سر لأول مره يبان

الفصل الثالث عشر

"سر لأول مرة يبان"

الجو في الكافتيريا كان متوتر بشكل خانق.

البنات متجمعين حوالين فيروز، وصوت لارا العالي كان مالي المكان، بينما دينا بتحاول تبعدهم عنها بعصبية وهي بتزعق:

— ابعدوا عنها! انتو اتجننتوا؟!

لكن واحدة من البنات مسكت دينا من دراعها تمنعها تدخل، والتانية كانت لسه بتشد شعر فيروز بعنف وهي بتحاول تقوم نفسها وسط الإهانة والوجع.

ولارا واقفة قدامها وعينيها مليانة غل:

— فاكرة نفسك قوية عشان ضربتيني قدام الناس؟!

فيروز كانت بتحاول تبعد إيدها عنها وهي بتقول بصعوبة:

— سيبيني…

لكن لارا زقتها بعنف خلاها تقع تاني على الكرسي الحديد.

وفي اللحظة دي…

دخل آدم الكافتيريا بسرعة ومعاه سيف.

أول ما شاف المنظر… ملامحه اتقلبت فورًا.

ودون تفكير اندفع ناحية البنات وهو يزعق بصوت عالي هز المكان كله:

— انتو بتعملوا إيه؟!

الكل اتلفت ناحيته بصدمة.

لكن آدم كان مركز على لارا فقط.

كانت ماسكة شعر فيروز بعنف ورافعه إيدها كأنها هتضربها تاني.

فمد إيده فورًا ومسك دراعها بقوة يمنعها.

— انتي اتجننتي؟!

لارا حاولت تشد إيدها بعصبية:

— سيبني يا آدم!

لكن صوته خرج أقوى وأحد:

— بقولك سيبي شعرها!

الحدة في صوته خلت حتى البنات يتجمدوا.

وبالفعل… لارا سابت شعر فيروز ببطء وهي مصدومة من طريقته.

ثم بصتله بعدم استيعاب:

— انت بتزعقلي أنا؟! بتدافع عنها كدا ليه؟!

لكن قبل ما يرد…

جسم فيروز مال فجأة.

وعينيها قفلت بالكامل.

ووقعت على الأرض.

شهقة قوية خرجت من دينا وهي تجري عليها بسرعة:

— فيروز!!

ركعت جنبها بخضة وهي تهزها بخوف:

— فيروز قومي… فيروز فوقي!

لكن مفيش أي استجابة.

لون وشها كان شاحب بطريقة مخيفة.

حتى شفايفها بقت باهتة.

وفي ثانية… التوتر اتحول لرعب حقيقي.

سيف قرب بسرعة وهو بيقول بقلق:

— شكلها أغمى عليها فعلًا!

أما آدم…

فبصلهم بغضب مرعب، ثم زق إيد لارا من قدامه بعنف وهو يقول:

— عاجبكم كدا؟!

صوته كان عالي بشكل خلى الكل ساكت.

— لو حصلها حاجة هتروحوا في داهية انتو فاهمين؟! انتو طلبة جامعة ولا بلطجية؟! إيه الجنان اللي عملتوه ده؟!

لارا بدأت تتوتر فعلًا لأول مرة وهي تبص لفيروز بخوف:

— أنا… أنا معملتش حاجة!

لكن آدم تجاهلها تمامًا.

نزل بسرعة عند فيروز وبص لدينا:

— انتي تقربيلها؟

ردت دينا بتلقائية ومن غير تفكير:

— أيوة… دي أختي.

هز راسه بسرعة، ثم شال فيروز بين إيديه بدون تردد.

دينا اتفاجئت للحظة، لكن خوفها على فيروز خلاها تلحقه فورًا.

قال آدم بسرعة وهو بيتحرك ناحية الباب:

— يلا على العربية بسرعة.

وسيف جري وراهم وهو بيبعد الناس اللي واقفة تتفرج.

أما الكافتيريا كلها… فكانت ساكتة بصدمة.

حتى لارا نفسها كانت واقفة متجمدة وعينيها مليانة توتر وهي شايفة آدم خارج شايل فيروز بالشكل ده.

---

بعد شوية…

وصلوا المستشفى.

آدم دخل بسرعة وهو شايل فيروز، ودينا ماشية جنبه وهي شبه بتعيط من الخوف.

— دكتور! حد ييجي بسرعة!

الممرضين أخدوها فورًا على أوضة الكشف.

ودينا كانت واقفة قدام الباب وإيديها بتترعش بشكل واضح.

أما آدم… فكان واقف قريب منها وملامحه متجهمة بشكل غريب.

حاسس بغضب وخنقة في نفس الوقت.

صورة وشها وهي بتقع قدامه مش راضية تخرج من دماغه.

سيف قرب منه بهدوء:

— اهدى شوية يا آدم… إن شاء الله تبقى كويسة.

لكن آدم ما ردش.

كان مركز على الباب فقط.

بعد دقائق طويلة…

خرج الدكتور أخيرًا.

فجريت دينا عليه بسرعة:

— يا دكتور! هي مالها؟!

بصلهم الدكتور باستغراب واضح قبل ما يقول بعتاب:

— إزاي توصلوها للتعب ده؟

اتجمدت دينا مكانها.

— يعني إيه؟

قال الدكتور بجدية:

— واضح جدًا إن عندها مشكلة في القلب… وممنوع تتعرض لانفعال أو ضغط عصبي بالشكل ده.

اتسعت عيون دينا بصدمة.

— قلب؟!

حتى آدم رفع عينيه للدكتور بسرعة.

أما سيف فقال بعدم فهم:

— يعني إيه يا دكتور؟ هي تعبانة؟

هز الدكتور راسه:

— غالبًا حالة وراثية… ولسه هنحتاج فحوصات أكتر، لكن واضح إنها بتتعرض لإجهاد نفسي كبير. وياريت جدًا تبعدوها عن أي توتر أو زعل شديد، لأن ده خطر عليها.

ثم قال بهدوء:

— عن إذنكم.

ومشي.

لكن الصدمة فضلت معلقة في المكان.

دينا كانت واقفة كأنها مش مستوعبة.

ثم فجأة دموعها نزلت وهي تقول بصوت مكسور:

— يا حبيبتي يا فيروز… ملكِيش بخت في حياتك أبدًا…

سيف اتوتر من بكاها وقال يحاول يهديها:

— اهدي يا آنسة… إن شاء الله هتبقى كويسة.

لكنها فضلت تعيط وهي ماسكة وشها.

أما آدم…

فكان باصصلها باستغراب حقيقي.

ثم قال فجأة:

— انتي إزاي متعرفيش إن أختك تعبانة؟

رفعت دينا عينيها له بسرعة وهي بتمسح دموعها:

— أصلها… مقالتليش.

اتشدت ملامحه أكتر.

— ثانية واحدة…

سكت لحظة قبل ما يكمل بتركيز:

— الدكتور بيقول مرض وراثي. يعني المفروض تكوني زيها أو حد من أهلكم عنده نفس المشكلة.

بصتله دينا بعدم فهم:

— يعني إيه؟

قال وهو مركز معاها:

— يعني… هي مش أختك؟

استغربت سؤاله للحظة، ثم قالت بسرعة:

— لا… هي أختي طبعًا.

— أختك إزاي يعني؟

سكتت لحظة ثم قالت:

— مش شقيقتي.

استغرب أكتر:

— أمال إيه؟

نزلت عيون دينا للحظة قبل ما تقول بهدوء:

— بابا وماما مربينها معانا من وهي صغيرة.

آدم فضل ساكت ثواني.

حاسس إن فيه حاجة غريبة.

طريقة كلامها… وعدم معرفتهم بمرضها… وإنها مش أختهم الحقيقية.

كل ده خلى فضوله يزيد أكتر بدون سبب مفهوم.

لكن قبل ما يسأل تاني…

خرجت ممرضة من الأوضة وهي بتبص حواليها:

— مداموزيل دينا؟

ردت بسرعة:

— أيوة!

ابتسمت الممرضة:

— الآنسة فاقت… وبتسأل عليكي.

جريت دينا فورًا للداخل وهي تمسح دموعها بسرعة.

أما آدم… ففضل واقف مكانه للحظة.

حاسس براحة غريبة أول ما عرف إنها فاقت.

وده ضايقه من نفسه أكتر.

---

دخلت دينا الأوضة بسرعة.

وكانت فيروز نايمة على السرير، وشها لسه شاحب جدًا، وجهاز المحلول متوصل بإيدها.

أول ما شافتها دينا… عينيها دمعت تاني.

قربت منها بسرعة وهي تمسك إيدها:

— خوفتيني عليكي يا فيروز…

ابتسمت فيروز بتعب:

— أنا كويسة.

لكن صوتها كان ضعيف بشكل واضح.

— كويسة إيه بس؟!

اتلفتت فيروز حواليها بتوتر خفيف:

— احنا في المستشفى؟

هزت دينا راسها.

ثم قالت بعتاب:

— انتي ليه مخبية إنك تعبانة بالقلب؟

اتجمدت ملامح فيروز فورًا.

وعينيها اتحركت بسرعة ناحية الباب كأنها خايفة حد يسمع.

— الدكتور قالك؟

— أيوة.

سكتت فيروز ثواني طويلة.

ثم قالت بهدوء متعب:

— مكنتش عاوزة أقلقكم.

دموع دينا نزلت وهي تضغط على إيدها:

— انتي غبية؟ إحنا مالناش غير بعض.

ابتسمت فيروز بحزن خفيف.

وفي اللحظة دي…

خبط خفيف على الباب.

فلفوا الاتنين.

وكان آدم واقف عند الباب.

نظراته راحت مباشرة لفيروز.

ولأول مرة… شافها بالشكل الضعيف ده.

بدون قوة. بدون عناد. ولا حتى النظرة الحادة اللي كانت بترد بيها على أي حد.

بس تعبانة.

وعينيها مرهقة بطريقة وجعته بدون ما يفهم ليه.

سأل بهدوء:

— ينفع أدخل؟

بصتله فيروز باستغراب خفيف.

أما دينا فقالت بسرعة:

— أكيد اتفضل… إحنا أصلًا لازم نشكرك على اللي عملته.