الفصل السابع

انتبه إليها باهر فجأة وقال بصوت مرتفع فيه غضب خفي:

= إيه... مين قالك إنها مش موافقة؟ أنتِ هتتخيلي أوهام دلوقتي؟

ردت هاجر بصوت منخفض وهي تنظر إلى الأرض:

= طيب ليه النهارده قفلت في وشي السكة؟ مفيش تفسير تاني.

أفاقت من شرودها على دخول خلود إلى المنزل. ذهب باهر إليها فورًا وجذبها بين أحضانه بقوة قائلاً بصوت مرتجف من الفرحة:

= حبيبة بابي... أخيرًا جتي.

ابتسمت خلود وقبّلت والدها قائلة:

= عيون خلود.

ابتسم باهر ابتسامة عريضة وقال بصوت يملأه الفخر:

= النهارده أحلى يوم في حياتنا كلها... زين طلبك للجواز.

صدمت خلود وتسمرت في مكانها، تلجلجت مرتبكة وصوتها خرج مكسورًا:

= زي...ن طلبني أنا للجواز؟ إزاي؟

رد باهر بفرحة لا تخفى:

= أيوه يا حبيبتي... وده أحلى طلب لأحلى خلود في الدنيا.

ارتعدت أوصالها من تأكيد والدها للخبر وصرخت فجأة بصوت عالٍ:

= مستحيل... أنا لا يمكن أوافق أبدًا!

هنا فاقت هاجر من شرودها تمامًا وقالت بغضب شديد وهي تقترب منها:

= أنتِ اتجننتِ؟ أنتِ متعرفيش اليوم ده أنا خططت له إزاي؟ سنين من التعب عشان اللحظة دي!

خلود بغضب موازٍ ودموعها بدأت تظهر:

= لا يا ماما... مستحيل. ولو هتغصبوني ههرب وهعملكم فضيحة قدام الناس كلها.

صفعتها هاجر على وجهها صفعة قوية جعلتها تميل برأسها، ثم قالت بصوت حاد كالسكين:

= ده أنا كنت قتلتك وشربت من دمك... أنتِ لسه صغيرة ومتعرفيش مصلحتك. إحنا أدرى بيها منك.

خلود بدموع ساخنة وهي تمسك خدها:

= ومصلحتي إني أتجوز معاق؟

رفعت هاجر إصبعها إلى فمها بتنبيه حاد قائلة:

= أششش... اخرسي. إياكي أسمعك تقولي كده تاني. زين مش معاق... ده حادث اتعرض له وركب ساق وبقا زيه زينا... بل أحسن مننا بفلوسه اللي هتعيشك ملكة... وهتنقذنا من الفقر اللي إحنا غرقانين فيه من سنين.

نظرت خلود إلى باهر لتستعطفه، لكنّه أشاح بوجهه إلى الجانب الآخر قائلاً بجمود بارد:

= أمك عندها حق. دي الجوازة اللي كان نفسنا فيها من زمان. احمدي ربنا إنه طلبك أنتِ للجواز... أنتِ بالذات مش غيرك.

تركتهم ودخلت غرفتها وهي تجر أذيال الخيبة والغضب. أسرعت بإخراج هاتفها من حقيبتها لتتصل بحازم. كان نائمًا، فعندما رن هاتفه حدّق في الشاشة ووجدها خلود. زفر حانقًا وقال لنفسه:

= يووه... مش لسه مكلماني الصبح. مضطر أرد لاحسن مش هتبطل رن... ويمكن يكون عندها أخبار مهمة.

رد بصوت ناعس متعب:

= أيوه يا خلود.

أجابته بصوتها الباكي المرتجف:

= الحقني يا حازم... هيجوزوني غصبن عني. لازم تيجي تخطبني دلوقتي.

تنهد حازم تنهيدة طويلة وقال:

= أهدي يا خلود... أنا حاليًا مقدرش أتقدم لكِ لأني خطبت.

صدمت خلود وقالت بصوت مكسور:

= خطبت... إزاي وامتى وفين ومين؟ حازم أنا لسه مكلماك الصبح!

حازم بأسى واضح:

= خطبت شهيرة... كل حاجة جت بسرعة. معلش اعذريني.

قالت من بين شهقاتها وهي تبكي بصوت أعلى:

= آسف! اعذريني! ده اللي ربنا قدرك عليه؟ طب وأنا؟ كنت أنا إيه بالنسبالك؟

حازم بنفاذ صبر:

= أنا ما وعدتكيش بحاجة من الأول.

مسحت خلود دموعها بقوة وقالت بصوت بارد فجأة:

= طب مش حابب تعرف مين اللي اتقدم لي؟

مط شفتيه وقال بلا اهتمام:

= أيًّا كان... بتمنالك السعادة من كل قلبي. تصبحي على خير.

ظلت خلود تنظر إلى هاتفها بذهول وغضب يشتعل داخلها... إلى أن حسمت أمرها بالموافقة على زواجها من زين لتنتقم أشد الانتقام من حازم وشهيرة معًا.

استيقظت خلود من نومها بتعب شديد وأجفان متورمة من شدة البكاء الذي انتهى باستسلامها التام للقدر مع الخوف من المستقبل. نهضت من الفراش متجهة إلى الخارج لتلحق بوالدها قبل ذهابه إلى الشركة. كاد أن يخرج من الشقة فنادته قائلة بصوت خافت:

= بابا... أنا موافقة على الجواز من زين.

شعر باهر بالاطمئنان فأغلق عينيه وحمد ربه ثم استطرد قائلاً بابتسامة:

= طيب مش نقول صباح الخير الأول؟

ردت خلود بحزن ظاهر:

= صباح الخير.

تنهد باهر وذهب إليها ليحتضنها قائلاً بحنان:

= خلود أنتِ مش دايمًا بتثقي في اختياراتي؟

قالت باستسلام:

= أيوه يا بابا.

باهر بفرح واضح:

= يعني يا خلود اقتنعتي بكلامنا امبارح؟

ابتسمت ابتسامة باهتة وقالت:

= اقتنعت... بس يا ريت يا بابا لو جيت في يوم ومرتحتش وعايزة أطلق توافق.

ربت باهر على كتفها ومسح على شعرها وقال بثقة:

= وأنا أوعدك يا قلب بابا إنك هتكوني قوية بيا دايمًا. متخافيش من حاجة.

ذهب باهر إلى الشركة وزف خبر موافقة خلود لزين، الذي لم يستغرب موافقتها لأنه يعلم أنها إنسانة جشعة مثل والديها. تصنّع زين الفرح واتفقوا على ترتيبات الزفاف على أن يتم بعد أسبوع من الاتفاق. بعث لهم كبير الصاغة إلى المنزل لتنتقي مجوهراتها، وهذا الشيء أحزنها كثيرًا. كانت تتمنى أن تقابله ولو لمرة واحدة قبل الزفاف على الرغم من كرهها الشديد له، وأن زواجها منه زواج قائم على المصلحة فقط. لكن رفض زين الالتقاء بها لأن مثل هذه الأشياء ليست مهمة بالنسبة له. ولم ينسَ أبدًا أمر ثوب الزفاف، فقد بعث لإحضاره من أرقى بيوت الأزياء في باريس وصمم على اختياره بنفسه لأنه لا يثق باختيارها ويخشى أن تختار فستانًا فاضحًا. وكل ذلك يعني أنه لم يقصر بأي شيء في ترتيبات الزفاف.

بعد مرور أسبوع... تجلس خلود في جناح العروس المخصص لها في فندق من أكبر الفنادق، تفرك يديها بتوتر وقلق مما هي مقبلة عليه. تتذكر المرتين اللتين قابلت فيهما زين ونظراته المستميتة لها، وتتعجب لماذا رفض مقابلتها في الأسبوع الماضي ولو حتى مرة واحدة قبل الزفاف. الذي زاد من غضبها أمره لأبيها أن تنزل من على درج الفندق لاستقباله بمفردها بدون أن تتباطأ ذراع والدها مثل أي عروس. أفاقت من شرودها على دخول والدتها للجناح. انبهرت والدتها بها فقد كانت ترتدي فستانًا من أجمل فساتين العالم، على الرغم من استيائها لاحتشامه الشديد؛ فقد كان ذو أكمام طويلة ورقبة تغطي عنقها بالكامل وظهر مغطى تمامًا وليس به أي فتحات أو أشياء مثيرة. أخبرتها والدتها أن زين ينتظر في القاعة وعليها الإسراع بالهبوط حتى لا يتذمر من تأخيرها.

خرجت خلود من الجناح وتوجهت إلى الدرج، ولم تظهر عليها أي ملامح للفرحة كعروس. هبطت الدرج تحمل فستانها حتى لا تتعثر به وتمسكت بالثوب جيدًا، وتمتمت بكلمات لعينة تخص بها زين. وما إن وصلت لآخر الدرج حتى رأته يتقدم إليها ببطء وبرود وثقة مطلقة. مد يده إليها وقبّلها قبلة مصطنعة على جبينها وسحبها معه إلى متعهد الدي جي وأخذ منه مكبر الصوت، مما أثار اندهاشها. نظر زين إلى المدعوين وتحدث ببرود قائلاً:

= طبعًا كلكم معزومين ومش عارفين مين العروسة... لأني تعمدت ما أكتبش اسمها في الدعوة... عشان أعرفكم عليها بنفسي.

تعالت الهمهمات بين المدعوين شغفًا منهم لمعرفة هوية العروس. أما عن حالة خلود فكانت مذهولة من حديثه. أفاقت من شرودها عندما قال بصوت أوضح:

= عروستي تبقى خلود الجويلي... بنت السيد باهر اللي بيشتغل عندي، ووالدتها الست هاجر بتشتغل مساعدة لأمي في الجمعيات الخيرية. شفتوا بقى أنا راجل متواضع إزاي... مش متكبر زي ما بتتكلموا عني.

ظهرت معالم الاستياء على وجه ياسمين فحديثه بمثابة فضيحة أمام صديقاتها. أما عن خليفة فشعر بالحزن على أسلوب زين. أما نهى فشعرت بالأسف على خلود فهي امرأة مثلها ترى أن أسلوب زين محرج وقاسي.

صدمت خلود من حديثه عنها وأحست بالاختناق خاصة مع فستانها الثقيل ونظرات المدعوين لها. أشار زين لمتعهد الدي جي ليبدأ الحفل وقال للمدعوين لإسكاتهم:

= ودلوقتي أقدر أقولكم انجوي...

ونظر إلى خلود بخبث وهو يكمل:

= زي ما أنا هستمتع مع عروستي.

وسحبها لساحة الرقص ليفتتح الحفل برقصتهما السلو. وجدت نفسها بين أحضانه ترقص وهو لا ينظر إليها. فاستطردت قائلة بصوت منخفض غاضب:

= ليه عملت كده؟ قاصدك إيه من ده كله؟ ليه ما كتبتش اسمي في دعوة الفرح؟

ابتسم زين بسخريه ونظر إلى عينيها نظرة ثاقبة وقال بصوت هادئ وقاسٍ:

= هو ده كل اللي يهمك؟ إن اسمك مش مكتوب؟

---