CHAPTER THREE : SECRET ANIMOSITY

“HEY, watch out!”

Nagising ang diwa ni Zelica nang marinig niya ang boses ni Luke at kaagad siyang tumabi para makadaan ito dahil nakaharang pala siya sa daan.

Saglit pang tumingin kay Zelica si Luke kaya naman itinuro niya ulit ang daan para magpatuloy na ito sa trabaho. Umiling na lamang ito at saka naglakad patungo sa lamesa ng mga customers para i-deliver ang order ng mga ito.

Napabuntong hininga na lamang si Zelica at saka sandaling napaupo sa lamesang nililinis niya. Ilang araw pa lamang ang nakakalipas nang maghiwalay ang kaniyang mga magulang at naapektuhan pa rin siya dahil doon.

Hindi alam ni Zelica ang nararamdaman niya ngayon dahil may guilt na siya ang unang nakaalam ng pangangaliwa ng ama at kailangan niya pa itong ipaalam sa ina dahil ayaw niyang magmukha itong tanga.

Walang anak ang gustong masira ang pamilya pero wala ring anak na magtitiis at isasawalang bahala ang mga pagkakamali ng magulang nila.

“Ang lalim naman ng buntonghininga mo…” natatawang komento ni Luke na kasabay si Cathy at tumabi kay Zelica.

Binigyan lamang ng isang tipid na ngiti ni Zelica sina Luke at Cathy.

“Ano ang problema, Zelica? Sa bahay ninyo ba ‘yan?” tanong ni Cathy.

“Oo, naghiwalay na mga magulang ko…” mapaklang sagot ni Zelica sa tanong ni Cathy at natahimik kaagad nang ilang sandali sina Luke at Cathy nang dahil doon. Halatang hindi makapaniwala sa nalaman.

“Pwede bang malaman kung bakit naghiwalay silang dalawa?”

“Nagloko si Papa, ako pa mismo ang nakahuli…”

“Grabe, mga lalaki nga naman, oh.” pambibiro ni Cathy pero hindi naman makatawa si Zelica.

Naramdaman yata ni Cathy na wala sa mood si Zelica makipagbiruan kaya napatikhim na lang ito.

“Alam mo, para kahit papaano eh makalimutan mo ‘yang problema mo, what if uminom tayo after duty?” excited na tanong ni Cathy kay Zelica at mahina pa nitong niyugyog ang kaniyang braso para mapapayag siya. “Iinom na lang natin ‘yan!”

Tumango si Zelica. “Sige ba—”

“Ikaw ba, Luke? Sama ka ba sa amin uminom?” biglaang tanong agad ni Cathy kay Luke kahit hindi pa tapos sumagot si Zelica.

“No, may gagawin pa ako after duty,” sagot ni Luke.

Napanguso si Cathy. “Ay, sayang naman... Mas masaya sana kung kasama ka namin uminom para—”

“No, hangover lang naman aabutin ko diyan,” pambabara ni Luke kay Cathy at saka ito naglakad palayo.

Naramdaman ni Zelica ang pagkadismaya ni Cathy sa hindi pagsama ni Luke kaya tinapik niya ito sa balikat.

“Crush na crush mo talaga ‘yon, ‘no?” natatawang pang-iinis ni Zelica kay Cathy pero umirap lang ito sa kaniya at sumunod kaagad kay Luke.

Napakamot na lamang si Zelica sa kaniyang ulo nang dahil doon. Kahit labag na sa loob kong magpatuloy sa pagtatrabaho ay pinilit ko pa rin tapusin ang duty ko dahil ganado akong lumaklak pagkatapos nito.

***

“T*NGINA, sobrang hirap bang maging loyal at hindi kayang gawin ‘yon ni Papa?” malutong na pagmumura ni Zelica at saka nilagok ang alak na nasa baso.

Humagod ang mainit at mapait na lasa sa lalamunan ni Zelica pero dahil nakarami na siya ay hindi niya na ito inisip pa.

“Ang tagal na nilang nagsasama ni Mama, eh... Lumaki na nga akong ganito tapos saka pa siya talaga nagloko,” nangingiyak na pagkukuwento ni Zelica kay Cathy at inaalo naman siya nito para hindi matuloy ang pagtulo ng kaniyang mga luha.

“Hirap akong intindihin ang sitwasyon mo ngayon, Bes. Wala kasi akong kinalakihang ama pero sige, t*ngina talaga ng mga lalaki.”

“G*go mo talaga kahit kailan, eh.” natatawang mura ni Zelica kay Cathy dahil kanina pa ito panay ang pabirong pagsagot sa kaniya. Siguro ay para maging light lang ang mood nilang dalawa habang nag-iinuman kahit na hinahayaan siya nitong i-vent out lahat ng mga nararamdaman niya.

“Alam mo, mas maganda na ring ikaw ang nakahuli sa kaniya, ‘no.”

“Bakit naman? Anong maganda doon?”

“Tignan mo, hindi na kayo mukhang tanga ni Tita ngayon. Biruin mo, ang haba na pala ng panahon na niloloko kayo ni Tito at wala kayong kamalay-malay…”

“Pero sira naman pamilya namin ngayon…”

“Ayon nga lang pero gusto mo ba buo pa rin kayo pero naglolokohan? Ha? Ganoon ba ang gusto mo?” tanong ni Cathy kay Zelica kaya naman sunod-sunod ang pag-iling niya bilang sagot dito.

“Mas mabuti nang maghiwalay sila kaysa maglokohan habang buhay. Mas masakit ‘yong nagkukunwari kang walang alam sa mga nangyayari, ‘no…”

“Tama! Kaya iinom na lang natin ‘yan dahil nangyari naman na,” hiyaw ni Cathy at saka itinaas ang baso nito kaya naman itinaas rin ni Zelica ang kaniya at pinagtama nila itong dalawa.

“Cheers!” sabay na sigaw nina Zelica at Cathy.

***

“NAHIHILO na ako, Cathy…” pagrereklamo ni Zelica makalipas ang ilang oras na pag-iinuman nilang dalawa ni Cathy. Napapapikit na lamang siya dahil tinatamaan na siya ng mga alak na nainom niya at umiikot na rin ang kaniyang paningin.

“Sus, kaya mo pa ‘yan! Hindi ako naniniwalang nahihilo ka na dahil nakakapagreklamo ka pa sa akin!”

“T*rantado, ang sabi ko nahihilo ako hindi napipipe na ako!” sagot ni Zelica kay Cathy at saka umiwas sa pinaiinom nitong alak sa kaniya dahil ramdam niyang nasasagad niya na ang sarili. Kaunti na lang ay babagsak na talaga siya.

Kakaiba pa naman si Zelica kapag malasing dahil nagba-black out talaga siya at wala na masiyadong naaalala sa mga ginawa niya pagkagising kinabukasan.

“Magpakalasing tayo ngayong gabi hanggang sa mawala at makalimutan mo na lahat ng problema mo!”

“Hindi lang proble—hik! Problema ko ang mawawala ngayong gabi, pati ulirat ko!” buwelta ni Zelica kay Cathy pero nilagok niya pa rin ang basong inaabot nito sa kaniya para matahimik na ito sa pangungulit. Nalasahan niya na kakaiba ang inabot nitong alak sa kaniya pero wala na siya sa huwisyo para tanungin kung naiba na ba ang iniinom namin ngayon o hindi.

“Inom pa, Zelica! Kaya mo pa ‘yan!” natatawang udyok ni Cathy kay Zelica.

Tumanggi na talaga si Zelica at saka yumuko sa lamesang pinag-iinuman nilang dalawa ni Cathy dahil unti-unti na rin siyang nilalamon ng antok sa hindi malamang dahilan.

“Hindi lang problema mo ang mawawala sa iyo ngayong gabi... pati ikaw... pati ang sarili mo, Zelica…”

Dahil nawawalan nang ulirat si Zelica ay hindi niya na gaanong narinig ang mga sinasabi ni Cathy bago pa siya tuluyang lamunin ng dilim at mawalan ng malay.