Chapter 10

MAAGA pa naman kaya nagtagal sa swimming pool si Elise. Tapos na siyang mag-almusal at naglinis ng bahay. Alas-nuwebe pa naman ang tutorial niya sa mga bata at hindi rin problema kung ma-late siya. Makapaghihintay naman ang mga ‘yon.

Nang magsawa kakalangoy ay umahon na siya sa tubig at nagbanlaw. Nagdala na talaga siya ng tuwalya roon kahit nang pinupuno pa lang ng tubig ang pool. Hinintay lang niya si Terrence na makabalik at nagpaalam.

Pumasok siya ng bahay na tuwalya lamang ang sapin sa kaniyang katawan. Binitbit na niya ang basang damit at sa banyo ng kuwarto na niya kukusutin. Paakyat na siya ng hagdanan nang lumabas mula kusina si Terrence. Awtomatikong napatingin ito sa kaniya.

“Mukhang nag-enjoy ka sa paglangoy, ah. You spent almost an hour in swimming,” nakangiting sabi nito. Pinasadahan pa siya nito ng tingin.

“Ah, oo. Bihira rin kasi ako makaligo sa swimming pool.”

“Paano ka natutong lumangoy?”

“Tinuruan ako ni Thrasius noon sa artificial swimming pool na pambata.”