Chapter 2: His Ex

Seren Evangeline Del Valle

Isang linggo na rin mula nang bumalik ako sa Pilipinas kasama ang anak ko, pero hanggang ngayon ay wala pa rin akong mahanap na matinong trabaho kaya naman napaisip ako kung tama bang desisyon ang ginawa ko.

Mula sa kusina ay muli naman akong pumunta sa sala matapos kong marinig ang pagtunog ng cellphone ko na nakapatong sa maliit na lamesa roon.

Nang makitang si Daddy ang tumatawag ay agad ko naman itong sinagot dahil alam kong gabi na rin naman sa America at konting oras lang ang mayroon kami ngayon dahil kailangan na rin naman niyang magpahinga.

“Hello, Dad,” nakangiting wika ko kay Daddy pagkakita pa lang sa kanya sa screen ng cellphone ko.

“Anak, how are you? Ang apo ko, kamusta?” masayang wika rin nito habang nakaupo sa kanyang kama. Nakapantulog na rin ito at tila ba talagang tumawag lang sa akin para lang kamustahin kaming mag-ina.

“Maayos naman po, Dad. Si Cyrus po, tulog pa eh, medyo nag-a-adjust pa rin kasi sa oras dito sa Pinas,” sagot ko naman dito habang naglalakad papunta sa silid kung nasaan naroon ang aking anak na mahimbing na natutulog. I also change the camera into back cam para makita rin ni Daddy ang kanyang apo na alam kong nami-miss na rin niya.

Agad namang gumuhit ang pangungulila sa mga mata ni Daddy habang minamasdan ang kanyang apo.

“Let him rest and adjust in Philippine time and weather,” paalala pa ni Daddy sa akin para sa kanyang apo. Muli naman akong lumabas ng silid dahil ayaw ko rin naman maabala ang pagtulog ng aking anak kaya naman sa maliit na sala ko na lang pinilit ipagpatuloy ang tawag namin ni Daddy.

“That’s what I’m doing, Dad. Actually, sa oras na lang talaga siya naninibago, but when it comes to weather, he said he likes it here more. Mas nakakapaglaro kasi siya sa labas lalo na pag hindi masyadong mainit,” masayang kuwento ko naman sa kanya.

“Mabuti naman kung ganoon. Siya nga pala, napansin ko na medyo maliit ang tinutuluyan mo ah. Bakit hindi ka kumuha ng mas malaking apartment para mas komportable kayong mag-ina?” puna pa ni Daddy. Marahil, napansin niya ito habang naglalakad ako kanina.

Suminghap naman ako bago mas iniharap ang aking sarili sa harap ng kamera. “Dad, hindi naman po maliit itong nakuha ko na condo. Mas malaki pa nga ito kumpara sa tinitirhan natin diyan sa US. Saka ito lang kasi ang pinaka-accessible sa lahat ng tiningnan ko eh. Malapit po ito sa hospital, sa grocery store at maging sa school pag pumasok na si Cyrus,” paliwanag ko naman.

Totoo naman lahat ng aking sinabi kay Daddy, dahil sa lahat ng tiningnan kong lugar noong dumating ako ay ito ang pinaka-accessible sa lahat, bukod doon ay ito rin ang pinakamura na hindi ko na lang sinabi sa kanya.

Ilang sandali pa kaming nag-usap ni Daddy hanggang sa magpaalam na ito na magpapahinga na. Muli rin naman akong bumalik sa kusina para ipagpatuloy ang aking ginagawang paglilinis at nang mapansin kong puno na ang aming basurahan ay agad ko itong dinampot para itapon sa labas.

Bago ako tuluyang lumabas ng aming tinutuluyan ay muli ko rin naman sinilip ang aking anak at nang makita na mahimbing pa rin ang kanyang pagkakatulog ay saka naman ako tuluyang lumabas.

Hindi ko naman na kailangan pang bumaba para lang itapon ang aming mga basura. Sa mismong floor kasi kung nasaan ang aming unit ay mayroon na rin doon na waste disposal room kung saan puwede naming itapon ang lahat ng aming basura.

Saktong paglabas ko naman sa nasabing lugar ay siya rin namang paglabas ng isang pamilyar na lalaki mula sa isang silid na naroon.

Tila naman naipako ako sa aking kinalalagyan at hindi man lang nagawang kumilos dahil sa labis kong pagkagulat.

Dahil ang waste room ay malapit sa elevator kaya naman nang pumihit ang lalaki para magtungo sa elevator ay doon niya ako tuluyang nakita.

Ilang segundo pa niya akong pinakatitigan hanggang sa sa kanyang mukha ay gumuhit na rin ang pagkagulat nang mapagtanto kung sino ako.

“Ate Seren?” hindi pa rin makapaniwalang tanong ni Austine, ang bunsong kapatid ng ex ko.

“Yeah…” nag-aalangan ko namang tugon sa kanya. “How are you?” dugtong ko pa habang pilit na itinatago ang kaba sa aking sistema.

“I’m good… yeah… I’m actually great, lalo na at nakita kita uli…” bakas naman ang tuwa sa kanyang mga mata kasunod ng kanyang pagyakap sa akin.

"Kelan ka pa bumalik, Ate?" muling usisa niya matapos ang aming pagyayakapan.

"Noong isang linggo lang…" tanging sabi ko naman sa kanya. "Dito ka ba nakatira?" nagtatakang tanong ko pa rito.

Hindi naman kasi high-end condominium unit itong inuupahan ko kaya naman labis ang aking pagtataka na makita ang isang Serravelle sa lugar na ito, alam mo naman kung gaano sila kayaman.

Natawa naman ito kasabay ng kanyang pag-iling. "Hindi, Ate, alam mo na, napasobra ang inom ko kagabi kaya dito ako natulog…" ani pa niya habang may pilyong ngiti sa kanyang mga labi.

Napailing na lang ako sa isiping isang babae na naman ang pinaiyak nito kagabi at ngayon ay kanya na namang tataguan. Ano pa nga ba ang aasahan ko eh mula pa naman noon ay siya na ang pinaka-happy-go-lucky sa magkakapatid na Serravelle. Palibhasa ay bunso kaya naman tila walang kahit anong problemang iniisip.

"Ikaw, Ate, dito ka na po ba ngayon nakatira?" kunot-noong sabi naman niya.

Mabuti na lang rin at bigla itong may natanggap na tawag kaya naman hindi ako naobligang sagutin ang kanyang tanong.

Ilang minuto rin siyang nakipag-usap sa kanyang cellphone at nang maputol ang tawag ay saka naman siya muling humarap sa akin.

"I’m sorry, Ate. I really want to catch up with you pero kailangan ko na kasing umalis…" malungkot na sabi pa nito na siya namang tinanguan ko na lang.

"It’s okay… may next time pa naman," tanging sabi ko na lang bago ito pinanood na pumasok sa loob ng elevator bago ako muling bumalik sa loob ng aking unit.

Nang makapasok ako ay doon naman ako tila nabunutan ng tinik sa aking dibdib at nakahinga na rin nang maluwag habang minamasdan ang pinto ng aking silid kung nasaan ang aking anak.

Napakaliit talaga ng mundo… baka sa susunod, ibang Serravelle na ang makasalubong ko… huwag naman sanang dumating ang pagkakataon na siya mismo ang makita ko… lalo na ngayon na kasama ko ang pinakamalaking sikreto sa buhay ko.