الإهانة الأولي

الفصل الثالث

"الإهانة الأولى"

كانت فيروز واقفة قدام مراية أوضتها الصغيرة، تبص لنفسها بتوتر واضح وهي تعدل ياقة القميص الأسود الخاص بالكافيه للمرة العاشرة.

الـuniform كان بسيط… بنطلون أسود وقميص أبيض وفوقه مريلة بلون بني غامق.

لكن رغم بساطته، كانت حاسة إنه غريب عليها.

غريب زي كل حاجة حصلت مؤخرًا.

سمعت صوت دينا من برا وهي تخبط على الباب بخفة:

— خلصتي يا فيروز؟

فتحت الباب ببطء.

أول ما شافتها دينا، ابتسمت بحماس:

— الله! قمر أهو.

احمرت خدود فيروز فورًا وهي تنزل عينيها للأرض:

— متكسفنيش.

طلعت مدام ناهد من المطبخ وقتها، وبمجرد ما شافتها وقفت تتأملها ثواني بابتسامة حنونة.

— ربنا يحفظك يا بنتي.

الكلمة لمست قلبها كالعاده.

أما أسر، فكان واقف عند باب الشقة بيظبط ساعته قبل ما ينزل.

رفع عينيه ناحيتها للحظة.

وسكت.

مش عارف ليه… لكن شكلها كان مختلف النهارده.

يمكن عشان لأول مرة يشوفها خارجة للحياة فعلًا.

قال بهدوء وهو يفتح الباب:

— خلي بالك من نفسك.

رفعت عينيها له بسرعة، قبل ما تهز راسها بخجل:

— حاضر.

بعد نص ساعة…

كانت واقفة وسط الكافيه بتوتر قاتل.

صوت ماكينة القهوة، الناس، الطلبات، الكراسي اللي بتتحرك…

كل حاجة كانت سريعة أكتر مما تتخيل.

كريم، مدير المكان، كان واقف قدامها بيشرح بسرعة:

— الترابيزات دي مسؤوليتك، والأوردر بيتكتب هنا، وبعدها تاخديه للكاشير… سهلة يعني.

هزت راسها بسرعة وهي بتحاول تحفظ كل كلمة.

لكن الحقيقة؟

هي كانت تايهة.

خايفة تغلط.

خايفة حد يزعق.

خايفة يكتشفوا إنها مش قد الشغلانة.

مرت أول ساعتين بصعوبة.

مرة تنسى أوردر.

ومرة تغلط في اسم مشروب.

ومرة تتلخبط في الحساب.

لكنها كانت بتحاول.

تحاول بكل قوتها.

باب الكافيه اتفتح وقتها، ودخل شابين.

واحد منهم كان بيتكلم في الموبايل بضيق واضح، والتاني بيضحك وهو بيحاول يهديه.

رفعت فيروز عينيها تلقائيًا… واتجمدت لحظة.

الشاب اللي قدام كان طويل، لابس قميص رمادي وساعة شكلها غالية جدًا.

ملامحه حادة بطريقة ملفتة، ونظراته فيها برود وثقة زيادة عن اللزوم.

كان واضح جدًا إنه من النوع اللي متعود ياخد كل حاجة بسهولة.

أما صاحبه، فكان أهدى شوية وبيتكلم بهزار طول الوقت.

قربوا من الترابيزة، ورمت فيروز عينيها بعيد بسرعة وهي تحاول تركز في شغلها.

لكن قلبها بدأ يدق بتوتر بدون سبب مفهوم.

سمعت كريم يناديها:

— فيروز! خدي الأوردر ده لترابيزة سبعة.

هزت راسها بسرعة وأخدت الصينية.

قهوة.

وعصير.

وكوباية مية.

أخدت نفس عميق وهي تتحرك ناحية الترابيزة.

لكن أول ما قربت…

سمعت صوت عالي من ترابيزة تانية:

— يا آنسة!

اتفزعت وبصت بسرعة ناحية الصوت.

وفي ثانية…

الصينية اختلت من إيديها.

والقهوة الساخنة انسكبت بالكامل على قميص الشاب الرمادي.

الصمت نزل على المكان كله.

فيروز اتجمدت.

وعينيها اتوسعت برعب وهي باصة للقهوة على هدومه.

أما هو فوقف فجأة بعصبية وهو يبص لقميصه المبلول.

— إنتي إيه؟! مبتشوفيش؟!

صوته العالي ضربها بقوة.

ارتبكت فورًا وهي تتراجع خطوة:

— أنا آسفة والله… مخدتش بالي…

لكن آدم كان أصلًا متعصب من قبل ما يدخل.

يومه سيئ.

وشغله ضاغط عليه.

وآخر حاجة كان ناقصاها إن هدومه تتبهدل بالشكل ده.

فقال بعصبية وحدّة:

هو أي الى بيحصل دة الكافية بقا زفت بقى يشغل اى حد وخلاص؟!

بدأت الناس تبص عليهم.

وفيروز حسّت إن الأرض بتتهز تحتها.

الإحراج ضربها في قلبها بعنف.

خصوصًا إنها أصلًا بتحاول من أول اليوم متغلطش.

إيديها بدأت تترعش وهي تهمس بسرعة:

— والله غصب عني…

لكن آدم قاطعها بحدة:

— غصب عنك إيه؟! شايفة اللي عملتيه؟!

صاحبه تدخل بسرعة وهو يقوم من مكانه:

— خلاص يا آدم، حصل خير.

لكن آدم رد بعصبية وهو بيبص للقهوة على هدومه:

— خير إيه بس؟!

كل كلمة كانت بتنزل على فيروز كأنها صفعة.

الدموع بدأت تلمع في عينيها رغمًا عنها.

حاولت تخبيهم بسرعة، لكنها فشلت.

وأسوأ حاجة؟

إن الناس كلها كانت بتبصلها.

بنفس النظرات اللي طول عمرها هربانة منها.

نظرات الشفقة والتقليل والإهانة.

وفجأة، مقدرتش تستحمل أكتر حطت الصينية المرتعشة على أقرب ترابيزة، واستدارت بسرعة قبل ما حد يشوف دموعها وهي ماشية ناحية غرفة الموظفين سمعت صوت كريم بيناديها، لكنها مكملتش.

أول ما دخلت الغرفة الصغيرة وقفلت الباب…انهارت.

دموعها نزلت بعنف وهي حاطة إيديها على وشها.

ليه دايمًا بتحس إنها أقل؟

ليه أي غلطة صغيرة تحسسها إنها لا تستحق مكانها؟

حاولت تهدي نفسها بالعافية، لكن صوت آدم الغاضب كان لسه بيرن في ودانها "هو أي حد بقى يشتغل وخلاص؟"

الجملة وجعتها أكتر مما المفروض.

كأنها رجعتها لطفلة الملجأ الصغيرة اللي الناس كانت دايمًا تبصلها بدونية.

وفجأة…

اتفتح باب الكافيه بعنف برا.

وبعد ثواني، سمعت صوت آدم الغاضب بوضوح:

— راحت فين البنت دي؟!

اتجمدت فيروز مكانها.

وقلبها وقع بخوف.