CHAPTER 2: Kapit sa Patalim

Meleah’s Point Of View

“Meleah, gusto kong malaman mo na ayoko ng maarte, ah? Kapag sinabi ng mga kliyente kung ano ang gusto nilang gawin mo, ay gagawin mo. Tiyak naman na makukuha mo kaagad ang perang ibabayad sa iyo, at mas malaki pa kung may tip ka pang makukuha.” sambit iyon ni Madam Archie.

Tumango ako. “Opo, kakayanin ko po ang ganitong trabaho.”

Ito na lang talaga ang trabahong alam kong mabilis ang kitaan. Kilala at sikat ang Casa Divina kaya maraming nagpupunta. Iyong may mga pera, mayayaman, at mga tao sa gobyerno ang kadalasang suki ng lugar na ito. Paulit-ulit na binabalikan ang lugar na ito dahil maganda ang bawat rooms, at talagang nagbibigay aliw sa mga kalalakihan ang mga babae rito.

Hindi sana ako tatanggapin ni Madam Archie dahil may anak na ako, pero mukha naman daw akong dalaga pa at dahil na rin daw maputi ako. At isa pa nagkabulutong daw si Magdalena na siyang dapat na haharap sa mga VIP mamaya.

“Oh, bawal ka ng mag back out, ah? Galingan mo mamaya dahil tandaan mo mga VIP ang mga iyon. Oh, siya dalian mo at magbihis ka na.”

“Masusunod po.”

Iniwan na ako ni Madam Archie sa fitting room at kinuha ko ang isang kulay pulang lingerie set na ibinigay nito sa aki. Halos nanginginig pa ang aking kamay at napalunok na lamang ako sa aking susuotin. Para kasing kitang-kita na lahat sa akin, pero alam ko naman ang pinasok kong ito. Ito talaga ang mga sinusuot ng mga kababihan dito, at gagawin ko ito para sa nanay ko.

Nagulat ako nang makita si Trisha na nakasuot na rin bra at panty na kulay pula.

“A–Anong ginagawa mo rito, Trisha?” kunot noo kong tanong.

“Hindi kita puwedeng hayaang mag-isa rito, Bestie! Hindi mo kilala ang mga taong narito, at hindi ko kakayanin kung sakaling may mangyari sa iyo na hindi maganda.”

Hindi ko mapigilang hindi siya yakapin. Totoong natatakot ako sa maaaring mangyari at kung kakayanin ko ba, pero ngayon na alam ko na narito si Trisha na handa akong gabayan ay mas lalong lumakas ang loob ko. Para ito kay nanay at sa anak ko. Nalaman ko rin na iniwan niya si Alliya kay Tiya Nora. Ito ang tiyahin ni Trisha na may isang karinderya malapit sa apartment na aming inuupahan.

Nang matapos akong makapagbihis ay inayusan na rin ako ni Trisha. Halos light make up lang ang inilagay niya sa akin, dahil alam niyang may allergies ako sa cosmetics. Hindi ako mayaman o dughong bughaw ngunit maselan ang aking balat na siyang namana ko sa aking ina.

“Ready ka na ba talaga bestie? Wala ng atrasan 'to.” sambit ni Trisha habang kapwa kami nakatingin sa malaking salamin.

“Oo, bestie. Wala ng atrasan 'to. Gagawin ko ito para mailigtas ko ang buhay ni nanay. Gagawin ko lahat para sa kanila ni Alliya.”

“Then, let's go!”

Tumayo ako at lumabas kami ng fitting room. Naglakad kami patungong elavator at sumakay kami rito patungong 3rd floor. Aaminin kong ito ang unang beses na nagpunta ako sa ganitong lugar na ito at sobrang linis at ganda. Talagang hindi aakalaing simpleng club lamang ito.

Nang makarating kami ng third floor ay malakas na musika ang sumalubong sa amin at iba't ibang kulay ng ilaw. Maraming mga sumasayaw at nagkakasiyahan habang umiinom. Sinundan ko lamang si Trisha, at narating din namin ang counter.

“Dalawang devil shot nga, Jairus!” sigaw ni Trisha na kaagad naman narinig ng barista.

“Trisha?! Wow!” kaagad naman na inalagay sa harapan namin ang dalawang shot ng alak. “Welcome back!” dagdag pa nito.

“Hindi ito pagbabalik, sasamahan ko lang ang kaibigan ko.”

Napatingin naman sa akin ang lalaki.

“Oo nga pala, siya ang papalit kay Magdalena. Grabe, mas maganda siya kaysa kay Magdalena at isa pa— sexy!”

Bahagya akong napayuko dahil sa compliment na aking natanggap, pero nahihiya rin ako at the same time.

“She's off limits, Jairus. Kaya sarilinin mo na lang iyang kalibugan mo!”

Natawa naman ang barista at napailing. Iniabot naman sa akin ni Trisha ang isang shot glass na may lamang alak.

“Uminom ka muna kahit isang shot lang, pang dagdag tapang.”

Napalunok muna ako bago tanggapin ang baso na may lamang alak. Kailangan ko talaga ito, dahil kulang pa ang tapang na mayroon ako. Dali-dali ko itong ininom at isang lagukan lang. Grabe ang tapang, gaya ng pangalan nitong alak na devil, talagang demonyo ang hagod sa aking lalamunan.

“Isa pa!” sambit ko sa barista na siyang ikinatawa nito. Muli ko ulit tinungga ang alak at naramdaman kong muli ang pait at tapang na naghahalo at umiinit sa aking lalamunan. “Isa pa!” sigaw ko ulit.

Halos malaglag ang panga ni Trisha sa aking hiling, dahil hindi niya pa naiinom 'yung kaniya pero ako nakakatatlong shots na.

“Para kay nanay!” sigaw ko at pinag-untog ang basong hawak namin bago naman ininom 'yon.

Pagkatapos no'n ay hinila na ako ni Trisha patungo sa VIP room. Dalawa kaming request na sasayaw sa VIP room kasama ng ilang kasamahan namin na naka-table na sa ibang lalaki. Buong-buo na ang loob ko dahil siguro sa tama na rin ang alak sa aking sistema.

Pagbukas pa lamang ng pinto ay isang malawak na VIP room ang aking nakita. Mayroon ng dalwang sumasayaw, at may kalalakihan na halos nasa tantya ko ay labing dalawa ang mga ito. May kaniya-kaniya ng ka-table habang nagsisimula pa lang yata sa inuman.

Bumaba ang tingin ko sa lapag nang umalis ang dalawa sa harapan at naglakad naman si Trisha upang pumalit sa kanila. Nagkaroon ng makas na sigawan at ingay ng mga kalalakihan. Habang ako ay naiwan sa saradong pintuan. Para akong tinakasan ng tapang. Nang tingnan ko sila ay nakatitig sila sa akin na para bang nagtataka.

Naalala ko ang sitwasyon ni nanay, pati na ni Alliya at ang mga masasayang alaala namin. Hindi ko kayang makitang hanggang doon na lamang iyon. Nilunok ko ang sarili kong laway at kaagad na lumapit sa tabi ni Trisha, at dahan-dahan kong hinimas ang aking katawan habang sinasabayan ko ng pagkembot ang mabagal na melodiya ng musika.

Namayani muli ang makalas na sigawan at pagpito ng mga kalalakihan. Ngunit kaagad natigil iyon nang biglang may magsalita. Kaya pati kami ni Trisha ay napahinto rin sa aming ginagawa.

“Ano sa tingin mo ang ginagawa mo?!”

Punong-puno ng galit ang kaniyang boses. At nang tingnan ko ang lalaki ay nagulat ako nang makilala ko kung sino ito.

“W–Walden...” naibulong ko.

Nanlaki naman ang mga mata ni Trisha sa aking sinabing pangalan. Kilala niya kung sino si Walden sa buhay ko. At kung anong nakaraan ang mayroon kami. Nang tingnan ko ang mga katabi nitong lalaki ay mas lalo akong nanlumo at nanliliit sa aking sarili.

Kasama ngayon ni Walden ang mga kaibigan at pinsan niya. At lahat sila ay kilala kung sino ako.