SV: Kabanata 4

Nang mag-angat ng tingin si Elowen, saktong nagtama ang mga mata nila ni River.

Sa kabilang dulo ng dimly lit na VIP room, nakaupo ito na parang isang hari. Walang kahit anong emosyon sa pamilyar at gwapong mukha nito, maliban sa isang nakakapasong panunuya sa mga mata. 

"Inumin mo 'yang alak," malamig na utos ni River. "At humingi ka ng tawad kay Mr. Del Hamor."

"Oh ho! Narinig niyo 'yon?" pang-aasar ng rich kid na si Ramjay habang pumalakpak pa na parang nanonood ng isang nakakaaliw na palabas. "Ang tigas talaga ni River!"

Natigilan si Elowen, dahan-dahan siyang napalingon kay Mr. Del Hamor na kanina pa tahimik na nakaupo sa gitna at naninigarilyo.

Ngumisi ang matanda, ipinapakita ang kunwaring pagiging maginoo. "Naku, Mr. Samaniego, ano ba 'yang sinasabi mo? Empleyado mo 'yan sa Samaniego Corporation ‘di ba, hindi na kailangan pang mag-sorry sa akin. Saka... bakit mo naman pinapahirapan ang isang napakagandang binibini?"

Halata sa reaksyon ng lahat na mataas ang respeto at takot nila kay River. Kung anong sabihin nito, siyang batas.

Kahit nanginginig ang mga tuhod, nakita ni Elowen ang pagkakataon. Nilunok niya ang pride niya, ngumiti ng matamis kay Mr. Del Hamor at mabilis na iniabot ang kanyang business card.

"Mr. Del Hamor, pasensya na po sa abala," malambing na simula ni Elowen, lumapit nang bahagya para makipag-usap. "Actually po, nandito ako para sa South project. Nakita ko po ang potential ng lupa ninyo at kung paano natin mado-double ang value nito kung—"

Hindi pa siya nakakahinga ng maluwag nang biglang sumingit na naman ang boses ni Ramjay.

"Teka nga, Mr. Samaniego! Itong si Elowen, empleyado mo kamo? Kanina pa 'to aali-aligid at nag-aalok ng business sa kumpanya mo ah. Siguro ang taas ng posisyon nito sa inyo, 'no? Ano ba 'to, VP? O Director?" Puno ng malisya ang mga mata ni Ramjay habang pinapasadahan ng tingin ang buong katawan ni Elowen.

Dahil sa biglaang kaba at pamamahiya, nagkamali ng galaw si Elowen. Nasagi ng siko niya ang wine glass na nasa lamesa kung kaya’t bumuhos ang pulang alak at saktong tumapon ito sa mamahaling pantalon ni River.

"S-Sorry! Hala, sorry, hindi ko sinasadya!" natataranta at namumutlang sabi ni Elowen. Agad siyang kumuha ng table napkin at lumuhod ng bahagya para punasan ang hita ni River.

Pero bago pa man dumampi ang kamay niya, isang malamig at mahigpit na hawak ang pumulupot sa kanyang pulso.

Nag-angat ng tingin si Elowen. Nanlilisik ang mga mata ni River habang nakatitig sa kanya. Ramdam niya ang galit na nagmumula rito. Napalunok siya ng mariin at nag-iwas ng tingin dahil hindi niya kayang tagalan ang lamig sa mga mata ng sarili niyang asawa.

Biglang hinigpitan ni River ang hawak sa pulso niya hanggang sa mapadaing siya sa sakit, bago siya marahas na itinulak palayo.

"Tama ka," malamig na sagot ni River kay Ramjay habang pinapagpag ang pantalon nito. "Empleyado siya ng Samaniego Corporation. Dati siyang Development Director pero na-demote na siya kamakailan. Isa na lang siyang hamak na secretary ko."

"Secretary?" Tumaas ang kilay ni Ramjay at ngumisi ng abot tainga. "Anong klaseng secretary? Yung... ganung klaseng secretary ba?! Baka naman pwedeng mahiram namin siya paminsan-minsan?!"

Lahat ng lalaki sa kwarto ay nagtawanan at bumaling kay River, habang naghihintay ng basbas nito.

Tinitigan ni River si Elowen. Pigil-hiningang naghihintay si Elowen sa sasabihin ni River. 

“Please, tama na. Wag mo na akong pahiyain,” pagmamakaawa ng isip niya. Alam niyang wala siyang halaga dito pero asawa pa rin siya nito sa papel!

Ngunit ang susunod na lumabas sa bibig ni River ang tuluyang bumasag sa kanya.

"Of course," malamig at walang pakialam na sagot ni River. "Secretary lang naman siya. Pwedeng-pwede ninyong gamitin kahit anong oras iyan."

Pagkarinig nito, mabilis na tumayo si Mr. Del Hamor. Nawala ang pagiging maginoo nito kanina. Kuminang ang mga mata nitong puno ng pagnanasa habang mahigpit na hinawakan ang braso ni Elowen.

"Miss David? Halika nga rito sa tabi ko," malagkit na bulong ng matanda. "Ako ang bida ngayong gabi. Wag kang aalis sa tabi ko, ha? Pagsisihan mo habambuhay kapag tinanggihan mo ako..."

Hindi ganito kasakit kung ibang tao ang nagsabi. Pero galing iyon kay River. Sa lalaking lihim niyang minahal ng walong taon. Sa asawa niyang nangakong iingatan siya sa harap ng altar, pero syempre parte lang naman yun ng script nila noon pero kahit na. Nagsumpaan naman sila sa harap ng sagradong altar. 

Ganoon na lang ba siya kadumi sa paningin ng lalaking ito? Na ipamimigay na lang sa mga hayop na 'to para lang masaktan siya?

Naramdaman ni Elowen ang pamumuo ng mainit na luha sa mga mata niya. Basang-basa na ang mga pilik-mata niya. Pilit siyang nagpupumiglas sa pagkakahawak ni Mr. Del Hamor.

Tumingin siya kay River, literal na nagmamakaawa ang mga mata’t humihingi ng tulong. Pero umiwas ng tingin si River at kalmadong pinaikot ang alak sa baso. Parang walang nakikita at walang asawang binabastos sa harap nito. 

"Oops! Ay palaka!"

Isang baso ng malamig na tubig ang biglang tumapon sa mismong dibdib ni Elowen.

"Hala, my gosh! Elowen, I'm so sorry! Napatid ako!" malakas na sigaw ni Paloma at mabilis na hinila si Elowen mula sa pagkakahawak ni Mr. Del Hamor. "Ang tanga ko talaga! Tara sa restroom, papalitan natin 'yan, basang-basa ka na!"