Chapter 4 - Kambal

"Ano bang nangyayari! Tang ina naman ninyo!" Hindi ko na napigilan ang sarili ko habang sumisigaw sa harapan ni Ego at ng iba pang miyembro ng Lucky Nine kasama na rin si Abigaile.

"Kalma ka lang, Miss Roxanne..." sagot ni Rojen na siyang gumagamot ngayon sa sugat ni Jander— siya ang doktor sa grupo nila.

"Oo nga, malayo sa bituka," nakangiting sagot ni Jander na parang wala lang sa kanya.

Isa-isang nagsulputan ang mga miyembro ng Lucky Nine kanina at may mga hawak silang baril. Imbes na sa hospital dinala si Jander ay rito sa palasyong bahay ni Ego kami dinala.

Binalik ko ang tingin kay Ego. "Karapatan ko naman sigurong malaman kung anong nangyayari. Paano ako magpapanggap nang maayos kung hindi ko naman alam kung kailan bigla na lang ulit may susulpot na tao sa harapan ko at barilin ako!"

"Sinabi ko naman sa iyo na ingatan mo ang gown na iyan," malamig na saad ni Ego habang nakatingin sa akin.

"Eh gago ka pala, eh!" sigaw ko ulit sa kanya. "Tinago ba ninyo so Roxanne Rios dahil alam ninyong mangyayari ito? At ako ang nilagay ninyo sa sitwasyong ito dahil wala naman kayong pakialam kung mamatay man ako o hindi!"

Hindi ko alam kung bakit ako nanginginig— sa takot ba o sa galit. Mas lalo lang akong nainis nang wala akong matanggap na sagot mula kay Ego.

Tuluyan nang naputol ang pisi ng pasensya ko. Walang pagdadalawang-isip kong pinunit ang suot kong off-shoulder wedding dress. Wala akong pakialam kung naka-panty at bra lang ako sa harapan nilang lahat. Nakita ko namang umiwas silang lahat ng tingin sa akin maliban kay Ego na nakatuon pa rin sa akin ang atensyon.

Hinagis ko sa harapan ni Ego ang wedding dress. "Sa iyo na iyan! Pauwiin mo na ang nanay ko at kunin mo na ang lahat ng binigay mo sa amin! Mahal ko pa ang buhay ko! Kailangan ko pang mabuhay para sa pamilya ko!"

Tinalikuran ko na siya at handa na sanang lumayo nang biglang may naglagay ng coat sa akin dahilan para matakpan ang katawan ko. Nang lumingon ako ay nakita ko ang seryosong mukha ni Ego.

"Hawak nila si Roxanne..."

Napaharap naman ako sa kanya sa nakakunot kong noo. "Sinong nila?"

"Skeleton, ang mortal na kaaway ng Lucky Nine," dagdag niya pa. Mula sa kung saan ay binalik niya ang tingin sa akin. "Isang mafia organization ang Lucky Nine at ako ang namumuno nito."

Mafia...

Totoo pala ang mga ganoon? Ibig sabihin ay nasa delikado akong sitwasyon.

"Isang simpleng mansyon lang ang bahay kong ito pero ito ang nagsisilbing hideout namin. Ligtas ang lugar na ito sa kahit na anong panganib. Fully secured at hindi basta-basta mapapasok ng kalaban," paliwanag pa ni Ego. "May isa pa akong bahay na pinatayo at iyon ang pangarap na bahay ni Roxanne at doon ko siya huling nakita— walang bakas, walang natirang ebedensya, kaya hirap kaming hanapin siya. Isang buwan na siyang nawawala at wala pang may tumawag sa amin para gamitin siyang blackmail sa amin."

"Kung walang ebedensya, bakit parang sigurado kayong hawak siya ng iskeleton?" kuryoso kong tanong.

"Skeleton," pag-uulit niya sa sinabi ko na para bang tinatama ako. Tsk, parehas lang naman iyon. "Kaya ka nandito para lumabas sila."

Napataas ang kilay ko dahil hindi ko nakuha kung anong ibig niyang sabihin sa sinabi niyang iyon. Lumingon sa gilid si Ego kaya sinundan ko iyon ng tingin. Biglang nilagay ni Marcelo ang laptop niya sa mesa ni Ego— siya iyong laging may dalang laptop at nakasuot ng salamin sa mata.

May pinakita siya na para bang listahan. "Ito ang lahat ng kaaway ng Lucky Nine. Lahat iyan sila ay under surveillance."

Biglang may mga lumitaw na videos sa laptop at base sa nakikita ko ay nasa iba't ibang bansa iyon. Ang galing naman!

"Wala kaming ibang alam na rason sa pagkawala ni Roxanne kung hindi ang dinukot siya ng isa sa mga kalaban naming mafia organization," dagdag pa ni Ego. "Kung sakaling tama kami ng hinala, lalabas ang tunay na kalaban kapag nakita nilang kasama ko naman siya, which is ikaw. Magtataka sila bakit nasa mabuti kang kalagayan gayong hawak naman nila ang alam nilang tunay na Roxanne Rios. Wala silang choice kung hindi sila mismo ang umalam kung sino ka."

"Kaya ka magpapanggap na siya para ipakita sa kalaban na ikaw ang tunay na Roxanne Rios," dagdag pa ni Xavier— sa pagkakatanda ko ay isa siyang model. "Kaya ka rin tinuturuan ni Abigaile paano maging siya ay para makumbinsi ang kalaban na hindi si Miss Roxanne ang hawak nila."

"At tama nga kami ng kalkula dahil kinagat nila ang pain kanina," sabi pa ni Zandro— may ari siya ng isang wine factory. "Nagpakita sila."

"Dahil doon ay magkakaroon na tayo ng lead," saad naman ni Marcelo habang nakatingin sa laptop niya. "Puno ng surveillance camera ang reception kanina at ilang oras lang ay makakakita na ako ng butas."

Nag-usap-usap na sila habang nakapalibot na kay Marcelo.

Napangisi ako. "Kinagat nila ang pain? At ako ang ginawa ninyong pain? Nilagay ninyo sa alanganin ang buhay ko na hindi ko man lang alam ang lahat? Pinapirma ninyo ako ng kontrata kasi alam ninyong mauuto ninyo ako gamit ang pera ninyo?"

Natahimik silang lahat. Napayuko ako sa sahig at nararamdaman ko na ang pag-init ng mga mata ko at ilang saglit lang ay napaluha na ako.

"Ganoon ba ang tingin ninyong may pera sa mga tulad kong may miserableng buhay? Tingin ba ninyo sa akin isang bagay na pwedeng gamitin at pagkatapos ano? Kung namatay ako kanina, ano? Anong gagawin ninyo!"

Lumapit sa akin si Abigaile para pakalmahin ako. Ilang saglit ay may inilahad siyang papel. Tinanggap ko naman iyon at tiningnan. Napakunot ang noo ko dahil wala akong maintindihan. Umatras nga yata mga luha ko.

"Kanina lang kita nakuhanan ng buhok for DNA testing at match kayo ni Miss Roxanne ng 99.99%," dagdag pa ni Abigaile. "Hindi naman kasi aksidente lang na magkamukha kayo, kaya nagpagawa kami ng DNA testing. At oo, kambal kayong dalawa."

"We're protecting you like we're protecting Miss Roxanne," saad pa ni Francis— sa pagkakaalala ko ay may ari siya ng isang car company.

"Dahil matagal ng pangarap ni Roxanne ang magkaroon ng kapatid..." dagdag na sabi ni Ego. "Kaya palitan natin ang mga kondisyon sa contract marriage natin."

Ako?

Napatulala na lang ako sa hawak kong papel. Paanong nagkaroon ako ng kambal?

Kaya ba bigla na lang nag-iba ang trato sa akin ni Ego? Kasi kapatid ako ng babaeng mahal niya?

Nilingon ko si Jander na ngayon ay nakaupo na at nakatingin sa akin. "Alam ko na ang gusto kong idagdag na kondisyon."