الفصل الخامس: مواجهة الملكة

قصر "الملكة". الصالة الرئيسية.

الجو ثقيل. ريحة العود تخنك.

ام زين كاعدة على الكرسي الكبير كأنها على عرش.

يمينها عم زين. يسارها 3 خالات. وكدامهم سارة مبتسمة بشماتة.

ليلى واكفة. ضهرها مستقيم. وايدها بأيد زين.

"كعدوا" أمرت ام زين.

كعدوا. بس ليلى بقت واكفة.

"اني ما اجي حتى اكعد" كالت بهدوء. "اجيت اسمع شنو عندكم"

الكل انصدم. محد يحجي ويه ام زين هيج.

"بجحة" همست وحدة من الخالات.

ام زين رفعت ايدها. سكت الكل.

"زين ابني" بدت. "انت خيبت ظني. اخترت وحدة من الشارع حتى تفضحنا"

"ليلى مو من الشارع" رد زين. "وليلى زوجتي"

"زوجة عقد" سارة تدخلت. "الكل يعرف. سنة وتتطلق"

ليلى باوعت لسارة. "وانتِ شنو؟ خطيبة سابقة؟ اللي باعوها بفلوس؟"

سارة كامت معصبة. "اخرسي!"

"بس" صرخت ام زين. "كافي"

ساد صمت دقيقة كاملة.

"اسمعي" ام زين باوعت ليلى. "انا ما اكرهك شخصيا. بس انتِ خطر على اسم العائلة"

طلعت ملف ورمته على الطاولة. "هنا تقرير كامل عن اهلك. ديون. مشاكل. سمعة"

ليلى انهار قلبها. بس ما بينت.

"و؟"

"واذا بقيتي، راح ندمرك. انتِ واهلك" ابتسمت. "اختاري. مليون دولار وتختفين. لو حرب تخسرين بيها كل شي"

زين كام. "امي..."

"اسكت" قاطعته امه. "خلي هي تختار"

كل العيون على ليلى.

ليلى تنفست. وتذكرت كلام زين بالطيارة: "خليكِ قوية"

"اختاري" عادت ام زين.

ليلى رفعت راسها. "اختياري هو... لا"

"شنو؟"

"كلت لا" قربت خطوة. "ما ابيع كرامتي بمليون. ولا ابيع الرجل اللي واكف يمي"

باوعت زين. "حتى لو خسرت كل شي... ما اخسر نفسي"

القاعة انفجرت.

"وقحة!"

"اطردوها!"

بس زين كام ووقف يم ليلى.

"سمعتوا الجواب" كال. "وهذا جوابي هم. اللي يريد يحاربها... يحاربني"

سحب ليلى وطلع. محد كدر يوقفه.

---

بالسيارة. ليلى ترجف.

"ليش سويتي هيج؟" سأل زين. "كان ممكن تاخذين الفلوس وتعيشين"

ليلى باوعت من الشباك. "لان الفلوس تخلص. بس الاحترام اذا راح ما يرجع"

سكتت ثانية. "وبعدين... ما اريدك تواجه وحدك"

زين ما رد. بس مد ايده ومسك ايدها.

وصلوا لشقة زين الخاصة. مو الشركة ولا القصر.

"من اليوم" كال وهو يفتح الباب. "راح تسكنين هنا. امان الكِ"

الشقة فخمة بس باردة. مثل صاحبها.

"غرفتك هناك" اشر. "واي شي تحتاجينه كولي للخادمة"

"زين" ليلى وقفت بنص الصالة. "ممكن سؤال؟"

"هم"

"ليش دا تساعدني لهالدرجة؟ هذا اكبر من عقد"

زين لف. ظهره الها.

"لان..." سكت. "لان تعبت من الناس اللي تريدني لفلوسي"

التفت. "وانتِ الوحيدة اللي تريدني انا"

قبل لا ترد ليلى، موبايلها رن.

رقم غريب.

"الو؟"

صوت رجال. "الانسة ليلى؟ ابوكِ بالمستشفى. جلطة. تعالي بسرعة"

الدنيا دارت بيها.

---

المستشفى. ريحة معقم.

ابو ليلى نايم على السرير. وجهه اصفر.

امها تبكي يمه.

"ليلى بنتي" بكت الام. "الدكتور يكول لازم عملية. 20 الف دولار"

"ما عندنا" كال ابوها بضعف. "بيعوا البيت"

ليلى طلعت للكوريدور وانهارت.

20 الف؟ منين تجيبها؟

فجأة حسّت بيد على كتفها.

زين.

"سمعت كلشي" كال. "العملية على حسابي"

"لا" مسحت دموعها. "ما اريد صدقة"

"مو صدقة" قرب. "هذا... واجب زوج"

"بس احنا..."

"اسكتي" قطعها. "اذا ما قبلتي الفلوس مني، منو راح يقبلها؟"

ليلى باوعت بعيونه. لاول مرة شافت بيها صدق مو برود.

"موافقة" همست. "بس دين. راح ارجعه"

"ما اريده يرجع" ابتسم ابتسامة صغيرة. "بس اريدك تبقين قوية"

---

بعد اسبوع. ابو ليلى طلع من المستشفى.

ورجعوا للشقة.

العلاقة بينهم تغيرت. صار اكو عشاء سوا. صار اكو كلام.

بليلة، ليلى دا تشتغل على اللابتوب.

زين دخل ومعاه صينية اكل.

"ما تعشيتي" كال وحطها يمها.

"شكرا"

كلوا سوا بصمت.

فجأة زين سأل: "ليش وافقتي على العقد اصلا؟"

ليلى ابتسمت بمرارة. "ديون ابوي. وطمعت بالمليون"

"واندمتي؟"

"لا" باوعتله. "لان لولاك... جان ما عرفت شنو معنى واحد يوكف وياي"

زين سكت. وبعدين مد ايده ومسح على شعرها.

"ليلى..."

رن الجرس.

خادمة: "الاستاذ. اكو ضرف الكم"

ظرف ابيض. بدون اسم مرسل.

داخله صورة وحدة: ليلى وهي داخلة المستشفى، وزين ماسك ايدها.

وتحتها مكتوب بخط احمر:

"شفتوا؟ حتى بالمستشفى يتمثلون. العالم كله راح يعرف - س"

ليلى ارتعبت. "مرة ثانية؟"

زين اخذ الصورة ومزقها. "لا تخافين. هاي اخر مرة"

بس بعينه كان اكو شي... قلق.

---

اليوم اللي بعده. الشركة.

زين نادى ليلى لمكتبه.

"من اليوم انتِ المديرة التنفيذية المساعدة" دفعلها عقد جديد.

"شنو؟ بس انا..."

"تستاهلين" كال. "واثبتتي نفسك بدبي"

ليلى وقعت وهي مصدومة.

بالليل، وهي مروحة للشقة، واحد لحقها.

شد ايدها ودخلها لزاوية مظلمة.

"بعدي عن زين" كان صوت خشن. "لو الصور الجاية راح تكون لاهلك"

ضربها كف و هرب.

ليلى رجعت للشقة تبكي.

زين شاف اثر الكف على وجهها وانجن.

"منو سواها؟" صرخ.

"ما اعرف" كذبت. ما تريد تورطه اكثر.

زين سحبها وحضنها بقوة. اول حضن حقيقي.

"ما راح اخلي احد يأذيك" همس باذنها. "اسمعيني. ما راح اخلي"

ليلى بكت بحضنه.

بهاي اللحظة فهمت:

العقد صار ورقة ميتة.

واللي بينهم... صار شي حقي.

بس بنفس الوقت، بمكان ثاني، سارة دا تضحك وهي تباوع للصور الجديدة.

"خلي يلعبون حب" همست. "الجولة الجاية... راح اكسرهم اثنينهم"

الحرب توها بدت.

---

اليوم اللي بعده. الساعة 9 الصبح.

ليلى دخلت الشركة واكو مكياج يغطي اثر الكف.

بس زين لمحها. وجهه صار حجر.

"لمكتبي. هسه" أمر.

بالمكتب غلق الباب. "وريني وجهك"

"زين انا..."

"هسه" صوته كان يخوف.

ليلى مسحت المكياج. بينت علامة خفيفة بعدها.

زين ضرب المكتب بقبضته. "اقسم بالله اذا اعرف منو..."

"ما اعرف" كذبت مرة ثانية. "يمكن غلط"

"مو غلط" قرب منها. "ليلى دا ينلعب بينا لعبة كبيرة. ولازم ننهيها"

سحب درج وطلع ملف. "هذا تحقيق خاص. سارة دافعة فلوس لرجال حتى يراقبونا"

مد ايده ومسح على خدها. "بس خلص. من اليوم عندك 2 حراس وياك 24 ساعة"

ليلى ارتبكت من لمسته. "ما اريد ازعجك"

"مو ازعاج" همس. "واجب علي"

---

بالليل. عشاء بالشقة.

الجو كان مختلف. ماكو توتر.

زين طبخ بنفسه. باستا.

"انت تعرف تطبخ؟" ضحكت ليلى.

"اتعلمت من امي غصب" ابتسم. اول مرة تشوف ابتسامته طبيعية.

اكلوا وبعدين كعدوا بالبلكونة. بغداد من فوك حلوة.

"ليلى" كال فجأة. "اذا خلص العقد... بعد سنة"

"هم" قلبها دق.

"تردين تبقين؟" باوع بعينها مباشرة. "مو كموظفة. كزوجتي. بجد"

ليلى انصدمت. "بس احنا اتفقنا..."

"اعرف. بس انا غيرت رأيي" مد ايده ومسك ايدها. "ما اريد اخسرك"

دموعها نزلت. "زين انا... انا هم ما اريد"

قبل لا يكملون، موبايل زين رن.

رقم مجهول. شغل السماعة.

صوت سارة. "مبروك الخطوبة الجديدة. بس تذكر زين... امك ما راح توافق ابدا"

"واذا؟"

"واذا عندي فيديو لابوك وهو يستلم فلوس مني. حتى يعالج. فضيحة حلوة مو؟"

وقفلت.

زين رمى الموبايل. "لعنة عليها"

ليلى كامت. "هذا بسببي. انا السبب"

"لا" زين كام وسحبها لحضنه مرة ثانية. "السبب هي. مو انتِ"

باس راسها. "اسمعيني. من اليوم ماكو عقد. ماكو تمثيل"

بعد عنها وباوع بعيونها. "اكو انا وانتِ. وبس"

"وعد" ليلى هزت راسها وهي تبكي. "موافقة"

"زين انا خايفة" همست ليلى وهي بحضنه.

"لا تخافين" باس جبينها. "من اليوم انا وياكِ بكل شي"

بعدها باسبوعين،

بالشركة ليلى صارت المديرة المساعدة. واثبتت نفسها.

وكانت تدير اجتماعات مهمة، وتوقع صفقات، والكل صار يحترم رأيها بالشركة.

"سمعتها بالشركة صعدت. واللي كانوا يستهزئون بيها صاروا يخافون منها."

بالليل رجعوا للشقة. الجو هادئ.

زين مد ايده ومسك ايدها.

"خلص العقد انتهى" كال. "هسه نبدي حياة جديدة"

ليلى ابتسمت. اول مرة تحس بالأمان.

زين باوع لها وضحك ضحكة خفيفة. "من اليوم ماكو خوف. انا وياكِ"

قرب اكثر ومسح على شعرها بحنية. "ارتاحي. كلشي راح يصير زين"

"وعد" همست ليلى. "راح نبني كلشي سوا. من اليوم احنا واحد"

---

بمكتب مظلم. سارة ترمي الموبايل.

"يلا خليهم يتقربون اكثر" ضحكت. "حتى من اكسرهم... الوجع يكون اكبر"

طلعت صورة جديدة. ليلى وزين.

وكتبت تحتها: "الحلقة الجاية: سقوط العائلة"

"**انتهى الفصل**"