الفصل الثالث والعشرين

الأم: مالك يا ليلى؟ جاية واخدة في وشك كدا ليه ومنفوخة؟ إيه اللي حصل فوق؟

— ليلى (بغل): شوفي بنتك عاليا بتفضل عليا البتاعة اللي اسمها مي دي! أنا مش عارفة لقتها فين وجابتها من أنهي داهية؟ تربية حواري وشوارع وبقت حاشرة نفسها في حياتنا وعيلتنا بشكل يخنق! تخيلي يا ماما مرضيتش تلبس الفستان الغالي البراند اللي جيبتهولها بمبلغ كبير جدا، ولبست الفستان المقرف اللي البتاعة دي صممتهولها!

— الأم (بحزم وضيق من أسلوب ليلى): أولاً.. مسمهاش بتاعة! اسمها مي وبنت ناس ومؤدبة وكويسة جداً، وبتحب أختك وصاحبتها بجد ووقفت معاها.. ثانياً أنتي عارفة إن عاليا اتفقت معاها على الفستان من زمان، إيه اللي جَدّ بقا وخلاكي تتدخلي؟

— ليلى (بإحباط): يا ماما روحي شوفي ملبساها إيه فوق! هتخلي الناس والكل يضحك علينا وعلى شكلنا في الحفلة مش معقول كدا! ده غير الطرحة واللفة اللي مش عاوزة تخلعها النهاردة ومصممة تقعد بيها وسط المعازيم!

ابتسمت الأم نادية بابتسامة فخر وصافية من قلبها، وقالت بنبرة أسكتت ليلى تماماً:

— الأم: ربنا يكملها بعقلها ويثبتها يا رب! والله العظيم شاطرة وبرافو عليها إنها عملت كدا وتمسكت برأيها.. هو الحجاب كمان هيبقى لعبة نخلعه في المناسبات والأفراح ونلبسه تاني في الأيام العادية؟ عقبالك يا ليلى لما ربنا يهديكي وتلبسيه زي أختك وتفرحي قلبي.. أنا رايحة بنفسي أشوف الفستان وأبارك لها.

ذهبت الأم ودموع الفرحة في عينيها، لتضرب ليلى كفيها ببعضهما وتصرخ بقلة حيلة وغيظ:

— ليلى: حتى أنتي يا ماما واقفة معاهم؟! آه يا أنا من العيلة دي!

خطا حسام داخل الغرفة بخطوات يملؤها الشغف، وما إن وقعت عيناه على عاليا حتى تجمد في مكانه، وانبهر تماماً من فرط جمالها وأناقتها الطاغية. كانت تبدو كالأميرات في فستانها البرونزي البسيط وحجابها المتناسق، فاقترب منها وعيناه تشعان عشقاً، وأشاد بذوقها الرائع قائلاً بصوت دافئ:

— حسام: عارفة يا عاليا؟ بيعجبني فيكي جداً إنك دايماً بتختاري كل ما هو بسيط وانيق، والحاجة بتطلع عليكي تحفة وتخطف العين.. يمكن عشان أنتي اللي لابساه ومحلية الفستان! لو أي حد تاني غيرك لبسه مش هيكون بالجمال والحلاوة دي أبداً.

سرت قشعريرة دافئة في جسدها، واحمر وجهها طرباً وخجلاً إثر كلماته العذبة، مما زادها حسناً وبهاءً. لمحت مي هذا الارتباك اللذيذ، فتدخلت بصوت ضاحك ومشاكس:

— مي: الله أكبر! وشها احمر والكسوف اشتغل.. أنت قولت لها إيه بالظبط ياض عشان تقلب طماطم كدا ع الصبح؟

— حسام (وهو يلتفت إليها بضيق مصطنع): ياض؟! احترميني شوية بقا يا بنتي، دا أنا حتى عريس كتب كتابه النهاردة وكدا! (ثم نظر لعاليا): لمي صاحبتك دي يا عاليا أرجوكي، أنتي إيه مفيش سيطرة خالص على أصدقائك؟

— عاليا (بضحكة صافية): هههههه أنتوا إيه بالظبط؟ ناقر ونقير كدا دايماً مش بتبطلو!

— مي (بقهقهة): هههههه عارفة يا عاليا.. لو مكنش حسام أخويا في الرضاعة، كنت اتجوزته أنا مخصوص عشان أربيه من أول وجديد وأكرهه في صنف الستات كلهم!

— حسام (بسرعة وفزع كوميدي): لاااااا! كله إلا كدا يا مي.. أبوس إيدك حرمت وتُبت خلاص!

— مي: يا عبيط ما إحنا إخوات متخافش.. بس برضه هطلع عينك وعين اللي خلفوك في الأيام الجاية.

ضحك الجميع من قلوبهم، وفي الأجواء الاحتفالية الدافئة، حضر المأذون وجلس بين الحاج عبد الله وحسام. وخلال دقائق، تم كتب الكتاب وارتفعت الزغاريد وسط الفرحة والسعادة التي غابت طويلاً عن هذه العائلة. تعانق العروسان في لحظة انتصار للحب، لكن في زوايا الحديقة، كانت هناك عيون تراقب في صمت مريب، وعيون غيورة تكيد المكائد وتنفث سمومها.

اقتربت ليلى بخطوات بطيئة من حازم الذي كان يقف بعيداً يتابع الفرحة بملامح جامدة، وقفت بجواره وقالت بنبرة خفيضة حادة:

— ليلى: فاكر يوم خطوبتنا يا حازم؟ كان أسعد يوم في حياتي كلها.. كنت أتمنى نكمل ونبني بيت، وكنت هخليك أسعد إنسان في الدنيا كلها لو كنت بس حبتني ربع ما حبيتك! لكن اليوم اللي رميتلي فيه دبلتي وفسخت خطوبتنا وكسرت فرحتي قدام الكل، أنا حلفت ووعدت نفسي إني أندمك طول عمرك على الكسرة دي.. وبكرة تشوف ليلى هتعمل إيه! وكفاية عليا دلوقتي إني شايفه نظرة الحسرة والندم دي في عينيك وأنت شايفها بتكتب كتابها وبقت مع واحد غيرك.. شوفت النظرة دي في عينيها زمان لما خطبتني، ودلوقتي بشوفها في عينيك أنت.. ومستحيل هخليك لا أنت ولا هي ترتاحوا في حياتكم أبداً، لأنكم أنتوا الاثنين السبب في تدمير حياتي ونفسيتي!

أنهت ليلى كلماتها المسمومة، وتركت جمر غيظها في قلبه ورحلت، وسط دهشة حازم الشديدة وخوفه الحقيقي من نبرتها الوعدية. حاول حازم أن يطمئن نفسه ويهدئ روعه، متمتماً لنفسه بأنها مجرد كلمات غضب وتهديد شفهي ولن تجرؤ على فعل شيء، لكن كيف يطمئن وقد عمتها نيران الغيرة وفعلت ما فعلت من قبل؟ ظن لثوانٍ أنها تغيرت وهدأت بعد التعافي، لكن يبدو أنه كان مخطئاً تماماً، فالأفعى تغير جلدها ولا تغير سمّها.

انتهى اليوم الجميل بسلام، ورحل الجميع، وكان يوماً سعيداً بحق للعروسين.. كم انتظراه طويلاً وتجرعا من أجله الصبر، وها قد آن أوان الفرح.

في صباح اليوم التالي.. استيقظت عاليا على رنين هاتفها، فتحت الخط لتجد صوت حسام يفيض حيوية:

— حسام: صباح الخير يا مدام حسام.

— عاليا (بضحكة خفيفة ناعمة): ههههه صباح النور.. إيه مدام دي؟ لسه بدري عليها!

— حسام: لا بقولك إيه.. مدام ونص وثلث كمان! يلا فوقي وافطري وصحصحي كدا بسرعة عشان ورانا مشوار مهم جداً.

— عاليا: مشوار إيه والشغل؟ أنا ورايا تسليمات والـ...

قاطعها حسام سريعاً بنبرة حاسمة ومحبة:

— حسام: شغل إيه ونيلة إيه! أنا أخدت النهاردة إجازة رسمي من الموقع، وأنتي كمان إجازة النهاردة من الشركة.. أنا وأنتي وبس، ومفيش أي مخلوق تالت معانا.

— عاليا: بس النهاردة الشغل محتاجني و...

قاطعها مرة أخرى بدلال:

— حسام: يا حبيبي ده يوم إجازة واحد لينا نحتفل بيه.. أنا عارف ومقدر إنك مضغوطة ومش عاوزة تأخدي إجازات دلوقتي، بس ده يوم واحد هنحتفل فيه بكتب كتابنا ونتفسح.. يرضيكي يعني أقضي تاني يوم كتب كتابي مع العمال والخرسانة في الموقع؟ يرضيكي أقعد طول اليوم وشي في وش الواد عماد المهندس الرزل؟

ضحكت عاليا بشدة فور سماعها تشبيهه، وقالت مستسلمة:

— عاليا: لا طبعاً ميرضينيش هههه.. خلاص، اللي تشوفه صح اعمله، هستناك تجهز وتعدي عليا.

اتصلت عاليا بعمها الحاج عبد الله وطلبت منه إجازة لهذا اليوم فوافق بترحيب، وذهبت لتجهز نفسها وتختار ملابسها، لتفاجأ بعد قليل بدخول ليلى الغرفة وعلى وجهها علامات التهكم:

— ليلى: أهو.. بدأنا إجازات ودلع من أول يوم! بكرة بقا يقولك سيبي الشغل واقعدي في البيت.. مش كنتي زمان زعلانة من حازم ومضايقة عشان بياخد إجازات كتير؟ اشمعنى دلوقتي الوضع عاجبك مع حسام؟

— عاليا (بثبات وهدوء): أولاً.. دي إجازة يوم واحد بس مش أسبوع، وأنا ماخدتش إجازات من الشركة من زمان جداً وعمو وافق.. ثانياً، أنا كنت زعلانة من حازم لأنه كان بيختفي بالأيام من غير ما يبلغ حد قبلها ويوقعنا في مشاكل وخسائر في الشغل بسبب غيابه المفاجئ، مش عشان بياخد إجازة رسمية.. ثالثاً بقا وبمناسبة الإجازات، ما أنتي لسه راجعة من إجازة أسبوع كامل قضيتيه في دهب وفسح! في إيه مالك كدا ومنفوخة ليه؟