الفصل الواحد والخمسون

قصت عليها سارة كل تفاصيل الحوار واللقاء والمشاعر التي شعرت بها، ومنة تستمع إليها بابتسامة متسعة، وما إن انتهت سارة حتى سألتها منة: "طب معرفتيش اسمه إيه طيب؟"

أجابت سارة بهيام: "اسمه حازم.. قال لي اسمه حازم."

شهقت منة بصدمة ومفاجأة وقالت: "حازم؟! يا نهار أبيض.. دا حازم ابن عم عاليا وليلى ! يا محاسن الصدف يا بنتي!"

وفي منزل الزوجية الجديد، وتحديداً في الصباح الثاني للزفاف، كانت ليلى تقف في الصاله ووجهها يكسوه التوتر الشديد، وتفرك يديها بخوف. وفجأة، شهقت برعب وقالت: "في إيه يا رامي.. مالك؟!"

تقدم نحوها زوجها رامي بنظرة حازمة قوية وقال: "مالي؟! أنا اللي بسألك مالي؟ بتقفلي عليا باب الأوضة بالمفتاح وتهربي وتنامي في الصالة؟! دا أنتِ يومك مش فايت معايا النهارده!"

راجعت ليلى خطواتها للخلف بتوجس وسألته: "أنت.. أنت دخلت هنا الأوة إزاي والباب مقفول؟!"

لوى رامي فمه بابتسامة ثقة وقال: "بيتي بقى! وعارف كل مداخله ومخارجه كويس ومفيش باب يقف في وشي."

حاولت استجماع شجاعتها وقالت: "أومال مدخلتش امبارح بالليل ليه لما قفلته؟"

تنحنح رامي ولانت ملامحه قليلاً وقال بنبرة دافئة: "اممم.. مرضيتش أخوفك وأخضك، وكان باين عليكي التعب والإرهاق من الفرح، فقلت في نفسي أسيبك تستريحي على راحتك خالص من غير قلق."

تنفس الصعداء وقالت: "آه.. كويس، كتر خيرك. أومال في إيه بقى دلوقتي ومثور الدنيا ليه؟"

قال رامي بنبرة جادة وهو يقترب منها: "في إيه؟ أنا هقولك حالا في إيه.. تعالي هنا، تعالي متخافيش مني."

تراجعت ليلى فجأة ورعب حقيقي يسيطر عليها وصاحت: "مخافش إزاي وأنت مطلع سلاح من جيبك وعاوز تقتلني يا رامي؟! أهون عليك تعمل فيا كدا؟ دا احنا لسه ثاني يوم لينا مع بعض!"

انفجر رامي في ضحك هستيري وصاخب أهتزت له أرجاء الشقة وقال: "ههههههه، أقتلك إيه يا عبيطة أنتِ؟! دا طبنجة الشغل وعهدتي عشان أنا ضابط، متخافيش مش هطخك! أنا عاوز أتكلم معاكي كلمتين وبس."

اقتربت ليلى منه بحذر شديد وخطوات مرتعشة، فوقف رامي أمامها ونظر في عينيها بصدق بالغ وقال: "إوعي تخافي مني في يوم من الأيام يا ليلى، وخليكي واثقة فيا علطول.. أنا عمري في حياتي ما هغصبك على حاجة أنتِ مش عاوزاها، ومكنتيش مجبرة خالص تقفلي على نفسك الباب امبارح وتنامي خايفة.. كان كفاية جداً تقوليلي (أنا تعبانة يا رامي) وأنا كنت هخرج وأسيبك براحتك خالص. أنتِ أمانة عندي في رقبتي، وعمري ما هضيع الأمانة دي ولا هفرط فيها، ولا هقبل أبداً إنك تنامي زعلانة أو مكسورة في يوم من الأيام."

تأثرت ليلى بكلماته النبيلة، ولمعت عيناها بالدموع وقالت بنبرة طفولية: "بجد يا رامي؟ مش هتخليني أعمل أي حاجة أنا مش عاوزاها؟"

رد رامي بثقة وابتسامة: "طبعاً.. طبعاً! جربي كدا وشوفي بنفسك."

لمعت في رأس ليلى فكرة شقية وقالت بسرعة: "أجرب؟ طب أنت اللي قلت أهو!"

رامي بترحيب: "طبعاً.. يلا اطلبي اللي أنتِ عاوزاه."

ليلى بخبث ومرح: "طيب.. اطلع بره حالا وسيبلي الاوضة علشان منمتش كويس امبارح ومحتاجة أكمل نومي!"

برق رامي عينيه بذهول وصدمة وقال: "بس كدا؟! أنتِ تؤمري يا ستي.." وبدأ في خلع جاكيت بدلته الرسمية وهو يتقدم نحو الفراش.

صاحت ليلى بذعر: "بقول اطلع بره! أنت بتعمل إيه وبتلع الجاكيت ليه؟ أنت حران ولا إيه مالك؟!"

ضحك رامي وهو يغمز لها ويقترب: "مالي؟ هخرج دلوقتي حاضر.. بس بعد ما آخد حقوقي، أنتِ فاكراني عبيط وهسيبك تنامي وتطرديني؟"

راجعت للخلف وهي تضحك وتصرخ: "استنى بس هفهمك.. استنى يا رامي!"

وفي بيت الحاج عبد الله، كان الهدوء يخيم على المكان بعد انقضاء حفلات الزفاف الصاخبة. كانت أم عاليا تجلس مع شقيقتها أم حازم، وتتنهد بتعب وشجن.

قالت أم عاليا بنبرة حزينة: "البيت فضي عليا أوي بعد البنات ما مشيوا واتجوزوا.. مابقاش ليه حس."

ردت عليها أم حازم تحاول مواساتها وبث الأمل فيها: "معلش يا حبيبتي بكره حازم يتجوز هو كمان، ويملى علينا البيت أولاد وحركة ووش، وتزهقي من كتر دوشتهم."

علقت أم عاليا بقلب مقبوض: "ما يمكن يتجوز بره البيت، ويفضى البيت عليا على الآخر وملاقاش حد جنبي."

هتفت أم حازم برفض قاطع: "لأ طبعاً! يتجوز بره إيه ويسيبنا كدا لمين؟ دا أنا أقطم رقبته! هو يقدر يستغنى عننا؟"

في تلك اللحظة، دلف حازم إلى المنزل، وسمع شجارهما الحامي ونبراتهما المرتفعة، فتبسم وقال بمرح: "طيب بس صلوا على النبي.. أنتم بتتخانقوا على إيه دلوقتي وبتوزعوني علي بعض؟ مش لما ألاقي العروسة الأول نبقى نشوف الحوار دا ونقرر هنقعد فين؟"

التفت إليه الحاج عبد الله الذي كان يجلس ويتابع الموقف بذكاء، وضيق عينيه بابتسامة ماكرة وقال: "هو أنت لسه ملقيتهاش برضه يا حازم؟ أومال مين البنت اللي كنت واقف معاها وقاعد تسايرها في الكلام امبارح في الفرح دي؟"

تسمر حازم في مكانه، وابتلع ريقه بصعوبة، وتغيرت ألوان وجهه وحل عليه التوتر المفاجئ وقال بلعثمة صدمت الجميع: "دي.. دي.. دي..."

التفت الحاج عبد الله إليه بابتسامة ماكرة وقال: "إيه يا واد.. هتغني؟"

تنحنح حازم محاولاً ترتيب أفكاره وقال بسرعة: "يا بابا دي سارة صاحبة منة أخت حسام، وكانت بتسألني على حاجة تخص الفرح مش أكتر."

ضحك عبد الله وقال بنبرة متهكمة: "يا واد العب غيرها! مش عليا أنا الكلام دا.. أنت عينك متشالتش من عليها طول السهرة وفضلت تتكلم معاها، إيه.. كنت بتشرحلها درس فيزيا؟"

تدخلت أم حازم بضحكة خبيثة وقالت: "لأ كيميا يا حاج وأنت الصادق.. باين الكيميا كانت قوية بينهم!"

علقت أم عاليا وهي تبتسم: "بس الكيميا صعبة اليومين دول يا أم حازم، ومش سهل تلاقي حد يفهمها ويشرحها صح."

هبّ حازم واقفاً وقد اشتعل وجهه خجلاً وقال بمرح: "آه.. أنتم شكلكم كدا هتشقطوني لبعض وهبقى التسلية بتاعتكم الليلة دي! أنا ماشي وجايب بجلدي."

ناداه عبد الله وهو يضحك: "على فين يا هدهد الجناين؟"

التفت حازم وانفجر ضاحكاً: "ههههه، الله! هي وصلت لهدهد الجناين؟ رايح أقابل أصحابي على القهوة."

هز عبد الله رأسه وقال: "أصحابك برضه؟ ماشي.. روح يا سيدي."

بعد قليل، لحق عبد الله (والد حازم بابنه وهو يتقمص دور صديقه وليس والده )في مكانهما المعتاد.

دخل عبدالله مبتسماً وقال: "إزيك يا أبو حظو؟"

رد حازم برحاب الصدر: "أهلاً يا عبود! عاش مين شافك يا جدع."

ضحك الاثنان وتوجها معاً إلى الكافيه، .

قال حازم لصديقه: "الراجل أبويا دا يا عمي.. عمال يتريق عليا من الصبح ومستلمني!"

ضحك والده وقال: "ليه كدا؟ خرف ولا إيه الراجل دا؟"

رد حازم بابتسامة: "لا يا عم دا قمر، بس أحرجني أوي قدام الجماعة في البيت وأنا لسه مش جاهز ولا عارف راسي من رجلي."

قال والده بنبرة حنونة: "طيب سيبك منه واحكيلي أنا.. في إيه؟"

تنهد حازم وقال بصدق: "بصراحة.. هي شدتني ليها جداً، بس دي تاني مرة في حياتي أشوفها، ومش عارف أحدد طبيعة مشاعري بالظبط إيه."

علق والده بخبرة: "يبقى الموضوع محتاج زيارة لبيتها ونفهم الحكاية من أولها."

اعترض حازم بقلق: "لأ.. الموضوع محتاج مقابلة معاها الأول، أعرف إذا كان فيه قبول متبادل ولا لأ.. بس المشكلة هقولها إيه؟ وأقابلها بصفتي إيه؟"

ابتسم والده بمكر وقال: "أنا عندي الحل."

هتف حازم بلهفة: "الحقني بيه وحياة أبوك!"

بعد فترة وجيزة، اتصل والده بعاليا، فدخلت عاليا الكافيه وجلست معهما وهي تتطلع إليهما بشك وقالت: "إزيك يا عمو، إزيك يا حازم.. في إيه خير؟ مالكم مجمعيني كدا؟"

قال والد حازم: "أهو حازم هو اللي هيقولك."

نظرت عاليا إلى حازم بتضييق عين وتشكك، بينما كان حازم يجلس على جمر من النار وتوتُّره يكاد ينطق، وفجأة انفجرت عاليا في ضحك صاخب.

هتف حازم بضيق وخجل: "إيييه! مالك بتضحكي على إيه؟ هو أنا بقول نكتة؟"