نظرة غريبة

الفصل السابع

"نظرة غريبة"

الشمس كانت بدأت تميل للغروب، وساحة الجامعة بقت أهدى شوية بعد انتهاء أغلب المحاضرات.

أما فيروز…

فكانت خارجة من المدرج بسرعة وهي ضامة الكتب لصدرها، وملامحها متوترة وهي تبص للساعة كل شوية.

— يا نهار أبيض… هتأخر.

كانت تقريبًا بتجري وهي تحاول تلحق شيفتها في الكافيه.

شعرها الأسود الطويل كان بيتحرك وراها مع خطواتها السريعة، والهواء بيخبط في وشها بخفة.

وفي الجهة التانية من ساحة الجامعة…

كان آدم واقف مع سيف وشابين تانيين، ماسك مفاتيح عربيته وهو بالكاد مركز في الكلام اللي حواليه.

لكن فجأة…

عينه وقعت عليها.

اتثبت مكانه للحظة وهو شايفها ماشية بسرعة وسط الزحمة.

نفس البنت.

ونفس الإحساس الغريب اللي بيجيله كل ما يشوفها.

ضيّق عينه شوية وهو يتابعها بدون وعي.

سيف لاحظ فورًا.

بص ناحية فيروز، ثم رجع يبص لآدم بمكر:

— لا كدا الموضوع كبر فعلًا.

آدم بعد عينه بسرعة ورد ببرود:

— موضوع إيه؟

ضحك سيف وهو يسند ضهره على العربية:

— البنت اللي كل شوية عينك تروح عليها.

رفع آدم حاجبه باستنكار:

— إنت بتهبد.

— آه طبعًا… وأنا أعمى مثلًا؟

تنهد آدم بضيق وهو يحط إيده في جيبه:

— البنت دي مستفزة بس.

سيف ضحك بخبث:

— يا سلام… ومستفزة لدرجة إنك تفضل تراقبها وهي ماشية؟

بصله آدم بحدة خلت سيف يرفع إيده باستسلام وهو يضحك:

— خلاص يا عم متكلنيش.

لكن رغم كلامه…

آدم رجع بص ناحيتها مرة تانية.

كانت ماشية بسرعة وهي بتزق خصلة شعر ورا ودنها بعفوية.

واضح إنها مستعجلة فعلًا.

ولسبب هو نفسه مش فاهمه…

فضل متابعها بعينه لحد ما اختفت من قدامه.

ثم هز راسه بضيق من نفسه ودخل عربيته.

— يلا يا سيف.

لكن سيف ابتسم بخبث وهو يتمتم لنفسه:

— شكلك وقعت يا صاحبي وأنت مش واخد بالك.

---

بعد حوالي نص ساعة…

كانت فيروز واقفة ورا كاونتر الكافيه وهي بتحاول تاخد نفسها بعد ما وصلت بالعافية.

كريم أول ما شافها قال بضحك:

— إيه يا بنتي؟ كنتي جاية جري؟

ضحكت بخفة وهي تحاول تهدى:

— المواصلات كانت زحمة.

— المهم إنك وصلتي.

اليوم كان هادي بشكل غريب.

مفيش زباين رخمين.

ولا مشاكل.

ولا حتى أي ظهور مفاجئ لآدم.

وده خلا فيروز ترتاح شوية.

كانت بتتحرك بين الطاولات بخفة وهي تبتسم للزبائن بهدوء.

ومع الوقت…

بدأت فعلًا تتعود على المكان.

وفي آخر الكافيه…

كان في راجل كبير في السن قاعد لوحده.

ملامحه هادية وهيبته واضحة، لابس بدلة شيك بسيطة، وشعره الأبيض مرتب بعناية.

لكن عينه كانت متابعها من أول ما دخل.

مش بنظرة مريحة أو غريبة…

لا.

كأنه بيفكر.

كأن في حاجة فيها فكرته بحد تاني.

اقتربت منه فيروز بابتسامتها الهادية:

— حضرتك تحب تطلب إيه؟

فضل باصصلها ثواني قبل ما يرد بهدوء:

— قهوة سادة لو سمحتي.

— حاضر.

تحركت بسرعة، وبعد دقائق رجعت تحط القهوة قدامه.

لكن أول ما همّت تمشي، سمعته بيقول:

— استني يا بنتي.

التفتت له باستغراب بسيط:

— أفندم؟

ابتسم الراجل بخفة وهو يتأملها:

— اسمك إيه؟

اتوترت للحظة بسيطة من السؤال، لكنها ردت بأدب:

— فيروز.

اتسعت عينه للحظة وكأنه الاسم لمس حاجة جواه.

ردد بهدوء:

— فيروز…

ثم ابتسم ابتسامة خفيفة فيها حنين غريب:

— اسم جميل.

ابتسمت بخجل بسيط:

— شكرًا.

فضل باصصلها كام ثانية، قبل ما يقول:

— انتي شبه وحدة كنت أعرفها زمان.

سكتت فيروز للحظة، ثم قالت بلطف:

— أتمنى أكون شبهها في حاجة حلوة.

ضحك الراجل بخفة لأول مرة:

— أكيد.

ولأول مرة من بداية اليوم…

حست فيروز براحة غريبة مع حد غريب عنها.

يمكن بسبب طريقته الهادية.

أو نظرته اللي مكانش فيها شفقة.

بس دفا.

---

بعد حوالي ساعة…

كان الراجل الكبير بيستعد يمشي.

فيروز قربت تساعده وهو يقوم بهدوء، لكنه ابتسم وقال:

— متقلقيش يا بنتي، لسه بعرف أمشي لوحدي.

ضحكت بخفة:

— ربنا يديك الصحة.

تحرك ناحية باب الكافيه ببطء، وفي نفس اللحظة…

دخلت بنت بسرعة وهي باصة في موبايلها بدون ما تنتبه لقدامها.

وخبطت فيه بعنف.

اختل توازن الراجل فجأة وكاد يقع.

لكن فيروز جريت بسرعة ومسكت دراعه قبل ما يقع على الأرض.

شهقت بعصبية وهي تبص للبنت:

— انتي إزاي ماشية كدا؟!

البنت بصتلها ببرود مستفز:

— ماخدتش بالي معلش.

ردت فيروز بعصبية واضحة:

— يعني إيه ماخدتيش بالك؟! دا راجل قد جدك!

الزبائن القريبين بدأوا يبصوا عليهم.

أما البنت فلفت عينيها بملل:

— أوفر أوي يعني.

اتعصبت فيروز أكتر وهي تسند الراجل بحماية واضحة:

— أوفر؟! انتي تقريبًا وقعتيه! لولا ستر ربنا 

البنت بصتلها باستفزاز:

— مالك محموقة كدا ليه؟ قلت سوري

قرب كريم بسرعة يحاول يهدي الموقف:

— خلاص يا جماعة حصل خير.

لكن فيروز كانت متضايقة فعلًا.

مش بتحب قلة الاحترام.

خصوصًا مع الكبار.

فقالت بحدة:

— في ناس محتاجة تتعلم الذوق قبل ما تنزل من بيتها.

البنت بصتلها بغيظ، لكن قبل ما ترد، الراجل الكبير تدخل بهدوء:

— خلاص يا بنتي… محصلش حاجة.

بصتله فيروز بقلق:

— حضرتك كويس؟

ابتسم لها بحنان واضح:

— طول ما في حد محترم زيك كدا يبقي الدنيا لسه بخير.

سكتت فجأة واتكسفت من كلامه.

أما البنت، فتنهدت بضيق ومشت وهي تتمتم بكلمات غاضبة.

فيروز تجاهلتها تمامًا، وركزت مع الراجل وهي تقوله:

— تحب أوصلك او اطلبلك عربية

-- معايا عربية متتعبيش نفسك 

--خلاص اوصلك ليها

في البداية حاول يرفض، لكنها أصرت.

فابتسم باستسلام وهو يهز راسه:

— طيب يا ستي.

---

خرجت معاه برا الكافيه.

الهوا الليلي كان هادي، والشارع أهدى من الأول.

وصلت معاه لعربية سوداء فخمة كانت مستنياه.

السواق نزل بسرعة يفتح الباب، لكن الراجل وقف قبل ما يركب وبص لفيروز بهدوء.

نظراته كانت غريبة…

دافية بشكل مؤلم.

قال بابتسامة خفيفة:

— شكلك بنت ناس ومتربية كويس أوي يا فيروز.

ابتسمت بخجل وهي ترد:

— دا من ذوق حضرتك.

سكت لحظة، وكأنه متردد يقول حاجة.

ثم سألها بهدوء:

— انتي عايشة مع مين يا بنتي؟

السؤال خبطها فجأة.

لكنها حاولت تخبي ارتباكها بسرعة وقالت بابتسامة بسيطة:

— عايشة مع ناس اعتبرهم أهلي.

فضل باصصلها لحظة طويلة…

لحظة خلت قلبه ينقبض بدون سبب واضح.

فيها نفس الملامح.

نفس العيون.

حتى نفس الطريقة الهادية في الكلام.

تنهد بخفة قبل ما يقول:

— خلي بالك من نفسك يا بنتي.

هزت راسها بابتسامة:

— وحضرتك كمان.

ركب العربية أخيرًا.

لكن قبل ما الباب يتقفل…

فضل باصلها ثواني طويلة وكأنه بيحاول يفتكر حاجة ضايعة منه من سنين.

أما فيروز…

فوقفت مكانها تتابع العربية وهي بتتحرك ببطء.

وعقلها مشغول بسؤال واحد…

ليه الراجل ده حسسهـا بإحساس غريب أوي كأنه يعرفها فعلًا؟