CHAPTER 4 : THE OUTRAGEOUS PROPOSAL

Halos lumabas ang mga mata ko sa gulat. Tumingin ako kay Nikolai na kasalukuyang nakatitig sa amin na parang nakakita ng multo. Ang mukha niya kanina na punong-puno ng galit ay biglang napalitan ng matinding kalituhan.

“No! I won’t go home unless Auntie Maya comes with us! I want her to be my new mommy!” patuloy ang pag-iyak at pagwawala ni Tala habang lalong isinusubsob ang mukha niya sa balikat ko. Basang-basa na ang damit ko sa luha niya, pero wala akong magawa dahil baka mahulog siya kapag binitawan ko.

Kani-kanina lang nais niya ako maging nanny niya tapos ngayon naman, gusto niya akong maging mommy?! Ganyan kabilis? Walang pagdadalawang isip baby girl?!

Tumingin si Nikolai sa labas ng convenience store. Dahil sa ingay, nagsisimula nang mag-usisa ang ilang tao sa labas, at baka may makakilala pa sa kaniya bilang isang sikat na racer.

“Fine,” labag sa loob na sabi ni Nikolai.

‘ Akala mo rin ba natutuwa ako?! Hindi Uy! ’

Tumingin siya sa akin nang matalim.

“Sumama ka sa amin sa kotse. Ngayon na.”

“Aba, at bakit ako sasama sa’yo? Sino ka ba sa akala mo?” asik ko sa kaniya habang inaayos ang pagkakahawak kay Tala. “Hindi mo ako pwedeng utusan, Nikolai Sandoval!”

“Gusto mo bang makasuhan ng kidnapping dahil ayaw mong bitawan ang anak ko?” banta niya, kahit alam naman naming dalawa na si Tala ang ayaw bumitaw sa akin. “Sumakay ka sa kotse kung ayaw mong ipakaladkad kita sa mga bodyguard ko sa harap ng maraming tao.”

Sa tindi ng inis ko, wala akong nagawa kundi magmartsa palabas ng convenience store habang karga-karga si Tala. Pinagbuksan kami ng pinto ng isang bodyguard sa likod ng mamahaling Mercedes-Benz SUV. Pagkaupo ko, pumasok din si Nikolai at tumabi sa akin.

Sobrang luwag ng sasakyan pero pakiramdam ko ay sumisikip ang espasyo dahil sa bigat ng presensya ng lalaking ito.

Sa buong biyahe, hindi bumitaw si Tala sa akin. Nakaupo siya sa kandungan ko habang dahan-dahang tumatahimik dahil sa pagod. Ang nakakainis pa, kinuha ni Tala ang kanang kamay ko at ang kaliwang kamay ng tatay niya, pagkatapos ay pinagdaop niya ito.

Nakuryente ang buo kong katawan nang magkadikit ang mga palad namin ni Nikolai. Agad ko sanang hihilahin ang kamay ko, pero bago ko pa magawa 'yun, dinala ni Tala ang pinag-isang mga kamay namin sa kaniyang pisngi habang natutulog.

Napilitan kaming manatili sa ganoong posisyon. Tumingin ako sa bintana para itago ang pamumula ng mukha dahil sa awkwardness.

‘ Shutek! Ano ba itong pinasok ko? Na-stress ang kagandahan ko ah! ’

Mabilis kong sinulyapan si Nikolai—nakatingin lang din siya sa labas, pero ramdam ko ang paninigas ng mga muscle sa braso niya.

Habang natutulog ang bata, nakita kong kinuha ni Nikolai ang kaniyang tablet. Pindot siya nang pindot, at paminsan-minsan ay sumusulyap sa akin.

Hindi ko alam na kasalukuyan niya palang sine-search ang buong background ko.

Gamit ang kaniyang koneksyon, mabilis niyang nakuha ang profile ko: Maya Trinidad, 28 years old, Summa Cum Laude graduate, at kasalukuyang iginagalang na College Instructor sa isa sa pinakasikat na unibersidad sa Pilipinas.

Walang bahid ng dumi ang pangalan ko. Hindi ako gold-digger. Akala mo ah! Kahit ganito lang ako pero latin honor to no! Nakalaban ko kaya si Einstein sa quiz bee!

Narinig ko ang malalim na buntong-hininga ni Nikolai habang ibinababa ang tablet. Maya-maya pa, nagsalita siya sa kaniyang driver.

“Leo, pull over.”

Huminto ang marangyang SUV sa gilid ng isang tahimik at madilim na kalsada. Lumingon sa akin si Nikolai. Ang kaniyang mukha ay seryoso, malamig, at tila may kinakalkulang malaking business deal.

“My brother cheated on you in front of the whole country. You are humiliated, and you probably want revenge,” panimula niya, diretso ang tingin sa aking mga mata. “On the other hand, my daughter just fired her tenth nanny this morning. She hates everyone, but she miraculously listens to you.”

Napakunot ang noo ko.

“Anong punto mo?”

Inayos niya ang kaniyang pagkakaupo at sumandal.

“You need a rebound to save your pride from Kenji. And I need a mother figure for Tala so she won’t run away again. Let’s solve both our problems, Professor Trinidad. Let’s get married.”