Chapter 6

Napatigil sa paghakbang si Kayla ng marinig niya ang tanong ni Logan. Sunod-sunod ang naging paglunok niya. Hindi niya alam kung paano niya sasagutin ang tanong nito ng mga oras na iyon. Kung pwede niya lang sanang ibalik ang oras e di sana ay hindi na niya hinayaan ang anak niya pagala-gala kanina.

Huminga siya ng malalim at pilit na pinapakalma ang sarili. Kung aalis siya at hindi ito sasagutin ay baka mas lalo pa itong mag suspetsa kaya haharapin niya na lang ito. Umikot siya at hinarap ang lalaki saka ngumiti. “Bakit mo naman nasabi na anak natin siya? Ikaw lang ba ang lalaking pwedeng maging ama ng anak ko?” tanong niya rito na puno ng panunuya. Pinilit niyang maging matapang sa harapan nito kahit na ang totoo ay halos matumba na siya dahil dahan-dahan ng nangangatog ang mga tuhod niya.

“Sa tingin mo ba ay ikaw lang ang lalaking dumaan sa buhay ko para magtanong ka ng ganyan?” ngumiti siya at napuno ng lamig ang mga mata.

Ang kamay nitong nakahawak sa kanyang kamay ay bahagyang humigpit dahil sa sinabi niya at kitang-kita niya kung paano dumaan ang galit sa mga mata nito ngunit wala itong sinabi hanggang sa dahan-dahan din naman nitong binitawan ang kanyang kamay.

“Mauna na ako, sir.” sabi niya at ipinagdiinan niya talaga ang huling salita bago hinila ang kanyang anak papasok ng restaurant. 

Kahit na gusto niya na lang sanang umuwi at hindi na tumuloy pa sa pakikipagdate kay Xander dahil sa unexpected nilang hindi pagkikita ni Logan at ni Brix. sa araw na iyon ay napakaraming nangyari sa buhay niya. Biglang dumating sa kumpanya si Logan bilang bago niyang boss at ngayon ay nakita na nito si Brix.

Habang naglalakad ay nagulat siya ng bigla na lang magtanong ang kanyang anak. “Mommy, siya po ba ang Daddy ko?” bigla siyang napatigil sa paglalakad at napatingin sa kanyang anak. Anong sinasabi nito? Bakit siya nito tinatanong ng ganun? Anong sinabi ng lalaking iyon sa anak niya?

Mabilis siyang umiling. Hindi niya kailanman aaminin sa anak niya na si Logan ang ama nito kahit na anong mangyari. “Anak, paano mo yan nasabi? Hindi. Hindi siya ang ama mo.” sagot niya rito. Hinawakan niya ang magkabila nitong pisngi. “Gusto mo na ba talagang magkaroon ng Daddy?” masuyo niyang tanong nito na ikinatango lang naman nito.

“Well kung ganun ay sige. Payag ka naman siguro na si Tito mo Xander ang maging Daddy mo hindi ba?” tumingin ito sa kaniya at hindi kaagad nagsalita hanggang sa tuluyan ng tumango sa kaniya.

Kahit papano ay gumaan naman ang pakiramdam niya dahil sa pagpayag nito. “Sigurado ka ba? Hindi ka ba magagalit kapag sinagot ko ang Tito Xander mo?” tanong niya sa kanyang anak. Gusto niya na tanggap nito si Xander kung sakali man na sagutin niya ito dahil kung ayaw ng anak niya ay igagalang niya ang desisyon nito. Malaki na ang anak niya at nakakaintindi na rin kaya alam niyang naiintindihan na nito ang sinasabi niya.

Hindi pa rin ito sumagot at nakatitig lang sa kaniya. “Anak, bakit hindi ka sumasagot? Ayaw mo ba kay Tito Xander mo?” muli niyang tanong dito na may halong pag-aalala. Pinag-isipan na niya itong mabuti kanina pa na baka nga ito na ang tamang panahon para buksan niya ang puso niya para sa ibang lalaki para sa anak niya, para magkaroon ito ng isang ama. Lalo na ngayon at nakita na ni Logan si Brix ay mas tumindi pa ang kagustuhan niya na sagutin na talaga ito.

“Gusto ko naman Mommy pero…” tumigil ito at pinagsakilop ang dalawang kamay. “Pwede bang ang lalaking iyon na lang kanina ang maging Daddy ko?” tanong nito sa kaniya na ikinapanlaki ng kanyang mga mata.

“A-anak, ano bang sinasabi mo? Hindi pwede. Isa pa, paano kung may asawa na ang taong iyon? Okay?” saway niya sa anak niya. “Tara na nga lang sa loob. Baka hinintay na tayo ng Tito Xander mo.” sabi niya na lamang para tumigil na ito sa sinasabi nito.

********

Isang mahabang buntong hininga ang pinakawalan ni Logan pagtalikod ni Kayla. Parang patalim ang mga binitawan nitong salita sa kaniya sa totoo lang. Bakit parang galit ito sa kaniya? Ano bang ginawa niya?

Oo nga at naghiwalay sila ilang taon na ang nakakaraan pero hanggang ngayon ay hindi na siya nag-asawa pa, pero planning na sila ni Beatrice na magpakasal dahil masyado ng matagal ang relasyon nila.

Pero ang batang iyon, talaga bang hindi niya anak ito? Iba ang pakiramdam niya sa bata pero posible nga kayang may ibang lalaki ang dumaan sa buhay ni Kayla kaagad pagkatapos nilang maghiwalay? Ganun ba talaga siyang kawalang halaga dito?

Isang hindi maipaliwanag na galit ang naramdaman niya ng mga oras na iyon. Bakit niya nga ba inaaksaya ang oras niya para rito e wala naman itong pakialam sa kaniya in the first place. Masyado siyang umaasa sa mga walang kwentang bagay, siya si Logan Monteverde. Mayaman at gwapo kaya wala itong karapatan na iparamdam iyon sa kaniya.

At kung may iba na itong asawa o ano pa, anong pakialam niya? Pwede niya rin naman iyong gawin pero hindi niya ginawa dahil sa katiting na pag-asa na baka muli pang magkabalikan silang dalawa ngunit ngayon ay napatunayan niyang malabo ng mangyari pa ang bagay na iyon. May anak na ito sa iba.

Isang matalim na buntong hininga ang muli niyang pinakawalan bago inihakbang ang mga paa papasok sa restaurant. Tiyak na kanina pa siya hinihintay ni Beatrice sa loob.

…