الفصل الثالث

إقتربت شهد من فرح تربت على كتفها لتهدئتها ثم إستداراتا ليجدا بسمه حزينه على وجه هند.

فإندفعت شهد نحوها بقلق واضح: مالك يا هند

إبتلعت ريقها بصعوبه: إسمعونى كويس اللى ربنا يكرمها وتشتغل هنا تتمسك بالشغل واللى لأ ترجع للقديم

أجابتها فرح بغضب مكتوم: إيه العته ده يا نشتغل كلنا يا لأ

أكدت شهد حديثها بمرح لتهدئ من توتر هند : آه يانعيش عيشه فل يا نتزحلق احنا الكل

تمتمت فرح بسخريه: بيقولو نموت

فنهرتها شهد بغضب مصطنع أنهته بدلال مازح: موته تشيلك بتفولى عليا إخص عليكى دا أنا حتى لسه زغننه

رفعت فرح حاجبها لتسخر قائله: زغننه مين يا دبه

تدخلت هند حين ملت من جدالهما وندمت حين أفصحت عما تظنه سيحدث: خلاص إنتى وهيا يمكن ربنا يكرمنا وإحنا أصلا مقدمين عمال نضافه يعنى تهتهتى ف الكلام قدام اللى هيعمل معانا المقابله مش هتفرق

قضبت فرح جبينها متعجبه: وإنتى إيش عرفك إنه راجل مش يمكن تطلع ست

فأوضحت هند: مسمعتيش البت اللى بتتكلم بتقولك مستر جاسر ولا آسر ده هيطردنا تقريبا هو اللى هيعمل المقابله

تدخلت شهد لتهدئ من قلق هند: ويمكن صاحب المحل

فتمتمت الأخيره بقلق: ربنا يستر

أرادت شهد تغيير الموضوع لإشغال هند عما تفكر به: ياما كان نفسى أبقى مساعده للشيف وأتعلم الطبخ على أصوله

تنهدت فرح بضيق: للأسف لازملك شهاده

فمدحتها هند: مع إن أكلك وربنا أحلى من أجدع شيف

فتمتمت شهد بحزن: النصيب بقى وانتى يافرح

- والله أنا لو معايا شهاده أفضل أشتغل جارسونه مليش صبر عالمطبخ وصداعه

فهتفت هند بمرح لتخرجهما من ضيقهما: المهم هنبقى سوا أخيرا وهنشتغل بكل عزمنا

فنظرتا إليها ببسمة يومئان لها بتأكيد ولم يكنّ يومها يعلمن أن هناك من يراقب كل هذا بعقل واعٍ ولم يعلمن فيما بعد ولا غيرهن قد علم.

فقد تابع جاسر ما قيل وما حدث من كمبيوتره المحمول ثم أغلقه وظل يفكر بهذا الحديث الذى سمعه للتو من تلك الفتيات اللائي يبدون جادات بالعمل بالفعل.

وكم شعر بالمقت من هاتين المتعجرفتين اللتين تظنان أنهما أفضل من غيرهما فقط لأن ثيابهما أفضل وكما يبدو فهما سيكونان كالكثير ممن سبقنهما من فتيات ساذجات أتين للإيقاع به وكأنه جائزة يتنافسن عليها.

تنهد جاسر بضيق فعلى ما يبدو أن ليث كان محقاً بوضع كاميرات مراقبه خفيه لا يعلم بها سواهما فقد إكتشفا بها من أرادوا العبث هنا.

ولهذا أصبح يحكم قبضته على المكان والجميع يظنون أن هناك بينهم من ينقل أخبارهم له لذا يحذرون من بعضهم ويعملون بجد دون إستهتار

وقد كانت معرفته تلك السبب الخفي لإعطاء تلك الفتيات تلك الفرصة الذهبية التي تمسكن بها وها هن تعملن بجد.

❈-❈-❈

لقد كانت مكالمة ساذجة تلك التي أجراها جاسر مع تلك المجهولة ولكنها أعطته دفعة حماسية للعمل مجدداً وبعد أكثر من ساعتين عمل متواصل.

أزاح كمبيوتره المحمول جانباً متكئاً للخلف يغمض عينيه بإرهاق ولسبب لا يعلمه تذكر يوم تقدم الفتيات للعمل حين سمع حديثهن مع هاتين المدللتين.

وأرسل إلى حسام أقدم نادل بالمطعم ورغم هذا لم يترق لأنه مهمل بعض الشيء وهو فقط يتحمله من أجل مدير المطعم ذاك الرجل المُسن زوج خالة ليث الذى كان منذ البدايه يداً بيد معهما لإنجاح المطعم.

فقد كان والد حسام صديقاً جيداً له وقد توفى منذ عدة سنوات تاركاً زوجته وبناته الصغار بلا معاش يعيلهم وليس لديهم سوى حسام.

دخل حسام ليعلمه عن المتقدمين: ناس كتير جايه تقدم بس أربعه بس اللى جايين عشان النضافه منهم تلات بنات

- طب دخل البنات اللى متقدمه للنضافه الأول

خرج حسام وأخطر المتقدمين أن الفتيات المتقدمات إلى وظيفة عمال نظافه هن من سيدخلن أولا وقد أدخل الفتيات الثلاث دفعه واحده وتبعهن إلى الداخل يرمقهن بنظرات مستهينه ثم نظر إلى جاسر

- بلاشهم أحسن شكلهم تعبان

لم يبالى حسام بإحراجهن ونظر لهم وكأنهم أقل منه فعقب جاسر ساخرا: لأ إنت اللى كنت برنس عصرك وأوانك لما جيت تشتغل هنا

- أأ أأ أنا أنا

تلعثم حسام بحرج ممتزج بالضيق مما تعرض له من إهانه لكن جاسر لم يبالى وأشار له نحو الباب: بيتهيألى إن وراك شغل

- والمقابلات

إعترض حسام فإحتدت نظرات جاسر الساخره ترافقها نبرة صوته الجاده: أنا اللى هقابلهم على شغلك

فخرج حسام يصر على أسنانه بضيق بينما نظر جاسر إلى الفتيات الثلاث وأشار إلى ركن بالغرفه شبه خفي عن الأنظار فقط هو من يراهن لكن أي من المتقدمين لن يقع نظره عليهن لأنه خارج نطاق الرؤيه.

- هتقعدوا هناك وهتابعوا اللى هيحصل ومش عايز نفس من واحده فيكم وركزوا كويس ف اللى هيتقال والدروس اللى هعلمهالكم عشان بعد كده متتلخبطوش

إعترضت فرح بهدوء: بس حضرتك فاهم غلط إحنا مقدمين عمال نظافه

- أنا اللى أحدد ولا إنتو غيرتو رأيكم ومش عاوزين تشتغلوا

فهتفت شهد سريعاً: مش عاوزين إزاى إحنا تحت أمرك

قضب جبينه بضيق: كلنا بنخدم شغلنا واتفضلوا ومش عاوز نفس مفهوم

أومأن بصمت وجلسن ينظرن إلى بعضهن بحيره حتى صدع صوته يسمح بالمتقدم الأول بالدخول وقد كانت إحدى المتعجرفتين اللتين أهانتهن بالخارج وما إن أرادت الجلوس أشار لها جاسر بالنهوض

وسألها بصوت بارد: أنا أذنتك بالجلوس؟

- لأ

أجابته بحرج فلم يُظهر أى إهتمام وتابع سؤالها: قوليلى يا آنسه لو واحد شكل هدومه بسيط دخل المطعم هتعملى إيه

قضبت جبينها متسائله: يعنى إيه بسيط

- شخص فقير مثلا

أجابته بإستنكار: هطلب من الأمن يخرجه

- هتسيبى شغلك والزبون اللى بتتعاملى معاه وتروحى تطرديه؟

= لأ بس هنده للأمن بعد ما أعتذر للزبون وجود حد بالشكل ده هيسيء لسمعة المطعم

رفع حاجبه مستنكراً: حد؟!!

ثم تنهد بضيق وأردف سائلاً: طيب لو زبونه تعبت فجأه وإحتاجت مساعدتك هتعملى إيه؟

قضبت جبينها متعجبه: ازاى يعنى؟!

فأوضح بضيق: حامل مثلا وحالتها تعبت

قاطعته سريعاً بتقزز: يع ودي هتعوزني ف إيه

- تسنديها لحد ما تهدى أو توصل لمكانها مثلا

قاطعته مجدداً والإنزعاج واضح عليها: لأ حد من العمال يساعدها

- يا آنسه من تواضع لله رفع إحنا شعارنا ف المطعم الأكل للجميع كلنا ولاد آدم وقبل ما تتعالى على الناس شوفى عيوبك الأول

هتفت بإعتراض: افندم

فأفرغ كل ما ضايقه منها دفعة واحده بوجهها: إنتى متسرعه وبطيئة الفهم وكل سؤال بسأله عاوزاله شرح وفاكره نفسك أحسن من غيرك عشان شويه هدوم وأنا ميسعدنيش أبداً إنى أشغل واحده بالطريقه دى إتفضلي

نظرت الفتيات الثلاث إليه بذهول لقد رفضها وهى المتأنقه المتعلمه فماذا سيحدث لهن لكنهن تفاجأن به ينظر لهن بعد أن غادرت

- الدرس الأول التواضع

أتت أخرى تبدو واثقة جداً وقد أعطته ورقة تعريف فأمسكها بإستهزاء: إيه دي؟ توصيه!

أومأت بثقه: أهاه

- ومن مين يا ترى؟

= تقدر تشوف بنفسك

نظر إلى الإسم المدون ثم ضحك بقوة ومزقه أمام نظرها الذاهل وصرختها المستنكره: إنت إنت إزاى تعمل كده

نظر لها بإستخفاف: ياترى هتكملى المقابله ولا كفايه لحد كده

فإحتدت بنبرة غرور: انت متعرفش دى مين ولا الظاهر مخدتش بالك من الإسم كويس

لكنه لم يبالى بهذيها الأحمق: لأ خدت بالي كويس

- ومتعرفش إنها مرات أخو صاحب المطعم وتقدر تمشيك حالا

= تبقى تورينى هتعمل كده إزاي اتفضلي

تركته وغادرت فنظر إليهن: المساواة

ثم أردف بصوت واثق: اللى بعده

كان كلما دخل أحدهم يسأله وحين يخرج ينظر لهن ويخبرهن مبدأ ما حتى إنتهى وإختار من المتقدمين ثلاثه شباب غيرهن ووقفوا أمامه بعد أن أشار إلى الفتيات أن يقفن بجوارهم.

- أنا اللى يهمنى هنا النظام والإلتزام مادمتو بتأدوا شغلكم على أكمل وجه هتفضلوا هنا ومن اللحظه اللى هتلبسوا فيها زى العمل فإنتو رسمى انضميتوا لأسرة المطعم كلنا هنا إخوات محدش أحسن من حد إلا بجديته وحماسه ف الشغل وأى مشكله تواجه أى حد فيكم أنا موجود والمدير موجود تقدروا توصلوا شكواكم ليه وأتمنى إنكم تكونوا على قد التحدى وتشتغلوا بذمه

أفاق من شروده بعد دقائق مبتسماً راضياً عن نفسه لما فعله معهن