الفصل الثاني(3)

شرد وهو يقود سيارته باتجاه منزله في محادثته معها بعد أن ابلغته بموقف والدها ورفضه تماما لتلك الزيجة، فأخذ يفكر حتى دلف منزله ويظهر على وجهه الهم والضيق.

استقبلته زوجته بوجه بشوش واقتربت منه تقبله من صدغه مرحبة به وهتفت بحب:

-حمد الله على السلامه يا حبيبي.

قبلها هو الآخر من جبينها وهتف:

-ايه يا قلبي عاملة إيه؟

ابتسمت له وهتفت بحب

-الحمد لله، بس أنت مالك؟

قالتها بتخوف من شكله الحزين فأجابها بتهرب:

-مفيش، أنا طالع ارتاح شويه.

صعد غرفته وأخرج هاتفه يرسل لها رسائله:

-دارين أنا بحبك ومش عارف أعمل ايه؟ قوليلي أنتي لو طلقتها باباكي هيوافق على جوازنا؟ أنا اكتشفت إني مش قادر على بعدك يوم واحد، انهارده الشغل كان وحش أوى من غيرك، اسأليه لو طلقتها هيوافق على جوازنا؟

أرسل لها الرسالة فقرأتها وعادت تجيبه وعبراتها لا تنصاع لأمرها بالبقاء داخل مقلتيها.

-أنا معنديش حل، وخايفة آخد أي قرار أندم عليه، بس هبلغ بابا بطلبك مع إني شبه متأكدة إنه هيرفض.

دلفت چيهان لتطمئن عليه فارتبك وهو يغلق شاشة هاتفه ففطنت هي لفعلته.

اقتربت منه وجلست بجواره تحتضنه وتتكئ برأسها على كتفه وهمست بصوت هادئ

-بتحبني؟

أجابها بصوت خافت

-طبعاً

رفعت وجهها تنظر له بتدقيق وهتفت:

-ممكن ييجى عليك يوم وتخوني؟

لمعت عيناه بالدهشة والتعجب وسألها بذعر:

-إيه الكلام الفارغ ده؟

أحكم قبضته عليها وعمق من احتضانه لها ورد بصوت حنون:

-أنتي عارفة يا چيچى إني عمري ما حبيت ولا هحب غيرك.

أجابته بصوت منكسر وضعيف:

-ولا بتفكر في الخلفة؟

زفر تنهيدة عميقة ورد بتأكيد

-لو ده هيكون سبب في بعدك عنى فأنا مش عاوز خلفة.

رفعت وجهها تنظر له بهيام لتهتف بصوت متصنع الهدوء.

-افتكر كلامك ده، عشان لو اتغير بعدين أو اكتشفت إنك بتخوني ساعتها انتقامي مش هيعجبك أبداً.

اعتدل في جلسته ونظر لها مدهوشاً من تحولها المفاجئ فرد بحدة.

-أنتي إزاي بتقدري تتحولي بالشكل ده؟ أنا فعلا مبقتش فاهمك.

ضغطت على أسنانها بغل وهتفت بغضب.

-علشان عقلك ميصورلكش إنك ممكن بعد كل اللي عملته عشانك إنك ترميني لمجرد إني مش بخلف، أنت كنت مجرد موظف في شركة بابي وبالرغم من رفضه ليك، أنا وقفت وصممت عليك واتحديته، ومش بس خليته يوافق ده أنا خليته يعمل منك مدير لشركاته وبقيت أنت الكل في الكل فمتنساش ابدا الكلام ده.

وقف مكانه ونظر لها بسخرية وهتف بضيق:

-مش ناسي يا چيهان، و كل ما أنسى يا إما بفكر نفسي يا أنتي بتفكريني، فمتقلقيش أبداً.

عادت تحتضنه وكأن شيئاً لم يكن وعادت لصوتها الرقيق الهادئ:

-طيب يلا عشان الغدا، أنا عملالك نجرسكو.

ربت على ظهرها وهو يكتم غيظه ورد.

-حاضر هغير هدومي وأنزل.

اتخذ قراره وذهب بسيارته لمقر عمل هشام الذي يعمل موظف بأحد المصالح الحكومية وفور أن دلف مكتبه وقدم نفسه إليه نظر له الأخير رافعا حاجبه الأيسر مدهوشا من جرائته فقضم على جانب شفته ورد بضيق

-اتفضل يا أستاذ أكرم.

جلس الأخير أمامه وأخذ يفرك راحتيه معا حتى يستمد من دفئهما بعض الشجاعة فتنحنح بعد أن سأله هشام

-تشرب إيه؟

أجابه بتوتر:

-ولا حاجة يا أستاذ هشام، أنا جاي أتكلم مع حضرتك شويه وعشمي إنك تسمعلي..

قاطعه الأخير بحدة اجفلته:

-متتعشمش فيا لأن عمري لا هقبل ولا أوافق على طلبك يا أستاذ أكرم، ولو ربنا في يوم من الأيام رزقك بأولاد هتعرف السبب.

أومأ له موافقاً على كلامه وهتف يستطرد:

-أنا فاهم ومقدر وعارف إحساسك كويس جداً، راجل متجوز وعايز يتجوز بنتك.

أطرق رأسه لأسفل وعاد ينظر له بعد أن استنشق الهواء بعمق ولفظه بدفعه واحدة:

-أنا لو عارف أوقف مشاعري ناحية دارين مكنتش ابداً حطيت نفسى ولا حطتها في الموقف ده، بس فعلا مش عارف.

رد هشام بغضب

-مشاعرك دي تخصك لوحدك وأصلاً مش من حقك ولا صح عشان تكلمني بالجراءة دي عن بنتي يا أستاذ.

حاول الأخير تهدئته فوقف من مكانه وتحدث بتوسل

-أنا بحب دارين، أرجوك اسمعني واديني فرصة أحاول افهمك ظروفي.

رمقه بنظرات متفحصة وصمت ليفهم أكرم موافقته على استكمال حديثه فجلس ورد باستفاضة:

-أنا مش هكدب عليك واقولك إني عايز اتجوز دارين عشان مراتي مش بتخلف، لأن الموضوع ده مش في حساباتي أصلاً.

خرج من هشام نظرة تهكمية صريحة اخترقته فعاد يكمل:

-يمكن دي الحجه اللي هقولها لمراتي يوم ما تعرف، لكن أنا فعلا بحب دارين ومش عايز أخسرها.

زفر أنفاسه الحزينة وهتف:

-فضل أهل مراتي عليا محسسني بالذنب إن مشاعري اتحركت ناحية واحدة غيرها، بس الموضوع ده مش بايدى عشان ربنا هو اللي بيألف القلوب.

رد هشام بإيجاز:

-ونعم بالله.

عاد يستطرد حديثه

-أنا معاك في اللي تطلبه، لو شرطك إني مكونش متجوز، هعمل كده بس مش هبقى راضى عن نفسي لو عملتها لأن ساعتها هكون ندل.

طرق بأصابعه على سطح المكتب بتوتر ملحوظ وهو يكمل:

-لإني لو انكرت فضلها عليا لمجرد إني حبيت بنتك، يبقى لازم تخاف مني على بنتك يا أستاذ هشام، عشان كده أنا متمسك بمراتي زي ما أنا متمسك بدارين وهحارب لحد ما توافق.

شعر هشام بصدقه وشفافيته فتخبطت أفكاره ورد بتساؤل

-لو افترضنا إني وافقت، هيبقى الوضع بينكم عامل إزاي؟

ابتسم بأنتصار بعد أن شعر أنه استطاع أن يقنعه بحنكته وأسلوبه السلس فهتف بتوضيح:

-هعمل كل اللي ربنا يقدرني عليه عشان أسعد دارين، بس من غير ما اجرح مراتي

حرك رأسه قليلاً بامتعاض وهتف:

-أنا عايز اتجوز عشان ابني بيت وأسرة احس وسطهم بالونس والحب ولو ربنا أراد بالذرية يبقى فضل من عنده، ولو ما ارد تش يبقى له حكمة في كدة.

اقترب بوجهه وتمعن النظر بوجه هشام حتى يريه صدقه وأضاف:

-ولحد ربنا ما يأذن بالذرية، أنا شايف إن مش ضروري أبداً إن مراتي تعرف بجوازي، بس طبعا بمجرد ما يكون في حمل فأكيد هعرفها وهعرف كل الناس.

رد هشام بسخرية:

-يا ما شاء الله، هو أنت عايز الجواز في السر كمان، ده إيه البجاحة دى؟

قاطعه أكرم

-سر إيه يا أستاذ هشام، لأ طبعاً مش في السر، في العلن وشرعى وعلى أيد مأذون بس مش ضروري مراتي والناس المقربين لها وممكن يقولولها أنهم يعرفو.

و قبل أن يتحدث هشام ويخبره برأيه رد كنوع من التأكيد:

-وكل حاجة هتتعمل زي ما أنتو عايزين، يعني شقة وعفش وفرح ومؤخر وكل حقوقها هتبقى محفوظة ودي اقل حاجة اقدمها للإنسانة اللي بحبها وعايزها في الحلال.

♕♕♕♕♕