الفصل السابع عشر

فضلت تمشي وقالت رايحة البيت، ومكنتش أعرف إنها بتودعني!

مرت الأيام والأسابيع في رحلة بحث مضنية ومستمرة عنها في كل مكان؛ في المستشفيات، في الشوارع، وحتى في سجلات السفر، لكن دون جدوى، ولم يعثروا لها على أي أثر. حتى حازم نفسه كان يبحث عنها بلهفة وجنون، وبسبب غيابه السابق وإهماله، كانت الشكوك كلها في العائلة تحوم حوله، والجميع يظن أنه تعرّض لها أو هددها. كان حازم يقسم لهم ليل نهار بأغلظ الأيمان أنه بريء تماماً ولا يعرف مكانها، لكنه لم يسلم أبداً من نظرات الشك والاتهام الموجهة إليه من الجميع.

وفي ليلة، وقفت ليلى أمامه في غضب عارم وهي تصرخ فيه:

— ليلى: قولي الحقيقة يا حازم وخلصني! عملت لها إيه بالظبط خلاها تسيب بيتها وشغلها وتمشي وتهرب بالطريقة دي؟

— حازم (بضيق وزهق وهو يلوح بيده): يووووه! والله العظيم ما عملت حاجة ولا شوفتها أصلاً من يوم مشكلة المكتب! أنا نفسي ألاقيها وأطمن عليها زيكم بالظبط، ليه محدش فيكم مصدقني؟!

مرت الأيام لتصبح أسابيع، والأسابيع دارت لتصبح شهراً ثم شهرين كاملين.. ولا يوجد طرف خيط واحد، ولا إجابة واحدة شافية تدل على مكانها أو تثبت أنها على قيد الحياة.

وفي ذات مساء، كانت منة تجلس بجوار حسام في الصالة، نظرت إليه بتردد وقالت بصوت خفيض:

— منة: حسام.. أنا في حاجة بخصوص عاليا افتكرتها فجأة وبقالها فترة بتروح وتيجي في بالي.

— حسام (بانتباه سريع): إيه؟ افتكرتي إيه يا منة؟ أنطقي!

— منة: قبل اختفاء عاليا بيوم بالظبط، أنا شوفتها هنا في شارعنا ونازلة من عمارتنا.. بس لما دخلت وسألت ماما وقتها، ماما توترت وقالتلي إنها مجتش ويخلق من الشبه أربعين.

— حسام (بقطب حاجبيه واستغراب): هنا في الشارع وعندنا في العمارة؟! بتعمل إيه؟

— منة: أنا كنت داخلة من أول الشارع وشوفتها وهي خارجة من بوابة العمارتنا بسرعة، ندهت عليها "عاليا.. عاليا" بس مردتش عليا خالص، سرعت مشيتي عشان أحصلها بس ملحقتهاش، كانت ركبت عربية تاكسي ومشت.. ولما ماما قالتلي يمكن واحدة شبهها، شيلت الموضوع من دماغي ومحطيتش في بالي، بس دلوقتي لما بربط الأحداث ببعض بحس إنها كانت هي!

التفت حسام ببطء نحو والدته الجالسة في الركن، وكانت ملامح الأم قد تبدلت تماماً وظهر عليها الرعب، فقال حسام بصوت حاد يحمل نبرة اتهام وقلق:

— حسام: الكلام ده حصل بجد يا ماما؟! عاليا كانت هنا قبل ما تختفي؟

وفي مكان آخر تماماً.. في إحدى المدن الساحلية الهادئة البعيدة عن صخب القاهرة:

كانت تجلس على كرسي خشبي مريح أمام شاطئ البحر مباشرة، ترتدي فستاناً أبيض فضفاضاً رقيقاً، وتضع حجاباً أنيقاً يبرز صفاء وجهها. كانت تمسك بين يديها رواية تقرأها، لكن نظرها الحقيقي وعقلها كانا معلقين بأمواج البحر المتلاطمة وصوتها الهادئ.

قطع خلوتها صوت ذكوري دافئ قادم من خلفها:

— طارق: ادخلي جوه بقا يا نور.. الجو بدأ يليل والليل هنا هواه شديد وكدا هتبردي وتتعبي.

نور : حاضر يا طارق.. هدخل حالا.

— طارق: يلا عشان تستلمي "الشيفت" بتاعك في المطعم والكافيه، الزباين بدأت تيجي.

— نور (وهي تنظر في ساعتها): لسه فاضل نص ساعة على معادي.. صحيح، في زباين كتير النهاردة في القرية؟

— طارق (بإعجاب وفخر ظاهر): الحمد لله.. من ساعة ما اشتغلتي معانا هنا وعملتي التعديلات والأفكار الجديدة في الديكور والمنيو، والشغل ماشي كويس جداً والقرية بقت زحمة.

— نور: ميرسي جداً يا طارق.. ده من ذوقك، أنا هروح أغير هدومي والبس لبس الشغل وجاية وراك علطول.

نعود إلى القاهرة.. في منزل حسام:

كان حسام يقف أمام والدته، وعيناه تشعان غضباً وقلقاً لا حدود له، صرخ بصوت مخنوق:

— حسام: ردي عليا يا ماما أرجوكي! في إيه مخبياه عني؟ عاليا كانت هنا فعلاً؟!

— الأم (ببكاء وندم شديد وهي تخفض رأسها): بصراحة يا ابني.. اه، هي كانت هنا في البيت عندي.. بس والله العظيم ما كنت أقصد، ولا كنت أعرف أو أتخيل إن كل ده ممكن يحصل بسببي!

— حسام (بقلب ينبض رعباً): إيه اللي حصل؟! قولتي لها إيه؟!

(Flashback):

قبل الهروب بيوم، داخل صالون منزل حسام، كانت عاليا تجلس مع الأم وتقول بنبرة صادقة:

— عاليا: كويس إننا لوحدنا عشان نتكلم براحتنا وبصراحة يا طنط.. أنا عاوزه أسألك سؤال واحد وتجاوبيني عليه من قلبك؛ حضرتك موافقة عليا بجد؟ عاوزاني أكون زوجة لابنك؟

— الأم (بتوتر واضح وصدمة من جرأتها): إيه يا بنتي الكلام اللي بتقوليه ده؟ وجاية تسألي السؤال ده دلوقتي ليه؟ ده كتب الكتاب والخطوبة الأسبوع الجاي والناس كلها عرفت!

— عاليا (بثبات وحزن مكتوم): وأنا مش هتجوز حسام ولا هكمل في الخطوة دي غير لو كنتِ موافقة ومرحبة بيا من قلبك.. أنا مش عبيطة يا طنط، وحاسة وعارفة من نظراتك ليا وطريقتك إنك مش مرتاحة ومضايقة من وجودي.. لو في في قلبك حاجة قوليها دلوقتي وصارحيني.. حضرتك موافقة عليا؟

— الأم (تنهدت بقوة وقالت بجفاء): شوفي يا بنتي.. الصراحة راحة، أنتوا عيشتكم وطريقتكم غيرنا خالص! شوفي أنتي لبسك وطريقتك عاملة إزي؟ هو مش وحش ولطيف، بس أنا بناتي محجبات ولبسهم محتشم وطريقتهم غير.. شوفي لبس أختك ليلى عامل إزاي حتى؟ وبيتكوا ومستواكم المادي والاجتماعي غير بيتنا وعيشتنا تماماً.. أنا مش عاوزه ابني في يوم من الأيام يحس إنه أقل منكم أو تحسسوه بالفرق ده. عاداتنا وتقاليدنا غير عاداتكم.. يعني أنا أول مرة شوفتك فيها وسألت عليكي عرفت إنك كنتي قاعدة مع ابني لوحدكم في كافيه، وده مستحيل يحصل عندنا ولا نقبله! أنتي متربية بره مصر وواخدة على الحرية دي، بس حسام من يوم ما أبوه مات وهو الراجل بتاعنا وسندنا اللي مسنودين عليه.. بيحرم نفسه من اللقمة ومن كل حاجة عشان يجيب لنا اللي في نفسنا، ومينفعش يوم ما يختار ويقرر يتجوز أقوله لأ وأكسر بخاطره، فوافقت غصب عني عشان خاطره هو بس!

سقطت الكلمات كالسكاكين على قلب عاليا، ونزلت دموعها الحبيسة التي حاولت جاهدة إخفاءها، فتنحنحت وقالت بصوت مكسور:

— عاليا: اه.. احم.. اه، أكيد طبعاً، عندك حق. أنا.. أنا متشكرة جداً يا طنط على وقتك وعلى صراحتك الكبيرة معايا، وأوعدك.. أنا اللي هبعد من نفسي ومش هقول لحسام أي حاجة من اللي دار بيننا.. أنا مش هاخده منكم ولا هقبل في يوم أكون سبب في مشكلة، ولا أقبل أدخل بيت أهم بني آدمة فيه مش عاوزاني ولا قبلاني.. بس حضرتك نسيتي حاجة واحدة في كلامك؛ نسيتي إن حسام عاوز يتجوزني أنا "عاليا" بعيوبي وحريتي وتربيتي، مش عاوز يتجوز ليلى! عن إذنك.

(Back):

بكت الأم بنحيب وهي تمسك يد حسام:

— الأم: سامحني يا ابني.. أنا اتسرعت وغلطت في حقها، مكنتش أعرف إنها حساسة للدرجة دي وهتسيب بيتها وأهلها وتمشي! فكرت إنها لما تسمع الكلمتين دول هتبعد وتنهي الموضوع بهدوء، أو حتى هتيجي تشتكيلك وتعمل مشكلة بيني وبينك.. مكنتش أعرف إنها هتختفي!

— حسام (بصراخ ودموع قهر): ليه كدا يا أمي؟! ليه تعملي فيا وفيا كدا؟! أهو أنا مش لاقيها وضاعت مني! فضلت سنين عمري كلها مستنيها وبدعي بيها، ولما جت وبقت ملكي ضاعت من إيدي تاني وبسببك! أنا لا عارف أعيش من غيرها ولا هعرف أعيش من غيركم.. ليه حطيتينا في الموقف الصعب ده؟! أنا دلوقتي فهمت.. فهمت هي مشيت وهربت ليه؛ مشيت عشان متقفش قصادك، وعشان متحطنيش في حيرة واختيار صعب بينك وبينها لأنها عارفة ومقدرة أنا بحبكم قد إيه.. فضلت تيجي على نفسها وكرامتها ومشت وسابت الدنيا كلها! بس لا هي ولا أنتي عارفين إنها وهي ماشية، مأخدتش شنطتها بس.. دي أخدت قلبي وروحي وعقلي معاها! يا ترى أنتي فين دلوقتي يا عاليا.. فين؟

وفي المساء، داخل فيلا عبد الله:

كانت ليلى تدخل الصالة بضيق، ووجدت حازم يجلس في شرفة الغرفة هادئاً تماماً على غير عادته، فاقتربت منه وقالت بتهكم:

— ليلى: قاعد كدا وسرحان في إيه؟ أموت وأعرف بتختفي وتروح فين بقالك فترة؟