Maid For You

PROLOGUE

Alas singko pa lang ng umaga, mulat na ang mga mata ni Estrella. Kumikilos na rin ang katawan niya upang maghanda ng umagahan na para sa nag iisa niyang amo sa mansion kung saan siya naninilbihan ngayon.

" Este, ipagtimpla mo na si sir ng black coffee. Iyon ang hinahanap niya agad kapag naupo na siya sa mesa, " sambit ng isa niyang kasamahan sa kusina habang inuunaban ang sinaing na nakatalaga sa kaniya. " Huwag mong lalagyan ng asukal ha? Gusto niya iyong puro lang. "

" O-okay sige, ako na ang bahala. " Mabilis naman siyang kumilos upang gawin ang sinabi sakaniya. Hindi niya maiwasang mag taka dahil ni minsan, hindi pa siya nakakakilala ng taong umiinom ng kapeng walang asukal. Iniisip niya pa lang ang lasa, napapangiwi na siya.

Isang buwan na ang nakalipas magmula noong lumuwas siya patungo dito sa siyudad pero hanggang ngayon namamahay pa rin siya. Hindi pa rin sanay si Estrella sa paligid niya dahil bilang probinsyana na bago sa siyudad, lahat sa paningin niya ay kamangha-mangha maski ang mga naglalakihang gusali at estraktura na hanggang ngayon ay nalulula pa rin siya. Ang mansion kung saan siya pumasok bilang kasambahay ay nananatiling bago sa kaniya dahil sa tuwing gigising siya sa umaga at lalabas ng kwarto, hindi pa rin niya maiwasang libutin ng paningin ang bawat sulok ng mansion at maligaw dahil sa dami ng pasilyong pinamimilian niya.

" Gising na ang amo natin. Ilagay niyo na agad 'yong mga putahe sa mesa. Bilisan niyo na, " ani Manang Susan, ang head at pinakamatagal ng kasambahay sa mansion. Siya ang gumagabay sa lahat at nagtatalaga ng mga gawain sa apat na kasambahay na naninilbihan sa Martinez. " Nasaan ang kape? Bakit wala pa sa mesa? "

" Ah sandali lang po, ito na po ang kape niya. " Nagmamadaling inihatid ni Estrella ang tasa na may mainit na kape sa mesa kung saan pumu-pwesto ang kanilang amo. Sa kaniyang pagmamadali ay kamuntikan na niya itong mabitawan dahilan kaya siya nabanlian sa kamay. D*****g lang siya nang tagumpay niyang mailagay ang tasa sa mesa.

" Okay ka lang ba hija? " tanong ni Manang Susan saka sinuri ang paso niya. " Ibabad mo agad sa tubig at makaraan ay pahiran mo ng petroleum jelly. Mayroon ako sa kwarto, sandali kukuhanin ko--"

" Naku, hindi na po kailangan. Mamaya na lang po, " aniya at kasabay noon ang pamilyar na tunog ng sapatos na nanggagaling mula sa kaniyang likuran.

" Magandang umaga, Sir Sebastian, " nakangiting bati ng mga kasambahay sa kanilang amo na naglalakad patungo sa mesa. Agad namang umayos nang tayo si Estrella para batiin rin ang taong dumaan na sa harapan niya.

" Magandang umaga rin sainyo, " bati nito pabalik at nang sandaling mag tama ang kanilang mga mata, si Estrella agad ang umiwas ng tingin.

Tahimik na naupo si Sebastian sa silya at sumimsim sa mainit na kape na hindi pwedeng mawala sa umaga niya.

" Sinong nag timpla nito? " simpleng tanong lang pero naging dahilan ito para makaramdam ng nerbyos si Estrella.

" A-ako sir ang nagtimpla. Pasensya na po kung hindi niyo nagustuhan ulit ang lasa, " paghingi niya agad ng paumanhin kahit na wala pa man sakaniyang sinasabi.

" Masarap ang kapeng ito kumpara sa mga ginawa mo noong nakaraang araw, " ani Sebastian kaya nawala sa pagkakatungo ang ulo ni Estrella. " Good job. Sana magtutuloy ang magandang performance mo dito. "

Gumuhit ang malaking ngiti sa labi ni Estrella dahil sa kauna-unahang pagkakataon, ngayon lang siya nakatanggap ng papuri mula sa taong ito.

" Maraming salamat sir--"

" Drop the formalities, " putol nito sakaniya saka itinuro ang isang silya na nasa kaniyang harapan. " Maupo ka na at sabayan mo na akong kumain, Estrella. "

" Sir? " hindi makapaniwalang wika nito matapos marinig ang sinabi ng amo. Lumingon siya sa mga kasambahay na nasa paligid lang kanina pero nawala na ito ng parang mga bula. Silang dalawa na lamang ang naiwan ni Sebastian sa hapag kainan kung kaya naman sumunod na lamang siya sa sinabi nito.

Maingat siyang naupo sa silya at naiilang na inangat ang tingin sa lalakeng nasa harapan niya. " Kain na tayo, sir--"

" Estrella, hindi mo ako kailangang tawaging sir dahil walang ibang tao sa mansion na 'to, " paalala nito sakaniya. " Baka nakakalimutan mo, mag-asawa na tayo ngayon? "

Sa narinig, tuluyang nagising ang sistema sa katawan ni Estrella. Pakiramdam niya sa mga nagdaang linggo, isang mahabang panaginip lang ang lahat ng nangyari sakaniya dahil sa iglap, nagbago ang lahat. Kasambahay ang kaniyang pinasukang trabaho ngunit ngayon, isa na siya ngayong Maybahay.

---