Kabanata 6

"Tumahimik ka!" Pinanlisikan ni Brittany ng mga mata si Kimmy pero hindi naman nagpaawat ang huli.

"At bakit ako tatahimik? Nagsasabi lang ako ng totoo!"

Nakakuha na ng atensyon sa mga naroon ang sagutan nina Kimmy at Brittany. Agad namang lumabas mula sa opisina nito ang manager nilang si Sir Marlou.

"Anong nangyayari dito?" Masungit nitong tanong. Bakas sa mukha ng lalaki ang disgusto sa mga nangyari.

Mabilis siyang humakbang sa unahan at itinago sa likuran niya si Kimmy para protektahan ito. Problema niya ang bagay na ito kaya dapat lang na siya ang humarap sa dalawa.

"Sir Marlou, ako po ang nakabenta ng sasakyan kani-kanina lang. Bakit bigla niyo pong ibibigay kay Brittany ang credit ng mga pinagpaguran ko?"

Nakapamewang na humarap sa kanya si Sir Marlou. "Graciella, si Brittany ang unang nilapitan ng mag-asawa kanina. Kumain lang sandali si Miss Lorenzo sinulot mo na agad ang kliyente niya. Kung may nandaraya man dito, ikaw yun at hindi si Brittany."

Puno ng kumpyansang humarap si Brittany sa kanilang dalawa habang nakatayo ito sa likuran ng manager nila. "Sir Marlou is right, Graciella. Pero kung hindi ka talaga kumbinsido, why don't you try checking the CCTV footage?" Maarte nitong sambit.

Habang nakatitig sa dalawa, alam na alam na niya kung ano ang nangyayari.

Nirekomenda siya ng dati niyang kliyente sa mag-asawa na bumili ng van sa kanya kanina. Nang malaman ng dalawa na wala siya, tinawagan siya ng mga nito at hinintay na makarating sa Dynamic bago ito pumili ng sasakyan.

Tapos ngayon aakuin lang ng walang hiyang Brittany na ito? At kinukunsinti naman ng magaling nilang manager!

Tumikhim si Sir Marlou para kunin ang atensyon nila. "I hope this matter will end here right now, Miss Santiago. Palalagpasin ko ang insidenteng ito ngayon dahil sa maganda mong performance noong nakaraan."

Pinukol ni Graciella ng isang malamig na titig ang kanilang manager bago siya muling nagsalita. "So, ibibigay niyo po talaga kay Brittany ang credits ng sasakyan na naibenta ko ngayon?" Paninigurado niya.

Bahagya namang kinabahan si Marlou nang makita ang ekspresyon sa mga mata ni Graciella. Nasanay siya sa kalmado at maamo nitong mukha. Hindi niya inaakala na may tinatago palang tapang ang dalaga. Subalit bago paman siya makapagsalita ay tinalikuran na siya ni Graciella at naglakad paalis.

Mabilis namang sumunod si Kimmy kay Graciella. Hindi nakaligtas sa kanyang pandinig ang nakakalokong tawa ni Brittany na mas lalong nakadagdag sa kanyang inis.

"Narinig mo ba yung tawa niya, Graciella? Parang di natin alam kung bakit kinakampihan siya ni Sir Marlou. Ang lakas ng loob niyang sabihin na kaya ka lang nakakabenta ay dahil sa itsura mo samantalang siya ay katawan ang ginagamit niya para maging paborito siya ng manager natin. Ang kapal talaga ng mukha!" Nanggagalaiting sambit ni Kimmy.

"Isa pa, kung hindi lang biglang dumating yang si Sir Marlou dito sa Dynamic, ikaw na dapat ang manager eh," dagdag pa nito.

"Shh, baka may makarinig sayo. Kahit na galit tayo kay Sir Marlou, hindi parin dapat tayo magbitaw ng mga maselang kataga laban sa kanya," awat ni Graciella sa dalaga.

Huminga ng malalim si Kimmy para pakalmahin ang sarili nito. "Okay. Hindi na pero sumusobra na talaga sila. Bakit di natin subukang magreport sa General Manager?"

Marahang umiling si Graciella. "Balita ko galing din sa taas si Sir Marlou kaya wala paring silbi kung magsusumbong tayo sa General Manager."

"So kakalimutan nalang natin ang nangyari ngayon?"

Kalimutan?

Lihim na napaismid si Graciella. Bagama't wala siyang sinasabi, hindi ibig sabihin ay wala siya gagawin. Magpapatalo ba siya!?

Wala siyang interes kay Sir Marlou at maging kay Brittany. Ayos lang naman sa kanya ang magaspang nitong pag-uugali pero ang pigilan siya ng mga ito na kumita ng malaki, ibang usapan na yun!

Kapag pinigilan ka ng isang tao na kumita ng pera ay para ka narin nitong pinapatay!

Nagpasalamat si Brittany at agad na sumandal sa balikat ni Sir Marlou. Ipinulupot naman ng huli ang braso nito sa malambot at maliit na bewang ni Brittany pero ang mga mata nito ay nanatili sa direksyon ni Graciella.

Marami ng dumaan na babae sa buhay niya at hindi na naiiba pa si Brittany sa mga ito pero iba parin talaga ang ganda ni Graciella. Wala itong katulad.

Narinig niyang galing sa probinsya si Graciella at hindi maalwan ang buhay ng mga magulang nito kaya hindi niya inaakala na kayang magpalaki ng mga magulang ng dalaga ng isang napakaganda at marangal na babae.

Kaya naman ginawa niya ang lahat para mahirapan si Graciella. Hinayaan niya si Brittany na nakawin ang mga pinaghirapan ng dalaga para lumapit ito sa kanya. Nang sa ganun, hindi na siya mahirapan pang paamuhin ito at mapasakamay niya ang kagandahan nito.

Pero ang hindi niya inaasahan ay ang makatanggap siya ng tawag dalawang araw ang lumipas matapos ang sagutan nina Graciella at Brittany.

It was a call from the immediate boss of Dynamic Corporation.

At pinagalitan siya kung paano niya dinadala ang mga tauhan niya!

Nang mapagod ito na pagalitan siya ay sinamantala niya ang pagkakataon para itanong dito kung saan nito nalaman ang bagay na iyon.

"Bakit? Natatakot ka na? Isa sa mga tauhan na under sayo ang nagpadala ng complaint letter kay Master Levine at ang big boss mismo ang nagsabi sakin!" Galit parin nitong asik. "Kung hindi ko pa pinakiusapan si Master Levine, malamang wala ka na sa posisyon mo ngayon!" Dagdag pa nito.

Napalunok siya.

Master Levine?

Ang bagong may-ari at namamahala ng Dynamic Group of Companies!

Pakiramdam niya tinakasan siya ng dugo sa mukha. Hindi niya aakalain na didiretso si Graciella sa CEO ng Dynamic.

Paano kaya nakilala ni Graciella si Master Levine? Ano kaya ang koneksyon ng dalawa? Hindi kaya...

Mabilis niyang ipinilig ang kanyang ulo. Kilala niya si Master Levine. Kapag nagalit ito at hindi nagustuhan ang trabaho niya, maari siya nitong tanggalin at hindi lang iyon, siguradong hindi na siya makakahanap pa ng matinong trabaho sa buong Pilipinas!

"Ayusin mo ang gusot na ito Marlou at mag-ingat ka na sa susunod," anito bago pinatay ang tawag.

Sa nanginginig niyang mga binti, agad niyang tinawagan si Brittany para ibalik kay Graciella ang lahat ng files na kinuha nito sa dalaga.

Naguguluhan si Brittany sa nangyayari. At dahil ayaw niyang isauli ang mga iyon kay Graciella ay nagmatigas  siya pero ang hindi niya inaasahan, sinigawan siya at pinagalitan ni Marlou dahilan para mapilitan siyang sundin ang gusto ng manager nila.

"Hmm, I think kulang pa ito ng dalawa," ani Graciella habang isa-isang sinusuri ang mga files na ibinigay ni Brittany sa kanya. "Bukas ibigay mo sakin ang kulang Brittany," dagdag pa niya habang may munting ngisi sa labi.

Halos maglabasan na ang litid sa leeg ni Brittany sa sinabi niya. "You bitch! Sino ka ba sa akala mo, ha? Asawa ng CEO ng kumpanya? Sinuswerte ka rin no? Wala na akong kulang at lalong wala na akong dapat na isauli sayo!"