الفصل التاسع والأربعون

بعد مدة ليست بالقليلة بعد حديث الفتيات كانوا يتحدثون بالداخل بمفردهم يتشاورون في هذا الأمر، مع قلق شديد ينهش قلوبهم عن كون هذا الخاطف لا زال طليقا ولم يعلم عنه شيء، يقطع حديثهم وسيل أفكارهم رنين الهاتف..

احمد: مين يا حسام؟ !

حسام: ده سليم، اكيد بيرن عليا عشان اروح اجيب والده من المطار، أكيد هما على وصول

مروان: سليم ده الشريك الجديد؟ !

حسام: أيوة هو، بس شخصية محترمة، راجل اد كلمته، وانا بحترمه جدا

أحمد: معاك حق، مجال رجال الأعمال صعب دلوقتى تلاقى شخصية زي سليم، على العموم روح انت هاتهم الأول يا حسام هو معتمد عليك، وخلي ايمان وطنط فاطمة هنا على ما ترجع

حسام: تمام، يدوب الحق اوصل انا، سلام

يغادر ويبقى احمد ومران بالداخل يتناقشان حول كيفية حماية الصغار من التعرض للحادث مرة أخرى، وبعد قليل من الوقت كان قد وصل حسام للمطار بانتظار خروج عائلة السيد مصطفى والد سليم، لم تمر سوى دقائق معدودة وقد ظهروا في الأنحاء، يتجه لاستقبالهم لمعرفته السابقة به عن طريق العمل،

حسام: وهو يصافحه، حمدا لله على السلامة يا مصطفى بيه، نورتوا مصر

مصطفى وهو يصافحه بابتسامة: منورة بأهلها يا حسام يا ابني، معلش تعبناك معانا

حسام: ولا تعب ولا حاجة، متقولش كدة حضرتك في مقام والدي ده غير ان سليم صديق عزيز، نورتي يا طنط، ازيك يا انسة هنا،

بعد الترحيب بعضهم البعض استقلوا السيارة،

لم يمر وقت طويل وكانوا قد وصلوا وجهتهم ،منزلهم القديم الذي يحمل ذكريات الماضي، منزل كبير بحديقة واسعة تحفه من جميع الجهات بأشجارها الخضراء اليانعة التي تدل على الاهتمام البالغ بها، والورود المزهرة بألوانها المتعددة التي تخطف الأنظار، وتسلب اللب، والعشب الأخضر الذي يفترش الأنحاء كفراش يبطن أرضها المزهرة، يقطع تأملهم صوت حسام وهو يرحب بهم عند وصولهم: حمدا لله على السلامة يا جماعة

ليهم الجميع بالنزول تباعا وهم يتأملون منزلهم الذي تركوه منذ زمن وها قد عادوا لمنبع ذكرياتهم مرة أخرى،

حسام: حمدا لله على السلامة مرة ثانية يا جماعة، استأذن انا عشان لازم اروح اجيب المدام ووالدتي

مصطفى باعتذار: معلش يا ابني عطلناك

حسام: لا ولا عطلة ولا حاجة، استأذن انا ولو حضرتك احتاجت حاجة كلمني، بعد إذنكم

يغادر وتبقي العائلة تشرد الأم للماضي، سنوات مضت لكن هذا اليوم لازال يتجدد أمامها بذكرياته الجميلة كأنه اليوم، مجموعة من الصغار يلعبن ويلهون على العشب الأخضر، والكبار يعدون حفلة الشواء بجو مليء بالحب والألفة، تفق من شرودها على ربتة من يد زوجها يحثها على الدخول، تمسح دمعة فرت سريعا من مقلتيها، يتجهون للداخل وسط صخب هنا وفرحتها بالمنزل الذي شعرت بالحنين إليه، وومضة لمشهد محبب جعل قلبها ينبض بالفرحة،

هنا: تقول بفرحة وهي تدور ببهو المنزل، الله على الدفا اللي هنا يا بابا، اول مرة احس بالراحة كدة يا ماما

فاطمة: لازم تحسي بالراحة والدفا يا هنا، مش ده البيت اللي اتولدتي وعشتي فيه أجمل أيام طفولتك

هنا: بس انا يا ماما مش فاكرة حاجة غير شوية صور وخلاص مش واضحة

مصطفى: اكيد لازم تكون مش واضحة يا هنا، انتي كنتي صغيرة لسة، يلا نطلع نرتاح شوية لأني بجد تعبت من السفر

هنا: خلاص يا بابا انا هاطلع استكشف واختار أوضة حلوة، وشرحة وبرحة كدة قبل الهكسوس ما يجوا

يمسد على يد زوجته ويحثها على الصعود معه حتى تهدأ قليلا من سيل الذكريات التي تدفقت لقلبها كضخ القلب للدماء

مصطفى: اهدى عشان خاطري، بإذن الله كل حاجة ترجع زي الأول واحسن

تومئ برأسها ويصعدون للراحة قليلا

*******************************

على الجانب الآخر كان يقف بشرفة غرفته يتطلع للفراغ حوله، يتراءى للناظر أنه يستمتع بالمظهر الخلاب أمامه، لكنه أبعد ما يكون عن التمتع بما يراه، يشعر أن القادم ليس بالأمر السهل، لكن لابد من تنفيذ رغبة والده لأن هذا الأمر الصحيح، يكاد يجزم أن الماضي لن يتركهم يهنئون، يفق من شروده على صوت هاتفه يعلوا بجواره ينبأه بخبر وصول عائلته بسلام إلى موطنهم،

سليم: الو، أيوة يا حسام

حسام: تمام يا صاحبي الجماعة وصلوا بالسلامة، عقبالك انت كمان لما اجي اخدك من المطار

سليم بابتسامة: تسلم يا صاحبي مردودة لك ان شاء الله، وبعدين متقلقش هكون عندك قريب جدا بأمر الله، وانت اللي تيجي تخدني كمان

حسام: يا راجل، سواق حضرتك انا

سليم: بضحكة، لا صاحبي يا ابو الصحاب

حسام: طبعا يا سليم

سليم: احمد عامل ايه؟ سلم لي عليه كتير

حسام: كويس شوية مشاكل كدة بس ربنا ستر الحمد لله

سليم: مشاكل ايه!

حسام: موضوع كدة لما تيجي ابقي اقولك عليه، يلا سلام بقي دلوقتى، هكلمك بعدين

سليم: تمام، سلام

بعد غلق الهاتف يعود لشروده مرة أخرى

في هذا المنزل البسيط كانت تجلس بانتظار عودة زوجها من الخارج، هذه هي عادته في مثل هذا اليوم من كل عام، يبقى بالخارج ولايعود سوى في وقت متأخر، بعد وهلة من الوقت كان يدخل المنزل بخطي واسعة، تلاحظ هي هذا الأمر، لم تذهب خلفه مباشرة حتى لا تتسبب له بالإحراج، تعلم أنه لا يريدها أن تراه وهو على هذه الحال، لكن يكفيها في هذا الوقت أنها اطمأنت عليه، وبعد فترة ليست بالقصيرة تقرر الدخول لغرفتهما لترى هل هدأ أم لا

.........: كيفك دلوقتى يا حامد

حامد: يرفع رأسه إليها بعينين ضائعتين ولم يجب سوى بكلمتين فقط، زين يا ورد

ورد: بابتسامة بسيطة، خابرة انك زين يا ابو حنين، بس قولت اطمن على حبيبي، وسندي، وعزوتي، وابو ولادي

حامد: تسلمي لي يا ورد، عارف انك حاسة بيا ومستحملاني يا زينة الحريم، ربنا يخليكِ ليا ولا يحرمني منك واصل

ورد: ولا يحرمني منك ابدا، حنين نامت لما انت تأخرت كانت عاوزة تنام في حضنك زي كل ليلة، لكن انا خابرة اليوم ده ايه ليك، فنيمتها

حامد: تسلمي

تهم بالمغادرة، يشعر أنه يجرحها هكذا، هي تقدره وتقدر وضعه وهو لا يهتم، لكنه يجذب يدها ويخبرها أن تبقى لجواره، لكن بداخله جرح لم يندمل

هذا المنزل الذي زرناه سابقا، نرى الجميع يلتف على مائدة الطعام، الرجا بمفردهم، والنساء بمفردهن، لتخرج الصغيرة حنين من الداخل وتجلس بجوار جدها، تنهها والدتها، لكن هي الوحيدة المسموح لها بمخالفة القواعد، فهذه الصغيرة تربط على قلوب الجميع،

حنين: شوفت يا جدي امي بتزعق لي عشان انت وابوي بتحبوني اكتر منها

والدتها بشهقة: كدة يا حنين، طيب مش هعملك اي حاجة بعد كدة

حسن: سيبيها يا منار، خليها تدلع براحتها

منار: كتر الدلع أوقات بيبوظ صاحبه

حسن بانفعال شديد: منار قفلي على الكلام ده، ومش عاوز اسمع ولا كلمة زيادة، حنين جدها هو المسؤول عنها يعمل اللي هو عاوزه، خلص الكلام

يصمت الجميع والحزن يسيطر على ملامح الجميع، حزن يملأه الوجع، والألم ينهش داخلهم

***************************************