الفصل الثامن عشر

حازم (ببرود وهدوء): بفكر.

— ليلى: بتفكر فيا.. ولا فيها هي؟

— حازم: بفكر في كل حاجة.. في حياتي وفي كل غلطة عملتها.

— ليلى (بضحكة ساخرة): بقيت فايق ومركز وعميق كدا فجأة ما شاء الله! هو "الكوك" مبقاش بيعملك الدماغ المظبوطة ولا إيه يا حازم؟ خلصت الجرعة؟

التفت إليها حازم بنظرة قوية، خالية تماماً من الضعف أو الخوف، وقال بثقة هزت كيانها:

— حازم: أنتي قديمة أوي يا ليلى ومغفلة.. أنا بتعالج من الإدمان ده من بدري جداً، وخلاص بطلت تماماً ونظفت جسمي وحياتي من القذارة دي!

— ليلى (بصدمة وتفاجؤ شل حركتها): بتتعالج؟! بجد؟! طيب إمتى وإزاي ومن ورايا؟!

— حازم: لما قولت لكم إني مسافر بره مصر لمدة شهر زمان، أنا مكنتش مسافر.. أنا كنت في مصحة مغلّقة للعلاج والتعافي. ولما كنت بختفي بالأيام الفترة اللي فاتت، كنت بروح للمتابعة والتحاليل.. في حاجات كتير أوي اتغيرت فيا يا ليلى، وفي حاجات تانية لازم وضروري تتغير حالا.

— ليلى (بوجل): حاجات إيه؟

— حازم (وهو يقف ويواجهها بحسم): إحنا يا ليلى.. إحنا مش هينفع نكمل مع بعض أبداً. علاقتنا من الأول كانت غلط، ومبنية على غلط وابتزاز، ولازم نصلح الغلط ده فوراً.. خطوبتنا منتهية.

وفي اليوم التالي.. في منزل حسام:

اقتربت منة من شقيقها بخجل وتردد وهو يجلس حزيناً:

— منة: حسام.. ممكن أتكلم معاك في موضوع كدا لو فاضي؟

— حسام (بتنهيدة): تعالي يا منة.. سامعك.

— منة: أنا عارفة ومقدرة جداً إن الوقت مش مناسب وأنت مضايق، بس في موضوع مهم ولازم أقولك عليه.

— حسام: قولي على طول يا منة في إيه؟

— منة (بخجل شديد واحمرار وجنتيها): في.. في زميل ليا معايا في الكلية.. بقاله فترة،هو محترم وبيطلب مني يكلمك، وهو عاوز يجي يقابلك رسمي ويطلب إيدي.

— حسام (رغم حزنه ابتسم برفق): وأنتي رأيك إيه فيه وشايفاه إزاي؟

— منة (وهي تخفض رأسها): معرفش بقا.. قابله أنت الأول وشوفه، وبعدين نقرر ونشوف.

— حسام: طيب يا ستي.. خليه يجي ينورنا يوم الخميس الجاي وأنا هقعد معاه.

وفي مكان بعيد.. داخل مطعم راقٍ بقرية سياحية على البحر:

كان أحد الزبائن يجلس على طاولة ويلوح بيده:

— الزبون: لو سمحتي يا آنسة..

التفت طارق (مدير المكان) ونادى على نور:

— طارق: روحي يا نور شوفي الزبون اللي على طاولة 4 ده محتاج إيه.

— نور (وهي تبتسم بمهنية): حاضر..

توجهت نحو الطاولة وأمسكت بنوتة الصغيرة: "أيوة يا فندم تحت أمرك.. تحب تطلب إيه؟"

وفجأة، تجمدت يد الزبون وهو ينظر إلى وجهها بذهول تام وعدم تصديق، وصاح بعفوية:

— الزبون: آنسة عاليا؟!

رفعت عاليا عينيها بتوتر ورعب شديد عندما عرفت الهوية، وقالت بوهن:

— عاليا: إسلام؟! أنت.. أنت بتعمل إيه هنا؟!

— إسلام (بدهشة): حضرتك اللي بتعملي إيه هنا في المكان ده وبلبس الشغل؟ ومش بتيجي الشركة ليه بقالك شهرين؟ ده الدنيا مقلوبة عليكي في القاهرة والكل هيتجنن وبيدور!

لمح طارق التوتر والارتباك الشديد على وجهها من بعيد، فتقدم نحو الطاولة بخطوات سريعة وقال باهتمام:

— طارق: في إيه يا نور؟ في مشكلة هنا في الطلب ولا حاجة؟

— نور (بسرعة وخوف من الفضيحة): لا.. لا مفيش حاجة خالص يا طارق.. ده.. ده...

— إسلام (بمقاطعة واستغراب): نور مين؟! دي الآنسة عاليا هانم مديرة المشاريع وبنت أصحاب الشركة!

— عاليا (بسرعة والدموع تكاد تفر من عينيها): احم.. احم، حضرتك تحب تطلب أكل إيه تاني يا فندم؟

جذبها طارق بلطف وبحزم من يدها خارج صالة المطعم نحو الممر الخارجي الهادئ، بعدما أشار لزميلة أخرى لتأخذ مكانها مع الزبون. وقف أمامها وقال بنبرة حادة مليئة بالغيرة والتساؤل:

— طارق: أنتي مين بالظبط؟ عاليا ولا نور؟ ومخبية عننا إيه في ماضيكي؟ ومين البني آدم اللي جوه ده وبيقول عليكي هانم ومديرة؟

— عاليا (بضيق وهي تحاول الهروب): أنا مش مخبية حاجة.. ودي حياتي الشخصية ومحدش ليه دعوة بيها! عاليا.. نور.. اختار الاسم اللي يريحك ويتماشى معاك، ولو وجودي هنا أو اسمي مسبب مشكلة في الشغل، أنا كدا كدا هسيب الشغل وهمشي حالا ومن غير مطرود.. عن إذنك!

تحركت لتبتعد، لكن طارق قبض على يدها برفق ومنعها قائلاً بلهفة:

— طارق: نور استني.. قصدي يا عاليا.. أرجوكي اسمعيني!

— عاليا (بحدة وهي تنظر ليده): لو سمحت.. سيب إيدي فورا!

— طارق (وهو يترك يدها بأسف وصوت يملؤه الشغف): أنا آسف جداً والله مش قصدي أضايقك.. بس استني ومتجمديش كدا! أنا.. أنا ممستحملتش أشوفك واقفة معاه وبيتكلم معاكي بالطريقة دي.. أنا حسيت بنار وغيرة بتاكل في صدري.. نور، أنا بحبك!

كانت عاليا تعيش في دوامة أخرى من الذعر، الأفكار تتصارع في رأسها ولم يكن لديها سوى رغبة واحدة: الهروب فوراً قبل أن يخبر إسلام عائلتها بمكانها وتضيع خطتها. التفتت إلى طارق الذي كان ينظر إليها بلهفة وانتظار، وقالت بصوت مرتعش نادم:

— عاليا: أنا آسفة جداً يا طارق.. مش هينفع، أنت مديري في الشغل ومش أكتر من كدا، وأنا لازم أمشي من هنا حالا وبأسرع وقت!

— طارق (بصدمة ومحاولة للتمسك بها): طيب استني بس وفهميني! لو في مشكلة أو حد بيضايقك أنا هساعدك وأقف جنبك، متندفعيش كدا!

— عاليا (وهي تتحرك بخطوات متعثرة): مفيش وقت.. مفيش وقت للشرح يا طارق!

انطلقت نحو غرفتها لتجمع أغراضها القليلة في حقيبتها، وفي نفس اللحظة، كان إسلام يبتعد عن صالة المطعم ويمسك بهاتفه ليتصل على الفور بالقاهرة:

— إسلام (بلهفة وحماس): ألو.. يا عبد الله بيه! الآنسة عاليا هانم هنا في مطروح، أنا شوفتها بعيني وكلمتها حالا! البنت مشيت بسرعة أول ما لمحتني وكانت خايفة.. الغريبة إنها شغال واقفه على رجليها "ويتر" في مطعم في قرية سياحية! أنا هحاول أعطلها بأي طريقة ومخليهاش تمشي.. مع السلامة يا باشا.

أغلق إسلام الخط والتفت ليجد طارق يقف خلفه وعيناه تتفحصانه بشك وغيرة، فتقدم إليه إسلام مسرعاً:

— إسلام: لو سمحت.. هي الآنسة عاليا فين؟ قصدي زميلتكم نور؟

— طارق (بحدة): أنت مين بالظبط؟ وعاوز منها إيه وعرفت اسمها الحقيقي منين؟

— إسلام: مش وقته خالص الأسئلة دي، أرجوك متخليهاش تمشي ولا تهرب من المكان! أهلها قالبين الدنيا عليها وبيدوروا بقالهم شهرين وجايين في الطريق لهنا حالا.. لو سمحت ساعدني نمنعها تمشي وأنا هفهمك كل حاجة بالتفصيل!

داخل غرفتها، كانت عاليا تحاول دفع الباب بكل قوتها لتخرج بحقيبتها، لكنها وجدته مغلقاً من الخارج، فصرخت بزعيق وعصبية:

— عاليا: افتح الباب يا طارق! بقولك افتح الباب حالا ومتجننيش!

— طارق (من خلف الباب بصوت حازم): مش هفتح يا نور، ومش هتمشي وتسيبينا بالطريقة دي.. بطلي دوشة ورزع بقا واقعدي ارتاحي لحد ما نفهم في إيه!

التفت طارق إلى إسلام وسأله بذهول:

— طارق: يعني هي بجد من عيلة المرشدي؟ عيلة العز والشركات دي كلها؟ طب وهربت من الجنة دي كلها وجت تشتعل هنا ليه وعشان إيه؟

— إسلام (بتنهيدة): محدش عارف السبب الحقيقي لحد دلوقتي.. أهلها صحيوا من النوم في يوم لقوها اختفت وسابت رسائل غامضة، قلبوا الدنيا ونشروا صورتها في الجرائد والموانئ.. أنتوا إزاي مشوفتوش صورتها طول الفترة دي؟

مرت عدة ساعات، وعاليا مستمرة في الرزع والتخبيط على الباب دون جدوى، حتى تعبت وجلست على السرير تحاول التقاط أنفاسها. أخرجت هاتفها البديل واتصلت بزميلتها في السكن والمطعم:

— عاليا (بمحاولة لتهدئة صوتها): ألو.. أيوة يا ميرنا، أنا في حد قفل عليا باب الأوضة من بره بالغلط ومشي ومش عارفة أفتح.. معلش تعالي افتحيلي بسرعة.. أنا عارفة إن ده وقت الشفت بتاعك وضغط، بس حاولي طيب عشان خاطري.. هستناكي.. تمام مستنية.

بعد حوالي ساعة من القلق، وصلت ميرنا وفتحت الباب بالمفتاح الاحتياطي، فخرجت عاليا فوراً وهي تجر حقيبتها:

— عاليا (بأنفاس متلاحقة): متشكرة جداً يا ميرنا.. يلا سلام.

— ميرنا (بذهول وهي تنظر لحقيبتها): استني هنا! أنتي رايحة فين على فين بالشنطة دي كلها يا نور؟

— عاليا: لازم أمشي فوراً ومن غير تأخير.. زمان الشخص اللي شافني قالهم على مكاني وزمانهم على وصول.. هتوحشيني جداً يا ميرنا.. يلا باي.