الفصل الأول (2)

ضحكت بسخرية وضربت كفها بالآخر تهتف بتعجب:

-حتى هنا في السجن في كبير ومدير وريس؟

لم تعيرها آية اهتمام والتفتت لتغادر فأوقفها صوت لواحظ الغليظ:

-لاااا، ده أنتي شكلك كده عايزة يتعلم عليكى من أولها، وأنا معنديش مانع أهو تبقى عبرة لغيرك.

التفتت لها وعادت لتتجاهلها متحركة ناحية الفراش فاجتمعت حولها أربعة نساء يتحرشن بها فأخذت تبعدهن وتدفعهن ولكن الأمر تحول فجأة لتطاول بالأيدي وأصبح شجار كبير يحاولن بكل قوتهن أن يلقنوها درساً ولكنها كانت الأسبق والأسرع والأمهر؛ فانحنت لتتلافى الضربة القادمة من يمينها لتسقطها بعد أن عركلتها بقدمها وانتصبت لتسد ضربة أخرى من يسارها ردت عليها بلكمة عنيفة في منتصف الوجه نزفت السجينة على إثرها من أنفها وعادت لتضرب الثالثة بخلف رأسها عندما كبلتها الاخيره من ظهرها بيديها الغليظتين؛ فسقطت من قوة الضربة وانحنت لترتكز على يديها وترتفع بقدمها عن الأرض تضرب الرابعة لتسقط أرضاً متألمةٌ.

انتفضت عروق لواحظ وهي تجد اتباعها تسقطن مثل الذباب الواحدة تلو الأخرى فأمسكت بعصا كانت تخبئها أسفل فراشها واتجهت بغضب ناحية دارين محاولة ضربها ولكنها التقطتها منها بمهارة ونزلت بها على كتفها جعلتها تصرخ متألمة.

لم يقف الشجار إلا عندما بدأت المسجونات بالصراخ طلبا للنجدة فدلفت السجانات وبدأن يفرقهن وقالت السجانة فتحية:

-مش عاوزين تجبوها لبر يا شوية حوش، ودينى لادوركم كلكم على مكتب معاون المأمور، واستلقو وعدكم بقى منه وأنتو عارفينه، معندوش يا أمه ارحمينى.

قبضت باقي السجانات على لواحظ وأتباعها ومعهن دارين وسحبوهن بشراسة ومهانة وقالت فتحية بغضب

-اتحركى منك ليها على مكتب المعاون.

♕♕♕♕♕

وقفت فتحية تنتظر أن يأذن لها بالدخول وعندما دلفت هتفت باحترام:

-فى شغب في عنبر 2 يا باشا.

نظر لها متعجباً وهتف بفضول:

-اوعي تقوليلى لواحظ تاني.

أومأت بالموافقة فهتف بحدة:

-أكيد عملت نمرة على الوارد الجديد.

ضحكت فتحية تهتف بسخرية

-والله يا باشا المرة دي النمرة اتعملت عليها والبت الجديدة خليتها هي واللي معاها ميسوش تلاته مليم.

تعبيرات وجهه المصدومة مما سمعه جعلت حاجبيه ينعقدان بشدة وهو يهتف بحيرة:

-مين دي؟ متدخليهومش إلا لما تجبيلي ملف البنت دى الأول.

أومأت بطاعة وخرجت لتنفذ أمره باحضار ملفها، أما هي فظلت تستند على الحائط المهترئ لجدران السجن تنتظر أن يسمح لها المعاون بالدخول مع باقى السجينات لتعود بذاكرتها لماضيها القريب تشعر بتصدع عالمها بسبب جريمة لم تقترفها يداها.

فلاش باك *

ظل أكرم المغربي يتغزل بها في كل فرصه تسنح له وهى لا تعطيه آية رد فعل ولكن اصراره جعلها تلين قليلاً ليصبح تغزله بها أمراً طبيعياً بل وعادياً ولكنها لا تزال غير متقبلة لافعاله؛ فهتفت بعد أن شعرت بوجوب وقفه لتلك الأفعال:

-يا أكرم بيه اللى حضرتك بتعمله ده ميصحش.

ابتسم لها أكرم وهتف بغزل:

-الله جميل يحب الجمال، ومش عيب أبدا لما الواحد يلاقي قدامه حاجة حلوة ويقول عليها الله على الجمال، وسبحان من أبدع ومن صور.

حاولت اخفاء بسمتها من غزله بتلك الطريقة التى عفى عنها الزمن فاطرقت رأسها لاسفل ليقترب منها ويرفع وجهها ناحيته يهتف بحبور:

-أنا عارف إن اللى بيحصل ده مش صح، بس أعمل ايه؟

ثم اشار باصبعه ناحية قلبه وهتف بتأثر:

-مليش حكم على ده.

تحرجت من تصريحه وقالت برفض:

-حضرتك متجوز و...

قاطعها بوضع اصبعه على فمها وهتف بتأكيد:

-عارف، ومش محتاجك تفكرينى بده، ومش هعمل زى الرجاله اللى بتلعب ببنات الناس واقولك أنا مش سعيد مع مراتى ولا اني مبحبهاش، بالعكس، انا بحبها وسعيد معاها جدا وفضلها وفضل أهلها عليا كبير جداً بس...

صمت ثم رفع وجهه ناحيتها يحدق بها بنظرات والهة وعاد يكمل برومانسية:

-قلبي، قلبي اتهز جامد، طول ما انتي جنبي بحسه مش بيدق وبس، ده بيكون في زلزال.

ضحكت على تشبيهه وهمست بخجل:

-المعادلة دى اخرتها مش كويسة، أرجوك يا أكرم بيه متضطرنيش اسيب الشغل وأنا هنا حققت إنجاز كبير اوي و...

قاطعها مجددا بحدة:

-اوعي، اوعي تسيبي الشغل، أنا مقدرش يعدى عليا يوم من غير ما اشوفك يا دارين ارجوكي افهميني.

تنهدت بعمق فابتسم وهو يقترب منها ويهمس بصوت هادئ:

-أنا متأكد إن مشاعري ليها عندك صدى وإلا مكنتش شوفت الحيرة اللى في عنيكي دي.

هتفت بحيرة

-وافرض، برده دى معادلة ملهاش حل.

أجابها ببسمته الساحرة

-هو ربنا ليه حلل مثنى وثلاث ورباع؟

رفعت كتفيها كعلامة على جهلها فأجابها.

-الراجل يقدر يحب اكتر من واحده في نفس الوقت لكن الست لا ، وأنا بحب مراتي وفى نفس الوقت مشدود ليكى جداً، ده غير إنك عارفه إننا مخلفناش لحد دلوقت وأنا من حقى أكون أب.

امتعض وجهها وهتفت بحدة:

-يعنى بتقرب منى بالشكل ده عشان الخلفة؟

ابتسم وضحك وأمسك راحتيها بيديه وربت عليهما بدفئ وقال مفسراً:

-أبداً، لأن لو ده السبب كنت اتجوزت من زمان من ساعة ما عرفت إنها مبتخلفش، لكن أنا فعلا عايز ابني لنفسى بيت وأسره مع إنسانه بحبها وده أبسط حقوقي.

سألت بحيرة:

-وچيهان هانم، هتوافق على كده؟

ربت على كتفها وهتف؛

-سيبي كل حاجه لوقتها يا دارين، التسرع في المواضيع اللى زي دي مش كويس، خلينا نقرب من بعض ونشوف هنقدر نكمل مع بعض ولا لأ، ولما نوصل لمرحلة الجواز وموافقة چيهان يبقى يحلها الذى لا يغفل ولا ينام.

عودة***

عادت من شرودها على صوت الحارسة تهتف بحدة:

-ادخلى منك ليها، سيف باشا مستنيكم، يلا ياختي عشان تستلقى وعدك انتي وهي.

دلفن جميعاً وسيف جالس على مقعده يضع قدم فوق الأخرى ويشعل سيجارته ونظر لهن باذدراء، ولكنه دُهش من شكلهن فقد تورمت جبهة واحدة ونزفت الأخرى من أنفها وكدمات بجسد الثالثة والرابعة حتى لواحظ لم تسلم من الأذى فرفع حاجبه وهو ينظر لوجه الملاك الذي أمامه وهي سليمة معافاة ليس بها خدش واحد فقال بذهول:

-دى اللي عملت فيكم كده؟

صرخت لواحظ باتهام:

-ايوه يا باشا، دي مفترية وكسرت ضلوعنا.

ثم ارتفع صوتها أكثر باستعطاف:

-أنا عايزة حقي يا باشا، دهأنا حاسه إن كتفي اتخلع من مكانه.

عاد ينظر لها وهي تطرق رأسها بخزى فهتف بقسوة:

-بلاش وش البراءة ده عشانأنا فاهم أمثالك كويس.

امتعض وجهها من اذدراؤه الواضح لها؛ فرفعت وجهها ونظرت له بعينيه وردت بقوة واستفسار:

-امثالي؟ حضرتك تقصد إيه؟

ابتسم بجانب فمه وهتف بغضب:

-اللي شكلهم يقول برئ وهم قتالين قتله.

ضربت لواحظ على صدرها وهي تهتف بتخوف:

-قتل؟

ابتسم بمكر وعاد لمقعده وهتف بعد أن فتح ملفها أمامه يقول باستفاضة:

-دارين هشام الشامي، متهمة بجريمة قتل مع سبق الإصرار والترصد، مش كده يا...

!