بداية مواجهة

الفصل الثاني عشر

"بداية مواجهة"

رجعت فيروز البيت مع أسر وهي أهدى شوية من وقت ما خرجت من الكافيه، لكن جواها لسه موجوعة.

طول الطريق كانت ساكتة، وأسر كمان ما حاولش يضغط عليها بالكلام.

كان سايق بهدوء، وكل شوية يبصلها بسرعة يطمن إنها بقت أحسن.

ولما وصلوا البيت، نزلت فيروز وراه بهدوء.

أول ما دخلوا، قامت ناهد بسرعة من على السفرة بقلق واضح:

— فيروز! اتأخرتي كدا ليه؟ قلقتيني عليكي.

حاولت فيروز تبتسم وهي تقول:

— معلش يا طنط… الشغل اتأخر شوية.

لكن ناهد قربت منها أكتر، وعينيها راحت لملامحها المتعبة.

— شكلك مرهق… في حاجة حصلت؟

قبل ما ترد، دخل أسر وقال بهدوء:

— زحمة بس واتأخروا في الحساب.

بصتله ناهد ثواني، وكأنها فهمت إنه مش عايز يتفتح كلام قدام الكل.

فاتنهدت وهي تقول:

— المهم إنكم رجعتوا بخير… بس يا فيروز حاولي تخلصي شغلك بدري، أو مفيش شغل بعد كدا.

ابتسمت فيروز بحب حقيقي وهي تقول:

— حاضر.

وبعدين بصت لأسر بخجل بسيط:

— وشكرًا إنك بعتي أسر يا طنط.

ابتسمت ناهد بحنان:

— كنت قلقانة عليكي… والوقت كان متأخر.

سكتت فيروز لحظة، وبعدين قالت بهدوء:

— تصبحوا على خير.

واتحركت ناحية أوضتها بسرعة قبل ما حد يلاحظ إنها لسه متأثرة.

دخلت الأوضة وقفلت الباب وراها، وسندت ضهرها عليه وهي تاخد نفس طويل.

لكن ما لحقتش حتى تبدل هدومها…

لأن الباب خبط بخفة، وبعدها دخلت دينا بسرعة وهي بتقول بفضول:

— احكي.

بصتلها فيروز بتعب:

— أرتاح الأول يا دينا.

قعدت دينا جنبها على السرير وهي تعقد إيديها:

— لا… شكلك فيه مصيبة، وأنا عارفاكي.

تنهدت فيروز باستسلام، وقعدت جنبها.

وبدأت تحكيلها كل اللي حصل في الكافيه.

من أول رمية الفلوس…

لحد العصير…

لحد القلم اللي نزل على وش لارا.

كانت دينا كل شوية تفتح عينيها أكتر بصدمة.

— يا نهار أبيض!

وما إن وصلت لجزء دخول أسر…

دينا اعتدلت بسرعة وهي تقول بعدم تصديق:

— استنى استنى… أسر؟ أسر أخويا؟!

هزت فيروز راسها.

— أيوه.

— ودافع عنك بالشكل ده؟!

ضحكت فيروز بخفة رغم تعبها:

— أهو اللي حصل.

لكن دينا كانت مصدومة فعلًا.

— مستحيل… ده أسر عمره ما دخل نفسه في مشاكل حد، ده منطوي أصلًا ومبيحبش يتكلم مع حد!

سكتت لحظة وهي تبصلها بشك:

— كملي.

فكملت فيروز وهي تفتكر كل اللي حصل على البحر، وكلام أسر معاها، وإزاي هداها وخلاها تحس إنها مش قليلة.

ودينا كانت سامعاها بانتباه غريب.

لحد ما قالت فيروز فجأة:

— وعلى فكرة…فاكرة الشاب الى حكيتلك عنه قبل كدا آدم اللي كان هناك هو نفس الشاب اللي بهدلني أول يوم شغل.

اتسعت عيون دينا فجأة:

— إيه؟! ده نفسه؟!

هزت راسها.

— أيوه.

افتكرت دينا بسرعة اليوم اللي رجعت فيه فيروز منه متضايقة ومكسورة.

فاتشدت ملامحها بعصبية:

— أوعي تسمحي لحد يعمل معاكي كدا تاني.

ابتسمت فيروز بخفة:

المرة دي ضربت ياخوفي المرة الجاية 

ضحكت دينا رغم غضبها:

— لا دي عجبتني الصراحة.

وفي اللحظة دي، الباب اتفتح ودخلت ناهد وهي حاطة إيديها في وسطها:

— نعم يا حلوين؟ الساعة داخلة على واحدة ولسه صاحيين؟

ضحكت دينا بسرعة:

— أهو بنرغي شوية.

بصتلهم ناهد باستنكار لطيف:

— رغى إيه؟ ناموا عشان عندكم جامعة الصبح.

هزت دينا كتفها وهي تقوم:

— حاضر يا ست الكل.

وقبل ما تخرج، بصت لفيروز وقالت:

— كمليلي بكرة.

ضحكت فيروز لأول مرة من قلبها وهي تقول:

— امشي يا رخمة.

خرجت دينا، وفضلت فيروز لوحدها.

بصت للسقف شوية…

لكن الغريب إن اللي شاغل تفكيرها مش الخناقة.

كان كلام أسر.

ونظرته.

واهتمامه الغريب بيها.

غمضت عينيها بسرعة وهي تحاول تبطل تفكير.

وبعد شوية، نامت أخيرًا.

---

تاني يوم الصبح…

كانت السفرة مليانة صوت دينا كعادتها.

— يا ماما قولي لأسر يقوم يوصلنا بدل البهدلة كل يوم.

ردت ناهد وهي بتحط الأكل:

— ما انتي كل يوم تتخانقي معاه عشان يوصلك.

وفي اللحظة دي اتكلم أسر فعلًا.

وكان لابس أسود كعادته، وملامحه هادية.

قعد وهو بيقول:

— أنا هوصلكم النهاردة.

الصمت نزل ثانيتين.

وبعدين انفجرت دينا ضحك:

— يا نهار أبيض! غريبة.

بصلها أسر باستغراب:

— مالك؟

قالت وهي بتضحك:

— ده أنا بتحايل عليك بالشهر عشان توصلني، وتطلع عيني على ما توافق!

ضحكت ناهد هي كمان:

— خلاص بطلي بكش بقى… أهو هيوصلكم.

بصت فيروز لأسر باستغراب بسيط، لكنه تجاهل نظرتها تمامًا وهو بيشرب قهوته بهدوء.

وبعد شوية…

كانوا كلهم نازلين من العربية قدام الجامعة.

دينا نزلت الأول، وبعدها فيروز.

بصت لأسر بابتسامة بسيطة:

— شكرًا.

هز راسه بهدوء:

— العفو.

وفي نفس اللحظة…

كانت عربية تانية داخلة الجامعة.

آدم نزل منها مع سيف.

لكن خطواته وقفت لحظة أول ما لمح فيروز نازلة من عربية أسر.

شاف ابتسامتها الخفيفة وهي بتشكره.

وشاف أسر واقف يبصلها بهدوء.

فاتشد فك آدم بدون وعي.

سيف لاحظ التغيير فورًا، لكنه ما اتكلمش.

فضل ساكت وهو ماشي جنبه.

أما آدم، فكان داخل الجامعة متعصب بشكل غريب حتى هو نفسه مش فاهمه.

---

وفي آخر اليوم…

كانت فيروز قاعدة مع دينا في الكافتيريا.

بيأكلوا وبيهزروا كعادتهم.

لحد ما فجأة…

الجو هدي بطريقة غريبة.

رفعت دينا عينيها، وبعدها اتشد وشها بضيق.

لارا.

كانت داخلة الكافتيريا ومعاها شلة بنات.

واتجهوا مباشرة ناحية ترابيزة فيروز.

وقفت لارا وهي تبص لفيروز باحتقار واضح:

— لا بجد… الجامعة نورت.

تنهدت فيروز بضيق وهي تحاول تتجاهلها:

— لو سمحتي ابعدي.

ضحكت لارا بسخرية:

— بعد اللي عملتيه فيا؟!

البنات اللي معاها بدأوا يتكلموا بصوت عالي:

— دي قليلة الأدب.

— فاكرة نفسها مين؟

وقفت فيروز وهي تحاول تمسك أعصابها:

— انتي اللي بدأتي.

لارا قربت منها بعصبية:

— وضربتيني بالقلم قدام الناس!

ردت فيروز بثبات:

— بعد ما أهنتيني.

لكن لارا ما استنتش أكتر.

دفعتها بعنف.

اتصدمت فيروز، وقبل ما تلحق ترد كانت واحدة من البنات شدت شعرها.

دينا قامت بسرعة:

— ابعدوا عنها!

لكن بنتين مسكوها يمنعوها تدخل.

— سيبوني يا مجانين!

الخناقة بدأت تكبر وسط صريخ البنات.

وفي الجهة التانية من الجامعة…

كان سيف ماشي مع آدم، قبل ما يلمح التجمع.

وقف باستغراب وهو يحاول يبص من بعيد.

واتغير وشه فجأة.

— يا نهار أبيض…

بصله آدم:

— مالك؟

رد بسرعة:

— لارا لامة البنات وبيبهدلوا البنت بتاعة الكافيه.

اتجمد آدم ثانية.

— إيه؟!

ولأول مرة، ملامحه اتقلبت لغضب حقيقي.

وقبل حتى ما سيف يكمل…

كان آدم بيجري ناحية الكافتيريا بسرعة.