أسرار خلف الأبواب

في غرفة يوسف...

ما إن أنهى يوسف مكالمته مع خالد، حتى رن هاتفه مرة أخرى.

ابتسم عندما رأى الاسم الذي ينتظره.

ضغط زر الإجابة سريعًا.

— إزيك يا علياء؟

ابتسمت علياء وهي تغلق باب غرفتها حتى لا يسمعها أحد.

— الحمد لله... إنت عامل إيه؟

— كويس... بس انتي اللي اتأخرتي عليا النهارده.

تنهدت علياء.

— معلش... سارة كانت معايا طول الوقت، ومكنتش عارفة أكلمك.

ابتسم يوسف.

— ولا يهمك... المهم طمنيني. عملتي إيه في موضوع العريس؟

تنهدت علياء براحة.

— الحمد لله... الموضوع انتهى.

ابتسم يوسف وهو يسأل بلهفة:

— يعني رفضتيه؟

خفضت علياء صوتها وقالت:

— بصراحة... أنا اتعمدت أتأخر في الحمام، وسيبت سارة تقعد مكاني شوية... على أساس إنها أول ما تعرفه تقول له إني مش موجودة لحد ما أرجع.

صمتت لحظة ثم أكملت بندم:

— لكن اللي حصل مكانش في بالي خالص... الشاب افتكر إن سارة هي العروسة، واتكلم معاها بطريقة وحشة جدًا. ولما رجعت كانت مخبية عني اللي حصل.

قطب يوسف حاجبيه.

— يعني كل اللي حصل ده بسبب إنك سيبتيها مكانك؟

تنهدت علياء.

— أيوة... وضميري وجعني جدًا. أنا مكنتش أعرف إنه هيعمل كده.

ابتسم يوسف محاولًا طمأنتها.

— المهم إن الموضوع انتهى... وأنا بكرة هكلم ماما، ونروح رسمي نتقدم.

ارتسمت ابتسامة على وجه علياء.

— ياريت يا يوسف... لأن ماما لو حطت حاجة في دماغها مبتغيرهاش بسهولة.

قال يوسف بثقة:

— متقلقيش... قريب هتيجي أخطبك، وساعتها محدش هيقدر يجيبلك عريس تاني.

ابتسمت علياء بخجل.

— أنا مستنية اليوم ده.

قال يوسف بحنان:

— وانا كمان استنيته كتير... ومش هقدر أستنى أكتر من كده، خصوصًا إنك أصريتي نستنى لحد آخر سنة في الكلية.

ابتسمت علياء.

— كان لازم... أنا وعدت بابا إني هبقى دكتورة الأول.

رد يوسف فورًا:

— وأنا عمري ما كنت هقف في طريق حلمك... بالعكس، كنت أول واحد هيساعدك تحققيه.

كانت سارة في تلك اللحظة متجهة إلى غرفة أختها.

كانت تريد التحدث معها عما حدث في النادي، فقد حاولت طوال الطريق أن تبدو قوية، لكنها لم تستطع نسيان كلمات ذلك الشاب الغريب.

وما إن اقتربت من الباب...

حتى سمعت صوت علياء من الداخل.

— معلش يا يوسف... معرفتش أكلمك النهارده علشان سارة كانت معايا طول الوقت.

تجمدت سارة في مكانها.

يوسف؟!

قطبت حاجبيها وهي تستمع في صمت.

ثم سمعت علياء تقول:

— الحمد لله موضوع العريس انتهى...

اتسعت عينا سارة في صدمة.

إذن... علياء تحب شخصًا آخر!

وظلت تستمع دون أن تشعر.

...

ابتسم يوسف وهو يقول:

— خلاص يا حبيبتي... بكرة هكلم ماما، ونحدد ميعاد ونطلب إيدك رسمي.

ابتسمت علياء بسعادة.

— يارب... نفسي الموضوع يتم على خير.

قال يوسف بحنان:

— وهيتم بإذن الله... أنا استنيت تلات سنين، ومش هقدر أستنى أكتر من كده.

ردت علياء بخجل:

— معلش يا يوسف... كان لازم أخلص الكلية الأول، وأحقق الوعد اللي وعدته لبابا.

ابتسم يوسف.

— وأنا عمري ما كنت همنعك عن حلمك... بالعكس، كنت أول واحد هيدعمك.

وقبل أن ترد...

سمع الاثنان طرقًا خفيفًا على الباب.

اعتدلت علياء بسرعة.

— يوسف... معلش يا حبيبي، حد بيخبط. هقفل دلوقتي وأكلمك بعدين.

— ماشي يا حبيبتي... تصبحي على خير.

— وإنت من أهله.

أنهت المكالمة، ثم أخذت نفسًا عميقًا.

— ادخل.

فتح الباب ببطء...

ودخلت سارة.

كانت ملامحها هادئة...

لكن نظراتها كانت تحمل الكثير من الأسئلة.

ابتسمت علياء ابتسامة متوترة.

— مساء الخير يا سوسو.

أجابتها سارة وهي تغلق الباب خلفها.

— مساء النور.

ساد الصمت للحظات...

ثم سألتها بهدوء:

— كنتِ بتكلمي مين؟

ارتبكت علياء للحظة، ثم قالت بسرعة:

— رشا... صاحبتي.

نظرت إليها سارة نظرة طويلة.

ثم قالت بهدوء جعل قلب علياء يخفق بقوة:

— بجد؟

ابتلعت علياء ريقها.

— أيوة.

اقتربت سارة منها خطوة.

— أمال مين يوسف اللي سمعتك بتندهيله؟

تجمدت علياء.

وحاولت أن تبدو طبيعية.

— يوسف مين؟ يمكن سمعتي غلط.

هزت سارة رأسها بالنفي.

— لا يا علياء... أنا سمعت كويس جدًا.

ثم أخرجت هاتفها من جيبها وقالت:

— وعلى فكرة... رشا كانت لسه مكلماني من شوية، وقالتلي إنها حاولت تتصل بيكي ورقمك كان مشغول.

رفعت عينيها إلى أختها.

— يبقى كنتِ بتكلمي مين؟

ساد الصمت...

واستطاعت علياء أن تشعر أن الكذب لن يفيد.

تنهدت باستسلام.

ثم قالت بصوت منخفض:

— يوسف... أخو ريمان صاحبتي في الكلية.

عقدت سارة حاجبيها.

— تعرفيه من إمتى؟

— من تلات سنين... أول ما دخلت الكلية.

— وبتحبيه؟

خفضت علياء رأسها بخجل.

— أيوة.

صمتت سارة للحظات...

ثم سألتها بهدوء:

— وهو؟

ابتسمت علياء ابتسامة صغيرة.

— بيحبني من زمان... وطلب مني الارتباط من سنتين، لكن أنا رفضت.

استغربت سارة.

— رفضتي ليه؟

أجابت علياء بثقة.

— لأنه كان عايز يخطبني وقتها، وبعدها بسنة نتجوز... وأنا كنت مصممة أخلص الكلية الأول.

أومأت سارة ببطء.

ثم سألتها:

— ولما ماما قالتلك على العريس؟

تنهدت علياء.

— اضطرّيت أحكيله كل حاجة... وهو وعدني إنه هييجي يتقدملي رسمي في أقرب وقت.

ظلت سارة تنظر إليها للحظات...

ثم قالت بمرارة:

— يعني علشان تحافظي على حبك... سيبتيني أقعد مكانك؟

خفضت علياء رأسها في خجل.

— أنا مكنتش متوقعة اللي حصل.

ارتفع صوت سارة لأول مرة.

— لكن حصل!

دمعت عيناها وهي تكمل:

— اتبهدلت واتجرحت بكلام واحد معرفوش... بسبب قرار خدتيه لوحدك.

اقتربت منها علياء بسرعة وأمسكت يدها.

— والله يا سارة أنا آسفة... عمري ما كنت أتمنى ده يحصل.

سحبت سارة يدها برفق.

— أنا مش زعلانة إنك بتحبي يا علياء... بالعكس، كنت هفرحلك.

توقفت لحظة ثم قالت بحزن:

— لكن زعلانة إنك حطيتيني مكانك من غير حتى ما تعرفيني.

انهمرت دموع علياء.

— سامحيني.

نظرت إليها سارة طويلًا...

ثم تنهدت.

— احكيلي كل حاجة...

من أول مرة شوفتي فيها يوسف...

إزاي اتعرفتوا...

وإزاي حبكوا بدأ.

أومأت علياء برأسها.

وأخذت نفسًا عميقًا...

قبل أن تعود بذاكرتها إلى ثلاث سنوات مضت...

قبل ثلاث سنوات...

كانت علياء قد بدأت عامها الأول في كلية الطب.

كل شيء كان جديدًا عليها...

المباني الضخمة، المدرجات، مئات الطلاب، والوجوه التي لا تعرف منها أحدًا.

كانت تقف في ساحة الكلية تحمل جدول المحاضرات بين يديها، تنظر إليه تارة، وإلى المباني تارة أخرى، وقد ارتسمت الحيرة على وجهها.

همست لنفسها:

— يا رب... المدرج ده فين بس؟

التفتت يمينًا ويسارًا، لكنها لم تجد من تسأله.

وفي تلك اللحظة...

اقتربت منها فتاة تبتسم ابتسامة ودودة.

— صباح الخير... شكلك جديدة هنا.

ابتسمت علياء بخجل.

— صباح النور... أيوة، أول يوم ليا، وتايهة خالص.

ضحكت الفتاة بخفة.

— ولا يهمك، كلنا أول ما دخلنا الكلية كنا كده.

ثم أشارت بيدها نحو أحد المباني.

— المدرج اللي معاكي هناك... وأنا رايحة نفس المكان، تعالى معايا.

تنفست علياء براحة.

— بجد؟ شكراً جدًا.

ابتسمت الفتاة.

— مفيش شكر بينا.

ثم مدت يدها إليها.

— أنا ريمان.

صافحتها علياء بابتسامة.

— وأنا علياء.

سارتا معًا داخل الحرم الجامعي.

قالت علياء وهي تنظر إليها باستغراب:

— هو إنتِ في أولى برضو؟

أومأت ريمان.

— أيوة... بس أنا باينة أكبر شوية، صح؟

ضحكت علياء.

— شوية بس.

ضحكت ريمان هي الأخرى.

— أصل أنا كنت مسافرة السنة اللي فاتت مع بابا بره مصر، علشان كده أجلت الدراسة سنة، ورجعت أكمل دلوقتي.

— الحمد لله على السلامة.

— الله يسلمك.

ومنذ ذلك اليوم...

لم تفترق الفتاتان تقريبًا.

كانت ريمان مرحة، كثيرة الكلام، أما علياء فكانت هادئة وخجولة.

لكن اختلاف طباعهما جعلهما يكملان بعضهما البعض.

ومرت الأسابيع...

حتى أصبحتا أقرب صديقتين في الكلية.

---

وفي أحد الأيام...

دخلت ريمان المدرج وهي تكاد تقفز من شدة الحماس.

جلست بجوار علياء وقالت بسرعة:

— علياااااء... عندي خبر جامد!

أغلقت علياء الكتاب ونظرت إليها.

— خير؟

قالت ريمان بحماس:

— الكلية عاملة رحلة للأقصر وأسوان الأسبوع الجاي.

ابتسمت علياء.

— بجد؟

— أيوة... وإحنا لازم نروح.

هزت علياء رأسها بتردد.

— والله معرفش... لازم أسأل بابا الأول.

عبست ريمان.

— يا شيخة بلاش كسوف بقى... دي رحلة العمر.

ضحكت علياء.

— المشكلة إني عمري ما سافرت رحلة مع الكلية.

أمسكت ريمان بيدها.

— خلاص تبقى أول مرة... وأنا هفضل معاكي طول الوقت.

ابتسمت علياء.

— هشوف بابا، ولو وافق هاجي.

ابتسمت ريمان بثقة.

— هيوافق... خصوصًا لما يعرف إنك نفسك تروحي.

ثم أضافت بحماس أكبر:

— وبعدين أنا مستنية الرحلة دي من السنة اللي فاتت.

سألتها علياء باستغراب:

— للدرجة دي؟

ابتسمت ريمان وقد لمعت عيناها.

— أيوة... لأن أخويا يوسف هيكون هناك

رفعت علياء حاجبيها.

— أخوكي؟

أومأت ريمان بسعادة.

— أيوة... بيشتغل هناك، وأنا بقالي سنة كاملة مشفتهوش، ونفسي اشوفه جدا

ابتسمت علياء وهي ترى فرحة صديقتها.

— ربنا يجمعكم على خير.

ضحكت ريمان.

— آمين... بس أهم حاجة تقولي لبابا يوافق، علشان مش هسيبك لوحدك هنا.

ضحكت علياء وهي تهز رأسها.

— حاضر... أول ما أرجع البيت هكلمه، وأقولك ردّه بكرة.

وهنا تبدأ أول خيوط القدر... دون أن تعلم علياء أن تلك الرحلة ستغيّر حياتها بالكامل، وستكون سببًا في أول لقاء يجمعها بيوسف.