الفصل الرابع

التفتت إليه عاليا وخطت خطوة للأمام قائلة بجمود مصطنع:

— "أنا خلصت.. يلا نمشي."

نظر إليها حسام بتمعن، باحثاً في ملامحها عن سبب هذا التحول المفاجئ، وسألها بهدوء:

— "كله تمام؟ مامتك كويسة؟"

— "آه، كويسة الحمد لله."

خطا خطوة نحوها ومال برأسه قليلاً: "طيب مالك؟ شكلك زعلتِ فجأة!"

حاولت الهروب بعينيها وهي تسرع خُطاها: "لا عادي.. مفيش حاجة، إحنا كنا ماشيين أصلاً."

توقف حسام مكانه، وردد وعيناه تلمعان بفكرة خطرت له: "آه فعلاً.." فكّر قليلاً، ثم ابتسم وتابع بحماس: "بقولك إيه؟"

التفتت إليه بحيرة: "قول؟"

— "تحضري عيد ميلاد؟"

اتسعت عيناها بدهشة وخرجت الكلمة قوية: "نعم؟!!!"

ضحك حسام من رد فعلها وأمسك بطرف معطفها برفق: "تعالي معايا بس.. أنتِ لسه هتستغربي؟!"

انقادت معه بدافع الفضول. ذهبا معاً إلى متجر للحلوى، حيث اختارا كعكة عيد ميلاد شهية، واشترى حسام بعض الحلويات والسكاكر، كما توقف عند متجر للهدايا واشترى هديتين؛ وضع إحداهما في جيبه خفية عنها، وترك الأخرى في يده.

نظرت عاليا إلى الأكياس وسألته بفضول:

— "عيد ميلاد مين دا؟"

التفت إليها وعيناه تفيضان بالدفء: "ماما.. عيد ميلاد ماما."

شخصت عيناها وقالت بلهفة: "كل سنة وهي طيبة! طيب استني.. لازم أجيب هدية."

حاول منعها مبتسماً: "لا لا، مفيش داعي خالص."

توقفت عن السير وعقدت يديها أمام صدرها بإصرار: "يبقى مش جاية!"

استسلم حسام أمام عنادها الجميل وضحك: "خلاص.. هاتي."

توجها إلى متجر راقٍ، ودارت عاليا بين الأقسام حتى وقعت عيناها على معطف شتوي أنيق جداً وذو ذوق رفيع. رفعته أمامه قائلة بابتسامة عذبة: "إيه رأيك؟"

رد حسام بنظرة إعجاب بليغة: "حلو أوي.. ذوقك جنان."

تنهدت عاليا برقة: "يا رب يعجبها."

في تمام الساعة الثامنة مساءً، وصلا إلى البناية. وبمجرد أن وقفا أمام باب الشقة، شعرت عاليا بتوتر شديد يسري في جسدها، وتراجعت خطوة للخلف قائلة بارتباك:

— "بقولك إيه يا حسام.. أنا هروح، مش هقدر أدخل.. محدش عارفني هناك، وهيقولوا عليا إيه؟!"

نظر إليها حسام بقلة حيلة ثم قال مازحاً ليخفف عنها: "أنتِ هتستعبطي؟ جاية لحد هنا وتقولي أروح؟ إيه شغل العيال دا! على فكرة عيلتي كلها فوق، بجد أنتِ خايفة مني؟"

نظرت إليه وعيناها تلمعان بالصدق: "لا، مش خايفة منك.. بس مكسوفة، وكمان أنا مش عارفاهم ولا هما يعرفوني ويـ..."

قاطعها وهو يضغط على جرس الباب بثقة: "أنا هعرفك بيهم.. يلا."

فُتح الباب، ودخل حسام المنزل يتبعه طيف عاليا الخجول. وجد أمه وشقيقتيه وأولاد أخته الصغار في انتظاره، وسرعان ما علقت عيون الجميع بتلك الفتاة الرقيقة التي تقف عند العتبة بحرج.

تحرك حسام خطوة وأشار بيده مرحباً: "اتفضلي يا عاليا."

دخلت وعيناها في الأرض، وقالت بصوت خفيض من فرط الإحراج: "سلام عليكم."

ردت الأم بابتسامة بشوشة ومرحبة: "وعليكم السلام.. اتفضلي يا بنتي، نورتينا."

اقتربت منه شقيقته الصغرى "منة"، وهمست في أذنه بخبث: "مين المزة دي يا حوس؟"

لكزها حسام بخفة في كتفها متمتماً: "اخرسي يا قردة!"

ثم التفت لعاليا وبدأ يعرّفها بنبرة فخورة: "دي ماما طبعاً.. ودي ياسمين أختي الكبيرة، ودي القردة.." (قاطعته منة بضربة غاضبة على كتفه) "قصدت منة أختي الصغرى."

اتسعت ابتسامة عاليا فجأة، وظهرت غمازتاها بعد أن تذكرت المكالمة الهاتفية وعبارة "بحبك يا قردة"، وعرفت أخيراً من المقصودة، فزال نصف توترها. تقدمت خطوة وقالت برقة:

— "تشرفت بيكم جداً، ومبسوطة إني جيت هنا وشوفتكم ."

ثم مدت يدها بالباقة والمعطف للأم قائلة: "كل سنة وحضرتك طيبة.. ممكن تقبلي الهدية البسيطة دي مني؟"

احتضنتها الأم بحنان قائلة: "وأنتِ طيبة وبصحة وسعادة يا بنتي.. بس تعبتِ نفسك ليه كده؟"

تدخل حسام موضحاً: "دي عاليا يا ماما.. كنا زمايل دراسة زمان، وهي ومي أصحاب جداً."

هزت الأم رأسها بترحيب حار: "آه.. نورتينا يا عاليا، تعالي اقعدي جنبي هنا."

في تلك الأثناء، انحنت منة بياسمين جانباً وهمست لها بريبة: "زمايل إيه ومي إيه؟! الموضوع دا فيه إنّ وبكرة تشوفي!"

ردت ياسمين بصوت خفيض وهي تضغط على يدها: "يا بت اتلمي لتسمعنا!" ثم التفتت لعاليا بابتسامة: "نورتينا والله.. بس غريبة، أول مرة نشوفك مع حسام."

أجابتها عاليا بهدوء: "أصل أنا كنت مسافرة من مدة طويلة."

سألت منة بفضول طفولي ومقاطعة: "مسافرة فين؟"

— "أمريكا."

اتسعت عينا منة بغبطة: "يا بختكككك!"

صاح حسام متظاهراً بالضيق: "هشششش.. إيه إيه! يلا، أنتِ هتعملي تحقيق مع البنت؟!"

ضحكت عاليا قائلة: "سيبها يا حسام.. دي لطيفة خالص."

أخرجت منة لسانها لحسام بنصر: "هاااا.. أحسن! يا رب تكون اتكسفت بقى."

تجاذبوا أطراف الحديث، وذاب الجليد تماماً؛ حيث غمرتها العائلة بدفء افتقدته منذ زمن، واحتفلوا معاً بقطع الكعكة في أجواء مليئة بالبهجة. وبعد مرور ساعة، نظرت عاليا إلى ساعتها وقامت قائلة:

— "طيب.. أنا لازم أمشي، أنا اتأخرت أوي."

نهض حسام فوراً: "طيب يلا، أنا هوصلك."

قالت ياسمين بتمسك: "خليكي كمان شوية، لسه بدري!"

ردت عاليا بامتنان: "مش هينفع والله، اتأخرت جداً، وماما كده هتقلق عليا ويمكن تنزل تدور عليا في الشوارع ههههه.. يلا، سلام."

خرجا معاً إلى الشارع، وكان الجو قد أصبح مائلاً للبرودة. نظر حسام حوله ثم قال:

— "مش هنلاقي تاكسي بسهولة في الوقت دا، وكمان هكون قلقان عليكي.. تعالي نمشي شوية لغاية رأس الشارع وأنا هطلب أوبر."

وافقت عاليا قائلة: "ماشي."

سار إلى جوارها وقال بأسف متبسم: "معلش.. منة صدعتك شقية زيادة عن اللزوم."

التفتت إليه وعيناها تلمعان بالراحة: "بالعكس.. دي لطيفة جداً وتتحب بسرعة، ومامتك كمان طيبة أوي، وياسمين.. كلهم حبيتهم أوي، والصغننين قمر ربنا يخليكم لبعض."

نظر إليها حسام بعمق، وخرجت الكلمات من فمه دون وعي: "ويخليكي ليا.."

توقفت الكلمات في حلق عاليا، وشعرت بخجل شديد يكسو ملامحها، ولحسن حظها رأت وميض السيارة يقترب فقالت بارتباك: "العربية وصلت.. يلا، سلام."

ضحك حسام قائلاً: "سلام إيه؟ أنا جاي أوصلك طبعاً."

حاولت الاعتراض: "مفيش داعي والله، أنا هروح لوحدي."

فتح حسام باب السيارة وأشار لها بالدخول قائلاً بنبرة حاسمة دافئة: "مش هينفع أسيبك تمشي لوحدك في الوقت دا.. يلا من غير نقاش، وبعدين لسه في كلام عاوز أقوله."

طوال الطريق ساد الصمت، ولكنه كان صمتاً مريحاً يحمل الكثير من الترقب. وعندما وصلت السيارة أمام منزلها ونزلت، وقف حسام أمامها، وأخرج علبة أنيقة من جيبه ومدها نحوها:

— "عاليا..ممكن تقبلي مني دي؟"

نظرت إلى العلبة بنوع من الدهشة: "إيه دا يا حسام؟ ليه كده؟"

— "خديها متكسفنيش.. دي حاجة بسيطة."

أخذتها بتردد: "طيب بمناسبة إيه؟"

اقترب منها خطوة وقال بنبرة درامية مازحة، لكن عينيه كانت تقطر صدقاً: "بمناسبة إني شوفتك.. بمناسبة إنك رجعتِ مصر.. نورتِ مصر يا ستي!"

انفجرت عاليا ضاحكة: "هههه الكلمة دي دراما أوي! عموماً ميرسي جداً."

فتحت العلبة لتجد ساعة يد فاخرة يحيط بها أنسيال فضي رقيق نُقش عليه اسمها وتاريخ دقيق. اتسعت عيناها بالفرحة: "الله! حلوة أوي بجد."

ابتسم لرؤية فرحتها: "عجبتك؟"

— "آه.. أوي."

— "طيب يلا البسيها."

نظرت إلى النقش وسألته بحيرة: "بس إيه التاريخ دا يا حسام؟"

نظر إليها بنظرة غامضة وقال بصوت دافئ: "هقولك بعدين.. يلا ادخلي علشان متتأخريش."

على الجانب الآخر من الشارع، وراء زجاج سيارة مظلمة، كان هناك من يقف يراقب المشهد بأكمله وعيناه تتطاير منهما شرار الغيظ. لم يستطع تمييز وجه الرجل الذي يقف معها بدقة، لكن رؤيتها سعيدة وتضحك معه جعلت دماءه تغلي.