Chapter 5: Nabuko si Sabrina.

Hindi inaasahan ni Sabrina na sa kanyang pagbaba ay haharangin siya ni Seth. Hula niya tinawagan ito ni Pia at nag-drama na naman ito sa kanya. Hinablot ni Seth ang dala niyang bag at patakbo itong umakyat sa taas para siguraduhing hindi niya inaway ang kababata nito. Naiwan siya sa gitna ng sala na nakahalukipkip. Walang ibang tao roon o kung mayroon man baka nakasilip lang mula sa kanilang mga silid. Bumalik naman agad si Seth, bitbit pa rin ang kanyang bag.

“Akin na ang bag para makaalis na ako,” pilit niyang kinukuha ang bag mula kay Seth. “Wala akong ginawa roon sa kababata mo.” Sabi pa niya.

Sa halip na ibigay ang kanyang bag, hinawakan siya nito sa braso at mataas ang boses na nagwika, “ilang beses ko ba sasabihin sa ‘yo na kababata ko si Pia. Kapatid ang turing ko sa kanya. Mahirap bang intindihin ‘yon? Mahirap bang tanggapin ‘yon?”

Iwinaksi ni Sabina ang kamay ni Seth na nakahawak sa kanyang braso.

“Alam mo Seth, hindi ako ang problema dito eh. Nang maging magkarelasyon tayo ipinangako kong wala akong bibigyan ng atensyon kung 'di ikaw lang at ginawa ko ‘yon. Hindi ako nagbibigay motibo or interes sa ibang lalaki dahil sa ‘yo. Pero ikaw. . .kayo ni Pia? May magkababata bang nagkakandungan at nagsusubuan ng cake? Hindi pa kayo nakontento, parang nasiyahan pa kayong kuhanan ng video ang ginawa niyo at i-send sa ‘kin. Hindi niyo man lang isinaalang-alang ang mararamdaman ko.” Puno ng sama ng loob at poot ang bawat katagang binitiwan ni Sabrina mismo sa harapan ni Seth.

Pero mukhang hindi man lang tinablan ang lalaki at dinepensahan pa rin ang kababata.

“Isa siyang inosenti, Sabrina. Kababata ko si Pia at malapit ang loob namin sa isa't isa. Magkapatid ang turingan namin, ikaw lang itong binibigyan kami ng malisya," ganting wika ni Seth.

Pagak na tumawa si Sabrina. “Inosenti? Magkapatid ang turingan?" Pag-uulit niya sa sinabi ni Seth. “Ganyan ba ako kabobo sa tingin mo, Seth?”

Akmang hahawakan ni Seth ang kanyang mga kamay pero inilayo ito ni Sabrina. Humakbang pa siya paatras para mapalayo sa binata.

“Mali ‘yang iniisip mo, Sab—”

“Oo, mali ako! Kailan ba naging tama sa ‘yo ang mga sinabi ko kapag may kinalaman iyang kababata mo? Kailan? ‘Di ba lagi naman akong mali?” Hindi na napigilan ni Sabrina ang bugso ng kanyang damdamin. Kasabay nang pagbuhos ng sama ng loob, umagos na rin ang mga luhang kanina lang ay pinipigilan niya. “Sa dalawang taon ng ating relasyon, nakita mo ba akong may kasamang ibang lalaki?”

Naisuklay ni Seth ang mga daliri sa sariling buhok at bumuga ng isang malalim na hininga. Nakangisi itong muling hinarap si Sabrina habang matiim na nakatitig dito.

“Talaga, Sabrina? Alam mo kung bakit kita minahal. . .dahil matured ka, strong, smart kaya hinahayaan kita pero sumosobra ka na. Hindi dahil hinahayaan kita sa mga pagseselos mo ay okay lang.” Ganting sumbat ni Seth sa kanya. “May hangganan din ang aking pang-unawa.”

Sa nga pinagsasabi ni Seth ay parang wala siyang tamang ginawa mula sa umpisa.

“Kaya nga tapusin na natin ang walang kwentang relasyon na ‘to. Sige, ako na ang mali. Masaya ka na? Bahala kayo niyang kababata mo kung ano ang gagawin niyo, wala na akong pakialam,” muling wika ni Sabrina.

Akala ni Sabrina ay tapos na si Seth sa kanya pero parang bombang sumabog sa kanyang harapan nang ipinakita ni Seth ang larawan na nasa mobile phone nito. Nasa group chat ito ni Seth kasama ang mga kaibigan sa apartment pati si Adrian. Malamlam ang liwanag na galing sa ilaw na nasa sulok ng silid pero kitang-kita ang magulong kama at ang mga balikat ng dalawang nilalang na kitang nagniniig. Malabo man ang sinah na galing sa ilaw pero maliwanag ang kuha ng pulang nunal na nasa balikat ng babae at alam ni Sabrina na siya ‘yon.

“Now, tell me na hindi ka pumatol sa ibang lalaki? Paano mo ipaliwanag ang nasa larawan? Ngayon mo sabihin sa akin na matino kang babae. Na kailanman ay hindi mo ako niloko o baka nga mula umpisa ay niloloko mo na ako,” panunuya ni Seth sa kanya.

Parang itinulos sa kinatatayuan si Sabrina, hindi niya magawang igalaw ang sarili para lumayo sa papalapit na si Seth.

Tuliro at walang maisip na salita si Sabrina dahil sa pagkabigla. Hindi niya inaasahang may kumuha ng larawan habang kasiping niya si Adrian at ang masaklap umabot ito kay Seth at sa iba pa niyang kaibigan.

Lihim na nahiling ni Sabrina na sana lamunin na lamang siya sa kanyang kinatatayuan. Bigla niya ring naisip na kaya siguro nabanggit ng mga kasamahan ni Adrian na maghanap ito ng libangan dahil alam na nila ang nangyari sa pagitan nilang dalawa.

Hindi man nakuhanan ang kanyang mukha sa larawan pero tiyak na alam ng mga ito na siya ang babae dahil sa nunal niya sa balikat. Lagi siyang may suot ng off-shoulder na damit kamakailan dahil sa mainit na panahon at siguradong nakita at natatandaan ng mga ito ang kanyang pulang nunal.

“Paano mo ngayon ipaliwanag ang larawan, Sabrina?”

Hindi mahanap ni Sabrina ang sariling boses. Tila nalunok niya ang kanyang dila sa labis na pagkabigla. Hindi niya inaasahang agad-agad ay may makakaalam ng nangyari sa pagitan nila ni Adrian.

“Ikaw ba ang babaeng kasama ni Adrian sa larawan? Kailan pa may namamagitan sa inyong dalawa?”

Sukat sa narinig, bumalik sa huwesyo si Sabrina at matapang na hinarap si Seth.

“Nakalimutan mo bang nakipaghiwalay na ako sa ‘yo, Seth? At ang larawan, oo ako ‘yan at sa oras na ‘yan ay hiwalay na tayo so ano pang pinanggagalaiti mo?” Singhal ni Sabrina rito.

“Sa text ka lang nakipaghiwalay at hindi ko tinanggap ‘yon. At sasabihin ko sa ‘yo, hindi ako papayag na maghiwalay tayo,” tugon ni Seth na halos maputol ang mga litid sa tindi ng pinipigilang galit.

Sarkastikong napangiti si Sabrina pagkatapos marinig ang sinabi ni Seth.

“Don’t tell me na gusto mo pa rin akong pakasalan kahit nakipag-sex ako kay Adrian na kaibigan mo.”