Chapter 2 - Knowing the Truth

MALUTONG na sampal ang dumapo sa mukha ni Mina, sa labis na pagkabigla ay nablangko ang utak niya sa nangyari. Hindi makapaniwalang tiningnan ang biyenan na babae. "M-Mommy…"

Lahat ay nagulat sa ginawa ni Helena, unang beses na masaksihan nilang nagbuhat ito ng kamay kahit pa napaka-strict nitong tao.

Unang kumilos si Ethan na humarang sa pagitan ng ina at ni Mina, hinawakan niya pa ang braso ng huli na tila ba pinoprotektahan ito.

Nang makita iyon ni Clara ay bigla siyang nagtaka. "Ethan…" tawag niya, ngunit wala man lang nakarinig sa kanya.

"Umalis ka riyan, Ethan," ani Mina.

"Hindi niyo siya kailangan na saktan, Mommy," pagtatanggol nito.

Namumula sa galit ang mukha ni Helena, ng mga sandaling iyon ay wala siyang ibang naiisip kundi ang ibuntong kay Mina ang galit na nararamdaman.

Isa siyang ina at masakit tanggapin na sa isang iglap, ay nawalan siya ng anak. "Nang dahil sa kanya kaya wala na si Noah! Ang kapatid mo, tapos nakuha mo pa siyang ipagtanggol?!"

"Aksidente lang ang nangyari!"

"Ethan, pwede bang 'wag kang bulag?" sabat ni Ysabelle. "Hindi mo kasi nakita kung anong itsura ni Kuya, kaya nasasabi mo 'yan! Ang lala ng naging damage sa kanya pero galos lang ang tinamo ni Mina? Hindi ka ba nagtataka?"

Nakayuko lang si Mina, hindi makuhang mag-angat ng tingin habang lumuluha. Hindi pa maproseso ng isip na wala na ang asawa niya. "H-Hindi… hindi…"

"Kung hindi siya nag-insist na pumunta sa resort na 'yun!" mataas ang boses ni Helena, ngunit hindi niya magawang sumigaw. Mahinang-mahina at kinakapos siya ng hininga ng sandaling iyon.

Mabuti na lamang ay umalalay si Victor. "Huminahon ka lang."

Nagpumiglas si Helena, naaalibadbaran siya sa hawak nito. Gusto niyang magwala, umiyak at maglupasay pero nahihirapan siya. Parang ano man sandali ay mawawalan ng malay.

"Mommy!" nag-aalalang lumapit si Ysabelle nang makitang matutumba ang ina. Pagkatapos ay tiningnan nang masama ang kapatid. "Sige, ipagtanggol mo pa siya, 'di mo nakikita ang asawa mo? Nakatingin lang sa inyong dalawa?"

Sabay na napalingon ang dalawa kay Clara na natulala na sa kinatatayuan, bakas ang kalituhan sa mukha.

Mabilis na tinulak ni Mina si Ethan. "Ayos lang ako, kasalanan ko naman talaga."

Umismid si Ysabelle, naiinis habang lumuluha. "Mabuti naman. Kung hindi mo pinilit si Kuya na pumunta sa resort na 'yun, dapat nasa bahay lang siya at nagpapahinga."

"Ethan, ang mas mabuti pa ay ihatid mo muna si Mina pauwi sa bahay," utos ni Victor.

"Dito lang po ako! Hindi ko iiwan si Noah."

"Ako na lang po," ani Clara, siya na ang nagkusa. Mas mainam na naroon din si Ethan kasama ng pamilya nito. Lumapit siya, inalis ang kamay ng asawa sa braso ni Mina. "Tara na, Ate."

"Take care of her," bulong ni Ethan.

Biglang nanlamig si Clara sa narinig. Unang beses niyang makita ang concern ng asawa sa ibang babae, lalo na kay Mina. Gayon pa man ay binalewala niya ang nararamdaman, iniisip na out of concern lang talaga ang asawa para sa hipag nito.

Naglakad sila ni Mina palabas ng ospital pero huminto si Mina pagdating nila sa entrance.

"Dito na lang, bumalik ka na ro'n."

"Sasamahan na kita, Ate," ani Clara, hindi niya rin kaya ang bigat sa loob.

Biglang napaluhod si Mina, hindi na nakayanan ang sakit na nadarama. "Kasalanan ko 'tong lahat… ako ang may kasalanan," iyak niya.

Ang mga tao sa paligid ay napatingin. Dinaluhan naman agad ni Clara, hinahaplos-haplos ang likod nito. Ilang sandali silang ganoon hanggang sa tuluyan niyang madala sa kotse si Mina at maihatid pauwi kung saan ay naghihintay ang anak nitong si Nathan.

"Mommy?" Sabay yakap ng bata ng makitang umiiyak ang ina. "Where's Daddy?"

Hindi naman magawang makapagsalita ni Mina, niyakap lang niya ang anak at pagkatapos ay nagpaalam na magtutungo sa kwarto, "A-Ate," garalgal na tawag sa katulong. "Pakitingnan muna si Nathan, sa kwarto lang ako."

Pagkatapos ay naglakad na paakyat sa hagdan. Naiwan si Clara na nakasunod ang tingin at mayamaya pa ay nagpasiya na rin siyang umalis.

"Babalik po ba tayo sa ospital, Ma'am?" tanong ng driver.

Tumango si Clara saka napabuntong-hininga. Ang masayang araw sana para sa wedding anniversary nila ni Ethan ay hindi na matutuloy. Ang mas nakakalungkot, nawalan ng isang miyembro ng pamilya.

Hindi man sila ganoon ka-close ng pamilya niya, atleast, itinuturing siyang parte maliban kay Mina na ipinagtataka niya. Mabait ang mga Villareal sa kanya pero pagdating dito? Laging malalig ang pagtrato.

Wala siyang nakikitang problema kay Mina dahil mabait ito. Nang minsan siyang magtanong, wala ni isang sumagot. Iniiwasan ni Ethan, kahit ni Ysabelle magsalita kaya hinayaan na lamang niya.

Habang nasa malalim na pag-iisip ay bumagal ang takbo ng kotse, paglingon ay nasa tapat na sila ng ospital. Naghahanap ng mapaparadahan ang driver ng mapansin niya sa hindi kalayuan ang asawa, naglalakad kasama si Ysabelle. "Bababa na 'ko rito, Kuya," anas niya saka dali-daling sinundan ang dalawa na nagtungo sa gilid na bahagi ng gusali.

Nagtaka siya kung saan patungo ang mga ito, akmang tatawagin si Ethan ng marinig niya ang galit na boses ng asawa, "Pwede bang pigilan mo 'yang bibig mo?! Kanina pa 'ko nagtitimpi sa'yo."

Umismid si Ysabelle at pagak na natawa. "Oh really? Ako pa talaga? 'Di ba dapat ikaw 'tong magpigil? Obvious na obvious ka kanina sa harap ng asawa mo."

"Tama na, okay?!"

Dumuro si Ethan, tinabig naman ni Ysabelle ang kamay nito sa harap ng mukha niya sabay lapit habang nanlilisik ang mga mata. "Ano, lalaban ka? Baka nakakalimutan mo kung sino ako? Mas matanda ako sa'yo!"

Nanggigil si Ethan, mabilis na sinuntok ang pader sa likod niya.

Napasinghap si Clara nang masaksihan niya iyon. Unang beses na makita niyang magalit ito ng ganoon. "A-Ano bang pinag-uusapan nila?" bulong niya habang nakakubli pa rin sa pader.

"Ba't 'yang pader ang sinuntok mo? Nandito ako sa harap mo!" sabi ni Ysabelle, tila naghahamon. "Ba't 'di ako, gumanti ka. Kasi pinagtulungan namin ni Mommy si Mina. Ipagtanggol mo 'yung babaeng mahal mo!"

Nanginig ang talukap ng mata ni Clara sa narinig. Pakiwari niya ay namali lang siya ng dinig pero… malinaw na si Mina, ang hipag at asawa ng kapatid ni Ethan ang tinutukoy ng dalawa.

Napaatras siya, tuluyang nanghina ang tuhod. Ngunit kaya niya pang kumilos at umalis sa lugar. Tumalikod siya at akmang maglalakad palayo ng marinig pa ang sinabi ni Ysabelle.

"Hindi ka ba naaawa kay Clara? Pinakasalan mo siya kasi, si Kuya ang pinili ni Mina sa halip na ikaw. Ilang taon na ang nakalipas pero 'di mo pa rin siya makalimutan, ganyan ka ba katanga, ha, Ethan?"

Naistatwa sa kinatatayuan si Clara, nais niyang marinig ang sasabihin ng asawa. Gusto niyang itanggi nito ang nararamdaman kay Mina at sabihing nakalimutan na ito pero ng sumagot si Ethan, nadurog ng tuluyan ang puso niya.

"I just want to help her. Wala na si Kuya, kaya sino pang tutulong sa kanya?"

"And you think, ikaw 'yun? Anong iisipin ni Clara 'pag nalaman niya 'to?"

"I don't care, si Mina ang priority ko."