الصفقة

ردت "ليان" بغضب دفين وغير ومحتمل:

— بتقولي إيه يا ماما؟! ازاي يعني؟! المفروض طالما هيا عارفة كدا وشايفة جفافه، تتكلم مع بابا وينتهي الاتفاق دا خالص! تولين تستاهل حد يحبها ويقدر رقتها، مش حد يعاملها كأنها فرض واجب!

لوت السيدة "فريدة" شفتيها بأسف ومرارة:

— وتفتكري أبوكي عاصم هيوافق يا ليان؟ وحتي لو وافق.. ما هي كدا بردو هتعذب، أختك بتموت فيه ومش شايفة راجل غيره في الدنيا دي كلها.

تابعت "ليان" بإصرار:

— بس يا ماما..

قطع "ياسين" حديثهما وهو يزفر بحنق، محاولاً إغلاق الملف المقبض:

— بقولك إيه يا ليان.. إحنا ملناش دعوة، هما حرين في حياتهم. انتي شايفه بنفسك أختك بتحبه وهتموت نفسها علشانه ومستحملة كل ده، يبقى خلاص. إحنا اللي علينا إننا نحاول نغير منه شوية بالراحة ومن بعيد.. مع إني عارف وموجوع إن مفيش فايدة فيه أصلاً، مالك قلب حجر.

اغتاظت "ليان" من إعلان زوجها التخلي عن التدخل لمصلحة أختها، وقالت بحنق:

— هو ده اللي ربنا قدرك عليه؟ دا بدل ما تقعد معاها وتعقلها وتفهمها إن جوازتنا إحنا مش مقياس لنجاح جوازتهم؟ ياسين.. أختي بتدمر قدام عيني!

مسح "ياسين" على شعره بعصبية وشعر بالغيظ من عدم استيعاب زوجته لطبيعة أختها، وقال:

— شاهدة يا مرات عمي.. أنا حاسس إن حضرتك ولدتي "ليان" ناقصة تلات شهور! ما هو مش معقول مش فهماني ولا فهماكي ولا فاهمة أختها! طب أقولها إيه تاني؟ يا ستي أختك بتحبه.. ولو كان مالك ده مجرم أو سفاح، بردو بتحبه وهتتجوزه! الحب أعمى وهي مغمية عيونها بمزاجها.

تنهدت السيدة "فريدة" بصبر، وطبطبت على يد ياسين:

— معلش يا ابني.. بالراحة عليها، هيا بس بتحب أختها أوي وموجوعة عشانها، ومفكرة إن أختها ممكن تقتنع بكلامك أنت بالذات لأن مالك بيحترمك.

رد "ياسين" بقوة وقلة صبر:

— لا يا مرات عمي.. "تولين" عمرها ما هتقتنع بكده، لأنها مغيمة بحبها ليه من وهي طفلة، وعمرها ما شافت بعينها راجل غيره.. الحب عندها بقى مرض.

قالت "ليان" بحزن وشرود، وهي تتذكر تفصيلة أخرى:

— ياريتها كانت حتى أخدت بالها من مشاعر "طارق" ابن عمي.. دا بيحبها حب حقيقي وبيتمناها من زمان، بس لأسف هيا مش شايفاه خالص وبتعتبره مجرد أخ ليها ومصدر أمان مش أكتر.

كان "ياسين" يلوك الطعام داخل فمه بسرعة وعصبية، وعند ذكر اسم "طارق"، توقفت اللقمة في حلقه فجأة، وسعل كثيراً حتى كاد يختنق. سارعت "ليان" بتقديم كوب الماء له، وبعد أن بلع اللقمة بصعوبة بالغة وتغير لونه، نظر إليهما بجدية وخوف:

— ليان.. حبيبتي، انتي فاكرة لو هيا حتى انجذبت لـ"طارق"، السيد والدك عاصم هيوافق؟ دا مش بعيد يقتله! دا من غير حاجه بيعامله كأنه خدام عندنا في الشركة وتحت إيده.. طارق مملكش الفلوس اللي تخلي عمي يبص في وشه! ما تقوليلها يا مرات عمي الحقيقة.

عادت السيدة "فريدة" بذاكرتها إلى الوراء، وشردت بحزن شديد عندما تذكرت أحداث الماضي وقسوة زوجها "عاصم" في التعامل مع "طارق" وهو صغير، فقط لأنه لم يرث من والديه الراحلين المال والأسهم مثلما ورث "ياسين" و"مالك". أفاقت من شرودها وقالت بأسى تام:

— حقيقة يا ليان.. باباكي طول عمره مبيحبش طارق، قلبه كله لـ"ياسين" و"مالك" عشان الشغل والامتداد. ولولا رابط الدم والأصول، كان طرده من الشركة ومن القصر زي ما قال مالك بالظبط.. تعرفي يا ليان؟ أنا خايفة من طريقة مالك دي.. خايفة يكون نسخة تانية من أبوكي، ويكرهكم في بعض بسبب الفلوس والسيطرة.

شعرت "ليان" بقشعريرة خوف تسرع في جسدها، وتمسكت بيد زوجها قائلة برعب:

— لا يا ماما.. مش للدرجة دي إن شاء الله. مالك قاسي بس طيب من جوه.. وإن شاء الله "تولين" برقتها هتعرف تغيره وتدوب الجليد ده.. صح يا ياسين؟

نظر "ياسين" إلى عيني زوجته المليئتين بالبراءة والأمل، وابتسم بحنان متناسياً غضبه، وقبل يدها:

— صح يا روح قلب وعمر ياسين من جوه.. ممكن بقى أكمل فطاري في سلام عشان ألحق مكتبنا؟

ابتسمت بخجل ومسحت على وجنتها:

— ألف صحة وهنا على قلبك يا حبيبي.

غمز لها بمرحه المعتاد:

— حبيبتي يا ليونتي.. ربنا ما يحرمني منك.

على الجانب الآخر من الفيلا، وتحديداً في الحديقة الخلفية الواسعة.. هربت "تولين" إلى مكانها المفضل والأقرب إلى روحها المكسورة؛ "حوض الورد". كانت تعشق الزهور لأنها تشبهها تماماً؛ شخصية حساسة، رقيقة، وضعيفة، يمكن قطفها أو كسر ساقها بسهولة.. منهم من يعتني بها لتزدهر، ومنهم من يتركها تذبل وتموت تحت أقدام الإهمال.

وقد اختارت "تولين" هذا المكان بالذات في الحديقة لسبب خفي يعلمه قلبها؛ لأنه يطل مباشرة على شرفة حجرة مكتب "مالك". كانت دائماً تقف هناك، على أمل أن ينظر من نافذته يوماً، فيراها، وينجذب لنقائها ويشعر بالدفء الذي يملأ كيانها تجاهه.

في تلك اللحظة، كان "مالك" داخل مكتبه، يلملم أوراقه المهمة بعصبية ويضعها في حقيبته الجلدية الفاخرة استعداداً للسفر. لفت نظره وجودها من خلال الزجاج الكبير. نظر إلى الأسفل ورآها تقف عند "حوض الورد". هز رأسه يميناً ويساراً بسخرية لاذعة وتذمر، متمتماً في سره: "ناس فاضية.. م وراهمش غير الورد والعواطف والكلام الفاضي.. دي متصلحش تكون زوجة لراجل في مكاني!" بالنسبة له، هذا الاهتمام المبالغ فيه بالزهور ليس من اختصاص ستات عائلة "الراوي"، ولا يليق بامرأة ستتحمل اسمه ومسؤولياته في المجتمع.

ظلت "تولين" تبكي بصمت، والدموع تنحدر على وجنتيها لتسقط فوق أوراق الأزهار كحبات الندى الحارقة. كانت تتساءل بمرارة بداخلها: "ليه كل الألم ده يا مالك؟ الم يكفيك إنه زواج تقليدي باتفاق العائلات عشان أستحمل جفاك؟ ألم تستشعر مدى حبي وجنوني بيك ولو ليوم واحد؟ ليه محسستنيش إني أنثى مرغوبة ومش مجرد فرض وواجب؟"

احست بحركته وهيبته وهو يخرج من باب الفيلا الجانبي ماراً بالحديقة متوجهاً لسيارته. كانت تعطيه ظهرها، لكن قلبها كان يعلم جيداً أنه يمر خلفها ويراها. شعرت بغصة قاتلة في حلقها لأنه كالعادة لم يعرها أي اهتمام، ولم يكلف نفسه عناء إلقاء تحية الصباح أو السلام عليها. انهار حصنها الصغير فور خروجه من أسوار الحديقة، وانحنت على ركبتيها تبكي بنشيج مزق سكون المكان.

أما "مالك"، فقد توجه إلى سيارته الفارهة، وعندما وضع يده في جيبه ليخرج مفاتيح التشغيل، اكتشف أنه نسي هاتفه الشخصي الآخر الخاص بالعمليات الدولية فوق مكتبه. زفر بضيق وعاد أدراجه سريعاً ليأخذه. وأثناء مروره بالحديقة مرة أخرى، تفاجأ بوجودها؛ كانت تجلس على حافة "حوض الورد" الرخامية، وتضع كلتا يديها على وجهها، وجسدها يهتز بعنف إثر البكاء المرير.

توقف "مالك" في مكانه. صراع خفي دار داخله، لكن كبرياءه منعه من إظهار أي تعاطف. تنحنح بصوت جهوري صارم:

— انتي كويسة؟

تفاجأت "تولين" من صوته القريب. رفعت وجهها بسرعة، وعيناها الحمراوان المليئتان بالدموع تلتقيان بعينيه الحادتين. ايعقل أنه عاد لأجلها؟ هل شعر بنبضات قلبها المكسور واستمع لشكواها الخفية؟