الفصل الثالث والخمسون

كانت منة تسير في ممر الكلية، فاستوقفتها إحدى الفتيات بابتسامة صفراء وقالت: "أهلاً أهلاً.. بخطيبة الدكتور رامز!"

تدخلت فتاة ثانية بتهكم: "طبعاً.. من هنا ورايح هينجحك بامتياز، مش محتاجة مذاكرة ولا دح بقا يا محظوظة!"

وأضافت فتاة ثالثة بحقد: "بقى ليكي واسطة وتقل في الكلية هنا يا عم.. مين قدك؟"

عادت الفتاة الأولى وقالت بلؤم: "عاملينا فيها طيبة وغلبانة، وهي سهنة وبتتمسكن لحد ما وقعت الدكتور في حبالها! ويا عالم بقا كانت مجمعة ومظبطة معاه من إمتى ومن ورا ظهرنا!"

وانفجرت الفتيات في ضحكات مستفزة ملأت الممر.

(عودة للحاضر)

اشتعلت عينا رامز بالنشاط والغضب وقال: "بنات مين دول؟! وإزاي متقوليليش في وقتها ولا تردي عليهم وتوقفيهم عند حدهم؟! منة، أنتِ عارفة كويس إنك شاطرة ومن الطلبة المتميزين في الدفعة، وبتنجحي بمجهودك وسهرك طول عمرك، والكل هنا متوقع لك تتعيني معيدة.. ليه تسكتي على الإهانة والغمز اللامز دا؟!"

دمعت عيناها وقالت بصوت مخنوق: "مش عاوزة أعمل مشاكل.. أنا ماليش أصحاب في الكلية غير سارة وأنت عارف، وأنت عارف كمان إني سبت الكلية اللي فاتت وضيعت سنة كاملة من عمري ومن الكلية اللي كنت بحلم بيها بسبب كلام الناس والتنمر، علشان مكنتش بقدر أواجه وبخاف."

نظر إليها رامز بعطف وحزم: "شوفي يا منة.. أنا عارف الموضوع كله، وصدقيني لو كنت موجود وقتها لا يمكن كنت هسمحلك تضيعي حلمك بسبب كلام تافه من ناس ناقصة. اللي بيتنمر دا شخص مريض ومعقد ومش قادر يتقبل نجاح أو اختلاف غيره، والمفروض تكوني فاهمة دا كويس.. لازم توقفيهم عند حدهم وتتمسكي بأحلامك وظهرك يبقى ناشف."

ثم تابع وعيناه تلمعان بتوعد: "عموماً.. أول ما نرجع الدراسة، عاوزك تشاوريلي على البنات دول.. علشان أنا بنفسي عاوز أعلمهم كام درس في الذوق والأخلاق والتعامل مع أسيادهم."

خافت منة وقالت بسرعة: "أهو! شفت بقا؟ أنت لو عملت دا في الكلية، هيقولوا إني السبب وإني مستقوية بيك!"

رد رامز بابتسامة وثقة: "أنتِ عارفة إني مقبلش التجاوز دا على أي حد من طلابي، فما بالك بمراتي وخطيبتي؟ بس برضه لازم أنتِ تتغيري وتتعلمي تثقي في نفسك وتعرفي تاخدي حقك بدراعك.. أنتِ في البيت شخصية قوية وبره شخصية تانية خالص وبتخافي من خيالك."

منة بابتسامة رقيقة: "في البيت دول أهلي.. ومهما حصل بيتقبلوني ويسمعوني ومحدش فيهم بيضايقني.. لكن بره الدنيا بتخوف."

نظر في عينيها وقال بنبرة دافئة: "وأنا بقى.. تبع أنهي حزب فيهم؟"

خفضت رأسها بخجل وقالت بصوت تكاد تسمعه: "أنا حكيتلك دلوقتي وأنت سمعتني.. يبقى تبع حزب أهلي."

ابتسم رامز بارتياح: "بس برضه مش هسيبك غير لما أعلمك إزاي تاخدي حقك وتواجهي الدنيا بقلب جامد."

منة: "ماشي.. وأنا مستعدة أتعلم منك."

انتهى اليوم الجميل، وتوالت الأيام اللاحقة بدون أحداث مميزة تذكر في العائلة، سوى عند حازم وسارة؛ حيث بدأت قصتهما تأخذ مجرى آخر وأكثر عمقاً.. مكالمات ولقاءات جعلت حازم يتأكد كل يوم من مشاعره الحقيقية، ويزداد تعلقه بها وبضحكتها التي باتت تملأ دنيته.

وفي مطبخ أم رامي، كانت ليلى تقف وعلامات الإحباط على وجهها وتمسك بملعقة تقلب بها قدراً من الطعام وتصيح: "أوف! باظت تاني!"

ضحكت والدة رامي وقالت بطيبة: "خير خير يا بنتي تعالي.. تعالي وأنا هعلمك براحة خالص ومستعجليش على نفسك، الطبخ عاوز ممارسة."

تنهدت ليلى بزعل: "نفسي مرة واحدة يا طنط ياكل حاجة من إيدي أنا اللي طبخاها وتطلع حلوة ويشكر فيها! كان عندها حق عاليا لما كانت بتقولي اتعلمي."

طبطبت عليها حماتها: "هتعلمي وهتبقي ست بيت شاطرة، وبكره تطبخي أحسن مني كمان ورامي يتخانق على أكلك."

وفي شقة حسام وعاليا، كان حسام يتحرك في الغرفة ب استعجال وينادي بصوت مرتفع: "عاليا! يا عاااليا!"

خرجت عاليا من المطبخ وتمسح يديها: "إيه يا حبيبي في إيه؟ صوتك عالي ليه؟"

حسام بضيق: "فين التيشرت الأبيض بتاعي؟ بقالي ساعة بدور عليه مش لاقيه!"

ضربت عاليا جبهتها بيدها وقالت باعتذار: "أوف! والله نسيت خالص.. أسفة يا حسام، لسه منشرتوش في البلكونة ومبلول."

عقد حسام حاجبيه بغضب: "مش أنا قايلك من امبارح إني عاوزه ونازل بيه في مشوار مهم النهارده؟!"

عاليا بأسف وحرج: "معلش والله راحت من بالي خالص ونسيت.. البس أي حاجة تانية لحد ما ينشف."

نظر إليها حسام بملامح غاضبة وجافة، ولم يعلق، بل أخذ قميصاً آخر بعنف، وارتداه ثم التفت وغادر الشقة وصفق الباب خلفه بقوة تاركاً إياها واقفة في حيرة وضيق.ذهبت وراءه مسرعة لتحضر له بديلاً، لكنه التفت إليها بجفاء وقال بنبرة حادة: "خلاص يا عاليا.. أنا هجيب لنفسي، روحي شوفي أنتِ بتعملي إيه!"

تراجعت خطوات للخلف، وخرجت من الغرفة والحزن يكسو وجهها بالكامل؛ فالموضوع من وجهة نظرها بسيط ولا يستحق كل هذا الغضب والانفعال. أما هو، فقد ارتدى ثيابه على عجلة، ثم خرج وصفع الباب وراءه بقوة، وتوجه مباشرة إلى المقهى ليقابل أصدقاءه.

استقبله صديقه عماد بابتسامة قائلاً: "إزيك يا هندسة؟ إيه يا عم عاش مين شافك!"

رد حسام بضيق مكتوم: "عاش مين شافني إيه؟ ما أنت معايا في الموقع كل يوم!"

غمز له عماد وقال: "قصدي بره الموقع يا صاحبي.. باين المدام نسيتك أصحابك والقهوة."

حسام باقتضاب: "لا عادي.. بس مفيش وقت مش أكتر."

علق صديق آخر مازحاً: "يعني المدام معملتش معاك خناقة وعقدتلك الحواجب علشان نازل تسهر؟"

حسام بنفي: "لا خالص، مفيش الكلام دا."

تدخل صديق ثانٍ بضحكة خبيثة: "متصدقوهوش يا جماعة! دول بيعملوا عمايل غريبة يوم نزول القهوة دا بالذات.. تلاقيها فجأة عملت تعبانة، لا اللبس كله متوسخ ومبلول، لا مش عارف إيه.. حركات مكشوفة يعني!"

تسمر حسام في مكانه، ووقعت الكلمات عليه كالصاعقة؛ فتذكر على الفور أنه وبخ عاليا بقسوة وظلمها بسبب قميصه الأبيض دون أن يكون لها ذنب في ذلك، وأنها ربما كانت مرهقة. تذكر كيف تركها وغادر المنزل دون أن يصالحها أو يطيب خاطرها، فبدأ يلوم نفسه كثيراً وشعر بغصة ندم مريرة.

حاول عماد لفت انتباهه مجدداً وسأله: "إيه يا حسام.. هتعمل إيه في الحوار بتاع النهارده؟"

تنهد حسام بحيرة: "لسه مش عارف أفكر.. محتار جداً يا عماد."

عماد بنصح: "فكر براحتك، بس من رأيي دي فرصة كويسة جداً ومش بتتعوض."

حسام بنبرة مهمومة: "فرصة كويسة.. بس على حساب عاليا!"

عماد بفضول: "أنت قلت لها ولا لسه؟"

حسام: "لسه.. مش عارف أقولها إيه ومتردد."

قاطعهما أحد الأصدقاء بملل: "جرى إيه يا بشمهندسين؟ أنتم مش مع بعض في الموقع كل يوم؟ بتتكلموا في إيه وشغل إيه دلوقتي؟ خليكم معانا هنا وفكوا القفشة دي!"

جلس معهم حسام لفترة وجيزة، ولكن باله وعقله كانا في مكان آخر تماماً. لم يستطع الصمود أكثر، فنهض قائلاً: "معلش يا جماعة.. لازم أمشي دلوقتي، عاليا لوحدها في البيت ومش هينفع أتأخر أكتر من كدا."

انفجر صديقه ضاحكاً وقال للجميع: "مش قلت لكم؟! فيها خناقة وشد ودادن وهيروح يتصالح!"