الفصل الثاني (2)

ردت بصوت مختنق

-بس الوضع اللي إحنا فيه ده مش صح، أنت بتسحبني ناحيتك كل يوم أكتر من التانى، وأنا معنديش قدره إني اوقف اللي بيحصل.

أمسكها وأجلسها بجواره على الأريكة العريضة ونظر بعمق عينيها وهتف متغزلا بهما:

-عيونك الحلوين دول هم اللي جابوني على جدور رقبتى، ده غير شعرك الغجري ده.

تنفست بعمق فهتف مستطرداً:

-الحل اللي عندي إني آجي أفاتح أهلك في موضوع ارتباطنا وافهمهم ظروفي.

ضحكت بسخرية وردت

-وتفتكر أن أهلي ممكن يوافقو عليك وأنت متجوز، مستحيل طبعاً.

زفر بضيق وأخذ يتنفس بحدة وعاد يكمل:

-بصي يا دارين، لازم نحسب كل السيناريوهات عشان منندمش بعدين.

صمت وعاد بظهره على الاريكة ليريح ظهره وتحدث وهو يركز بصره بنقطة فارغة أمامه ثم أكمل:

-السيناريو الأول إني أقولها أن من حقي الخلفة وأسيبها تختار يا تكمل معايا يا ننفصل.

احتدت تعابيرها وهتفت بغضب

-وافرض طلعت أنا كمان مبخلفش؟

ضحك على غضبها الطفولى وقرص وجنتها الحمراء الصغيرة ورد بحب:

-أنتي بتغيرى يا قمر؟ أنا بحبك يا عبيطة، بس مش لازم يعنى أقول لها إني هتجوز عشان في بت متر ونص بشعر غجري سرقتني منها، يعنى دي حجه يا بيبي

ضحكت من تدليله لها فأكمل حديثه:

-بس نتيجة السيناريو ده حاجة من اتنين، يا إما هتوافق عشان متظلمنيش وده احتمال بعيد جداً إنه يحصل والإحتمال الأقرب إنها هترفض وساعتها أنا وأنتي هنبقى على باب الله، يعنى لا شغله ولا مشغله، هنطرد يعني من الشركة واخدك بقى اسرح بيكي في الموالد

ضحكت بشدة وقهقهت من سخريته وهتفت:

-يعنى أنت خايف منها عشان شغلك ومستقبلك؟

حاوط وجهها بكفيها العريضين وقابلت حدقتيه بؤبؤاها اللامعتين وهمس مجيباً:

-أنا لو أنكرت فضلها هي وأبوها عليا أبقى إنسان ملوش أمان يا دارين، ساعتها لازم تخافى مني لأن أنا كنت حتة موظف في الشركة هنا وبصي عليا بقيت إيه بعد ما اتجوزتها.

أطرقت رأسها تحركها بحيرة فأرد ف:

-صدقيني ده أسوأ سيناريو ممكن يواجهنا عشان كده أنا بحاول أخليه آخر الحلول لما ميبقاش قدأمي حل غيره.

همست بتلعثم:

-أومال إيه الحل المناسب اللي أنت شايفه؟

أجابها وهو يبتسم بسمة ساحرة جعلتها تشرد بملامحه القاتلة ووسامته الشديدة:

-الحل اللي قدأمي دلوقت إنك تقنعى أهلك بظروفى ونتجوز ولما ييجى وقت إنها تعرف أكون على الأقل عملت حسابي على شغل تاني أعرف أعيشك منه يا دارين.

زفرت باستسلام وأومأت له بصمت وهي تحاول أن تقيم الأمر برأسها وتحكم العقل قليلاً بدلاً من القلب والذي دائما ما تكون احكامه خاطئة.

دلفت منزلها بعد يوم عمل طويل وشاق لم يخلو من التفكير بأمر ارتباطها فانفردت بوالدتها تقص عليها الأمر لعلها تهديها للطريق الصحيح ويكون رأيها هو الصواب.

سمعت فدوى من ابنتها وعلامات الدهشة والتعجب تغزو وجهها؛ فارتبكت دارين من ملامح والدتها وسألت بهدوء ورهبة

-ماما، أنتي ساكته ليه؟

أجابتها فدوى بتخاذل:

-دي آخرة تربيتي ليكي يا دارين، اخص عليكي، إزاي تسمحي لنفسك تتحطي في موقف زي ده؟ لأ ومتخيله أن أبوكي هيوافق!

حاولت أن تهدء من عصبيتها قليلاً فاقتربت منها تربت على كفيها وتحدثت بنبرة خجولة:

-والله يا أمي الموضوع مش زي ما أنتي فاهمه....

قاطعتها بحدة

-أومال ايه؟

ابتلعت لعابها بارتباك ملحوظ ورددت بصوت ضعيف مهزوز

-مش عارفة إزاي قدر يخليني اتعلق بيه بالشكل ده؟ وهو يا ماما لو إنسان وحش كان اتسلى بيا، لكن هو من نفسه اللي فاتحني في موضوع الجواز.

زفرت والدتها باستسلام وهتفت بحيرو

-الصراحة، من اللي حكتيه عنه باين عليه ابن حلال وأي واحد غيره كان كدب عليكي، بس هو صريح والصراحه في الحاجات دى مطلوبة.

تشجعت قليلاً من مدحها له فأنتظرت تسمع منها جواب يريح قلبها فتنهدت فدوى وزفرت بحيرة وردت

-لله الأمر من قبل ومن بعد، سبينى اشاور نفسي وبعدها ابقى افاتح أبوكي

♕♕♕♕♕

مر وقت طويل ولا زال أكرم ينتظر ردها عليه وهي لا تزال في أنتظار موافقة أو رفض والدها ولكن حتى الآن لم تكن فدوى قد تجرأت على مفاتحته بالأمر.

أنتهزت فدوى فرصة جلوسه بيوم العطلة وبعد تناولهم وجبة الغداء برفقة ابنائها وزوجة ابنها البكري هتفت بحرج:

-كنت عيزاك يا هشام في موضوع كده لوحدنا.

أومأ لها واتخذا جانب لينفردا بنفسيهما فهي قد اختارت هذا اليوم بالتحديد ظنا منها أنه إن وافق كان بها وإن رفض فلن يحدث جلبة بحضور ابنه وزوجته وأحفاده.

قصت عليه الأمر بعد أن جملت له الكثير من الحقائق حتى يتقبلها، ولكنه أبداً لم يتقبل ولا حرف واحد مما سمعه منها؛ فصاح بحدة وعصبية اجتمع على إثرها ابنه جمال وزوجته ودارين بالطبع هرعوا جميعا٥ حتى يتقصوا الأمر.

نظر لها بعينين جاحظتين وغضب أهوج وهو يصرخ بها:

-أنتي إزاي تسمحي لنفسك يا بت أنتي إنك تخلؤ أمك تفاتحني في موضوع زي ده؟ خلاص مش لاقيه غير راجل متجوز وعايزاني أوافق عليه! ليه بس تصغري نفسك كده؟

حاولت تهدئته وردت بانكسار:

-يا بابا أكرم إنسان كويس، وظروفه حكمت عليه....

قاطعها بحدة وغضب:

-ظروف إيه اللي تخليه يعض الإيد اللي اتمدت له وخلته بنى آدم؟

أجابته بتوضيح

-هو ملوش سيره غير فضل أهل مراته عليه يا بابا، يعنى هو مش بينكر فضلهم، بس في النهاية إحنا بشر ومشاعرنا مش بإدينا.

أجابها بسخرية واستهزاء

-فأنتي بقى سبتي كل اللي اتقدمولك قبل كده ومشاعرك راحت لواحد متجوز!

تدخل جمال يحاول تهدئة والده فهتف:

-اهدى بس يا بابا، الراجل واضح وصريح وقال إنه مش هينكر فضل أهل مراته عليه، وقال إنه لسه بيحبها وإنه غصب عنه الوضع اللي هو فيه بس في النهاية الراجل من حقه يتجوز مش أحسن ما يغلط.

صاح هشام بحدة اجفلتهم جميعاً.

-يغلط! يغلط مع مين؟ يغلط مع أختك؟ وأنت كنت عارف الموضوع بقى على كده وأنا آخر من يعلم.

حاول أن يصحح له الأمر حتى لا يتأزم الموضوع أكثر فرد بهدوء وثير:

-يا بابا الراجل متمسك بدارين وجالي الشغل واتكلم معايا وبقاله فترة مستني موافقتك عشان ييجي يتقدم وإحنا اللي عمالين نأجل فيها عشان خايفين من رد فعلك.

زفر حانقا وهتف بغضب:

-وأنا رد فعلي مش هيتغير و مش موافق، ومن بكره تسيب الشغل ده، وده آخر كلام عندي.

♕♕♕♕♕