Chapter 3

Pagkauwi ni Foina sa bahay niya ay hindi pa nakabukas ang ilaw. Meaning wala ang Mama niya sa kaniyang bahay. Pagkatapos niya kasi sa college at no’ng nakapag-ipon siya ay bumili siya ng sarili niyang bahay. At paminsan-minsan ay dumadalaw ang kaniyang Mama para bisitahin siya.

Binuksan niya agad ang ilaw. Alas sais na kasi siya nakauwi dahil may binili muna sa Watson. Sa sobrang stress niya parang kailangan niyang mag-self care at bumili ng pampaganda upang mabalik ang one-fourth na gandang nawala sa kaniya kanina.

Nang malapag niya sa mesa ang pinamili niya ay saka nag-ring ang kaniyang cellphone. Agad din naman niyang kinuha sa bulsa ang cellphone at nabasa niya ang pangalan ni Georgie. Ang best friend niya no’ng college. Rumehestro agad sa kaniyang mga labi ang ngiti. Miss na miss niya ang babaeng ‘to.

“Hi, Luv!” bati agad nito nang masagot niya ang tawag. Cheerful na naman ang babae, as always. Kapag talaga nauubos ang socialization battery niya ay si Georgie ang sumasalo.

Ngumiti na lang siya para mapantayan kahit papaano ang sigla ng kaibigan saka umupo sa sofa.

“Ano ‘yan? Kakauwi mo lang?” tanong nito nang mapansing hindi pa siya nakapagpalit ng damit. Tumango siya bilang sagot dito.

“Eh, ikaw? Kumusta?” tanong din niya. Saka naalala ang dalawang katrabaho niya na kaugali ng kaibigan. “Alam mo ba, luv. May kaugali ka talagang teacher do’n sa school namin. As in kaugali mo talaga-”

“You mean, maiingay?” Tumawa pa ito nang malakas. “Baka ipagpalit mo ko dyan ah! Susugurin talaga kita dyan sa bahay mo.”

“Sus! Walang papantay sa’yo, alam mo ‘yan.”

“Mabuti naman.” Muli na naman itong tumawa. “Oh, kumusta naman do’n sa school niyo? May nakita ka bang pogi?”

Tumaas agad ang kilay niya sa tanong nito. Tumayo na lang siya sa sofa imbes na sagutin ito at umakyat na sa kwarto. Bigla niya tuloy naalala ang teacher na pinakapogi daw sa buong school. ‘Yong Sir Chester na idol din ng mga bata niya.

Ay talaga naman, oo. Naging idol pa nga. Napailing na lang siya ng wala sa oras.

“Anong iling ‘yan? You mean walang pogi do’n? Edi ang boring do’n.” At gaya ng palagi nitong ginagawa. Tumawa na naman ito nang malakas.

Pero hindi siya sumabay. May gwapo naman talaga pero hambog nga lang, plus playboy pa.

“Ay, snob talaga, eh no? Galing mo rin-”

“Actually, luv, merong pogi do’n. Para ngang artista eh.” panimula niya kaya natahimik ito kakatalak at nakinig sa kaniya. “Alam mo bang dahil sa sobrang gwapo niya, may fans club pa siya don. Poging-pogi sa sarili.”

Napaismid pa siya nang maalala ang sinabi ng kaniyang estudyante kanina na may fans club nga daw ito. At ang malala pa do’n, kung ano-ano ang itinuturo sa mga bata. Kung pwede lang talaga, siya na mismo magsusumbong sa DepEd. Pero hindi rin naman siya sigurado kung totoo ang mga sinasabi ng estudyante niya. Baka over lang din ang mga ito magkwento.

“What?” gulat na tanong naman ni Georgie. “Gano’n siya kapogi? Makapunta nga dyan sa school niya at magpapabinyag ako sa kaniya.”

“Baliw.”

‘Pero gwapo nga ba talaga?” kulit na naman nito nang matahimik siya.

Hindi na lang niya ito sinagot. Nagbihis na lang muna siya at hinayaan na magsalita ang kaibigan. Ang dami nitong tanong tungkol kay Sir Chester pero hindi niya sinagot. Paano na lang kung sabihin niyang niyaya siya nitong mag-date kahit unang pagkikita pa lang nila? Baka hindi talaga siya nito titigilan kakausisa.

“Hoy, luv! Napakadamot mo talaga sa information!” Narinig niyang sigaw nito kahit nagbibihis pa siya. “Ano bang mukha niya? May dimple ba? Makapal ang kilay? Maputi? Matangos ang ilong? Ano? Sumagot ka dyan?”

Natawa na lang siya sa narinig. Gano’n ang ugali ni Georgie. Hindi nga rin niya alam kung paano niya nakayang makasama ito sa loob ng apat na taon sa college. Nang matapos siyang magbihis ay bumalik na siya sa harap ng cellphone at kinindatan ang kaibigan.

“Wanna hear some interesting news?” aniya na mas nagpa-excite kay Georgie. “‘Yong teacher na ‘yon ay inaya akong mag-date.” Sasabihin na lang niya dito ang nangyari kanina para ma-stress din ito. Hindi pwedeng siya lang ang ma-stress sa nangyari sa unang araw niya sa DepEd.

“Ano? Inaya kang mag-ano?”

“Bingi?” Tumawa pa siya. “Inaya akong mag-date kako.”

“Whatda! Bakit ka inaya? Close ba kayo?”

That’s my point! Buti na lang, naiintindihan ako ni Georgie. Tama pala talagang nakwento ko para may kasama akong ma-stress ngayong gabi.

“See? Diba ang weird niya! At maliban pa do’n, luv, babaero pa siya. Playboy!” Nakataas pa ang kilay niya habang nagkukwento. “At alam mo pa, ang sabi ng isa kong kasama kapag may bago daw talaga doon, ay gano’n ang galawan ng teacher na ‘yon. Playboy daw talaga.”

Pero sa hinaba-haba ang sinabi niya ay parang tuwang-tuwa pa ito sa narinig. Para bang nag-sparkle pa ang mga mata nito habang nakikinig sa sinasabi niya. Nakapangalumbaba pa ito na para bang bawat salita niya ay ninanamnam nito. Para itong bata na enjoy-enjoy sa kwento niya.

“Oh, tapos? Ano pa?”

“Anong ano pa?”

“Anong sinabi mo kay Sir no’ng inaya ka niya makipag-date? Pumayag ka ba?” Papikit-pikit pa ang mga mata nitong tanong sa kaniya. 

Putek! Seryoso ba siya? Akala ko pa naman kapag sinabi ko sa kaniya ay magiging kakampi ko siya at magagalir din siya kay Chester! Parang nag-iba yata ang ihip ng hangin. Bakit parang kakampi pa siya ni Chester?

“Naririnig mo ba ang sinasabi mo? Diba sabi ko playboy siya?” Hindi niya inakalang gano’n pa ang sasabihin ng kaibigan niya. “Tapos sabi ko diba lahat ng babaeng teacher sa school ay niligawan niya? Kahit nga ‘yong dalawa kong nakilalang teacher kanina ay niligawan niya rin. Anong gusto mong gawin ko? Pumayag sa gusto niya?”

“Gwapo diba?”

Wala sa sarili siyang tumango. Totoo din naman kasing gwapo. Magsisinungaling pa siya kung hindi siya tatango.

“Go muna!” 

“Ewan ko sa’yo, luv. Hindi ka rin matino kausap.”

Papatayin na sana niya ang tawag nang may biglang lumabas sa notification niya. Friend request iyon sa F******k at mas lalo siyang kinabahan nang makita ang pangalan ng lalaking pinag-uusapan nila ngayon ni Georgie.

“Oh my God!” bulalas niya.

“Why, luv? Nag-friend request na ba?”

“Pa’no mo nalaman?”

“Syempe ganiyan ang galawan no’ng ex ko eh. Accept mo na ‘yan para masimulan niyo na ang love story niyo.”