الفصل الثامن

"لقد أثار حبيبي قلبي بصوته،

 وتركني فريسة لقلقى وتلهفي،

 إنه يسكن قريبًا من بيت والدتي،

 ومع ذلك فلا أعرف كيف أذهب نحوه،

 ربما تستطيع أمي أن تتصرف حيال ذلك،

 ويجب أن أتحدث معها وأبوح لها،

 إنه لا يعلم برغبتي في أن آخذه بين أحضاني،

 ولا يعرف بما دفعني للإفصاح بسري لأمي،

 إن قلبي يسرع في دقاته عندما أفكر في حبي،

 إنه ينتفض في مكانه،

 لقد أصبحت لا أعرف كيف أرتدي ملابسي،

 ولا أضع المساحيق حول عيني 

ولا أتعطر أبدًا بالروائح الذكية"

"شعر فرعوني"

❈-❈-❈

وصل منزله يترنح في الثالثة صباحًا، دخل غرفته فوجدها تغط في نوم عميق من إرهاق اليوم، فنظر إلى هيئتها الغير مغرية بالنسبة إليه بامتعاض شديد، فقام بتبديل ملابسه بصعوبة شديدة نظرًا لحالة السُكْر التي يعاني منها، وحاول أن يوقظها أكثر من مرة ولكنها لم تستجب له فقام بلكزها في كتفها بقوة نوعا ما فاستيقظت مفزوعة لا تدري أين هي، وأخذت تهذي بكلمات غير مفهومة وكأنها لازالت نائمة:

- إيه؟ فين؟ الدوا ناقص فيه البديل.

 قلب عينيه بملل على حالتها هذه وتحدث بنفاذ صبر وهو ينظر إليها بتقزز من أعلى إلى أسفل:

- إيه ساعة علشان تصحي؟ وإيه القرف اللي انتي لابساه ده؟ في واحدة تنام جمب جوزها بالمنظر ده؟

حاولت استيعاب حديثه ولكنها فشلت في ذلك فهي لازالت لم تستيقظ بشكل كامل، فعادت للنوم مرة أخرى وقالت وهي تضع الغطاء على وجهها:

- طيب ماشي.

استشاط غضبا من طريقتها هذه وقام بكشف الغطاء عنها وتحدث بغضب وصوت عالٍ يظهر عليه علامات السُكْر:

: لا بقولك إيه اصحي كده وفوقيلي مش كل ماجي ألاقيكي نايمة دي مبقتش عيشة دي.

استيقظت على صوته الجهوري وجلست على الفراش ثم قامت بالمسح على وجهها أكثر من مرة وفركت عينيها علها تستطيع التركيز لتعلم ما الذي يريده في ذلك الوقت المتأخر وتحدثت وعينيها نصف مغلقة لا تقوى على فتحهما بشكل كامل:

- خير يا أحمد في إيه؟ بتصحيني في الوقت ده ليه؟ حرام عليك يا أخي دنا لسة نايمة مكملتش ساعتين بعد ما طلع عيني طول النهار وما صدقت أروح في النوم.

جلس جوارها وقام بتحريك إصبعه ببطء على ذراعها صعودا وهبوطا وتحدث بصوت منخفض وعينيه تملؤها الرغبة:

- اصحي يا دودو بقى متبوظيش اليوم دا حتى النهاردة الخميس.

أعقب قوله بغمزة من إحدى عينيه ثم أكمل حديثه وهو يحاول فك أزرار منامتها:

- قومي يلا البسي البيبي دول اللي بحبه وحطي أي مكياج وبرفان ريحته حلوة كده وتعالي علشان عايزك.

جحظت عيناها وذهب النعاس الذي كانت تشعر به فالتفتت تنظر إليه بتأهب وقامت بالإمساك بيديه لتوقفه عما يفعل ثم تحدثت من بين أسنانها:

- بذمتك انت عندك دم جاي سكران و بتطوح وعايز تصحيني من النوم  علشان مزاجك مش مكفيك تعب اليوم ما بين الشغل والبيت والولاد وانت جاي من برا عايز تعدل مزاجك وخلاص.

ثم تذكرت ما حدث في آخر مكالمة هاتفية بينهما فاعتدلت لتكون مقابلة له وتحدثت بغضب وصوت عالٍ نسبيًا:

- وبعدين تعالى هنا انت نسيت إنك قفلت السكة في وشي بعد ما سمعتني كلام زي الزفت وتقولي لو مش عاجبك اقعدي من الشغل هو انا بشتغل علشان مين؟ مش ليك انت ولأولادك، منا لو كنت لقيتك بتشتغل و متحمل مسؤلية البيت مكنتش اضطريت اشتغل صبح وليل علشان أكفي طلبات ولادك وما نمدش إدينا لأهلك أكتر من كدا كفاية انهم شايلين مصاريف المدارس وفي الآخر تقولي مش مسؤوليتي اني أجيب الولاد أمال مسؤولية مين؟ 

امتلأت عيناها بالدموع وهي تتحدث بأسف على ما وصل إليه الحال بينهما:

- على العموم دا العادي بتاعك إيه الجديد طول عمرك مبتقدرش أي حاجة بعملها لو سمحت اطفي النور عشان عايزة انام.

لم يصدق ما تفوهت به فهو اعتاد على صمتها وتنفيذ ما يريد دون قيد أو شرط ولكن فيما يبدوا أنه قد تهاون معها أكثر من اللازم فسمحت لنفسها أن تتحدث معه بتلك الطريقة وكأن الأدوار قد قلبت وأصبحت هي الرجل لا هو لمجرد أنه لا يعمل وهنا لم يتمالك نفسه وقام بصفعها بقوة لدرجة أن تساقطت قطرات الدماء من فمها وصرخ بها بصوته الجهوري:

- انتي ازاي تسمحي لنفسك تكلميني بالطريقة دي؟ الظاهر اني دلعتك زياده عن اللزوم بس خلاص من هنا ورايح المعاملة هتتغير خالص علشان تتعلمي تكلميني إزاي.

أشار إليها من اعلى إلى أسفل في تقزز واضح:

- جاتك القرف في شكلك هو دا منظر يتبصله أصلًا انتي تحمدي ربنا إني كنت عايزك بمنظرك اللي يسد النفس ده لكن هقول إيه ست فقر مالهاش في الطيب نصيب.

قال تلك الكلمات وخرج من الغرفة صافعا الباب خلفه بقوة وهو يكيل لها الإهانات ويسبها بابشع الألفاظ  فأغمضت عيناها ووضعت يدها على وجهها مكان صفعته ثم أخذت تبكي في صمت وحمدت ربها أن طفليها ليسا في المنزل ولم يسمعوا إهانتها كالعادة.

❈-❈-❈

ذهب لغرفة أطفاله مستغلًا عدم وجودهما في المنزل وكان في قمة غضبه يدور حول نفسه تارة ويسبها تارة أخرى وعندما هدأ قليلًا قام بمهاتفة وعد على أمل أن تكون لازالت مستيقظة حتى تطفئ تلك النيران المشتعلة في جسده.

وكأنها كانت تنتظر تلك المكالمة جاءه الرد سريعا ولكن صوتها كان مختنق بالبكاء:

- أيوة يا أحمد كويس انك كلمتني كنت عايزة أكلمك من مدة بس خوفت تكون نمت.

تعجب كثيرا من طريقتها تلك ولكنه تصنع الاهتمام ورد عليها بلهفة قائلا:

- مالك يا حبيبتي؟ انتي معيطة ولا إيه؟ في حاجة حصلت؟ طمنيني في حد زعلك علشان اتأخرتي؟

تحدثت وهي تهز رأسها يمينًا ويسارا وكأنه يراها لتنفي ذلك الاعتقاد لديه وعقبت قائلة:

- لا يا حبيبي متقلقش محدش زعلني ولا حاجة بس عهد أختي من الصبح مش عارفين نوصلها ومبتردش على موبايلها، كان الأول بيدي جرس  ومحدش بيرد وبعد كدا اتقفل واحنا منعرفش حد من زمايلها نسأله عنها ومش عارفين نعمل إيه.

قالت تلك الكلمات وأخذت تبكي قلقًا على شقيقتها وأكملت من بين شهقاتها:

- أنا قلبي مقبوض وقلقانة عليها أوي وخايفة يكون جرالها حاجة.

أحس بالكثير من الإحباط من حديثها هذا وأخذ يتمتم في نفسه:

-  ما هي كانت ناقصة نكدك انتي كمان يختي شكل الليلة هتبوظ ولا إيه؟

حاول تهدئتها قليلًا لكي يستطيع أن يصل لما يريد فلو ظلت على تلك الحالة ستضيع الليلة سدى.

- اهدي بس يا قلبي متخافيش إن شاء الله تكون بخير  ومفيش حاجة حصلت لها يمكن انشغلت أو الموبايل حصله حاجة انتي مش بتقولي أن البعثة بتاعتها اكتشفوا مقبرة جديدة النهاردة.

ردت عليه من بين شهقاتها:

- أيوة كل القنوات عمالة بتذيع الخبر من الصبح بس برضه بيقولوا كلام عن تعب رئيس البعثة ودخوله المستشفى وان الشغل وقف في المقبرة ومن ساعتها عهد مختفية ومش عارفين إيه اللي حصل.

- لا متقلقيش هي أكيد مش فاضية وبتعمل ١٠٠ حاجة خصوصًا بعد اللي حصل ده وممكن الموبايل فصل شحن وهي مخدتش بالها روقي كدا واهدي وانتوا الصبح هتلاقوها بتكلمكم بنفسها.