الفصل الخامس

وصل "خليفة" إلى الشركة بوجهٍ متجهم، وكأن الليل لم يمر عليه أصلًا.

ألقى مفاتيحه فوق المكتب، ثم استدعى "أسر" سريعًا، فقد كان عاجزًا عن تنفيذ القرار بنفسه.

دخل "أسر" بخطوات متحمسة:

— صباح الخير يا "خليفة".

رد عليه "خليفة" بعبوس واضح:

— صباح النور.

ثم دفع نحوه بورقةٍ تحمل توقيعه، وقال بصوت مثقل:

— دي ورقة فصل "حازم"...

ياريت توصلهاله، ولو سأل عليّا قوله إني مشيت...

أنا مش هقدر أواجهه.

لم يستطع "أسر" إخفاء فرحته، فابتسم ابتسامة واسعة قبل أن يخرج مسرعًا نحو مكتب "حازم".

فتح الباب دون استئذان.

رفع "حازم" رأسه بضيق فور رؤيته:

— خير؟

إيه اللي جابك لعندي؟

ابتسم "أسر" بسخرية باردة:

— القدر يا عزيزي.

ثم مد يده بورقة الفصل.

أغمض "حازم" عينيه للحظة، فهو كان يتوقع هذه النهاية... لكنه لم يتوقع أبدًا أن يرى توقيع "خليفة" أسفل القرار.

قال "أسر" باستمتاع وهو يراقب صدمته:

— "خليفة" بيقولك متروحش مكتبه...

شايف إن ده القرار المناسب.

تنفس "حازم" ببطء، ثم قال باستسلام مؤلم:

— تمام...

هلم حاجتي وأمشي.

في تلك اللحظة، رن الجرس أعلى المكتب، فدخل "باهر" متسائلًا بقلق:

— خير يا "حازم" بيه؟

قال "حازم" دون أن ينظر إليه:

— لم حاجتي وابعتها البيت.

ارتبك "باهر":

— ليه يا "حازم" بيه؟

لكن "أسر" سبقه بالرد، متعمدًا إذلاله:

— لأن الشركة استغنت عن خدماته.

اشتعلت عينا "حازم" بالغضب، لكنه ابتلع إهانته وخرج من المكتب سريعًا.

وما إن غادر، حتى نظر "باهر" لـ"أسر" بتوتر:

— وأنا يا "أسر" بيه؟

مط "أسر" شفتيه بلا مبالاة:

— وإحنا مالنا بيك؟

اتصرف مع نفسك...

بس قبل ما تمشي، نضف المكتب كويس، أصل من النهارده بقى مكتبي أنا.

---

خرج "حازم" من الشركة وهو يشعر أن الأرض تُسحب من تحت قدميه.

أخرج هاتفه فورًا واتصل بـ"شهيرة".

كانت لا تزال نائمة بعد ليلة كاملة من التفكير والبكاء.

فتحت الهاتف بنعاس:

— أيوه يا "حازم"...

للدرجة دي مستعجل؟

مش قادر تستنى للضهر حتى؟

جاءها صوته مبحوحًا ومتوترًا:

— "شهيرة"... حصل حاجة جديدة.

ولازم أشوفك حالًا...

ولو مجتيش، أنا اللي هجيلك الفيلا... وساعتها مش ضامن رد فعلهم.

انتفضت من مكانها فورًا:

— إنت اتجننت؟!

عايز تهد الدنيا فوق دماغي؟!

قال بسرعة يحاول تهدئتها:

— اهدي...

إنتِ عارفة إني مستحيل أسببلك أذى.

تنهدت بتعب، ثم قالت باستسلام:

— حاضر... هغسل وشي وأنزل أقابلك.

بس بالله عليك متأخرنيش...

خايفة حد منهم يرجع.

رد عليها بحنان حاول إخفاءه:

— أوعدك... مستنيكي.

---

في الوقت نفسه...

وصلت "ياسمين" إلى مقر جمعية المرأة، لكنها لم تجد "هاجر" التي تتولى تنظيم الاجتماع.

زفرت بضيق واتصلت بها فورًا:

— إنتِ فين يا "هاجر"؟

مش قولتلك تيجي قبلي بساعة؟

جاءها صوت "هاجر" مرتبكًا:

— آسفة يا مدام "ياسمين"...

كنت نازلة، بس "باهر" رجع فجأة من الشغل، وكنت هكلم حضرتك لأن حصل مصيبة.

تجهم وجه "ياسمين":

— مصيبة إيه؟

قالت "هاجر" بسرعة:

— "حازم" اتفصل من الشركة...

و"باهر" كمان طردوه، والضغط والسكر عليوا عليه ووقع في الأرض.

في البداية ردت "ياسمين" بلا اهتمام:

— ما يفصلوه... أنا مالي؟

لكنها فجأة تذكرت أنها هي من أصرت يومًا على تعيين "باهر" بجوار "حازم" ليخبرها بكل تحركاته.

تنهدت بضيق:

— خلاص يا "هاجر"...

هأجل الاجتماع وأشوف موضوع "باهر".

ردت "هاجر" بامتنان واضح:

— مش عارفة أودي جمايل حضرتك فين.

ابتسمت "ياسمين" بسخرية باردة:

— عدي الجمايل يا "هاجر"... وخليكي فاكرة كويس.

ثم أغلقت الهاتف وعادت فورًا إلى الفيلا.

---

خرجت "شهيرة" من البوابة الخلفية للفيلا بخطوات متوترة، حتى وصلت إلى الشارع الخلفي حيث كان "حازم" ينتظرها.

ما إن رآها حتى شعر أن قلبه يتمزق.

عيناها ذابلتان من كثرة البكاء، ووجهها شاحب بشكل موجع.

كان يريد أن يضمها بقوة بين ذراعيه... لكنه اكتفى بمصافحتها.

— إزيك يا "شهيرة"؟

ردت ببرود متعمد:

— بخير.

ياريت تقول اللي عندك بسرعة.

تنهد "حازم" طويلًا:

— يوم الحادثة...

أنا كان المفروض أسافر بالمهمة دي.

لكن "أسر" أصر ياخدها بدالي... وهو اللي بعت العربية لـ"زين".

أنا بس مضيت على خروجها.

اتسعت عينا "شهيرة" بذهول:

— تقصد إيه؟

نظر داخل عينيها مباشرة وقال:

— أقصد إن "أسر"... هو اللي دبر الحادثة.

صرخت فيه بعنف:

— كداب!

"أسر" صاحب زين ومستحيل يعمل كده!

امتعض وجه "حازم" بألم:

— يعني تصدقي إني أنا اللي عملتها... لكن "أسر" لأ؟

دفعت صدره بيديها وهي تبكي:

— أيوه!

إنت طول عمرك بتغير من زين... وعايز تاخدني منه بأي طريقة!

في لحظة ضعف، جذبها "حازم" إلى صدره وربت على ظهرها بحنان موجوع:

— لا يا "شهيرة"...

أنا مستحيل أخدك من أي حد غصب.

أنا بس... كنت عايزك تبقي مبسوطة، حتى لو مع غيري.

---

في المساء...

عاد "زين" إلى الفيلا ليجدها ساكنة على غير عادتها.

تنهد براحة خفية لأنه لم يجد أحدًا بانتظاره.

دخل مكتبه وجلس خلفه، يسند رأسه المتعب فوق سطح المكتب.

لكن الباب انفتح فجأة، ودخلت "ياسمين" بعصبية:

— إيه الكلام اللي سمعته ده؟!

جواز إيه؟ و"خلود" مين اللي عايز تتجوزها؟!

رفع "زين" رأسه ببطء، ثم قال ببرود غاضب:

— دي حياتي يا أمي...

ومش ملزم أديكي تبريرات.

اقتربت منه بقلق حقيقي:

— إزاي؟ أنا أمك!

الناس هتقول إيه؟

هيقولوا إن "زين السرجاني" بعد موضوع رجله اتجوز أي واحدة والسلام!

ثم تابعت باحتقار واضح:

— أنا أصلًا بتكسف لما أمها تركب معايا العربية ويفتكروها صاحبتي...

دي مجرد خدامة عندي!

صرخ "زين" بعنف لأول مرة:

— خلصنا من الموضوع ده يا أمي!

ومش عايز أسمع نقاش فيه تاني.

لكن "ياسمين" حاولت تلطيف نبرتها خوفًا من خسارته:

— طيب... فكر تاني بس.

خبر زي ده ممكن يهد الدنيا فوق دماغنا.

نهض "زين" من مكانه واتجه نحو الباب، ثم قال بقسوة دون أن يلتفت لها:

— أنا طالع أنام...

ومن بكرة هبدأ ترتيبات جوازي من "خلود".

تجمدت "ياسمين" في مكانها.

انتظرت حتى خرج، ثم جلست على كرسيه ببطء وهمست بشرٍ واضح:

— مبقاش أنا "ياسمين" لو ما نفيتكِ من على وش الدنيا يا "خلود"...

أكيد دي لعبة من "هاجر" و"باهر".

---

أما "زين"...

فما إن دخل غرفته حتى خلع سترته بعصبية، ثم جلس على السرير يحاول فك ساقه الصناعية.

لكن كلمات والدته كانت تلاحقه.

"اتجوز أي واحدة والسلام..."

قبض على الساق الصناعية بعنف، وكاد يحطمها من شدة الغضب.

هو يعلم جيدًا...

أن فتاة مثل "خلود" لم تكن لتنظر إليه أصلًا لولا المال والنفوذ.

تذكر ملابسها الضيقة، وطريقتها المستفزة داخل مكتبه، فاشتعل غضبه أكثر.

كيف يمكن أن تصبح زوجته؟

لكن فجأة...

لمعت عيناه بفكرة قاسية.

ربما كانت "خلود" بالذات... أفضل شخص يفرغ فيه كل غضبه ومرارته.

---

في صباح اليوم التالي...

استيقظت "خلود" بإرهاق واضح بعد ليلة كاملة قضتها تنتظر اتصال "حازم".

غسلت وجهها سريعًا وخرجت من غرفتها، لتتفاجأ بوالدتها جالسة بشرود داخل الصالة.

توقفت بدهشة...

فـ"هاجر" من المفترض أن تكون الآن في اجتماع الجمعية.