كرامة مش للبيع

الفصل العاشر 

"كرامة مش للبيع"

الليل كان هادي نسبيًا داخل الكافيه، والأضواء الصفراء الناعمة منعكسة على الإزاز الكبير، وصوت الأغاني الهادية ماشي في الخلفية بشكل مريح.

وفيروز كانت بتتحرك بين الترابيزات بخفة وسرعة مختلفة تمامًا عن أول يوم.

بقت تحفظ الطلبات أسرع.

تعرف مين طلب إيه.

وتعرف تتعامل مع الزباين بهدوء وثقة أكبر.

حتى خطواتها نفسها اختلفت.

مبقاش فيها التردد القديم.

كانت شايلة صينية مليانة أكواب قهوة وعصاير، وماشية بثبات وهي توزع الطلبات بابتسامة بسيطة محترمة.

كريم كان واقف عند الكاشير بيتابعها، قبل ما يهز راسه بإعجاب وهو يقول لأحد العمال:

— البنت دي اتغيرت جدًا في كام يوم.

ثم بص لفيروز وهو يضحك:

— أهو كدا… بقيتي شاطرة أهو.

ابتسمت بخجل خفيف وهي تحط آخر كوب على الترابيزة:

— الحمد لله.

وفي آخر الكافيه…

كان آدم قاعد مع سيف والشلة بتاعتهم من أكتر من ساعة.

والترابيزة مليانة أكواب ومشروبات وعلب شيبسي وحلويات.

ومن وقت للتاني…

عين آدم كانت بتتحرك ناحية فيروز بدون وعي.

وكان مستغرب فعلًا.

هي نفس البنت اللي أول مرة شافها كانت بتترعش من التوتر؟

دلوقتي ماشية بثقة هادية وكأنها اتعودت على المكان.

حتى لما واحد من الزباين رخّم عليها شوية في الطلب، ردت بابتسامة هادية وأنهت الموضوع من غير ما تتوتر.

وده خلاه يركز معاها أكتر.

أما لارا…

فكانت ملاحظة كل نظرة.

كل مرة آدم عينه تروح ناحية فيروز.

وكل مرة سيف يضحك ويقوله كلمة يرد عليها بعصبية.

وده كان كافي يولع غيرتها.

فمالت ناحية البنت اللي جنبها وهمست:

— البنت دي مستفزة أوي.

ضحكت صاحبتها بخبث:

— شكل آدم مركز معاها زيادة.

اتشد فك لارا فورًا وهي تبص ناحية فيروز بضيق واضح.

دى حتة جرسونة يعني… مش فاهمة واخدة مقلب في نفسها على إيه

في الوقت ده…

كانت فيروز بتقرب من ترابيزة تانية وهي بتكتب أوردر جديد.

شعرها الأسود الطويل مربوط بنص رفعة بسيطة، وملامحها هادية بطريقة ملفتة.

ورغم إنها كانت مرهقة من الشغل…

لكن كان واضح إنها بتحاول تبقى قوية.

بعد حوالي نص ساعة كمان…

الساعة قربت على معاد انتهاء شيفتها.

تنهدت فيروز بهدوء وهي تبص للساعة المعلقة على الحيطة، قبل ما تتحرك ناحية الكاشير.

— كريم، أنا هقفل ترابيزة سبعة وأمشي.

هز راسه:

— تمام يا فيروز.

أخدت دفتر الحسابات، واتحركت ناحية ترابيزة آدم والشلة.

كانوا لسه قاعدين بيضحكوا ويتكلموا بصوت عالي.

وقفت جنب الترابيزة وقالت بأدب هادي:

— بعد إذنكم… اتفضلو الشيك لو سمحتوا، عشان شيفتي خلص ولازم أقفل الحساب

رفعت لارا عينيها ناحيتها، ثم ابتسمت ابتسامة غريبة فيها سخرية واضحة.

— آه طبعًا… أكيد.

مدت إيدها ناحية شنطتها ببطء متعمد، وطلعت شوية فلوس.

أما فيروز ففضلت واقفة بهدوء وهي مستنية.

وفجأة…

لارا رمت الفلوس كلها في وش فيروز مباشرة.

الأوراق طارت في الهوا، وبعضها وقع على الأرض حوالين رجليها.

وفي ثانية…

الصمت ضرب المكان.

اتسعت عيون فيروز بصدمة وهي باصة للبنت بعدم استيعاب.

حتى سيف اعتدل بسرعة وقال بذهول:

— لارا! إيه اللي انتي عملتيه ده؟!

أما آدم…

فوشه اتشد فجأة وهو يبصلها بعدم رضا واضح.

لكن لارا ضحكت وهي تسند ضهرها على الكرسي:

— وإيه يعني؟ ما هي شغالة هنا تقدر تشيلهم وقعو منى غصب عني 

نزلت عيون فيروز ببطء ناحية الفلوس اللي على الأرض.

وقلبها بدأ يدق بعنف.

الإهانة نزلت عليها كأن حد رماها في وشها مش فلوس.

لكنها رفعت وشها تاني بثبات وهي تقول بهدوء مخيف:

— لو سمحت الفلوس هاتيها في إيدي بطريقة محترمة.

لارا رفعت حاجبها بسخرية:

— نعم؟

— اللي وقعتيه على الأرض هاتيه واديني الحساب بشكل محترم.

ضحكت البنت اللي جنبها بخبث:

— يا حرام… دى طلع عندها كرامة.

ردت فيروز بدون ما تبعد عينها عن لارا:

— أيوة عندي.

ملامح لارا بدأت تتشنج بعصبية.

خصوصًا إنها كانت متوقعة إن فيروز توطي وتلم الفلوس في صمت.

لكن وقفتها وثباتها قدامهم استفزوها أكتر.

فقالت ببرود مستفز:

— انزلي لميهم… ده شغلك أصلًا.

ردت فيروز فورًا:

— لا مش شغلي.

— نعم؟

— شغلي إني أشتغل باحترام… مش أتهان.

اتوتر الجو حوالين الترابيزة فورًا.

وسيف بدأ يحس إن الموضوع هيقلب خناقة فعلًا.

أما آدم…

فكان ساكت، لكن عينه ثابتة على فيروز.

ملاحظ إنها رغم الغضب…

إيديها بتترعش بخفة.

بس واقفة.

مكسرتش عينها.

وده خلا حاجة جواه تتحرك بشكل غريب.

لارا قامت من مكانها بعصبية وهي تبصلها من فوق لتحت باحتقار:

— انتي شكلك نسيتي نفسك أوي.

ردت فيروز ببرود:

— بالعكس انا محترماكي لحد دلوقتي 

—انتى حتة واحدة شغالة جرسونة ازاى بتتكلمى معايا كدا؟

الجملة ضربت قلبها بعنف…

لكنها المرة دي ما نزلتش عينها.

بالعكس.

رفعت دقنها أكتر وهي تقول:

— الشغل مش عيب.

ضحكت لارا بسخرية:

— بس قلة الأدب والتربية عيب اوي لما تتكلمي كدا مع زباين المكان 

اتغيرت ملامح فيروز فجأة.

والجرح اللي حاولت تخبيه طول عمرها اترمى في وشها مرة واحدة.

فقالت بصوت منخفض لكنه حاد:

— سمعيني تاني كدا قولتي اى 

لارا قربت أكتر وهي تقول باستفزاز:

— وقعتي على ودانك هقول اي ما يمكن أصلًا محدش عرف يربيكي.

وساعتها…

ردت فيروز بعصبية لأول مرة:

— على الأقل أهلك لو موجودين كانوا عرفوا يربوكي أحسن من كدا.

شهقت البنات بصدمة.

أما لارا فاتجننت تمامًا.

خطفت كوب العصير اللي قدامها فجأة…

ودلقته بالكامل على فيروز.

العصير نزل على شعرها ووشها وهدومها.

واتجمد المكان كله.

شهقة طلعت من أكتر من شخص.

حتى كريم خرج من الكاشير بسرعة لما لمح اللي حصل.

أما فيروز…

ففضلت واقفة ثانية كاملة بدون حركة.

شعرها مبلول.

والعصير بينزل على هدومها ببطء.

وحاجة جواها…

اتكسرت.

لكن بعدها مباشرة…

رفعت وشها ببطء.

وعينيها كانت مليانة غضب ووجع بطريقة خلت حتى آدم يتوتر.

وفجأة…

رفعت إيدها وضربت لارا بالقلم.

الصوت رن في المكان كله.

لارا حطت إيدها على خدها بصدمة وهي تبصلها بعدم استيعاب.

— انتي اتجننتي؟!

ورفعت إيدها بعنف عشان تضربها.

لكن قبل ما إيدها توصل لفيروز…

حد مسك دراعها بقوة.

التفتت فيروز بسرعة وهي نفسها عالي.

واتجمدت.

أسر.

كان واقف بينهم، ماسك دراع لارا بعنف واضح، وعينيه مليانة غضب مرعب.

صوته خرج حاد لأول مرة بالشكل ده:

— إيدك دي لو اتمدت عليها هكسرهالك.

صمت نزل على المكان كله.

أما لارا فحاولت تسحب إيدها بعصبية:

— سيب إيدي!

لكن أسر قرب منها أكتر وقال بغضب بارد:

— انتي مفكرة نفسك مين عشان تهيني حد بالشكل ده؟

ردت بعصبية:

— دي ضربتني!

زعق أسر فجأة:

— بعد ما رميتي الفلوس في وشها ودلقيتي العصير عليها؟!

ملامحه كانت متشنجة بشكل مخيف.

ولأول مرة…

فيروز تشوفه فاقد هدوءه بالشكل ده.

سيف تدخل بسرعة يحاول يهدي الوضع:

— يا جماعة خلاص… حصل خير هي متقصدش

لكن أسر كان مركز بالكامل مع لارا.

وقال بحدة:

— لو عندك مشكلة معاها تحليها باحترام… مش بالطريقة دي.

ردت لارا باستفزاز:

— وانت مالك بيها أصلًا؟

اتشد فك أسر بعنف، لكنه تجاهل السؤال تمامًا.

ثم لف ناحية فيروز.

وأول ما شاف شكلها…

العصير على شعرها وهدومها، والدموع اللي متجمعة في عينيها رغم مقاومتها…

الغضب اللي جواه زاد أكتر.

فخلع الجاكيت بتاعه فورًا، وحطه على كتفها بهدوء.

وقال بصوت أهدى شوية:

— يلا بينا يا فيروز.

همست بتوتر:

— أسر أنا…

— يلا.

صوته كان حاسم بطريقة خلتها تسكت وخدها ومشيوا 

أما كريم فكان واقف متوتر ومش عارف يقول إيه.

وفجأة…

اتكلم آدم لأول مرة بصوت منخفض لكنه واضح:

— اى الى عملتيه دة لولا انك بنت ومقدرش اعملك حاجة كنت بهدلتك على الى عملتيه دة 

بصتله لارا بصدمة:

— آدم!

لكنه كمل بضيق حقيقي:

— مهما كان… اللي عملتيه قلة ادب 

الكلام نزل على لارا كأنه صفعة تانية.

بره الكافيه وبعد ما مشيو اسر وفيروز 

أول ما خرجوا…

الهوا البارد خبط في وشها.

لكنها فجأة حست إنها مش قادرة تمسك نفسها أكتر.

عينيها دمعت غصب عنها.

اتوتر أسر فورًا وهو يقف قدامها:

— فيروز؟

هزت راسها بسرعة وهي تمسح دموعها بعناد:

— أنا كويسة.

لكن صوتها المكسور فضحها.

اتشد فك أسر بعصبية وهو يبصلها.

حاسس بغضب رهيب جواه.

مش بس عشان اللي حصل…

لكن عشان فكرة إن حد أهانها بالشكل ده وجعتها أكتر مما كانت بتحاول تبين.

قال بهدوء وهو يحاول يسيطر على عصبيته:

— محدش له حق يهينك.

نزلت عينيها للأرض وهي تضم الجاكيت حواليها أكتر.

وفجأة…

حست بإيده بتمسك كتفها بخفة.

رفع وشها ناحيته وقال بثبات:

— فاهمة؟ انتي مش أقل من حد.