صدفة مش في وقتها

الفصل الخامس

"صدفة مش في وقتها"

طول الطريق للبيت، كانت فيروز ماشية بخطوات سريعة وهي ضامة الجاكيت عليها بقوة، كأنها بتحاول تهرب من الإحساس اللي مخنقها.

الهواء البارد كان بيخبط في وشها، لكن اللي جواها كان أتقل بكتير.

صوت آدم وهو بيزعقلها قدام الناس لسه بيرن في ودانها.

"هو أي حد بقى يشتغل وخلاص؟"

غمضت عينيها للحظة وهي تكمل مشي.

ليه كلامه وجعها بالشكل ده؟

هو مجرد شخص غريب.

مجرد زبون.

لكن الحقيقة اللي كانت بتحاول تهرب منها… إن نظراته كانت شبه نظرات ناس كتير شافتهم طول عمرها.

النظرة اللي بتحسسها إنها أقل.

وصلت البيت أخيرًا، وطلعت السلم بسرعة من غير حتى ما ترفع عينيها.

أول ما فتحت الباب، دخلت بهدوء وهي بتحاول تعدي ناحية أوضتها بسرعة.

لكن صوت دينا سبقها:

— فيروووز! جيتي؟

هزت راسها بخفة من غير ما تبصلها:

— أيوة.

وكان واضح جدًا إن صوتها مش طبيعي.

دينا عقدت حواجبها باستغراب وهي تلاحظ وشها الشاحب وعينيها الحمرا، لكنها قبل ما تسأل، كانت فيروز دخلت أوضتها وقفلت الباب بهدوء.

فضلت دينا باصة للباب ثواني.

— هي مالها؟

خرجت مدام ناهد من المطبخ وقتها وهي ماسكة كوب شاي:

— مين؟

— فيروز… شكلها مخنوقة أوي.

بصت ناهد ناحية الأوضة بقلق خفيف، ثم قالت بهدوء:

— يمكن تعبانة من الشغل.

لكن قلبها مكانش مطمن.

---

جوا الأوضة…

أول ما قفلت الباب، سندت فيروز ضهرها عليه وغمضت عينيها بتعب.

شعرها الأسود الطويل كان مبعثر شوية بسبب الهوا، فرفعته بإيد مرتعشة وربطته بسرعة وهي بتحاول تهدى.

رمت الشنطة على السرير، قبل ما تقعد على الأرض وهي تضم ركبتها لصدرها.

دموعها كانت قريبة تنزل، لكنها كانت بتحاربها بعناد.

مش هتعيط.

مش كل مرة حد يكسرها تنهار بالشكل ده.

لكن صوت آدم وهو بيزعقلها قدام الناس كان بيرجع في دماغها غصب عنها.

والأسوأ من صوته…

إنه خلاها تحس بنفس الإحساس القديم.

إحساس البنت اللي ملهاش قيمة.

خبط خفيف قطع أفكارها.

— فيروز؟

كان صوت دينا.

مسحت وشها بسرعة وردت:

— أيوة؟

دخلت دينا بحذر وهي ماسكة كيس شيبسي وعصير.

بمجرد ما شافت قعدتها، قلبها اتقبض.

قربت منها بسرعة وقعدت جنبها على الأرض:

— مالك بس؟

هزت فيروز راسها وهي تحاول تبتسم:

— مفيش… مرهقة شوية.

ضيقت دينا عينيها بعدم اقتناع:

— لا، في.

لكن فيروز هربت بعينيها بعيد:

— بجد مفيش حاجة.

سكتت دينا شوية، قبل ما تقول فجأة وهي بتحاول تغير الجو:

— طب تعرفي إنك لو فضلتي مكشرة كدا هتشيبي بدري؟

بصتلها فيروز باستغراب، فعملت دينا نفسها خبيرة تجميل:

— آه والله، الزعل بيجيب تجاعيد… وأنا كأخت محترمة لازم أحافظ على جمالك.

طلعت من فيروز ضحكة صغيرة رغماً عنها.

فابتسمت دينا بانتصار:

— أهوو! أخيرًا ضحكتي.

هزت فيروز راسها بيأس وهي تمسح تحت عينيها بسرعة.

وفجأة…

اتفتح الباب بدون خبط.

ودخل أسر وهو ماسك كوب قهوة.

وقف لحظة أول ما شافهم، ثم قال ببرود هادي:

— هو في اجتماع وأنا مش عارف؟

ردت دينا بسرعة:

— لا، بحاول أصلح نفسية الآنسة المكتئبة دي.

عيني أسر اتحركت تلقائيًا ناحية فيروز.

لاحظ فورًا إنها كانت بتعيط.

ملامحه هديت بدون ما يحس، وقرب حط القهوة على المكتب.

— أول أسبوع شغل بيبقى مرهق عادي.

رفعت فيروز عينيها له للحظة، ثم نزلتهم بسرعة.

قالت بخفوت:

— يمكن.

سكت أسر ثواني، قبل ما يقول:

— متضغطيش على نفسك أوي.

الجملة كانت بسيطة.

لكن الغريب إنها لمست قلبها.

لأن طريقته مكانش فيها شفقة.

ولا تقليل.

بس هدوء.

وفجأة دخلت مدام ناهد هي كمان وهي باصة لهم باستغراب:

— الله! هو كلكم هتقعدو فى الأوضة عندكم هنا النهارده؟

ضحكت دينا فورًا:

— بنحاول نخرجها من المود الزفت اللي هي فيه.

اقتربت ناهد من فيروز وقعدت جنبها، ثم رفعت وشها بحنان:

— بصيلي كدا.

رفعت فيروز عينيها بالعافية.

ابتسمت ناهد وهي تمرر إيدها على شعرها:

— طبيعي تتعبي وتتوتري في الأول… بس انتي شاطرة وهتتعلمي بسرعة.

نزلت عيون فيروز للأرض وهي تهمس:

— أتمنى.

سكتت ناهد لحظة، ثم قالت فجأة:

— خلاص، قوموا البسوا.

رفعت دينا راسها بحماس:

— هنخرج؟!

— أيوة، بدل الكآبة دي.

حاولت فيروز ترفض فورًا:

— لا والله مش عايزة—

لكن دينا قاطعتها وهي تسحبها من إيدها:

— لا لا لا، مفيش رفض.

حتى أسر قال بهدوء:

— الخروج هيحسن مودك شوية.

بصتلهم فيروز بتردد.

الغريب إنها لأول مرة تحس إن في ناس فعلًا مهتمة بزعلها.

وده لوحده كان كفاية يخلي قلبها يلين.

---

بعد ساعة…

كانت واقفة قدام المراية بتلبس جاكيتها البيج الخفيف.

شعرها الأسود نازل على ضهرها بنعومة، وعينيها لسه فيهم أثر تعب بسيط رغم إنها حاولت تخفيه.

خرجت من أوضتها، فرفعت دينا حاجبها بإعجاب:

— يا نهار أبيض… هو إحنا خارجين مع موديل؟

اتكسفت فيروز فورًا:

— اسكتي بقى.

أما أسر، فكان واقف عند باب الشقة، لكنه سكت لحظة أول ما شافها.

مش عارف ليه…

لكنها كانت جميلة بشكل هادي يخطف الانتباه بدون مجهود.

أبعد عينه بسرعة وهو يقول:

— يلا عشان متأخرين.

---

كان المكان اللي خرجوا له مفتوح على النيل، مليان أضواء خافتة وصوت أغاني هادية.

الهوا كان لطيف، والمكان مليان ناس بتضحك وتتصور.

دينا كانت بتحكي بدون توقف كعادتها، ومدام ناهد بتضحك عليها، أما أسر فكان ساكت أغلب الوقت لكنه متابع فيروز بهدوء من وقت للتاني.

أما هي…

فبدأت تهدى فعلًا.

يمكن لأنها لأول مرة تخرج بالشكل ده.

كعيلة.

مش مجرد بنت ملهاش مكان.

ضحكت بخفة على هزار دينا، فانتبه أسر تلقائيًا لضحكتها.

واستغرب.

لأنها وهي مرتاحة… كانت مختلفة تمامًا.

أهدى.

وأجمل.

وفجأة…

وقفت عربية سوداء فخمة قريب من المكان.

نزل منها مجموعة شباب وبنات وسط صوت ضحك عالي.

وفي وسطهم…

آدم.

كان لابس جاكيت أسود، وشعره مرتب بعشوائية جذابة، وماشي وهو بيتكلم مع سيف واللي حواليه.

لكن وهو بيعدّي بعينه على المكان كله…

نظره اتثبت فجأة.

توقف لحظة كأنه مش مصدق اللي شايفه.

عينه رجعت تاني على نفس النقطة…

فيروز.

كانت قاعدة وسط دينا ومدام ناهد، وشعرها بيتحرك مع الهوا وهي بتضحك بخفة، ملامحها هادية ومختلفة تمامًا عن الصورة اللي في دماغه عنها.

مش البنت اللي كانت واقفة قدامه بتتهز من الإحراج في الكافيه.

دي حد تاني خالص.

آدم ضيق عينه شوية، كأنه بيحاول يتأكد إنه مش بيتخيل.

وفي نفس اللحظة…

ميل ناحيه سيف اللي جنبه وقال بصوت منخفض وهو لسه عينه عليها:

— مش دي البنت بتاعة الكافيه؟

سيف بص ناحية اللي بيبص عليها، وبعدين رفع حاجبه باستغراب:

— آه… هي فعلاً.

سكت لحظة، وبعدين ضحك بخفة وهو بيهز راسه:

— إزاي جاية مكان زي ده؟ واضح إن المكان ده مش مستواها خالص.

لكن آدم ما ردش.

كان لسه مركز معاها هي بس.

مش قادر يفهم الإحساس اللي اتسلل جواه فجأة…

مزيج بين الاستغراب والانزعاج.

خصوصًا لما لاحظ إنها بتضحك ولا كان حاجة حصلت

الضحكة اللي خلتها تبان أبعد ما تكون عن صورة البنت المنكسرة اللي شافها قبل كده.

وفي نفس الوقت…

حس بشيء غريب جواه وهو شايفها وسطهم كأنها بتنتمي للمكان ده رغم كل حاجة.

شد على إيده بهدوء، وبص قدامه بسرعة كأنه بيهرب من التفكير.

لكن قبل ما يمشي…

بص لها نظرة أخيرة طويلة…

وبعدين اتحرك مع أصحابه من غير ما يقول حاجة تانية.

وفي نفس اللحظة…

من غير ما تحس فيروز، ان في عين بتراقبها من بعيد… وبتحاول تفهم هو ليه مش طالع من دماغها