CHAPTER 1

CHAPTER 1

ATHENA MADRIGAL

“I now pronounce you husband and wife. You may now kiss the bride.”

Mga salitang ayaw pang marinig ni Athena pero wala na siyang magagawa pa dahil nasa harapan na siya ngayon ng altar at opisyal ng sinabi ng pari na sila ay kasal na ni Lucas Infante ang matalik na kaibigan ng kanyang ama.

Isang malalim na buntong hininga ang pinakawalan ni Athena bago siya humarap kay Lucas na ngayon ay asawa na niya.  At nang itaas na nito ang kanyang suot na belo ay nanatili lamang na seryoso ang kanyang mukha.

“Ngumiti ka naman kahit ngayon lang. Maraming tao ang nakatingin sa atin at ayaw mo naman siguro na mapagalitan ka ng iyong ama pagkatapos ng kasal na ito,” mahinang sabi ni Lucas kay Athena dahil hindi na talaga niya napigilan pa ang kanyang sarili na pagsabihan ito ng ganon dahil kanina pa talaga niya napapansin na nakasimangot o di kaya naman ay walang emosyon ang mukha nito.

“Okay na ba to?” mahinang sabi ni Athena kay Lucas habang may pilit na ngiti sa kanyang labi na para bang nang aasar pa ito at saka niya inirapan si Lucas.

Napabuntong hininga na lamang talaga muli si Lucas at napapailing na lang din talaga siya sa inasal na iyon ni Athena dahil para talag itong bata.

At para nga matapos na iyon ay isang magaan na halik sa labi ang iginawad ni Lucas kay Athena na ngayon ay asawa na niya. Kanina pa kasi naghihintay ang lahat ng naroon na nakatingin sa kanila na halikan niya si Athena.

Masigabong palakpakan naman ang umalingawngaw sa loob ng simbahan matapos na halikan ni Lucas si Athena. At habang ang lahat ay masaya sa kanilang nasaksihan si Athena naman ay natulala na lamang at hindi kaagad nakagalaw sa kanyang kinatatayuan dahil hindi niya inaasahan na sa labi talaga siya hahalikan ni Lucas.

Mahina naman na siniko ni Lucas si Athena ng mapansin niya na natulala na pang ito matapos niyang halikan.

Agad naman na bumalik sa wisyo si Athena dahil sa ginawa na iyon ni Lucas at napakurap kurap na lang talaga siya at napalunok ng sarili niyang laway dahil pakiramdam niya ay biglang nanuyo ang kanyang lalamunan sa hindi niya malamang dahilan. Ramdam na ramdam din niya ang pag iinit ng kanyang pisngi dahil iyon ang unang beses na hinalikan siya ni Lucas.

Matapos na pumirma ng kanilang mga ninong at ninang ay isa isa na rin na nagsilapit ang kanilang mga bisita sa kanila upang batiin silang dalawa. Karamihan din sa mga bisita nila na naroon ngayon ay mga kilalang tao sa mundo ng pagnenegosyo. Si Athena kasi ay nagmula sa kilalang angkan ng mga Madrigal habang si Lucas naman ay isa sa tagapagmana ng pamilya Infante.

“Congratulations sa inyong dalawa.”

“Binabati ko kayo.”

“Congrats!”

Matapos na batiin sila Athena at Lucas ng kanilang mga bisita ay kinuhaan na rin muna sila ng litrato roon kasama ng ilan sa mga bisita nila at habang ginagawa nga iyon ay nakabantay lamang ang ama ni Athena sa di kalayuan sa kanya dahil baka magmaldita na naman ang kanyang anak at baka hindi ito makaya ni Lucas.

Pagkatapos sa simbahan ay agad na rin naman silang dumiretso sa reception ng kanilang kasal at habang nasa sasakyan pa nga lang ang bagong kasal ay hindi na maipinta ang mukha ni Athena at hindi na talaga naalis ang kunot sa noo nito.

Napansin naman ni Lucas ang pagsimangot na iyon ni Athena kaya naman napabuntong hininga na lamang talaga siya at bigla tuloy siyang napaisip kung tama ba na sinunod niya ang gustong mangyari ng kanyang matalik na kaibigan na pakasalan niya ang anak nito.

“Athena, hindi ka na bata para magmuryot ng ganyan. Umayos ka nga dahil nakakahiya sa mga bisita natin baka mamaya ay kung ano na lang ang isipin ng mga yan kapag nakita ka nila na nakasimangot,” hindi na napigilan na saway ni Lucas kay Athena na ngayon nga ay asawa na niya.

Napatingin naman si Athena sa gawi ni Lucas at saka niya ito inirapan.

“Bakit? Ano ba ang gusto mong gawin ko? Ngumiti? Sa tingin mo ba ay madaling ngumiti sa harap ng maraming tao? Hindi naman ako artista para ngumiti ng ngumiti sa kanila. At isa pa ay kayo naman ni daddy ang may gusto nito kaya sa tingin nyo ba ay matutuwa ako?” pagmamaldita naman ni Athena sa kanyang asawa at lalo pa itong sumimangot na para bang isang bata na hindi nasunod ang gusto.

Napabuga na lamang talaga ng hangin sa kanyang bibig si Lucas at napapailing na lang din talaga siya dahil sa pinapakitang ugali na iyon ng kanyang asawa.

“Tsk. Wag ka sa akin magreklamo ng ganyan dahil ang ama mo ang nakiusap sa akin tungkol sa bagay na ito. At isa pa bakit hindi mo na lamang sinuway ang iyong ama tutal ay matigas naman talaga ang iyang ulo. Hindi ba nga kaya ka niya pinakasal sa akin ay dahil dyan sa katigasan ng ulo mo,” sagot ni Lucas kay Athena habang nanatili na seryoso ang kanyang mukha. “At dahil nagpakasal ka naman sa akin at hindi ka naman umurong ay asawa mo na ako  kaya wag mo akong masimangot simangutan dyan dahil ginusto mo na rin naman iyan. At dahil asawa mo na ako ngayon ay may karapatan naman siguro ako na punahin ka sa mga mali mong ginagawa lalo na at dala dala mo na rin ang pangalan ko kaya ayusin mo ang mga kinikilos mo dahil wala akong balak na sirain ang pinangangalagaan kong pangalan ng pamilya namin,” pagpapatuloy pa niya at hindi na talaga niya napigilan pa ang kanyang sarili na  pagsalitaan ng ganon si Athena dahil hindi naman siya nagpakasal para sirain lang nito ang iniingatan niyang pangalan ng kanilang pamilya.

Nagulat naman si Athena sa sinabi na iyon ni Lucas. Napakurap kurap na lang talaga siya habang nakaawang ang kanyang labi dahil hindi talaga niya inakala na sasabihin iyon sa kanya ni Lucas. Matagal na kasing kilala ni Athena si Lucas lalo na at matalik itong kaibigan ng kanyang ama at sa pagkakakilala niya rito ay napakatahimik nitong tao pero isa ito sa kinatatakutan sa mundo ng pagnenegosyo kagaya ng kanyang ama. 

“Talaga ba? E bakit kasi hindi na lang ikaw ang humindi sa kasalan na ito? At saka bakit hindi ka rin tumutol sa gustong mangyari ni dad dahil kung tutuusin ay pwede ka rin namang humindi sa gustong mangyari ni daddy,” mataray naman na sagot ni Athena kay Lucas.

“Tama ka… pwede naman talaga sana akong humindi sa kasalan na ito pero gaya nga ng sinabi ko ay wala akong balak na sirain ang iningatan na pangalan ng aking pamilya at kung uurong ako bigla ngayon ay parang ipinahiya ko na rin ang aking pamilya. At isa pa ay ang ama mo na rin mismo ang nakiusap sa akin na kung pwedeng ako na lamang daw ang maging asawa ng kanyang unica hija na pasaway. Syempre sino ba naman ang aayaw sa grasya? Nasa tamang edad na ako ng pag aasawa at ganon din naman ikaw kaya hindi naman na siguro masama na tanggapin ang alok na iyon ng iyong ama,” sagot ni Lucas kay Athena at saka niya ito kinindatan.

Hindi naman makapaniwala si Athena sa huling sinabi na iyon ni Lucas. Bigla tuloy siyang pinamulahan ng mukha dahil totoo naman na pwede na talaga siyang mag asawa pero hindi naman niya akalain na sa matalik pa talaga na kaibigan ng kanyang ama siya ikakasal.

“Bastos!” gigil na sabi ni Athena at saka niya tinalikuran si Lucas at sa bintana na lang talaga siya humarap.

Lihim naman na natawa si Lucas dahil sa inasta na iyon ni Athena. Gusto lang naman niya itong asarin dahil sa pagmamaldita nito sa kanya at hindi niya inaasahan na mapipikon ito sa kanyang sinabi.