إنتِ تاني؟

الفصل السادس

إنت تاني 

صوت الدكاترة والطلبة كان مالي ساحة الجامعة، والكل بيتحرك بسرعة بين المحاضرات وكأن اليوم بيجري من غير ما يستنى حد.

أما فيروز…

فكانت ماشية وهي ضامة الكتب لصدرها، وشعرها الأسود الطويل بيتحرك مع الهوا الخفيف.

من بعد اللي حصل في الكافيه وهي بتحاول تركز في أي حاجة غير آدم.

لكن الغريب…

إنه كان بيظهر في دماغها غصب عنها.

طريقته المستفزة.

نظراته.

والإهانة اللي حسّتها منه.

هزت راسها بضيق وهي تتمتم لنفسها:

— يا رب ما أشوفه تاني.

وفي نفس اللحظة تقريبًا…

كانت ماشية بسرعة وهي باصة في الورق اللي بإيدها، قبل ما فجأة تخبط في جسم صلب بقوة.

شهقت بفزع وهي تحس نفسها هتقع، لكن إيد قوية مسكتها بسرعة من دراعها قبل ما تقع على الأرض.

الكتب وقعت من إيدها واتبعترت حواليهم.

رفعت فيروز وشها بعصبية فورًا وهي بتقول بانفعال:

— الله! مش تحاسب؟! في حد يمشي من غير ما يبص قدامه؟!

الشاب اللي قدامها كان لابس نضارة سودا، وملامحه متضايقة أصلًا وهو كان بيبص للي وراه بعصبية:

— بقولك متدخلش في اللي ملكش فيه يا سيف!

صوت مألوف.

بشكل خلى قلب فيروز يقف لحظة.

لكنها لسه مش مستوعبة.

سيف اللي كان واقف وراه قال بضيق:

— يا بني اهدى شوية، كل يوم خناق!

رد بعصبية وهو يعدل الجاكيت بتاعه:

— ما—

وسكت فجأة.

لأنه أخيرًا بص للبنت اللي ماسك دراعها.

أما هي…

فاتجمدت مكانها أول ما شافته يشيل النضارة من على عينه.

واتسعت عينيها بصدمة:

— هو إنت؟!

آدم رفع حاجبه بدهشة واضحة، وكأنه هو كمان مكانش متوقع يشوفها.

ثواني وعدت وهم باصين لبعض بصمت.

ثم قال ببرود مستفز:

— انتي ورايا ورايا ولا إيه؟

فتحت فيروز بوقها بصدمة من بجاحته.

— نعم؟!

سيف حط إيده على وشه بيأس:

— يا نهار أسود… بدأنا.

لكن آدم كمل وهو يبصلها باستفزاز خفيف:

— يعني الكافيه وسكت كمان جاية ورايا الجامعة

ردت فورًا بعصبية:

— الجامعة انت فاكراني بجري وراك دي جامعتي أصلًا على فكرة!

رفع آدم حاجبه بعدم اقتناع:

— صدفة غريبة.

ضيقت عينيها وهي تسحب دراعها من إيده بسرعة:

— والله الغريب إنك متخيل إن العالم كله بيلف حواليك.

سيف حاول يكتم ضحكته بالعافية.

أما البنتين اللي كانوا واقفين معاهم، فبصوا لبعض بدهشة.

واحدة منهم، شعرها أشقر ومكياجها واضح، قربت من آدم وهي تقول بملل:

— آدم يلا بقى، إحنا متأخرين.

لكن عينيها كانت مثبتة على فيروز من فوق لتحت بنظرة تقييم واضحة.

آدم تجاهل كلامها وهو لسه باصص لفيروز.

الغريب إنها المرة دي مش خايفة.

متعصبة آه…

لكن واقفة قدامه بثبات.

وده استفزه وشده في نفس الوقت.

انحنت فيروز بسرعة تجمع الكتب اللي وقعت، وهي بتتمتم بضيق:

— ناس مستفزة بشكل…

لكن قبل ما تلحق تمسك آخر كتاب، آدم انحنى قبليها وأخده من الأرض.

رفعت عينها له تلقائيًا.

ثانية صمت عدت بينهم.

ثم ناولها الكتاب وهو يقول بهدوء أخف شوية:

— اتفضلي.

أخدته منه بسرعة وكأنها خايفة تلمسه أصلًا.

وقالت بحدة:

— شكرًا… مش محتاجة مساعدتك.

ابتسم آدم بسخرية خفيفة:

— واضح.

وقبل ما ترد، البنت الشقرا قربت أكتر وهي تلف إيدها حوالين دراع آدم بطريقة تلقائية.

— حبيبي يلا بقى.

الكلمة خلت فيروز تسكت لحظة بدون سبب مفهوم.

أما آدم، فبص للبنت بضيق خفيف كأنه مش طايق الحركة، لكنه ما قالش حاجة.

البنت وجهت نظرها لفيروز بابتسامة مصطنعة:

— واضح إنك بتاعة مشاكل ومع مين ملقتيش غير آدم من أول ما عرفتيه وهتقضيها مشاكل 

ردت فيروز ببرود:

— أنا اللي عاملة مشاكل؟

سيف كتم ضحكته مرة تانية، بينما آدم بص بعيد وهو يحاول يخفي ابتسامة صغيرة ظهرت غصب عنه.

لكن البنت لاحظتها.

ولاحظت كمان إن آدم مركز مع فيروز أكتر من الطبيعي.

وده ضايقها فورًا.

قالت بنبرة حادة شوية:

— يلا يا آدم.

لكن قبل ما يتحرك، بص آدم لفيروز مرة أخيرة وقال باستفزاز:

— المرة الجاية ابقي تبصي قدامك وانتي ماشية.

اتفتحت عينيها بصدمة:

— أنا؟! دا إنت اللي كنت هتدوسني أصلًا وتوقعني

ابتسم بخفة لأول مرة:

— وما وقعتيش اهو

ثم لبس النضارة تاني واستدار يمشي.

أما فيروز ففضلت باصة لطيفه بعدم استيعاب.

مستفز.

بجح.

ومتكبر بشكل يخنق.

لكن…

ليه قلبها بيدق بالشكل ده؟

— انتي كويسة؟

صوت بنت قطع أفكارها.

التفتت لواحدة من زميلاتها في الجامعة كانت واقفة قريب.

هزت راسها بسرعة:

— أيوة.

لكن قبل ما تتحرك…

حست بنظرة قوية عليها.

رفعت عينيها تلقائيًا.

ولقت البنت الشقرا واقفة بعيد شوية جنب آدم، لكنها باصة عليها هي.

نظرة مليانة ضيق وغيرة واضحة.

وكأنها بالفعل حطتها في دماغها.

أما آدم…

فكان ماشي مع سيف، لكن عقله مكانش معاهم.

سيف بصله فجأة بمكر:

— إنت مبتبقاش كدا غير لما حد يشدك.

رد آدم ببرود:

— متخرفش.

ضحك سيف:

— آه طبعًا… وعشان كدا فضلت باصص للبنت خمس دقايق.

وقف آدم لحظة، ثم قال بضيق:

— البنت دي مستفزة.

— وأنت عاجبك الاستفزاز غالبًا.

بصله آدم بحدة، لكن سيف ضحك وهو يكمل مشي.

أما آدم…

فالتفت بدون وعي يبص وراه.

كانت فيروز لسه واقفة مكانها، ضامة الكتب لصدرها والهوا بيحرك شعرها وهي متضايقة.

وعلى الرغم من كل حاجة…

ماقدرش يمنع نفسه من إنه يفضل باصلها ثواني زيادة. ومستغرب من الصدف الى بتجمعه بيها يشوفها 3 مرات فى يومين بس