Kabanata 3

Nang magising si Tajana sa kwarto ay wala na siyang suot na mga damit. Napaupo agad siya at pilit inalala ang mga nangyari. Hindi niya matanggap ang mga alaalang bumabalik sa kanyang isipan. Pinayagan niya ang lalaking 'yon. Hinawakan siya nito, hinalikan at may nangyari sa kanila.

Litong-lito ang isip ni Tajana. Nang marinig niya ang tunog ng tubig mula sa banyo sa loob ng kwarto ay nagmadali na siyang magbihis. Alam niyang nasa loob pa ang lalaking 'yon.  Gusto niyang kalimutan ang mga nangyari. Gusto niyang takasan na lang ito. Lasing lang siya. Wala siya sa sarili niya ng mangyari ang lahat ng 'yon.

Kahit na masakit ang ulo niya dahil sa alak at pagod pa rin ang katawan ay pinilit niya pa rin na magmaneho. Ayaw niyang makita ang lalaking 'yon.

Nang makadating siya sa kanilang tahanan ay tila hinihingal pa siya. Wala namang nakakita sa kanya sa kakaibang kasuotan niya dahil nagpalit muna siya sa kanyang kotse.

"Tajana?" narinig niyang tawag sa kanya ng kaibigan na si Nicolas.

Nagising ang dalaga sa malalim niyang iniisip ng tawagin siya nito. Tumingin siya dito. Napagtanto niyang may ipinapaliwanag ito tungkol sa plantasyon nila ng kape.

"Ah. Sorry. Pwedeng ipaliwanag mo ulit itong sumunod na sinasabi mo?" sabay turo ni Tajana sa pangalawang pahina sa mga papel na hawak niya.

"Masama ba ang pakiramdam mo?" nag-aalalang tanong ni Nicolas.

"Hindi. May inisip lang ako sa mga nabasa ko tungkol sa plantasyon. Medyo nawala ang focus ko sa sinasabi mo."

"Mukhang matagal mawawala sila Don Ismael. 'Wag mong pagurin ang sarili mo."

"Ayos lang ako, Nico. At gusto kong makatulong kay lolo. Hindi ako pagod." sabay ngiti ni Tajana.

Kinalimutan ng dalaga ang mga nangyari sa kanila ni Terrence. Alam niyang kakaiba ang isip ng mga taga-syudad kumpara sa probinsya. Isang gabi lang ang nangyari na 'yon. Isang gabi ng pagkakamali niya at kasiyahan lang iyon sa isang lalaki.

Inabala niya ang sarili sa pagbisita sa kanilang plantasyon.

"Hija!" masayang tawag ng isang boses.

Nakita niya si Simon na naglalakad na ngayon patungo sa kanya. Malapit dito ang pastulan ng mga alagang hayop ng Vallejos.

"Kumusta po Ginoong Simon?" bati ng dalaga ng makalapit ito.

"Ayos naman ako. Ikaw hija?"

"Maayos rin naman po." nakangiting sagot nito.

"Nasaan si Don Ismael?"

"Lumilibot po siya ngayon sa ilang plantasyon at lupain sa ibang lugar."

"Talagang masipag pa rin ang iyong lolo sa negosyo." humahalakhak nitong sabi.

"May inihanda pa lang salu-salo si Ginoong Ismael para sa'min. Kaya isasama ko ang aking mga anak."

Nagulat ang dalaga sa sinabi nito. Walang nabanggit sa kanya ang kanyang lolo. Pagdating sa mga desisyon nito ay siya ang unang sinasabihan. Ngayon lang ito nangyari.

"Tumawag po si lolo sa inyo?"

"Hindi. Ang tiyahin mo ang tumawag."

Ngayon pa lang ay nalinawan na si Tajana sa kung anong gustong mangyari ng kanyang tiyahin. Kinukuha niya ang tiwala ng mga Vallejos para makuha ang atensyon ng kanyang lolo. Alam naman niyang siya ang madalas pinapaboran nito kaya alam niya din ang pagkainis sa kanya ng tiyahin.

"Gusto ko ngang ipakilala sayo ang anak ko. Sigurado akong bagay kayo." masayang sabi ni Simon.

Ngiti lang ang naisagot ng dalaga. Hindi niya pa nararanasan ang magmahal ng totoo sa isang relasyon. Hindi niya rin alam kung kailan siya magiging handa para rito.

Inilibot ni Tajana si Simon sa kanilang plantasyon. Tila nalilibang naman ito. Ang negosyo ng Campoverde ay nakatuon lamang sa mga tanim samantalang ang Vallejos ay nag-aalaga din ng mga hayop. Kung nanatili lamang ang Vallejos sa probinsyang ito ay siguradong sila ay mas kinikilalang pinakamayaman sa lugar. Ngunit dahil ang Campoverde ang may pinakamalaking plantasyon dito ay sila ang tanyag na apelyido na pinakamayaman. Ang ilang taniman ng Vallejos ay wala sa probinsyang ito dahil sa mahilig maglibot si Simon sa iba't ibang lugar para bumili ng mga lupa at sakahan.

Nakarating ng mas maaga sa inaasahan ni Tajana sila Don Ismael. Napagtanto na niyang dahil iyon sa paghahanda para sa mga Vallejos.

"Maayos ba ang mga tanim natin?" tanong ng matanda kay Tajana habang nasa hapag-kainan na sila ngayon.

"Maganda po ang tubo ng mga tanim at magagaling ang mga trabahador sa pag-aalalaga. Bumisita po ako kahapon sa plantasyon ng kape."

"Magaling. Magandang balita 'yan. Sana ay mas madalas na malago rin ang tanim."

"Bibisita po ba ang mga Vallejos nitong linggo?"

Nagtatakang tumigil sa paghigop ng sabaw ang matanda at bumaling ang tingin kay Tajana.

"Ang mga Vallejos?"

"Nakita ko po si Ginoong Simon at nabanggit lang niya ang pagbisita."

"Papa, nagkausap kami ni Simon." masayang singit naman ng tiyahin sa usapan.

Napatingin si Jaime dito maging ang matanda habang si Catalina naman ay nawawalan na ng ganang kumain. Inabala lang ni Tajana ang sarili sa paggalaw ng pagkain niya kahit na nakikinig pa rin siya sa usapan.

"Hindi mo ito sinabi sa'kin agad, Eloisa. Paano kayo nagkausap ni Simon?" nagtatakang tanong ng matanda. Alam niya na may pagkatuso ang manugang niya.

Kinabahan bigla si Eloisa pero mas nangibabaw ang pagiging kalmado niya dahil konting mali lang niya ay alam niyang magagalit ang matanda. Hindi gusto nito na pinangungunahan siya.

"Siya pala ang bisita natin na sinasabi mo?"

Tahimik ang lahat habang nakikinig sa usapan.

"Nagkausap po kami ni Simon ng dalawin niya nga kayo. Nagkapalitan po kami ng numero. Gusto sana naming sorpresahin kayo ngayong linggo sa pagbisita nila. Alam din kasi niya na gusto niyo pong makilala ang kanyang mga anak." pagsisinungalin nito. Pinangunahan niya talaga ang matanda at siya lang ang nagplano sa pagbisita.

Si Tajana lang ang hindi naniwala sa mga sinasabi ng kanyang tiyahin.

"Ganoon ba?" Tumawa ang matanda dahil sa saya at nakalimutan ang kakaibang ugali ni Eloisa. Bumaling ang tingin niya sa kanyang mga apo.

"Tajana at Catalina. Ayusin ninyo ang inyong sarili sa pagbisita nila dito. Siguraduhin ninyong mabibighani sa inyo ang mga anak ni Simon. Sigurado ako na magaling sa negosyo at mababait ang kanyang mga anak. Isang karangalan iyon para sa pamilya natin kung ang mapapakasalan niyo ay isang Vallejos."

Nakangisi lang si Eloisa na parang planado niya na ang lahat ng susunod na mangyayari.

Nang maabutan ni Eloisa sa hardin si Tajana na nag-iisa at humihigop ng tsaa ay hindi ito nagdalawang-isip na lumapit.

Nawalan na agad ng gana si Tajana ng mahagip sa kanyang paningin ang tiyahin.

"Mukhang hindi ka yata makatulog."

"Nagpapaantok na po ako, tiya. Gusto ko lang uminom muna ng tsaa. Gusto niyo rin po ba?" alok ng dalaga.

"Hindi na kailangan. May gusto lang akong hingin na pabor sayo."

Huminto ang dalaga sa pag-inom ng tsaa at tumingin sa tiyahin niyang ngayon ay nakaupo na sa upuan na kaharap niya.

"Ano po 'yon?"

"Sa pagdating ng Vallejos dito. Kasama niya ang dalawang anak niya. Nalaman kong hiwalay si Simon sa una niyang asawa."

Nanatili ang mata ni Tajana sa kanyang tiyahin kahit na huminto ito saglit sa pagsasalita.

"Wala akong pakialam kung gustuhin mo ang panganay niyang anak. Pero ang bunso ay para kay Catalina. Kaya gusto kong hayaan mo ang lalaking 'yon sa kanya kahit na anong mangyari."

Tipid na ngumiti si Tajana.

"Tiya, hindi ko pa po kilala ang mga Vallejos. At wala pa sa isip ko ang magpakasal."

"Alam kong pipiliin ni papa para sayo ang bunsong iyon. Kaya gusto ko na tulungan mo ang pinsan mo. Mahal mo naman si Catalina bilang kapatid 'di ba?"

Totoo naman ang sinabi ng tiyahin niya. Ang lalaking nasa maayos ang pamilya ang pipiliin ng kanyang lolo para sa kanya. At totoo rin na mahalaga sa kanya ang pinsan niya.

"Masyado po kayong seryoso tiya."

"'Wag mo akong daanin sa paligoy-ligoy na usapan, Tajana. Kung gusto mo ay ibibigay ko sayo ang address ni Alicia bilang kapalit."

Naging seryoso ang tingin ni Tajana na para bang nalaman ng kanyang tiyahin kung paano siya mapapasunod. Ayaw ng kanyang lolo na hanapin niya ang kanyang ina. Pero nag-aalala siya rito. Mahal niya ang ina niya, hindi niya ito gustong mapabayaan.

"Ano Tajana? Sabihin mo sa'kin ang desisyon mo ngayon."

"Wala rin naman pong mawawala sa'kin. Hindi ko gusto ang magpakasal. Wala din po akong pakialam sa mga Vallejos."

"Magaling kung gano'n. Ngayon ay nagkakaintindihan na tayo."

"Kailan niyo po ibibigay sa'kin ang... address?"

May tuwa at lungkot sa pakiramdam ni Tajana ngayon. Gusto niyang makita ang kanyang ina. Pero ang kanyang lolo ay ilang beses na siyang nahuli sa pagpapahanap sa kanyang ina. Pinagbawalan siya nito at sinabing itatakwil siya kapag nakipagkita pa siya kay Alicia o kahit kay Flavio.

Umangat ang labi ni Eloisa na para bang wagi na siya ngayon.

"Ibibigay ko sayo ang address na 'yon kapag naikasal na si Catalina sa anak ni Simon."

"Paano po ako makakasigurado?"

Tumawa ang tiyahin niya.

"Tuso ako, pero pagdating sa ganitong pag-uusap. Kung ibinigay ng tao ang gusto ko ay ibibigay ko rin ang gusto niya."

Ngumiti si Eloisa.

"Kaya kung gusto mong mapadali ito. Pwede mo rin tulungan si Catalina para magkagusto agad sa kanya ang anak ni Simon."