قرب غريب

الفصل الرابع عشر

"قرب غريب"

بصت دينا لآدم بسرعة وهي تمسح دموعها بخفة وقالت بامتنان واضح:

— أكيد اتفضل… إحنا أصلًا لازم نشكرك على اللي عملته.

لفت فيروز وشها ناحيتها باستغراب خفيف وقالت بتعب:

— تشكريه على إيه؟

ردت دينا فورًا وهي تبصلها بعتاب:

— هو اللي لحقك وجابك المستشفى يا هبلة.

سكتت فيروز لحظة.

وعينيها اتحركت ببطء ناحية آدم الواقف عند الباب.

كان واقف هادي بشكل غريب، إيده في جيبه، وعينيه ثابتة عليها من غير ما يتكلم.

ولأول مرة…

تحس إنها مش قادرة تفهمه.

مرة مستفز ومتغطرس.

ومرة واقف جنبها بالشكل ده.

دخل آدم الأوضة بهدوء وهو يقول:

— عاملة إيه دلوقتي؟

ردت بخفوت:

— أحسن.

لكن صوتها كان مرهق جدًا.

دينا بصتلها شوية، قبل ما تقول فجأة:

— أنا هروح أجبلك عصير واجي.

فيروز رفعت عينيها بسرعة:

— لا مش عايزة مش هينفع.

لكن دينا هزت راسها بعناد:

— لا ينفع… لازم تشربي حاجة. ثواني وراجعة.

ثم خرجت بسرعة من الأوضة.

وفي نفس اللحظة…

طلع صوت ضحكة خافتة من آدم.

رفعت فيروز عينيها له فورًا بتعصب خفيف:

— بتضحك على إيه؟

بصلها بثبات، قبل ما يقول بنبرة فيها تسلية واضحة:

— متخافيش… أنا مش بعض.

اتعقدت حواجبها باستغراب:

— قصدك إيه؟

ضحك مرة تانية وهو يقرب خطوة بسيطة:

— يعني مش عارفة؟ انتي مش عاوزاها تمشي وتسيبك معايا لوحدك… مش كدا؟

اتسعت عينيها شوية وهي تبصله بعدم استيعاب.

ثم قالت بسرعة وهي تحاول تبان ثابتة:

— وأنا أخاف من إيه يعني؟ أنا مش خايفة.

رفع حاجبه وهو يبصلها بتسلية أوضح.

وبعدين قرب أكتر.

لحد ما بقى واقف قريب جدًا منها.

درجة خلت قلبها يدق بسرعة بدون إرادتها.

مال ناحيتها شوية وهو يبص جوا عينيها مباشرة وقال بصوت واطي:

— ما هو واضح فعلًا.

اتوتر نفسها فجأة.

وحست إنها مش عارفة تبصله ولا تبعد عنه.

فمدت إيدها بسرعة تزقه بخفة وهي تقول بتوتر واضح:

— لو سمحت ابعد… مينفعش كدا.

ضحك بخفة ورجع خطوة لورا فورًا:

— حاضر… أنا آسف.

ثم سكت لحظة قصيرة، قبل ما يقول بهدوء مختلف تمامًا:

— وحمدلله على سلامتك.

بصتله ثانيتين.

ونبرة صوته الهادية دي خلتها تهدى غصب عنها.

فقالت بخفوت:

— الله يسلمك.

ثم سكتت شوية قبل ما تكمل:

— شكرًا.

ابتسم بخفة:

— على إيه؟

نزلت عينيها للحظة، قبل ما تقول:

— على مساعدتك… وإنك جبتني المستشفى.

وقبل ما يرد…

الباب اتفتح.

ودخلت دينا ومعاها سيف وهو شايل أكياس عصير ومياه.

أول ما دخل سيف ابتسم بخفة وقال:

— حمدلله على سلامتك يا آنسة…

رفعت فيروز عينيها ليه، فردت بهدوء:

— فيروز… اسمي فيروز.

ابتسم أكتر وهو يهز راسه:

— تمام يا فيروز… خضتينا عليكي. ألف سلامة مرة تانية.

ابتسمت بخجل بسيط:

— الله يسلمك.

أما دينا فاتحركت بسرعة جنب السرير وهي تديها العصير:

— يلا اشربي ده.

تنهدت فيروز باستسلام وهي تاخده منها.

في الوقت ده…

كان سيف واقف يبص لآدم باستغراب خفيف.

لأنه لأول مرة يشوفه هادي بالشكل ده مع بنت.

ولا قاعد في مستشفى مستني يطمن على حد أصلًا.

لكن آدم كان مركز بالكامل مع فيروز بدون ما يحس.

حتى وهو ساكت.

عينه كانت عليها.

وكأن عقله مش قادر يبعد عنها من ساعة ما وقعت بين إيديه.

قطعت دينا الصمت فجأة وهي تبص لفيروز بعتاب:

— وكنتي هتفضلي مخبية علينا موضوع قلبك؟ لحد امتي

توترت ملامح فيروز فورًا.

ولفت تبص ناحية آدم وسيف بسرعة.

كأنها اتضايقت إن الكلام اتفتح قدامهم.

فقالت بهدوء متوتر:

— يا دينا…

لكن دينا كملت بعصبية ممزوجة بخوف:

— يعني إيه تتعبي بالشكل ده وإحنا منعرفش؟! لو كان جرالك حاجة؟

نزلت عيون فيروز وهي تمسك العصير بين إيديها:

— مكنتش حابة أقلقكم.

اتكلم آدم لأول مرة بجدية:

— وإخفاء حاجة زي دي هيقلقهم أقل يعني؟

رفعت عينيها له.

وكان باصصلها بنظرة غريبة…

مش قاسية.

بس فيها لوم حقيقي.

فقالت بعناد خفيف:

— أنا كويسة ومش بحب أحسس الناس إني ناقصة.

اتشد فك آدم فورًا.

وقال بهدوء ثابت:

— اللي بيتعب مش ناقص.

سكتت.

أما سيف فبص لآدم بسرعة باستغراب أكبر.

لأن الكلام ده تحديدًا…

مش شبه آدم خالص.

لكن آدم نفسه ما انتبهش.

كان كل تركيزه مع البنت اللي قاعدة قدامه وشكلها مرهق بالشكل ده.

دينا حاولت تغير الجو فقالت بخفة:

— المهم إنك بقيتي كويسة دلوقتي.

ابتسمت فيروز ليها بخفوت.

ثم فجأة افتكرت حاجة، فرفعت عينيها ناحية آدم بسرعة وقالت بتوتر:

— الجامعة… أكيد حصل مشكلة بسبب اللي حصل؟

رد سيف بسرعة:

— متشغليش بالك دلوقتي بالكلام ده.

لكن ملامحها فضلت متوترة.

فقال آدم بهدوء:

— محدش هيقربلك.

بصتله باستغراب خفيف.

أما هو فكمل بنفس النبرة:

— وطالما الغلط مش منك… يبقى متخافيش.

الغريب إن كلماته طمنتها فعلًا.

رغم إنها المفروض آخر شخص ترتاحله هو.

سكتت وهي تبصله ثواني طويلة.

ولأول مرة…

تحس إن غروره وعصبيته اللي كانت شايفاهم فيه من أول مرة، وراهم حاجة تانية.

حاجة أهدى.

وأصدق.

قطع اللحظة دخول الدكتور وهو بيبص للكل:

— ياريت المريضة ترتاح شوية.

دينا قامت بسرعة:

— حاضر يا دكتور.

بصلهم الدكتور ثم قال بجدية:

— وممنوع أي ضغط عصبي أو انفعال الفترة دي.

هزت دينا راسها بسرعة.

أما آدم فبص لفيروز للحظة قصيرة قبل ما يبعد عينه.

وكأنه افتكر منظرها وهي واقعة بين إيديه تاني.

خرج الدكتور، وبعده ساد صمت بسيط.

ثم قال سيف فجأة وهو يحاول يخفف الجو:

— واضح إن يومنا النهارده كان فيلم أكشن مش يوم جامعة.

ضحكت دينا غصب عنها.

حتى فيروز ابتسمت بخفة.

أما آدم…

فاكتفى بابتسامة صغيرة بالكاد ظهرت.

وبعد شوية…

بدأ الوقت يتأخر.

فبص سيف لآدم وقال:

— يلا؟ عشان الوقت.

هز آدم راسه ببطء.

ثم بص ناحية فيروز مرة أخيرة وقال بهدوء:

— ارتاحي.

ردت بخفوت:

— حاضر.

اتحرك هو وسيف ناحية الباب.

لكن قبل ما يخرج…

وقف ثانية قصيرة.

ولف يبصلها تاني.

كانت قاعدة على السرير، ماسكة العصير بإيديها الصغيرة، وشعرها الأسود نازل حوالين وشها الشاحب.

شكلها كان مرهق جدًا…

بس رغم كدا، عينيها لسه فيها نفس العند اللي استفزه من أول مرة.

ابتسم بدون ما يحس.

ثم خرج أخيرًا.

وأول ما الباب اتقفل…

بصت دينا لفيروز بخبث واضح.

— إيه ده بقى؟

اتوترت فيروز فورًا:

— إيه؟

قربت منها دينا وهي تبتسم:

— الواد ده مركز معاكي أوي.

شهقت فيروز بسرعة:

— دينا!

ضحكت دينا وهي ترفع إيديها باستسلام:

— خلاص خلاص… بس والله طريقته معاكي غريبة.

نزلت عيون فيروز للحظة.

وقلبها دق فجأة لما افتكرت قربه منها من شوية ونظرته وهو بيقول:

"ما هو واضح فعلًا."

فقالت بسرعة وهي بتحاول تهرب من أفكارها:

— نامي يا دينا بلاش هبل.

لكن دينا فضلت تضحك وهي تبصلها.

أما فيروز…

فغمضت عينيها ببطء.

ولأول مرة من وقت طويل…

وسط تعبها وخوفها…

كانت بتحس بحاجة غريبة جدًا جواها.

حاجة بدأت تتحرك كل ما تفتكر نظرات آدم ليها.