الفصل الثاني عشر

ربتت الأم على فخذها بحنان وهزت رأسها بالإيجاب لتكمل، فتابعت ياسمين ونبرتها تشتعل بالتحدي: "كل ما بروح الجامعة وبسمعهم ورا ضهري وفي وشي بيقولوا لي 'يا عرجة' أو 'يا أم رجل ونص'.. ببقى من جوايا عاوزه أصرخ وأعيط من القهر والظلم، بس برجع أسكت فوراً وأحبس دموعي، وبحلف لنفسي إني هكون حاجة كبيرة جداً في البلد دي وهثبت نفسي، عشان يعرفوا كلهم إن 'أم رجل ونص' دي مش فاشلة ولا ناقصة، وإن النقص والتشوه الحقيقي والعرج موجود جوه عقولهم وقلوبهم المريضة!".

دمعت عينا الأم من شجاعة ابنتها وكبريائها، وقالت بلهفة وخوف عليها: "يا ياسمين يا حبيبتي، لو أنتِ مش مرتاحة في الكلية دي والضغط النفسي عليكي كبير، نحول ورقنا لكلية تانية فوراً ومتروحيش هناك تاني، وقدمي شكوى رسمية في العمادة ضد الولاد والبنات دول وأنا هروح معاكي.. وكمان أنا هكلم باباكي النهاردة عشان نتحرك بسرعة ونجيب رجل تانية اصطناعية ومطورة من برا عشان تسندك وتريحك في المشي".

ضحكت ياسمين فجأة ضحكة خفيفة طريفة لتقلب الطاولة على الحزن وقالت: "قصدك رجل تالتة يا ماما!.. الناس كلها الطبيعي عندها رجلين اتنين بس، وأنا ما شاء الله هيكون عندي تلاتة؛ رجلي الطبيعية، ورجلي القديمة، والرجل الجديدة اللي هنجيبها.. والأغبياء المتنمرين في الكلية لسه بيقولوا عليا أم رجل ونص!".

ابتسمت الأم بمرارة ممتزجة بالفخر الشديد بذكاء ابنتها وقدرتها على السخرية من وجعها، وضمتها إليها مجدداً وقالت بحنان جارف: "ومالو يا ستي.. تلاتة تلاتة، وهو إحنا عندنا في الدنيا دي كلها حد أهم ولا أغلى منك يا ياسمين؟ ربنا يحفظك ليا يارب".

أمسكت ياسمين يد والدتها وضغطت عليها برفق، ونزلت دمعة صامتة على خدها وهي تقول بنبرة يملؤها الامتنان والمسؤولية: "أنا عارفة يا ماما إني محملة بابا فوق طاقته بكتير، وعارفة إنه اضطر يسافر ويتغرب مخصوص بعد الحادثة بتاعتي عشان مصاريف علاجي والعمليات كترت ودخلنا في دوامة مابتخلصش، مع إنه كان رافض السفر والغربة تماماً وكان عاوز يفضل جنبنا.. بس أرجوكِ يا ماما، لما تكلميه في التليفون قوليله إن أول ما أخلص دراستي وأتخرج هشتغل وأعوضه عن كل شقاوتة وتعبة ده.. هانت يا أمي، هانت ومفيش فاضل كتير".

مرت الأيام والأسابيع متلاحقة، وتأرجحت تفاصيلها بين المذاكرة المكثفة، والاهتمام بدروس ملك وحصصها التي لا تنتهي، وبين ذلك الموعد اليومي الثابت الذي أصبح بمثابة رئة يتنفس منها إسلام؛ موعد توصيله لياسمين إلى الجامعة. مع كل رحلة وكل حوار يدور بينهما في السيارة، كان إسلام يشعر بأن هناك خيوطاً خفية تُغزل لتشد قلبه نحوها، وزاد تعلقه بها وب تفاصيلها بشكل لم يحسب له حساباً.

واقترب موعد فك الجبيرة عن قدم ياسمين.. وجد إسلام نفسه غارقاً في دوامة من الأفكار المشتتة؛ لا يعلم لماذا يفكر بها إلى هذا الحد؟ وكيف سيراها بعد أن تُشفى؟ شعر بانقباضة في صدره وهو يدرك أنه سيفقد تلك الأحاديث اليومية المشوقة التي كانت تزيل هموم يومه، وسيشتاق كثيراً لابتسامتها الخجولة التي كانت تشرق في سيارته كل صباح. وفجأة، فاق من شروده العميق وتلاشت ملامح ياسمين من مخيلته على صوت الممرضة "هناء" وهي تطرق مكتبه قائلة: "يا دكتور إسلام.. المريض اللي في أوضة ٣٠٣ حالته استقرت تماماً وخارج النهاردة، وكان طالب يشوف حضرتك بالاسم قبل ما يمشي".

اعتدل إسلام في مكتبه وقال: "حاضر يا هناء، أنا رايح له حالاً".

بعد دقائق معدودة، وصل إسلام إلى جناح المريض، ووقف أمام الغرفة رقم ٣٠٣ وطرق الباب برفق، فجاءه الصوت من الداخل مألوفاً وقوراً: "ادخل..".

فتح إسلام الباب ودخل بابتسامة بشوشة قائلاً: "تعالي يا إسلام.. خطوة عزيزة يا ابني".

تقدم إسلام نحو الفراش وقال بمرحه المعتاد: "أستاذنا الكبير الغالي! هتوحشني والله والعيادة من غيرك مش هتبقى حلوة.. الممرضات قالوا لي إنك عاوزني بالاسم، فجيت أوام وجري قطع نفس عشان ألحق أودعك".

ضحك الرجل بصفاء وهز رأسه قائلاً: "والله أنت ولد بكاش ولسانك حلو! ولا كنت فاكرني أصلاً ولا جاي في بالك وسط زحمة المستشفى دي".

(فلاش باك - ليلة العملية الجراحية)

دلف إسلام إلى الغرفة ليلاً وعلى وجهه أمارات الإرهاق الشديد، واقترب من فراش المريض الذي كان يستعيد وعيه ببطء، وقال باعتذار: "معلش أنا آسف جداً إني اتأخرت عليك وسيبتك الفترة اللي فاتت دي كلها لوحدك بعد ما فقت".

رد الرجل بنبرة هادئة ومجهدة: "ولا يهمك يا ابني، أنا عارف تعبك ومقدره.. المهم طمني، أختك الصغيرة عاملة إيه دلوقتي؟ نزلت واطمنت عليها وبقت بخير؟".

تنفس إسلام بارتياح وقال: "الحمد لله، روحت واطمنت عليها ولقيتها في البيت مع الست اللي بتاخد بالها منها والحمد لله جت سليمة.. قولي بقى يا فندم، أنا بقالي يومين بتابع حالتك بس من كتر التوتر والضغط لسه معرفش اسمك الكريم إيه؟".

ابتسم الرجل وقست ملامحه بنوع من الشجن والذكريات البعيدة، وقال بصوت حنون: "كان ياما كان.. كان في ولد صغير شاطر، كل يوم الصبح ياخد أخت الصغير في إيده ويروح بيها المدرسة، وكان دايماً بيطلع من الأوائل على المدرسة كلها. وفي يوم وهو مروح بعد الظهر، لقي بنت صغيرة واقفة في الشارع بتعيط بحرقة لإنها تاهت ومش عارفة ترجع بيتها.. الولد ده رغم صغر سنه ورغم إنه كان لسه طفل، إلا إنه رجولته ومروءته مسمحتش ليه إنه يسيبها لوحدها ويمشي؛ فضل واقف معاها في الشارع يحميها، كل العيال زمايله مشيوا وروحوا لبيوتهم وهي لسه واقفة معاه، أصل عيلتها كانت لسه منقولة جديد في الحي ومش عارفين الشوارع كويس. فضل الولد جنبها لحد ما الوقت اتمخر والدنيا ضلمت، وفي الآخر لما عجز يوصل لعنوانها، خدها في إيده وروح بيها على بيته.. يومها الولد ده أخد علقة سخنة محترمة من أبوه عشان اتأخر بره البيت والكل قلق عليه، ولما أبوه شاف البنت الصغيرة معاه وسأله عن السبب، حكاله البطل الصغير كل اللي حصل بأمانة.. الأب فرح بشجاعة ابنه، وخدهم هما الاتنين ونزلوا راحوا لنفس الشارع اللي تاهت فيه، وفعلاً لقوا أبو البنت قالب الدنيا عليها وبيدور مع الشرطة، ويومها أبو البنت شكر الولد الصغير جداً وشكر أبوه اللي أحسن تربيته".

اتسعت عينا إسلام بذهول وصدمة ألجمت لسانه، وتسارعت دقات قلبه وهو يستمع للقصة التي يعرف تفاصيلها بدقة، ولم يستطع منع نفسه من مقاطعة الرجل ليكمل القصة بصوت يرتجف من شدة التأثر: ".. وتاني يوم، الولد ده لما راح المدرسة، تفاجأ إن الراجل الطيب أبو البنت التايهة هو المدرس الجديد اللي دخل عليهم الفصل! ومن يومها اتصاحبوا وبقى المدرس ده بيحب الولد جداً وبيعتبره ابنه، وفضلوا مع بعض لحد ما الراجل ده سافر فجأة هو وعيلته كلها بره مصر، وانقطعت أخبارهم ومشافوش بعض تاني من سنين طويلة!".

تلاقت أعينهما بنظرات مليئة بالدموع، وقال الرجل بابتسامة دافئة: "أنت أنقذت بنتي زمان من الشارع يا إسلام.. وأنقذتني أنا دلوقتي من الموت بعد ربنا".

تأثر إسلام بشدة وتقدم خطوة للأمام قائلاً بصوت مخنوق: "كنت فين السنين دي كلها يا أستاذ منير؟! وحشتنا جداً والدنيا غيرت ملامحنا خالص".