الفصل الرابع

الحادثة التي جاءت كأنها رسالة قاسية من القدر... لتقطع آخر خيطٍ يمكن أن يُبقي هذا الزواج حيًا.

قالت "نهى" بعفوية وهي تشير لـ"زين":

— تعالى اقعد... الوقفة غلط عليك.

لكزها "خليفة" سريعًا في كتفها لتصمت، فهي بأقوالها تزيد الوضع سوءًا دون قصد.

ثم تدخل محاولًا إنقاذ الموقف:

— سيبوا الكلام ده دلوقتي... المهم العربية.

عرفت منين إنها مفيهاش فرامل يا زين؟

لكن "ياسمين" كان لها رأي آخر.

اقتربت من ابنها وقالت بحزم:

— سيبوه يطلع يرتاح يا "خليفة".

كفاية عليه شهر كامل لا بيعرف ينام ولا يرتاح.

تنهد "خليفة" باستسلام:

— ماشي يا ماما... اللي تشوفيه.

اطلع ارتاح يا زين.

لكن "زين" رمق والدته بنظرة قوية تحمل انزعاجه من تدخلها الدائم، ثم قال بصلابة:

— لا يا "خليفة"... أنا هقعد هنا.

لازم أفهم من عمي شوية حاجات.

رد "شرف" ببرود وهو يعقد ذراعيه:

— اسأل... وأنا أجاوب.

هز "زين" رأسه ببطء قبل أن يقول بنبرة حادة أشبه بالتحقيق:

— عربيات الشركة بتتفحص باستمرار ولا لأ؟

ضاق صدر "شرف" من أسلوبه، لكنه قال مباشرة:

— هقولك من الآخر... العربية كانت جاية من التوكيل ومتتفحة بالكامل.

واللي حصل مقصود، ومن "حازم".

كل مرة أقولك اطرده تقولي مهما كان ابن عمي!

وفجأة اندفعت "ياسمين" نحوه كالإعصار، تمسكه من تلابيب قميصه وهي تصرخ:

— ولما إنت متأكد إنه "حازم"، مبلغتش البوليس ليه؟!

أقولك أنا ليه؟!

عشان لما ابني يضيع، ييجي "حازم" ياخد بنتك بداله!

شهقت "شهيرة" بانهيار:

— لا يا طنط!

إنتِ عارفة كويس إني بحب زين... ومستحيل بابا يعمل فيه كده!

ده بيحب زين أكتر مننا كلنا.

كان "زين" يتابع كل شيء بصمتٍ ثقيل ونظرات ثاقبة، قبل أن تقترب منه "شهيرة" باكية:

— قول لمامتك يا زين إن بابا عمره ما يأذيك... بابا بيعاملك زي ابنه.

لكن كعادته... تجاهل دموعها تمامًا.

وقال لوالدته بصرامة:

— أمي... لو سمحتي متتدخليش في الموضوع ده.

أنا مش صغير، وأعرف أجيب حقي بنفسي.

ثم التفت إلى "خليفة" فجأة:

— من بكرة... يطلع قرار بطرد "حازم" من الشركة.

أنا صبرت عليه كتير... لكن خلاص، طفح الكيل.

اتسعت عينا "خليفة" بصدمة:

— إيه اللي بتقوله ده؟!

مش لما نتأكد الأول؟

وبعدين "حازم" مستحيل يعمل كده... إحنا أولاد عم، زي الإخوات.

ضحك "زين" باستهزاء مرير:

— إنت فعلًا أخويا الكبير... بس للأسف بتحركك مشاعرك.

ومعندكش القدرة تاخد قرارات مصيرية زيي.

شعر "خليفة" بطعنة حقيقية من كلام أخيه، خصوصًا بعدما لمح نظرات الشماتة داخل عيني "ياسمين" و"شرف".

فهم أيضًا لا يؤمنون بقوة شخصيته.

بعدما أنهى "زين" أوامره، استدار وصعد إلى غرفته دون أن يمنح أحد فرصة للنقاش.

راقبت "ياسمين" وجه "خليفة" العابس، ثم قالت بحدة:

— أنا مش فاهمة إيه اللي مضايقك في طرد "حازم"؟

يكونش أخوك هو كمان؟

لم تتحمل "نهى" أكثر فقالت بغضب:

— حرام بقى!

"حازم" مستحيل يعمل كده... أكيد في حاجة غلط.

لكنها ما إن انتبهت لوجود والدها حتى صمتت فورًا.

ضحكت "ياسمين" بسخرية لاذعة:

— والله ما فضل غير مرات ابني تدافع عن عدونا.

حاول "خليفة" التدخل سريعًا:

— لا يا ماما، "نهى" مقصدهاش—

لكن "ياسمين" أشارت له بعنف:

— بس!

محدش فيكم يتكلم.

وفي تلك اللحظة، كان هاتف "شهيرة" لا يتوقف عن الرنين والرسائل.

لاحظت "ياسمين" الأمر فورًا، فالتفتت إليها بنظرة مليئة بالشك:

— وإنتِ يا ست "شهيرة"... من ساعة ما رجعتي والتليفون مش بيسكت.

خير؟

توترت "شهيرة" ونظرت نحو والدتها تستنجد بها.

لتندفع "تفيدة" فورًا في وجه "ياسمين":

— قصدك إيه يا "ياسمين"؟

مالك ومال بناتي؟

ابتسمت "ياسمين" بسخرية مستفزة:

— مقصديش حاجة...

بس اللي على راسه بطحة بيحسس عليها.

وفجأة دوّى صوت "شرف" بحدة أخرست الجميع:

— خلصنا!

كل واحد يشوف وراه إيه.

غادرت "تفيدة" مع ابنتيها نحو الحديقة، بينما صعد "خليفة" إلى غرفته شاردًا في الطريقة التي سيطرد بها "حازم" غدًا.

لكنه حسم أمره أخيرًا...

سيترك المهمة لـ"أسر"، لأنه الوحيد الذي لا يطيق "حازم".

أما داخل بهو الفيلا...

فلم يبقَ سوى "شرف" و"ياسمين".

انتظر "شرف" حتى تأكد من انصراف الجميع، ثم قال بخشونة:

— إنتِ عايزة إيه بالظبط يا "ياسمين"؟

نهضت من مكانها بكل هدوء، ثم قالت ببرود مرعب:

— عايزة اللي إنت بتفكر فيه... وهاخده برضاك أو غصب عنك.

في الحالتين مش فارقة معايا.

ثم رمقته من رأسه حتى قدميه وصعدت لغرفتها.

ظل "شرف" يراقب أثرها قبل أن يتمتم بغضب:

— عايزة ترميني برا البيت والشركة زي ما كنت ناوي أعمل زمان؟!

اشتدت أنفاسه وقال بوعيد:

— بس لأ...

مش "شرف السرجاني" اللي حد يعلّم عليه.

---

في الحديقة...

جلست "شهيرة" تفرك يديها بتوتر بينما هاتفها بين كفيها.

"حازم" لا يتوقف عن الاتصال منذ خروجها من المستشفى، مُصرًا على مقابلتها ليشرح حقيقة ما حدث.

حاولت "تفيدة" تهدئتها:

— يا بنتي اهدي... العياط مش حل.

لكن "نهى" كانت تفكر سريعًا حتى لمعت الفكرة في رأسها فجأة.

انتفضت بحماس:

— لقيتها!

بكرة اجتماع جمعية المرأة... وطنط "ياسمين" مبتجيش إلا بالليل.

ده أنسب وقت تقابلي فيه "حازم".

ترددت "شهيرة" للحظات، قبل أن تُخرج هاتفها وتتصل به.

جاءها صوته فورًا مليئًا بالقلق والحنان:

— "شهيرة"... إزيك؟

طمنيني عليكي... إنتِ بخير؟

امتلأت عيناها بالدموع.

كيف لهذا الرجل الحنون أن يحاول قتل "زين"؟

تماسكت بصعوبة وقالت:

— الحمد لله... أنا بخير.

ممكن تقابلني بكرة؟

تنفس "حازم" براحة واضحة:

— طبعًا... بس ليه أستأذن من الشغل؟

ما نتقابل بعده ونتغدى سوا.

اشتعل غضبها فجأة:

— نتغدى سوا؟!

إنت عايز توجعني أكتر من كده؟

ارتبك فورًا:

— خلاص... خلاص، آسف.

اللي إنتِ عايزاه.

أغمضت عينيها بتعب قبل أن تهمس:

— قابلني في الشارع اللي ورا الفيلا.

شعر "حازم" بمرارة قاسية.

حتى لقاءه بها أصبح يتم خلسة كالمذنبين.

لكنه قال بصبر:

— حاضر يا "شهيرة".

أول ما أوصل هرن عليكي... بس لازم تيجي، لأني لازم أقولك حاجة مهمة.

ثم أضاف بألم:

— بعدها... إنتِ اللي هتقرري إذا كنتِ عايزة تشوفيني تاني ولا لأ.

ومهما كان قرارك... هتمنالك السعادة من كل قلبي.

أغلق الهاتف، لترتمي "شهيرة" بعدها داخل أحضان والدتها باكية.

تسأل نفسها للمرة الألف:

هل يمكن فعلًا أن يكون "حازم" قاتلًا؟

---

في صباح اليوم التالي...

غادرت "ياسمين" الفيلا متجهة لاجتماع جمعية المرأة، بينما خرج "خليفة" إلى الشركة مُكرهًا...

فاليوم، سيتم طرد "حازم".