مكانها الحقيقي

الفصل التاسع

"مكانها الحقيقي"

خرج آدم من غرفة جده بملامح مشدودة، بينما محمد كان ماشي جنبه بهدوء بعد ما الاتنين سابوا الخطيب يرتاح.

الكحة كانت مرهقة جدًا ليه، والدكتور كان محذرهم أكتر من مرة إن العصبية ممنوعة عنه تمامًا.

لكن الخطيب من النوع اللي عمره ما بيسيب حاجة تشغله.

خصوصًا الموضوع ده.

موضوع البنت اللي ضاعت.

نزلوا السلم بهدوء، ولسه محمد هيتكلم، لكن صوت عالي قطعهم فجأة.

— انتوا لسه ماشيين ورا كلام الراجل اللي بيخرف ده؟!

آدم قفل عينه بضيق أول ما سمع صوت أمه.

كانت ألفت واقفة في نص الصالة، لابسة روب حرير غالي وشعرها مصفف بعناية، لكن العصبية مبوظة هدوء شكلها.

محمد رفع عينه لها بصدمة وغضب:

— ألفت!

لكنها كملت بعصبية:

— إيه؟! بقول الحقيقة! كل شوية نفس الحكاية… بنت ضاعت من سنين ومحدش عارف إذا كانت عايشة أصلًا!

محمد قرب منها بخطوات حادة لأول مرة:

— اخرسي.

اتجمدت ملامح ألفت.

أما آدم فرفع عينه بسرعة ناحية أبوه.

محمد نادر جدًا لما يزعق بالشكل ده.

قال محمد بحدة واضحة:

— حسك تتكلمي عن بابا بالطريقة دي تاني.

ألفت ضحكت بسخرية وهي تعقد دراعها:

— لا والله؟ بقى أنا اللي غلطانة؟

ثم بصت لآدم بسرعة:

— قول لأبوك يا آدم.

لكن آدم فضل ساكت.

وألفت كملت بانفعال أكبر:

— أبوك لو لقاها هيديها ورث أمها… يعني هتبقى شريكة ليكم مكان أمها!

سكتت لحظة، قبل ما تقول بحدة:

— انت مجنون لو هتساعده في حاجة زي دي يا محمد! دي فلوس ولادنا!

اتشد فك محمد بعنف.

أما آدم فاتنهد بضيق وهو يحك رقبته.

واضح إنه بدأ يفقد أعصابه هو كمان.

قال بهدوء متماسك:

— ماما… كفاية بقى.

التفتت له بسرعة:

— كفاية إيه؟! انت مش فاهم! البنت دي لو ظهرت فجأة هتاخد حق في كل حاجة!

رد آدم ببرود واضح:

— اللي يقول عليه جدي هو اللي هيمشي.

اتسعت عيني ألفت بصدمة خفيفة.

أما هو فكمل بنفس الهدوء:

— دي فلوسه… وهو حر يديها لمين إحنا مالناش دعوة.

— آدم!

قالتها بحدة وكأنها مش مصدقة كلامه.

لكن آدم رفع حاجبه ببرود:

— لما تبقى فلوسنا نبقى نتكلم.

في اللحظة دي، خرجت جنى من المطبخ وهي ماسكة كوب عصير، وعينيها رايحة جاية بينهم بتوتر.

— هو في إيه؟

ألفت بصتلها بعصبية:

— أخوكي وأبوكي عايزين يضيعوا حقكم!

جنى عقدت حاجبها بعدم فهم:

— عشان البنت دي؟

ثم بصت لآدم وقالت بهدوء:

— بصراحة… كلام آدم صح.

ألفت بصتلها بصدمة:

— نعم؟!

جنى قربت وهي تتكلم بهدوء أكتر:

— أنا مش فاهمة انتي رافضة البنت دي ليه أصلًا؟ لو ليها حق تاخده عادي.

ألفت ضحكت بسخرية وهي تشير بإيدها:

— عشان انتي لسه صغيرة ومش فاهمة حاجة.

ثم قربت أكتر وهي تقول بحدة:

— اللي بتدافعوا عنها دي هتورث أكتر منكم وقتها هتعرفوا قيمة كلامي!

جنى اتضايقت فورًا:

— يعني انتي كل اللي فارق معاكي الفلوس؟

— أيوة الفلوس مهمة! ولا عايزاني أفرح إن واحدة جاية من الشارع تشارككم في كل حاجة؟!

الجملة خلت محمد يزعق بغضب:

— ألفت!!

لكن آدم سبق أي كلام وهو يقول بضيق شديد:

— يوه بقى… خلاص.

مرر إيده في شعره بعصبية واضحة.

— أنا ماشي.

ثم بص لأبوه بسرعة:

— بكرة نتكلم في موضوع البحث.

محمد هز راسه بهدوء، بينما ألفت كانت لسه متعصبة.

أما آدم فخد مفاتيحه وخرج من الفيلا كلها قبل ما يسمع أي كلمة زيادة.

---

بعد حوالي نص ساعة…

كان آدم سايق عربيته، والهواء البارد داخل من الشباك نص المفتوح.

عقله كان مصدع.

صوت أمه.

تعب جده.

وموضوع البنت المجهولة اللي قلب البيت كله.

تنهد بضيق وهو يطلع موبايله ويتصل بسيف.

— انت فين؟

جاله صوت سيف الضاحك فورًا:

— أخيرًا افتكرت إن عندك صاحب؟

— متستظرفش… إنتوا فين؟

— في الكافيه المعتاد.

سكت آدم ثانية، ثم قال:

— جاي.

---

بعد شوية…

دخل آدم الكافيه بخطوات هادية.

المكان كان زحمة نسبيًا، وصوت الأغاني الهادية مالي الجو.

أول ما دخل لمح سيف قاعد مع باقي الشلة في آخر الكافيه.

كان معاهم لارا وميرنا.

رفع سيف إيده فورًا:

— أهو النجم وصل.

قرب آدم وقعد وهو يرمي مفاتيحه على الترابيزة بضيق:

— يوم ابن لذينة.

ضحك سيف:

— واضح من وشك.

أما لارا فكانت بتبصله باهتمام:

— مالك متعصب؟

— مشاكل عائلية.

ردها باختصار وهو يسند ضهره للكرسي.

في نفس اللحظة، عدت فيروز من جنب الترابيزة وهي شايلة صينية طلبات.

شعرها كان مربوط بشكل بسيط، وملامحها مرهقة شوية من الشغل، لكنها كانت مركزة.

عين آدم اتحركت تلقائيًا ناحيتها للحظة.

مش باستغراب…

لأنه أصلًا عارف إنها شغالة هنا من أول يوم شافها فيه.

لكن الغريب إنه كل مرة يشوفها فيها هنا، يحس بإحساس مختلف.

كأن صورة البنت اللي في الجامعة، والبنت اللي بتضحك وسط عيلتها، والبنت اللي واقفة تشتغل بهدوء وسط الزحمة… كلهم شخصيات مختلفة لنفس الإنسانة.

أما لارا، فأول ما لاحظت نظراته، بصت ناحية فيروز هي كمان.

ثم ابتسمت بسخرية خفيفة:

— الله… مش دي البنت بتاعة الجامعة.

سيف بص ناحيتها بسرعة:

— آه.

أما ميرنا فقالت وهي تتأمل فيروز من بعيد:

— دي شغالة هنا فعلًا؟

رد سيف عادي:

— أيوة، احنا شفناها هنا 

آدم رفع عينه لسيف بنظرة سريعة، لكن ما علقش.

أما لارا فمالت لقدام وهي تبتسم بخبث:

— طب ما نخليها تيجي تاخد الأوردر.

سيف حس فورًا إنها ناوية على حاجة رخمة.

— لارا بلاش.

لكنها تجاهلته ورفعت إيدها تنادي بصوت واضح:

— لو سمحتي!

رفعت فيروز عينيها تلقائيًا ناحية الصوت.

وأول ما شافت الترابيزة، قلبها اتقبض لحظة.

آدم.

كان قاعد وسطهم بهدوئه المعتاد، لابس قميص أسود وساعته الفضية، وعينه ثابتة عليها بشكل أربكها ثانية قبل ما تتدارك نفسها.

أخدت نفس هادي وتحركت ناحية الترابيزة.

ده شغل.

لازم تتعامل طبيعي.

وقفت قدامهم وهي ماسكة النوتة الصغيرة:

— تحبوا تطلبوا إيه؟

ميرنا بصتلها بابتسامة مصطنعة:

— انتي شغالة هنا من زمان؟

ردت فيروز بهدوء:

— لا… بقالي فترة بسيطة.

أما لارا فبصتلها من فوق لتحت ببطء متعمد.

— غريبة… مكنتش متخيلة إنك فعلًا جرسونة.

فيروز فهمت النبرة فورًا.

لكنها حافظت على هدوئها.

— تحبي أكتب الأوردر؟

لارا ضحكت بخفة وهي تبص لصاحبتها:

— لا بجد… الدنيا غريبة. الصبح في الجامعة وبليل جرسونة.

سيف تنهد بضيق.

أما آدم فرفع عينه بحدة خفيفة ناحية لارا.

واضح إنه بدأ يتضايق.

لكن فيروز سبقته.

ابتسمت بهدوء غريب وقالت:

— الحمد لله… الشغل مش عيب.

الجملة خلت سيف يبتسم تلقائيًا.

أما لارا فاتضايقت أكتر.

فقالت باستفزاز:

— أكيد طبعًا… بس كل واحد بيبقى في المكان اللي شبهه.

الصمت نزل للحظة.

الجملة كانت واضحة جدًا.

لكن اللي صدم آدم…

إن فيروز ما اتهزتش.

بالعكس.

رفعت عينيها مباشرة ناحية لارا وقالت بهدوء ثابت:

— عندك حق فعلًا.

سكتت ثانية، ثم كملت بابتسامة بسيطة:

— عشان كدا أنا مرتاحة هنا وسط ناس محترمة.

سيف شرق في العصير وهو يحاول يكتم ضحكته.

أما ميرنا فاتسعت عينيها بصدمة.

ولارا نفسها اتخرست للحظة.

لكن آدم…

فضل باصلها بدون ما يحس.

في حاجة فيها مختلفة فعلًا.

مشكلتها إنها هادية زيادة…

لكن وقت اللزوم بتعرف تدافع عن نفسها بطريقة تخلي اللي قدامها يبان صغير.

لارا اتعصبت فورًا:

— انتي قصدك إيه؟

لكن آدم اتكلم أخيرًا بصوت بارد حاسم:

— خلاص يا لارا.

بصتله بصدمة:

— نعم؟

— قولت خلاص.

صوته كان واضح إنه قفل الموضوع.

ولأول مرة من بداية السهرة، لارا حسّت إنه واقف ضدها.

وده ضايقها جدًا.

أما فيروز…

فكانت واقفة هادية من برا.

لكن جواها قلبها بيدق بعنف.

لأنها حست بنظرة آدم عليها طول الوقت.

النظرة اللي بقت تربكها بشكل غريب.

قال سيف بسرعة وهو يحاول يعدي الموقف:

— خلاص يا جماعة نطلب بدل ما نجوع.

بدأوا يقولوا الطلبات، بينما فيروز كانت تكتب بهدوء.

لكن طول الوقت…

كانت حاسة بعين آدم عليها.

أما هو…

فكان مستغرب نفسه.

لأنه المفروض إن البنت دي مجرد صدفة قابلها كام مرة.

بس ليه كل مرة يشوفها…

يحس إنه عايز يعرف عنها أكتر؟