الفصل السادس

لاحظت الأم نظراتها وسألتها: "بتدوري على حاجة؟"

— "في ضيوف مستنياهم يا ماما.. أهو جم! عن إذنك اروح أستقبلهم."

تحركت عاليا بسرعة نحو الباب واستقبلتهما بابتسامة عريضة: "أهلاً أهلاً.. اتأخرتوا ليه؟ أنا قلت مش جايين! هو دا اللي خلصت بدري؟"

قال حسام مدافعاً عن نفسه وهو يعدل ياقة بدلته السوداء الأنيقة: "أنا خلصت من بدري جداً، مي هي السبب! موقفاني ساعة في الشارع لحد ما اتعاكست كدا!" (وغمز لها بخفة ثم تابع بذهول) "بس إيه رأيك في البدلة؟.. وبالمناسبة، إيه القمر دا؟ شكلك حلو أوي والفستان يجنن عليكي!"

احمر وجه عاليا خجلاً وقالت بصوت رقيق: "ميرسي يا حسام.. أنت كمان البدلة تجنن عليك."

تدخلت مي مقاطعة وممتعضة مازحة: "ميرسي يا حسام؟! إيهئ إيهئ.. أنا اللي عامة الفستان على فكرة! قولي ميرسي يا مي، تسلم إيدك يا مي!"

ضحكت عاليا بقوة: "ههههههه يا بنتي مش أنا فضلت أشكرك ساعة في الأتيليه؟ وبعدين متخافيش، أنا طلعت لايف على صفحتي وقلت اسمك واسم الأتيليه، وهتتشهري على إيدي.. أنا عندي متابعين كتير أوي خلي بالك ههههه.. يلا تعالوا سلموا على العروسة والعريس."

لوت مي فمها بضيق: "إحنا جايين لك أنتِ مش ليهم.. أنا مش هسلم، مبحبهاش البت دي، هي أختك آه بس مش بطيقها!"

دفعتهما عاليا أماما ضاحكة: "يلاااا قدامي من غير كلام."

تقدموا نحو الكوشة، وقالت عاليا بنبرة رسمية: "ليلي أختي العروسة طبعاً.. وحازم العريس. ودول أصحاب الطفولة؛ مي، والبشمهندس حسام."

نظر حازم بترقب ونفور، وقد عرف فوراً أن هذا هو الرجل الذي كان معها تحت البيت، فقال باقتضاب: "أهلاً وسهلاً."

بادله حسام نفس النظرة القوية والواثقة، وقال ببرود ذكي: "مبروك يا عريس.. مبروك يا عروسة."

تقدمت مي وقالت بابتسامة مصطنعة: "مبروك يا عروسة.. أنا مي، فاكراني؟"

نظرت إليها ليلي بضيق، وهي تلاحظ عيني حازم المعرقتين بعاليا، وقالت بجفاء: "لا.. مش فاكراكي."

كتم حسام ضحكته بصعوبة، بينما اشتعلت مي غيظاً من هذه الوقاحة. تداركت عاليا الموقف بسرعة وقالت بإحراج: "طيب يلا يا جماعة نسيب العرسان لوحدهم، بلاش نبقى عازول رخم.. تعالوا أعرفكم على عمي وماما وطنط."

قادتهم نحو طاولة العائلة وعرّفتهم ببعض، وساد جو من الترحيب. وبعد قليل قالت عاليا: "طيب، خمس دقائق وجاية."

تحدثت الأم مع حسام ومي قائلة بامتنان: "والله أنا مبسوطة إني شوفتكم، ومبسوطة أكتر إنكم مع عاليا.. دي فضلت 3 شهور حابسة نفسها، لا خروج ولا كلام، بس من يوم ما ظهرتوا في حياتها وهي حالتها اتحسنت خالص.. حتي من يوم ما رجعت من السفر وهي ملهاش أصحاب خالص."

قال عمها عبد الله بنبرة حزينة: "الحمد لله.. ربنا عوضها بناس أحسن ويستاهلوها، مش زي ناس ثانية كانت خسارة فيهم!"

قاطعتها زوجة عمها بهمس لتهدئة الوضع: "خلاص بقى يا عبد الله.. اللي حصل حصل، مفيش لزوم نقلب في القديم، مش وقت الكلام دا."

في هذه الأثناء، اقترب أحد الضيوف من الطاولة ونظر لعاليا بانبهار ثم التفت لعبد الله وقال بصوت عالٍ: "ما شاء الله! العروسة بنفسها بتستقبل الضيوف؟ قمر يا عاليا كالعادة!"

ردت عاليا بابتسامة مجاملة: "ميرسي يا عمو.. اتفضلوا."

نظر عبد الله للضيف وقال بحيرة: "أهلاً يا محمود.. اتفضلوا جوه، بس دي عاليا مش العروسة."

تعجب الضيف "محمود" وقال بعدم فهم: "إيه دا؟ عاليا هنا؟ أمال مين اللي قاعدة جنب العريس جوه دي؟!"

— "العروسة ليلي.. جرى إيه يا محمود؟"

— "الله! العروسة إزاي؟ وعاليا أهي؟! ما تشوفي عمك يا عاليا، إحنا كنا عارفين إنك أنتِ العروسة!"

شعرت عاليا بنغزة في قلبها من هذا الموقف المحرج، لكنها حافظت على ابتسامتها وقالت بهدوء: "مش أنا العروسة يا عمو.. أكيد أنت فاهم

انسحبت عاليا من وسط قاعة الاحتفال الصاخبة، وتوجهت نحو شرفة هادئة بعيدة عن الضوضاء والزحام، لتتنفس الصعداء. ولم تمضِ دقيقة حتى تبعها حسام، الذي كان قد سمع وشهد كل ما دار مع الضيف.

وقف إلى جوارها وسألها بنبرة حنونة مليئة بالقلق:

— "قاعدة لوحدك ليه هنا؟"

أجابت وهي تسند رأسها على السور الرخامي: "جالي صداع من الدوشة اللي جوه."

نظر إلى عينيها بدقة وقال بصوت منخفض: "صداع.. ولا زعلانه؟"

حاولت الابتسام قائلة: "وهزعل ليه يعني؟"

خطا حسام خطوة نحوها، وأمسك بيدها برفق، وقال بنبرة عاتبة لكنها تفيض بالحب والدعم:

— "أنتِ دايماً بتتهربي يا عاليا.. ومش عاوزه تتكلمي عن نفسك وعن اللي حصل، وبتكتمي وجعك جواكي.. احكيلي ونقسم الوجع على اتنين، أنتِ مش هتقدري تشيلي الشيلة دي لوحدك.."

صمت برهة، ثم رفع يده برفق ليرفع وجهها إليه وتابع بعينين تملأهما الحيرة والخوف من إجابتها:

ثبت حسام نظراته الدافئة على عينيها الملتمعتين بالدموع في عتمة الشرفة، وانتظر إجابتها التي كادت تحبس أنفاسه وهو يسألها: "لسه بتحبيه ومأثر فيكي؟"

التفتت إليه عاليا بسرعة، وأجابت بنبرة قاطعة امتزجت فيها الكبرياء بالمرارة:

— عاليا: لا.. لا يا حسام مش بحبه! أنا بس صعبان عليا نفسي.. صعبان عليا إني اكتشفت إني فرطت في كرامتي وحقوقي وأحلامي كلها علشان واحد محسش بيا ولا قدرني يوم.. علشان واحد صدق عليا حاجة لو كان يعرفني أو بيفهمني شوية، كان عرف إن عاليا لا يمكن تعملها أبداً! مكنش عنده ذرة ثقة فيا، وعمره ما فكر يسمعني أو يمنحني فرصة أدافع عن نفسي.. أنا مش زعلانة عليه، أنا صعبان عليا نفسي، وزعلانة إن أختي باعتني وبالطريقة الرخيصة دي.. أختي ليلى اللي ماليش غيرها في الدنيا!

التمعت الدموع في عينيها مجدداً لكنها تابعت بقوة:

— عاليا: أنا خرجت من أوضتي بعد الشهور اللي فاتت وأنا دافنة حبهم في سابع أرض، ومبقتش أعتبرهم موجودين في حياتي أصلاً.. بس اللي بيوجعني هو سنين عمري اللي عدت وضاعت في كلمة "حاضر يا حازم"، "آسفة يا حازم"، "اللي تشوفه يا حازم".. عمره ما عرف أنا بحب إيه أو بكره إيه، عمره ما افتكر مناسبة تخصني أو فرحة في عمري، ولا عرف مرة واحدة يجي يصالحني أو يجبر خاطري بكلمة طيبة.. خلاني ألغي عقلي تماماً وأمشي وراه عمياني بس علشان ميزعلش! كان كل همه إنه يكون مسيطر ومتحكم فيا، ممنوع النقاش ومعاه الأوامر وبس، وشايفني طول الوقت تافهه وغبية.. وأنا كنت بعدي وأسامح علشان كنت فاكرة بغبائي إني بحبه وهو كمان بيحبني.. بس لا، الحب مش كدا.. مش كدا أبداً يا حسام!

أحس حسام بنار تتأكل في صدره غيظاً من ذلك الحازم، وامتدت يده ليمسك بيدها المرتجفة برفق وضغط عليها برقة قائلاً بصوت حنون:حسام: طيب اهدي يا عاليا.. اهدي وكل حاجة في اللي جاي هتبقى أحسن بكتير.. هو أصلاً ما يستهلكيش ولا يستاهل قلبك النظيف ده، أنتي غالية يا عاليا.. غالية أوي أوي، ودموعك دي غالية عليا وميهونش عليا زعلك ولا كسرتك أبداً.. عارفة؟ لو كنتي قلتي الكلمة التانية وقلتي "آه لسه بحبه"، أنا كنت دخلت حالا قلبت الخطوبة دي عزا، وكنت مسكته ضربته علقة موت أخليه ميعرفش ملامح وشه فيها!