الفصل الثاني والخمسون

ردت عاليا وهي تمسح دمعة من عينيها: "ولا حاجة.. افتكرت موقف بس."

في الواقع، تذكرت عاليا على الفور مكالمة منة معها منذ قليل، حين كانت تسألها بفضول غريب: "اشمعنى حازم يعني اللي بتسألي عليه يا منة؟"

منة بتهرب: "يا ستي جاوبي وخلاص! هو لازم سين وجيم؟"

عاليا بضحكة: "الله! مش لازم أفهم الأول؟"

منة: "هقولك بعدين.. المهم، هو مرتبط دلوقتي؟"

عاليا: "على حد علمي.. دلوقتي لأ، مش مرتبط."

منة بفضول: "وقبل كدا؟"

تنحنحت عاليا وقالت بمكر: "احم احم.. ارتبط مرتين بخطوبة، منهم واحدة كان فيها كتب كتاب كمان."

صدمت منة وقالت: "أوف! وسابهم ليه؟"

عاليا: "محصلش نصيب، مكنش فيه حب حقيقي."

منة بتوجس: "وممكن يرجعلهم تاني؟"

عاليا بثقة: "لا أبداً، أنا متأكدة إنه لا يمكن يحصل."

منة: "ومتأكدة أوي كدا ليه؟"

ضحكت عاليا وقالت: "لأن واحدة منهم كانت أنا.. والتانية حضرتي فرحها امبارح!"صرخت منة بصدمة ذهول: "إيييييييه؟!"

(عودة للحاضر)

أفاق حازم عاليا من شرودها وهو يقول بقلة حيلة: "طيب.. هتكلميها ولا إيه؟"

نظرت إليه عاليا بتشكك وضيقت نصف عينها وقالت: "أكلمها؟ أممم.. ماشي، بس..."

حازم بلهفة: "إيه؟"

اقتربت منه عاليا قليلاً وقالت بنبرة جادة: "عاوز أعرف.. أنت عاوز منها إيه بالظبط؟ ناوي تتجوزها فعلاً؟"

تردد حازم ثم قال: "آه.. قصدي ليه لأ؟ بس عاوز أتأكد من مشاعري الأول، معرفش أحكم على قلبي من مجرد نظرة أو مقابلة."

عاليا: "وتتأكد إزاي وأنت بعيد؟"

حازم: "مش عارف.. بس محتاج فرصة."

عاليا بصرامة حانية: "حازم، أنت عاوز إيه؟ لازم تحدد موقفك عشان دي بنات ناس."

لوى حازم فمه بزعل: "أنتِ مش عاوزة تساعديني وخلاص يا عاليا."

ابتسمت عاليا وقالت: "طيب يا حازم، هريحك.. البنت مهتمة بيك فعلاً وأنت لفت نظرها أوي.. ها، قولي هتعمل إيه دلوقتي؟"

نظر إليها طويلاً وعيناه متسعتان من المفاجأة: "عرفتي إزي؟!"

عاليا بغمزة: "عرفت وبس، الباقي بقى عليك.. وحركة جدعنة مني هديك فرصة ذهبية؛ الأسبوع اللي بعد الجاي خطوبة منة ورامز، وأنت طبعاً معزوم."

تركت مقعدها وغادرت الكافيه، تاركة إياه يواجه نفسه وصراعاته الداخلية.

عادت عاليا إلى بيتها، وجلست في حضن زوجها حسام وسألته بهدوء: "تفتكر حازم هيعمل إيه؟"

مَسد حسام على شعرها وقال: "لو أنا مكانه مش هسيب الفرصة دي تضيع من إيدي أبداً.. الإنسان ما بيصدق يلاقي حد يدخل قلبه ويحرك مشاعره، ومش هيفرط فيه بسهولة."

تنهدت عاليا وقالت: "مشكلة حازم إنه مابقاش عنده ثقة في نفسه ولا في حد بسبب تجاربه القديمة، مابقاش عارف يفرق بين الحب الحقيقي والتعود أو مجرد الإعجاب.. خايف يقرب يكتشف إنه مش حب، فيمشي ويسيب وراه جرح زي كل مرة.. بس أنا حاسة من توتره المرة دي إن الموضوع مختلف تماماً."

حسام برأيه العاقل: "وهيعرف إزاي وهو واقف بعيد؟ لازم يقرب."

عاليا: "هو خايف من القرب.. الموضوع مش سهل عليه."

ابتسم حسام ونظر في عينيها بدفء: "الموضوع عوز مغامرة يا حبيبتي.. الوصول للقلب أصلاً مغامرة كبيرة ولازم يعيشها بكامل تفاصيلها."

عاليا بداعبة: "يمكن خايف يغرق وهو مش بيعرف يعوم؟"

ضحك حسام واحتضنها بقوة: "لو غرق، هيطلعله جناحات ويطير.. زي ما أنا طرت بالظبط لما حبيتك، ولسه لحد النهارده قلبي طاير بيكي في السما."

وفي منزل رامي وليلى، كانت ليلى تقف فوق رأسه في الصباح وهي تهزه بضيق: "يلا يا رامي! كفاية نوم بقى!"

تململ رامي في فراشه ودثر نفسه بالغطاء: "سيبيني شوية كمان يا ليلى.. حرام عليكي."

تذمرت ليلى: "رامي! أنا ما صدقت إنك تاخد إجازة علشان تقضيها معايا، مش تقضيها نوم! بكره هتنزل الشغل تاني ومشوفش وشك!"

قال رامي بنعاس وصوت متقطع: "ما هو أنا عاوز أشبع نوم شوية قبل ما أنزل المفرمة تاني.. سيبيني بقى!"

خرجت ليلى من الغرفة والحزن يرتسم على وجهها، وتوجهت إلى حماتها (أم رامي) التي تعيش معهما.

سألتها أم رامي بقلق: "إيه يا ليلى يا بنتي؟ مالك زعلانة الصبح كدا ليه؟"

انفجرت ليلى بشكواها: "يعني يرضيكي كدا يا طنط؟ نايم ومقضيها نوم وسايبني لوحدي! المفروض يفسحني في إجازته، مش دا شهر العسل يعني؟ خلاها أسبوع وقلت ماشي، لكن يقضيه كله نوم؟! أجل السفر وقلت معلش، نتفسح هنا على الأقل ويقعد معايا.. مش كدا خالص!"

هزت أم رامي رأسها بإنصاف: "عندك حق يا بنتي، ولا تزعلي نفسك.. أنا هصحهولك."

بينما هما تتحدثان، تفاجأتا برامي يخرج من الغرفة وقد ارتدى ملابسه بالكامل وبدا بكامل أناقته، وكان يحمل في يده ثوبين جديدين اشتراهما لها.

ابتسم رامي بغمزة وقال: "ها.. البسي دا ولا دا؟ ويلا بسرعة الفستان اللي تختاريه البسيه عشان الفيلم قرب يبدأ في السينما!"

قفزت ليلى عالياً من فرط الفرحة، وخطفت الملابس من يده وهرولت إلى الغرفة لتبدل ثيابها وهي تكاد تطير.

نظرت إليه والدته بابتسامة حنونة وقالت: "متزعلهاش يا ابني، دي لسه عروسة جديدة وعاوزة تفرح وتعيش سنها."

تنهد رامي وقال بصدق: "والله بحبها يا ماما، وكنت عاوز أفاجئها مش أكتر.. أنا بزعل أوي لما أشوف دموعها أو حزن في عينيها، لكن أعمل إيه؟ غصب عني ظروف شغلي في الشرطة صعبة.. بس هعوضها."

بعد دقائق، خرجت ليلى وهي ترتدي الفستان وتبتسم بنصر، وانطلقا معاً إلى السينما ليمضيا وقتاً رائعاً أعاد الدفء لقلبيهما.

مرت الأيام متلاحقة حتى أتى يوم خطوبة منة ورامز. كانت منة في غرفتها تتأرجح من شدة التوتر والقلق، وتحاول أختها ياسمين وعاليا تهدئتها.

قالت ياسمين بضيق: "اهدئي شوية يا بنتي مش كدا! وترتيني معاكي!"

منة وهي تفرك يديها: "مش قادرة يا ياسمين، حاسة قلبي هيقف!"

ضحكت عاليا وقالت وهي تمسك الفرشاة: "أومال في الفرح الكبير هتعملي إيه؟ اثبتي بقى خليني أظبطلك الميك أب."

لوحت ياسمين بعباءتها وقالت: "قوليلها بالله عليكي.. دي وترتني وبوظتلي أعصابي، بطلي تهزي رجليكي دي بقى.. أنا خارجة أشوف الناس بره."

التفتت منة لعاليا وسألتها بقلق: "هي سارة مجتش ليه لحد دلوقتي؟"

عاليا بهدوء: "أكيد هتيجي مع العريس وأهله، مش هي بنت خالته؟"

منة بقمص: "بس كانت تيجي معايا أنا الأول مش معاه هو!"

ضحكت عاليا: "أنتِ عبيطة يا بنتي؟ ما هو نفس الشيء، كدا كدا هتوصل."

منة: "قصدى تيجي هنا على طول الأوضة عندي."

طبطبت عاليا على كتفها: "طيب اهدي خالص.. شوفي نفسك في المراية، قمرررري دا ولا إيه؟"

بالفعل، وصلت عائلة رامز ومعهم سارة التي كانت تبدو غاية في الأناقة والجمال. تمت الخطوبة وقراءة الفاتحة وسط فرحة الأهل والزغاريد. وفي وسط الاحتفال، دخل حازم بكامل وسامته وسلم على العروسين، ثم التفت وبحث بعينيه حتى التقت عيناه بعيني سارة.

ابتسم لها حازم، فابتسمت هي الأخرى بحياء شديد ووجه محمر. اقترب منها بخطوات واثقة، وانحنى قليلاً وهمس بنبرة دافئة: "عقبالك.."

ردت سارة بصوت خافت: "ميرسي.. عقبالك أنت كمان."

ابتسم حازم بخبث وقال وهو يغمز لها: "أوف! الفون المرة دي مفصلش شحن ولا حاجة؟.. طب ممكن أعمل مكالمة ضرورية من تليفونك أنتِ؟"

ضحكت سارة برقة وقالت: "هتكلم مين؟"

نظر في عينيها وقال بجرأة وصوت منخفض: "هكلم نفسي بصراحة.. فيه كلام كتير أوي في قلبي عاوز أقولهولها.. ممكن الفون؟"

مررت له الهاتف بخجل وقالت: "اتفضل.."

على الجانب الآخر، كان رامز يجلس بجوار منة، ونظر إليها بحب وقال: "مبروك يا عروسة."

نظرت للأرض بخجل: "الله يبارك فيك.. مبروك ليك أنت كمان."

لاحظ رامز ارتباكها فسألها: "مالك كدا متوترة وشايلة طاجن ستة ليه؟"

تنهدت منة: "مش عارفة.. ومش عارفة كمان لما نرجع الكلية الأسبوع الجاي هيبقى إيه الوضع بينا هناك."

عقد حاجبيه: "وضع إيه؟"

منة بتردد: "يعني.. هنقول للناس والدكاترة والطلبة، ولا هنخبي ارتباطنا؟"

تعجب رامز وقال بنبرة قاطعة: "وأخبي ليه إن شاء الله؟! دا أنا أول ما أروح هرفع الخبر على الأكونت بتاعي وجروب الكلية الرسمي كمان.. أنتِ قلقانة من إيه بالظبط يا منة؟"

أطرقت برأسها وقالت بضعف: "بصراحة.. فيه حاجة كدا حصلت في الكلية بعد قراية الفاتحة الكبيرة."

رامز باهتمام: "حاجة إيه؟ احكيلي."