مش ضعيفة

الفصل الرابع

"مش ضعيفة"

كان التوتر مالي الكافيه كله.

الزبائن بقوا يبصوا ناحية آدم بصمت، بينما كريم قرب بسرعة وهو بيحاول يحتوي الموقف قبل ما يكبر أكتر.

— أستاذ آدم، حقك علينا… البنت جديدة ولسه أول يوم ليها.

لكن آدم كان متعصب فعلًا.

واقف يبص للقهوة اللي بوظت قميصه بعصبية، وملامحه متشنجة بشكل واضح.

مش بسبب القهوة بس.

كان أصلًا داخل مشحون.

خناقة في الشغل.

ضغط من أهله.

ومكالمة مستفزة قبل ما يدخل الكافيه بدقايق.

وكان محتاج يطلع غضبه في أي حد.

فقال ببرود مستفز

 الجديد طالما مش قد الشغل ميشتغلش دة تهريج

ابتسامة كريم اختفت تدريجيًا وهو يحاول يفضل هادي:

— حقك علينا، والله هنعوضك

لكن آدم كان لسه عينه ناحية غرفة الموظفين اللي دخلتها فيروز.

كأن وجودها استفزه أكتر من الغلطة نفسها.

صاحبه، سيف، تنهد بضيق وهو يقعد مكانه:

— يا بني خلاص… البنت كانت هتعيط.

رد آدم بحدة وهو يشد كرسيه:

— وأنا مالي؟

لكن رغم كلمته… صورة عينيها وهي بتحاول تمنع دموعها كانت ثابتة في دماغه بشكل سخيف.

وده ضايقه أكتر

جوا غرفة الموظفين…

كانت فيروز واقفة قدام المراية الصغيرة، تحاول تهدي نفسها بالعافية.

دموعها وقفت، لكن ملامحها لسه مكسورة.

كانت بتتنفس بسرعة وهي باصة لانعكاسها.

ليه اتوجعت بالشكل ده؟

هو أصلًا ميعرفهاش.

لكن طريقته رجعتها سنين لورا…

لكل مرة حد بص فيها ليها بدونية.

مسحت وشها بسرعة وهي تاخد نفس عميق.

لا.

هي مش هتفضل مستخبية.

مش كل مرة حد يزعقلها تنهار بالشكل ده.

وفجأة…

الباب اتفتح بخفة.

دخل كريم وهو باين عليه الإحراج:

— انتي كويسة؟

هزت راسها بسرعة:

— أيوة.

بصلها كام ثانية قبل ما يقول بهدوء:

— متزعليش منه… شكله كان مضغوط.

ضحكت ضحكة صغيرة باهتة:

— وأنا مالي إنه مضغوط؟

اتصدم كريم للحظة من ردها.

لأنها طول اليوم كانت هادية وخجولة بشكل مبالغ.

لكن دلوقتي… في حاجة مختلفة في عينيها.

كملت وهي بتعدل هدومها:

— أنا غلطت آه… بس هو مالوش حق يكلمني بالطريقة دي.

ابتسم كريم بخفة:

— أهو كدا… دا الكلام.

أخدت نفس عميق، وبعدها فتحت الباب وخرجت.

أول ما خرجت، عيون آدم اتحركت ناحيتها فورًا.

كانت ماشية بخطوات هادية، لكن وشها بقى بارد بشكل غريب.

مش البنت المرتبكة اللي كانت من شوية.

وقفت قدامه مباشرة.

الكافيه كله سكت تقريبًا.

حتى سيف رفع حاجبه باهتمام.

بصتلُه فيروز بثبات وقالت:—

 ايوة يا فندم حضرتك بتسال عليا واعتقد أنا غلطت واعتذرتلك في حاجة تانية 

استغرب آدم طريقتها، لكنه رد ببرود:

—

اعتذراك دا ميغيرش إن اللي حصل استهتار.

ضيقت عينيها شوية، وردت فورًا:

— لا… ميغيرش تمام يا فندم وحضرتك ملكش حق تهيني قدام الناس.

سيف فتح بقه بصدمة خفيفة.

أما آدم فثبت عينه عليها باستغراب واضح.

واضح إنه مكانش متوقع منها ترد أصلًا.

كملت وهي تحاول تتحكم في رعشة صوتها:

— أنا شغالة هنا عشان محتاجة الشغل… مش عشان حد يقلل مني.

كان صوتها هادي.

وده خلا كلامها أقوى.

آدم حس بحاجة غريبة وهو باصلها.

لأول مرة يلاحظ تفاصيلها فعلًا.

عينيها اللي واضح إنها كانت بتعيط.

إيديها اللي لسه بتترعش رغم محاولتها تبان قوية.

والإهانة اللي مستخبية ورا هدوئها.

لكن غروره منعه يتراجع.

فقال ببرود مستفز:

— يبقى تتعلمي تشتغلي صح الأول.

الجملة نزلت عليها كصفعة جديدة.

لكن الغريب؟

إنها المرة دي ما انهارتش.

بالعكس…

ابتسمت بسخرية خفيفة هزت آدم نفسه.

وقالت:

 حاضر يا فندم اى خدمة تانية 

ثم استدارت ومشيت.

بكل برود.

لكن أول ما عدت من جنبه، قبضت إيديها بقوة وهي تحاول تمنع نفسها متعيطش تاني.

أما آدم…

ففضل باصص لطيفها وهي ماشية.

حاجة جواه اتضايقت.

مش فاهم ليه.

سيف بصله بصدمة:

— إنت بجد زودتها أوي.

رد آدم بضيق وهو يبعد عينه عنها:

— أنا معملتش حاجة.

لكن حتى هو… مكانش مقتنع بكلامه بالكامل

---

بعد ساعة 

كانت فيروز واقفة برا الكافيه بعد انتهاء الشيفت.

الليل كان هادي والشارع شبه فاضي.

ضمت الجاكيت عليها وهي ماشية بخطوات بطيئة.

مرهقة ومتلخبطة وغضبانة من نفسها لأنها اتأثرت بكلام واحد غريب بالشكل دة 

طول الطريق للبيت، كانت فيروز ماشية بخطوات سريعة وهي ضامة الجاكيت عليها بقوة، كأنها بتحاول تهرب من الإحساس اللي مخنقها.

الهواء البارد كان بيخبط في وشها، لكن اللي جواها كان أتقل بكتير.

صوت آدم وهو بيزعقلها قدام الناس لسه بيرن في ودانها.

"هو أي حد بقى يشتغل وخلاص؟"

غمضت عينيها للحظة وهي تكمل مشي.

ليه كلامه وجعها بالشكل ده؟

هو مجرد شخص غريب.

مجرد زبون.

لكن الحقيقة اللي كانت بتحاول تهرب منها… إن نظراته كانت شبه نظرات ناس كتير شافتهم طول عمرها.

النظرة اللي بتحسسها إنها أقل.