حادث جمع القلوب

الفصل الخامس

في مقهى الكلية...

ذهبت علياء إلى مقابلة ريمان وهي تعرج بخطوات بطيئة بسبب الإصابة التي تعرضت لها في قدمها، ولم تنتبه أن هاتفها قد سقط منها عند بوابة الكلية بعد الحادث مباشرة. فقد كانت منشغلة بالشجار الذي دار بينها وبين ذلك الشاب، وغادرت المكان دون أن تلتفت إلى هاتفها.

أما يوسف، فظل واقفًا للحظات بعد رحيلها، ثم لمح الهاتف ملقى على الأرض. انحنى والتقطه وهو ينظر في اتجاهها، وتمتم بهدوء:

يوسف: — واضح إنها نست تليفونها...

وضع الهاتف في جيبه، وقرر أن يبحث عنها داخل الكلية ليعيده إليها إن سنحت له الفرصة.

وصلت علياء إلى المقهى، وما إن رأتها ريمان حتى نهضت من مكانها بقلق.

ريمان: — مالك يا بنتي؟ بتعرجي كده ليه؟ وإيه اللي حصل؟ وبعدين تليفونك فصل فجأة ليه؟

علياء بضيق: — وأنا جاية واحد غبي خبطني بالعربية في رجلي، والتليفون وقع مني وأنا بكلمك.

ريمان بغضب: — ومقولتيليش ليه؟ والله لو كنتِ وريتيني مين ده كنت وريته مقامه! شكله إيه ده؟

علياء بهدوء: — عادي خلاص... اللي حصل حصل، وبصراحة أنا كمان مكنتش مركزة في الطريق.

ريمان: — حتى لو مش مركزة، مش معناها يخبطك بالعربية! هو معانا هنا في الكلية؟

علياء: — معتقدش... شكله أكبر من إنه يكون طالب هنا.

ريمان بعصبية: — كمان مش من الكلية؟ ده ليلته سودا لو أعرفه!

ابتسمت علياء ابتسامة باهتة وهي تغير الحديث.

علياء: — خلاص يا بنتي... سيبك من ده. المهم كنتِ عاوزاني في إيه؟

---

في تلك الأثناء...

كان يوسف قد دخل إلى مكتب مدير الكلية، وبعد دقائق خرج بعدما أخبره المدير أن المحاضرات قد انتهت، وأن أغلب الطلبة موجودون في مقهى الكلية.

اتجه يوسف إلى هناك بسرعة، فقد كان يريد رؤية شقيقته قبل أن يضطر للمغادرة والعودة إلى عمله.

وما إن وقع بصره عليها حتى ابتسم وهتف بصوت مرتفع:

يوسف: — ريمااااان!

التفتت ريمان إليه فورًا، وما إن رأته حتى أسرعت نحوه تعانقه بقوة، وهي تضربه بخفة على ذراعه.

ريمان: — يوسف! وحشتني أوي! كنت فين؟ أنا زعلانة منك ومش عاوزة أكلمك!

يوسف وهو يضحك: — متزعليش... فُكيني بقى، إيه ما صدقتي تلزقي فيا؟

ريمان وهي تدفعه في كتفه: — كده يا يوسف؟ طب غور بقى!

في تلك اللحظة، رفعت علياء رأسها لتنظر إلى الشاب الذي تناديه ريمان...

لكنها تجمدت مكانها.

اتسعت عيناها في صدمة، وهمست بينها وبين نفسها:

— هو ده!

لقد كان نفس الشاب الذي صدمها عند بوابة الكلية منذ دقائق قليلة.

تعجبت كثيرًا من تصرف ريمان وهي تعانقه أمام الجميع، ولم تستوعب كيف سمح له مدير الكلية بالدخول بهذا الشكل.

ريمان: — جيت إمتى يا يويو؟ تصدق كنا بنتكلم عنك أنا وماما امبارح!

يوسف مبتسمًا: — بس؟ مليون جنيه بس؟ لا كده أزعل.

ريمان: — إنت عمرك ما هتبطل رخم!

يوسف: — طبعًا... أنا أتغير؟ عيب عليكي! صحيح رائد في الجيش، لكن من جوايا عيل صغير.

ريمان ضاحكة: — ربنا يكون في عون اللي هتتجوزك.

يوسف: — بالعكس... دي هتعيش في جنة.

ريمان: — تعالى أقعد معانا شوية، وبالمرة أعرفك على لولو.

يوسف: — مينفعش أتأخر يا حبيبتي، ورايا شغل.

ريمان بعناد: — مليش دعوة... هتقعد يعني هتقعد!

توجه الاثنان نحو الطاولة التي تجلس عليها علياء.

ابتسمت ريمان وهي تشير إليها.

ريمان: — لولو حبيبتي... أعرفك، ده يوسف...

لكنها لم تكمل جملتها.

علياء ببرود: — مش مشكلة... أنا مطلبتش أعرف ده مين.

تفاجأت ريمان من ردها، بينما نظر يوسف إلى علياء باستغراب.

ريمان: — علياء! مالك؟ قلبتي كده ليه؟

علياء بضيق: — بعد اللي عملتيه قدام الطلبة ده، ومش عاوزاني أتكلم؟ مهما كانت القرابة بينكم، الحضن بالطريقة دي غلط، وعارفة الناس ممكن تقول إيه.

نظرت ريمان إلى أخيها ثم إلى علياء باستغراب.

ريمان: — إيه اللي حصل لكل ده؟ بتكلميه بالطريقة دي ليه؟

ابتسم يوسف ابتسامة خفيفة وقال:

يوسف: — معلش يا ريمان... أصلها متعرفش أنا مين.

رفعت علياء رأسها وقالت ببرود:

علياء: — ومش عاوزة أعرف... هو بالعافية؟

ابتسم يوسف وهو يهز رأسه.

يوسف: — لا مش بالعافية... وشكرًا على ذوقك يا آنسة، وشكرًا كمان على سوء الظن.

وفي اللحظة التي همّت فيها علياء بالمغادرة، باغتها ألم شديد في قدمها.

علياء: — آااه... رجلي!

تقدم يوسف بسرعة وقد اختفت ابتسامته.

يوسف بقلق: — إنتِ كويسة؟ حصلك إيه؟

أسرعت ريمان إليها.

ريمان: — علياء مالك؟

قالت علياء وهي تحاول إخفاء ألمها:

— مفيش... أنا همشي.

قال يوسف بحزم:

— هتمشي إزاي وإنتِ بالحالة دي؟ لازم تروحي المستشفى الأول.

رمقته بنظرة غاضبة.

علياء: — تسمحلي؟ وإنت مين أصلًا علشان تسمحلي أو تمنعني؟

قال بهدوء:

يوسف: — متتعصبيش... عصبيتك هتتعبك أكتر.

ردت بعناد:

— أنا هكلم سامح، وهو اللي هيجي ياخدني.

عندها فقط شعرت بشيء ناقص...

وضعت يدها داخل حقيبتها، ثم فتشت في جيوبها بسرعة.

اتسعت عيناها.

علياء بقلق: — تليفوني... مش لاقياه!

ريمان:

ـ يمكن وقع منك برة؟ خلاص كلمي سامح من تليفوني.

أخذت علياء هاتف ريمان، واتصلت بأخيها سامح.

سامح:

ـ ألو... مين؟

-أنا علياء يا سامح

- خير ياحبيبتي إيه اللي حصل؟

وقبل أن تجيب، مد يوسف يده وأخذ الهاتف منها.

نظرت إليه بغضب.

علياء:

ـ إنت بتعمل إيه؟ هات التليفون!

لكن يوسف تجاهل اعتراضها، ثم تحدث بهدوء.

يوسف:

ـ السلام عليكم... حضرتك أستاذ سامح؟

سامح بقلق:

ـ أيوة، مين معايا؟

يوسف:

ـ أنا الرائد يوسف. أخت حضرتك اتعرضت لخبطة بسيطة بعربية وبنحاول نوديها المستشفى ورافضة لحد ما حضرتك تيجي أحنا دلوقتي في الكلية، وأنا شايف إنها لازم تروح المستشفى الأول.

وقف سامح من مكانه بفزع.

سامح:

ـ إيه! هي كويسة؟

يوسف:

ـ الحمد لله، إصابتها بسيطة، لكن لازم الدكتور يكشف عليها علشان نطمن.

سامح:

ـ تمام... أنا جايلكم حالًا.

يوسف:

ـ مفيش داعي تتعب نفسك، إحنا هناخدها على المستشفى العسكري، ولو حضرتك حبيت تيجي هتلاقينا هناك.

سامح:

ـ حاضر... أنا خارج حالًا.

أنهى يوسف المكالمة، ثم أعاد الهاتف إلى علياء.

نظرت إليه بغضب شديد.

علياء:

ـ مين سمحلك تاخد التليفون من إيدي؟

يوسف بهدوء:

ـ كان لازم أبلغه اننا هنروح المستشفى دلوقتي

علياء بعصبية:

ـ وأنا كنت هعرف أتكلم معاه بنفسي.

يوسف:

ـ عارف... لكن الوقت مكنش يسمح بالنقاش.

تنهدت علياء بضيق، ولم تجد مفرًا من الذهاب معهم، خاصة بعد اتفاق يوسف مع سامح.

وبعد قليل...

وصلوا إلى المستشفى العسكري.

دخلت علياء مع الطبيب للكشف عليها، بينما جلس يوسف في الخارج ينتظر نتيجة الكشف، وقد سيطر عليه تأنيب الضمير لأنه كان السبب فيما حدث لها.

ولشدة انشغاله بها...

نسي تمامًا موعد مناوبته العسكرية.

وبعد مرور نصف ساعة، رن هاتفه.

نظر إلى الشاشة، فوجد اسم خالد.

رد سريعًا.

خالد:

ـ فينك يا يوسف؟ اتأخرت ليه؟

يوسف:

ـ حصلت ظروف منعتني أرجع في الوقت.

خالد:

ـ طيب إنت فين؟ لازم أبلغ اللواء بمكانك فورًا.

يوسف:

ـ في المستشفى العسكري... حصلت حادثة معايا واختي معايا فى المستشفى

أغلق يوسف الهاتف، وظل واقفًا أمام غرفة الكشف، ينتظر خروج الطبيب، وقلبه منشغل بعلياء أكثر من انشغاله بالعقاب الذي قد ينتظره في العمل.

وما إن خرج الطبيب من غرفة الكشف، حتى اقترب منه يوسف بسرعة، وسأله بقلق واضح:

يوسف:

ـ ها يا دكتور... إصابتها خطيرة؟