Chapter 7

Dalawang linggo na ang nakakalipas simula nang lumipat ako rito sa bahay ni Lucas. Ganoon palagi ang set up namin. Gigisingin niya ako ng ala sais at bibigyan ng mainit-init na tubig. Pagkatapos ay yayayain niya akong mag-exercise na good for the pregnant people daw. If I know, sa TV niya lang naman natutuhan iyon.

Sa loob ng dalawang linggo na iyon, inaayos na rin namin ang mga papel at mga dapat ayusin para sa kasal namin. Sa katapusan din ng buwan na ito kami ikakasal. Mas maaga, mas maganda. Dahil mabilisan, kakaunti lang din ang bisita namin. Sa akin, sina Hannah, Solene at Teru lang pagkatapos sa kaniya ay si Lois at si Clark. Sa office naman ay mga lima lang ang inimbitahan namin, tanging mga ka-close namin.

“Morales! Bakit iba ang papel na hawak ni Ma'am? Mag-print ka ulit doon!” himig ang inis sa boses ng manager namin kay Anthony, isa sa mga bagong aplikante. Sabay-sabay kaming napailing-iling nina Cloe at Janeth na sinamahan pa niya ng pag-irap sa hangin.

“Velasco, baka nakakalimutan mong kaharap kita. Dukutin ko ’yang mata mo,” nanlalaki ang matang sabi ni Sir Barata kay Janeth na ngayon ay maamo ang mukhang nakatingin sa kaniya, wari ba ay hindi siya umirap-irap kanina.

“Sorry, sir. I don't quite understand what you're saying. Maybe you just have to shift your focus on the paper that has been given to you instead of me,” nakangiting sagot ni Janeth at nanatili ang hindi makabasag pinggan na mukha, para bang wala siyang sinabi na makakapagpalala ng init ng ulo ni Sir. Tulad ng inaasahan, nainis nga si sir. Pabagsak niyang nilapag ang proposal at halos matabig na ang kape ng katabi. Hindi naman kumikibo si Ma'am Debora.

Pagdating ni Anthony ay agad kaming nagsimula.

“Bilisan lang natin dahil may meeting pa kami ng Production at QC,” sabi ni Ma'am. Bumuntong hininga siya. “Dapat kasi inayos na nila ito noon pa para hindi na nagkaroon ng problema. Isa pa iyong marketing department, ang sakit nila sa ulo.”

Tumingin sa akin si Ma'am. “Maalala ko lang. Magkakaroon nga rin pala tayo ng collaboration sa kanila. Pupuntahan ka mamaya ni Mr. Chavez, makipag-coordinate ka na lang Ms. Mendoza. Isama mo na rin si Ms. Velasco para may kasama kang masungit at hindi kumuda ang ibang tiga-Marketing.”

Tumango ako bilang sagot at tumingin kay Janeth na dalawang segundong itinaas ang kilay niya sa akin, habit niya iyon tuwing indirectly siyang sasang-ayon sayo o okay lang sa kaniya. Nginitian ko siya pabalik.

Nagsimula na ngang magsalita si Sir Barata patungkol sa dami ng reklamo, positive feedbacks na dumarating, at ilang suggestions mula sa mga customer.

Dahil kaharap ko lang si Cloe, kitang-kita ko ang pagkamot niya sa ulo niya. Wala pa man ay naririnig ko na ang mga reklamo niya mamaya.

“Makiasikaso ang report patungkol sa dahilan ng pagbaba ng customer satisfaction score sa loob ng isang linggo. Maghanda na kayo ng inyong analysis. Suriin niyo na rin ang customer feedback forms at sa susunod na meeting, dapat may nakahanda na kayong insights and recommendations. Maski ang recommendations ng customers ay isaalang-alang,” sabi ni Ma'am Debora at tumayo na. Tumingin siya sa akin. “Iyong pinaasikaso ko sayo Ms. Mendoza. Maki-report na lang ng mangyayari kay Mr. Barata.” Pagkatapos no'n ay umalis na siya.

Inayos ni Sir Barata ang damit niya at hinilot ang sintido.

“Ms. Dela Cruz,” panimula ni Sir.

“Ako agad sir? Hindi po ba pwedeng si Anthony muna?”

Sinamaan siya ng tingin ni Sir. “Bago palang si Anthony. Kailangang may kasama siya sa paggawa dahil i-guide niyo pa siya. Hindi ka nag-iisip.”

Napahawak sa dibdib si Cloe. “Excuse me po, sir?”

“Ikaw na ang bahala sa report ng customer satisfaction score at analysis. Kailangang makita ko roon ang specific problem at possible solutions. Tutal gusto mo rin naman unahin ko bigyan ng gawain si Morales, isama mo na siya sa paggawa. Kayo na bahala mag-usap ng paghahati sa gagawin niyo.”

Sunod naman niyang tinignan si Lucas. “Ikaw na bahala sa pag-check ng feedback forms. Ihanda mo na lang ang insights at recommendations. Isama mo na iyong dalawa pang bago sayo.”

“Luh, sir? Bakit si Lucas dalawa agad ang kasama samantalang ako isa lang?” reklamo ni Cloe.

“Edi magpalit kayo ng gagawin ni Mr. Chavez.”

Pagkatapos ng meeting ay pumunta muna kami sa pantry ni Janeth at Cloe.

“Sa akin na naman agad napunta iyong analysis!” reklamo ni Cloe habang nagtitimpla ng kape.

“Ginusto mo ’yan, e. Sa susunod kasi huwag mong nilalagay sa CV mo iyong mga ayaw mo naman palang gawin,” sagot naman ni Janeth.

“Atsaka bakit sa inyo palagi napupunta iyong pakikipag-usap sa marketing department?” reklamo ulit ni Cloe.

“Kahit magpunta ka ro’n, hindi ka pa rin mapapansin ni Leonardo,” natatawang sabi ko sa kaniya. “Sisilay ka lang do’n, e,” dugtong ko pa. Sumimangit siya lalo na nakapagpahalakhak sa akin.

Ngumuso si Cloe. Kinunotan siya ng noo ni Janeth. “Cloe, tigilan mo. Hindi bagay sayo.”

Hindi pa rin tumigil sa pagnguso si Cloe habang ang mga mata ay naka-fix na sa likod ko.

Sinundan ko ang tingin niya at nakita si Lois na naglalakad papalapit sa amin.

“Hello! Okay lang ba kung bukas na lang tayo makapag-usap sa collab? Inaapura kasi kami ngayon,” bungad niya agad nang makalapit sa amin.

“Oo naman,” sagot ko. Nagpaalam na rin siya sa amin agad at umalis na. Mukhang busy nga sila ngayon. Baka inulan ng sermon.

“Ayon na ’yon? So casual naman. Parang hindi mo inaya magpakasal noong nakaraan, a,” nakangising sambit ni Cloe. Pinanlakihan ko siya ng mata. Lalo lang siyang ngumisi na nakapagpairap sa akin.

7:00 pm na nang makauwi ako sa bahay. Hindi kami sabay umuwi ni Lucas dahil mag-overtime daw siya. Pipigilan ko na nga sana dahil kawawa ang mga bagong employee sa kaniya pero mukha namang mga workaholic ang natapat sa kaniya. Nagluto na lang ako ng sinigang para hindi na ako lumabas pa.

Hindi pa ako nakakasubo ay sunod-sunod ang pag-doorbell ng kung sino.