الفصل التاسع عشر

ركضت عاليا نحو بوابة القرية السياحية الخارجية، لكنها تجمدت في مكانها وتخفت عندما وجدت سيارتين فخمتين تقفان فجأة، وترجل منهما رجال عائلتها.

تقدم إسلام بابتسامة:

— إسلام: حمد الله على السـ...

قاطعه حسام الذي دفع الباب ونزل كالمجنون، ملامحه يملؤها الشوق والغضب والخوف، وصاح بعصبية:

— حسام: هي فين؟! مش وقت سلامات وترحيب دلوقتي خالص يا إسلام!

— طارق (الذي ركض خلف ميرنا ووقف عند الباب): اتفضلو يا جماعة.. أنا قفلت عليها باب السكن من جوه عشان متتحركش... (نظر إلى الباب المفتوح بصدمة): إيه ده؟! الباب مفتوح.. هي هربت؟!

— حازم (بحسم وهو يوزع بنظراته على الممرات): كل واحد فينا يروح من حتة ويدور في ممر.. دوروا كويس ومش عاوزينها تضيع مننا تاني!

وعند البوابة الخلفية المؤدية للطريق الرئيسي، كانت عاليا تسير بسرعة الصاروخ، وفجأة اخترق مسامعها ذلك الصوت الدافئ المحفور في قلبها:

— حسام: مستعجلة على إيه كدا وليه؟ هتروحي فين تاني وتبعدي عني؟

لفت وجهها ببطء وصدمة عندما سمعت صوته، وكانت الدموع قد تجمعت في عينيها لتغطي ملامحها الشاحبة.

— حسام (بوجع وعتاب مرير): مش عاوزه تشوفيني يا عاليا؟ طيب مامتك اللي بتموت عليكي دي موحشتكيش؟ إزاي قلبك طاوعك تعملي فينا كلنا كدا وتسيبيني في النار دي؟

لم تجب، بل خفضت رأسها تنظر لأسفل، لا تقوى على النظر في عينيه اللتين يملؤهما العشق والعتاب، وشعرت أن كل قواها وكبريائها قد انهارا تماماً في هذه اللحظة، فتمتمت بصوت مبحوح:

— عاليا: حسام.. أنا...

لم تدعها الكلمات تكمل، إذ فاجأها بحركته السريعة والاندفاعية نحوها، وجذبها إلى صدره في عناق قوي وعنيف، عناق تجمعت فيه أشواق شهرين من الضياع.

— حسام (وهو يدفن رأسه في كتفها ويبكي باشتياق): أنا كنت بموت في كل ثانية من غيرك.. وحشتيني يا عاليا.. وحشتيني أوي! ليه مشيتي وعملتي كدا؟ كنتي اتكلمي معايا وعاتبيني.. أنا كنت هموت من القلق والوجع عليكي!

أفاقت عاليا من صدمة العناق، وشعرت بخوف من ضعفها أمام مشاعرها، فبدأت تحاول الهرب والتملص من بين يديه، لكنه أحكم قبضته عليها كأنه يرفض تركها للحياة مرة أخرى.

— عاليا (وهي تدفعه بعيداً بحدة مصطنعة): حسام سيبني لو سمحت! ابعد عني وابعد خالص!

دفعته بقوة حتى تراجع خطوتين، ونظرت إليه بقسوة مزيفة:

— عاليا: متقربش مني تاني يا حسام.. أنا مش بحبك، أنا كنت موهومة وظالمة نفسي معاك!

— حسام (بابتسامة ثقة وعينين تلمعان): بس بقا.. بطلي كذب وتأليف! أنا عرفت كل حاجة بالتفصيل.. ماما حكتلي على كل كلمة دارت بينكم وقالتلي الحقيقة!

— عاليا (بصدمة وجسد مرتجف): وطالما عرفت يبقى لازم تبعد! أنا مش موافقة على الجوازة دي، ولا يمكن هقبل أحطك في موقف اختيار ومقارنة بيني وبين مامتك، ولا هقدر أعيش معاك وأنا عارفة إنك بسببي ممكن تخسرها أو تزعلها.. ابعد عني يا حسام.

— حسام (وهو يقترب ويأخذ حقيبتها من يدها): مفيش مقارنة ومفيش خسارة يا قلب حسام.. ماما ندمت ندم عمرها على الكلام اللي قالتهولك، وموافقة عليكي ومستنياكي تنوري لينا بيتنا.. (نظر إلى حجابها بابتسامة دافئة): بعدين.. تعرفي إن شكلك حلو أوي بالحجاب؟ ولا ده جزء من خطة التنكر والاسم الجديد؟

— عاليا (بخجل وهي تعدل حجابها): لا طبعاً.. أنا كنت ناوية ومقررة ألبسه من قبل ما أسافر وأهرب أصلاً، بس مكنش عندي الشجاعة الكافية للخطوة دي، والغربة ادتني الشجاعة.

— حسام: طيب يلا تعالي معايا ومن غير نقاش، مامتك في القاهرة هيجرى لها حاجة بسببك وبسبب عياطها.

— عاليا (بعفوية): والله؟ أمال لو مكنتش بكلمها في التليفون واطمنها عليا بانتظام و...

توقف الكلام في حلقها عندما تجمد الثلاثة؛ حسام، وعبد الله، وحازم الذين ظهروا خلفهم فجأة، وصاحوا في وقت واحد بصوت هز المكان:

— الثلاثة: نَعَـمْ؟! بتكلميها؟!

— عاليا (بذعر وهي تتراجع للخلف): إيه في إيه يا جماعة مالكم خضيتوني الله! مش مامتي وبطمنها عليا عشان متقلقش؟

— عبد الله (بصدمة مصطنعة وحزم): بس.. لما نرجع القاهرة لينا حساب طويل عريض سوا على اللعبة دي!

— حازم (بابتسامة هادئة وصادقة التفتت لها عاليا باستغراب): مبروك الحجاب يا عاليا.. لايق عليكي.

— عاليا (بامتنان): الله يبارك فيك يا حازم..

وفي تلك اللحظة، تقدم طارق بخطوات حزينة وقال وعيناه معلقتان بها:

— طارق: هتوحشيني والله يا نور.. قصدي يا آنسة عاليا.

تلقى طارق نظرة نارية حارقة من حسام جعلته يتراجع خطوة ويدير دفة الكلام بسرعة:

— طارق (بتلعثم): احم.. هتوحشينا كلنا في المطعم والقرية يا آنسة عاليا، كنتي ضيفة خفيفة ولطيفة علينا والكل حبك.. ابقي تعالي زورينا في أي وقت.

— عاليا (بود): وأنتوا كمان هتوحشوني والله جداً.. خلي بالك من ميرنا وسمية، وسلملي على عم إبراهيم والحاجة خديجة.

التفت الحاج عبد الله إلى إسلام وقال بتقدير:

— عبد الله: خلص إجازتك براحتك يا إسلام، وأول ما ترجع الشركة ليك مكافأة كبيرة جداً عندي على أمانتك وشطارتك.

— إسلام (بفرحة): ملوش لزوم والله يا باشا.. ده واجبي، المهم إننا اطمنا على الآنسة عاليا ورجعت بالسلامة.. حمد الله على السلامة يا هانم.

ركب الجميع السيارات وعادوا إلى القاهرة. وطوال الطريق، كان كل واحد منهم يعيش في عالم آخر؛ النفوس تغيرت وانقلبت 180 درجة، والكل يفكر في الخطوة القادمة وفي المصير الجديد.

وعند وصولهم أمام فيلا المرشدي، التفت حسام لعاليا وقال بحنان حاسم:

— حسام: ارتاحي دلوقتي ونامي كويس، ولينا كلام كتير اوي مع بعض الفتره الجاية.. وعقاباً ليكي على الهروب ده، المرة الجاية هتبقى فرح ودخلة علطول مش خطوبة وكتب كتاب!

— عاليا (بتردد): حسام.. أنا...

— حسام (وهو يضع إصبعه على شفتيها): هششش.. يلا اطلعي نامي وفكي كدا، أنا كمان ميت من التعب وعاوز أنام.

دخلت عاليا الفيلا، فصرخت ليلى بفرحة وذهول وهي تنادي في أرجاء البيت:

— ليلى: عاليا جت يا ماما! تعالي بسرعة يا طنط تعالي شوف مين هنا!

ركضت ليلى نحو أختها واحتضنتها بشدة وعاطفة حقيقية افتقدتها:

— ليلى: وحشتيني أوي أوي يا عاليا! كنتي فين كل ده وسيبانا لمين؟ إيه ده.. وأنتي اتحجبتي إمتى؟ شكلك بقا جميل!

— عاليا (بابتسامة صافية): طيب قولي مبروك الأول.

وفي تلك اللحظة اندفعت الأم نادية، وأخذت عاليا من أحضان ليلى لتضمها إلى صدرها بقوة وتبكي بنحيب:

— نادية: مبروك يا حبيبتي.. مبروك الحجاب ياروح قلبي، وحشتيني أوي.. كدا يا عاليا؟ يهون عليكي قلب أمك وتبعدي عني كل الشهور دي وتاكلي في نفسي؟

دخل عبد الله خلفهم وقال بوعيد وضيق:

— عبد الله: أنتي بقا حسابك معايا عسير يا نادية! مقولتيش ليه من الأول إن البنت بتكلمك في التليفون وعارفة مكانها وسيبانا نلف حولين نفسنا كالمجانين؟!

— نادية (بدموع ودفاع عن النفس): لا والله يا عبد الله أنا معرفش مكانها فين بالظبط! هي كانت بتكلمني من أرقام مختلفة وتقولي "أنا كويسة وبخير وبصرف على نفسي وبس".. وقالت لي بالحرف الواحد لو قولتي لحد أو حاولتي تدوري عليا مش هتشوفي وشي ولا هتصل بيكي تاني أبداً! عشان كدا سكت وقلت كفاية أسمع صوتها كل كام يوم وأطمن إنها عايشة وبخير!

— ليلى (بفضول كبير): طيب كنتي بتعملي إيه الفترة دي كلها وعايشة إزاي ومستخبيه فين؟