شباك العنكبوت

توقف "مالك" في مكانه. صراع خفي دار داخله، لكن كبرياءه منعه من إظهار أي تعاطف. تنحنح بصوت جهوري صارم:

— انتي كويسة؟

تفاجأت "تولين" من صوته القريب. رفعت وجهها بسرعة، وعيناها الحمراوان المليئتان بالدموع تلتقيان بعينيه الحادتين. ايعقل أنه عاد لأجلها؟ هل شعر بنبضات قلبها المكسور واستمع لشكواها الخفية؟

ردت بارتباك شديد وهي تمسح دموعها بسرعة طفولية:

— مالك؟! أنت.. أنت رجعت ليه؟ في حاجة حصلت؟ الصفقة فيها مشكلة؟

رأى آثار دموعها بوضوح، لكن ملامحه بقيت خالية من أي مبالاة أو حنان، ورد بجفاف:

— لا.. نسيت موبايلي على المكتب، هروح جيبه وراجعلك هنا.. استنيني، في كلمتين لازم نتكلم فيهم عشان نضع النقط على الحروف.

فرحت كثيراً، ودق قلبها بعنف كطبول الحرب. ارتسم الأمل على وجهها، وانتظرته بلهفة، متمنية أن يرق قلبه أخيراً، وأن تسمع منه ولو كلمة حنونة واحدة ترطب قلبها المتألم وتهدئ من روع عاصفتها الدفينة.

وعندما عاد بعد دقيقتين، حاملاً هاتفه، وقف أمامها بكامل هيبته وجبروته، ونظر إليها مباشرة:

— تولين.. أنا عارف ومتأكد إنك مكنتيش حابة تتجوزي بالطريقة دي، وعارف إن الأمور بتمشي بضغط عائلي..

كادت أن تقاطعه لترد وتفهمه الأمر كله، وتصرخ في وجهه بأنها ليست مجبورة، بل هي من اختارته وعشقته منذ نعومة أظفارها.. ولكن صوته الحازم قاطعها بقسوة:

— اسمعيني للآخر وبعدين اتكلمي! حتي لو مكنش عمي عاصم طلب مني الجواز منك كشرط في توزيع الحصص.. كنت أنا اللي هطلبك منه بنفسي!

ارتسمت على وجهها معالم الفرحة الساحرة، وظنت لثانية أن معجزتها قد تحققت.. ولكن الفرحة سرعان ما تحولت إلى جمود تام وصدمة شلت أطرافها عندما سمعته يتابع ببرود قاتل:

— لسبب واحد.. لأنك بنت عمي اللي رباني وله أفضال كتير عليا، وأنا بفضل الأصول في بيتي. وياريت مش كل مرة نتكلم فيها في موضوع الجواز تاخدي الأمور بحساسية مفرطة وتعيطي! أنا طبيعتي كدة وعمري ما هتغير، ولا عندي وقت للرومانسيات الرخيصة دي.. عن إذنك عشان متأخرش.

استوقفته "تولين" برجاء حار، ممسكة بطرف كم بدلتها الفاخرة وعيناها تستعطفانه:

— ثواني يا مالك.. أرجوك، ممكن طلب واحد بس قبل ما تسافر؟

تنهد بنفاذ صبر واضح وتطلع إلى ساعته الفاخرة:

— اتفضلي.. قولي بسرعة.

جمعت شتات نفسها وقالت بنبرة حاولت جعلها قوية:

— عايزة أنزل أشتغل في الشركة معاك.. أكون قريبة منك وأفهم طبيعة شغلك.

بكل جمود وصخرية رد في أقل من ثانية:

— لأسف.. مرفوض.

شعرت بحزن مضاعف وسألت بنبرة مخنوقة:

— ليه؟ دا حقي وحق عيلتي بردو!

رد وعيناه تلمعان بصرامة لا تلين:

— مبحبش مراتي تكون شغالة عندي وتحت طوع أوامري في المكاتب.. الست مكانها بيتها وبرستيجها بره الإطار ده.

فرجت شفتيها بذهول مما سمعته، وقالت بمرارة:

— بتشتغل عندك؟! مالك.. أنا هبقى مراتك وشريكة حياتك، مش موظفة!

قاطعها بحدة كالعادة، حاسماً النقاش دون رجعة:

— مهما اختلفت المسميات يا تولين.. أنا مبحبش حد من ستات عيلتي يشتغلوا في شركاتي، حتى لو كانت أمي شاهيناز هانم بيدخلهاش المكتب ده! الموضوع قُضي.. أنا اتأخرت وعندي طيارة بعد الظهر.. عن إذنك.

تركها كالعادة في حيرة من أمرها، تصارع أمواج خيبتها، ورحل بخطوات واسعة واثقة، تاركاً إياها تموت ببطء بجوار زهورها التي تمنت لو تذبل معها في تلك اللحظة.

في الجانب الآخر من العاصمة، وتحديداً داخل شقة متوسطة الحال في أحد أحياء مدينة نصر الصاخبة، كانت الأجواء مشحونة بنوع آخر من الطموح؛ طموحٌ لا يتغذى على الأصول أو الكبرياء الأرستقراطي، بل على الجشع والرغبة العارمة في تسلق الطبقات الاجتماعية بأي ثمن.

أمام مرآة الزينة الكبيرة في غرفتها، كانت "ميرا" (خلود سابقاً) تقف متأملة انعكاس صورتها برضا تام. كانت ترتدي فستاناً أحمر نارياً، بأكمام طويلة ولكنه ضيق للغاية، يبرز تفاصيل جسدها بشكل صارخ يتحدى كل القيود والتقاليد العائلية. لم يكن هناك أي رادع يمنعها من ارتداء ملابس بهذا الشكل، ولِمَ لا؟ وإن كانت هذه الملابس والتبرج المبالغ فيه هما الوسيلة الوحيدة التي يراها أبوها وأمها لجذب "العريس الثري" المنتظر. لم تكن "ميرا" بالنسبة لهما مجرد ابنة تُربى، بل كانت أشبه بصفقة تجارية مربحة خططا للاستثمار فيها منذ سنوات.

أمسكت بقلم أحمر الشفاه الصاخب، ومررته على شفتيها بعناية، ثم رفعت شعرها الأسود الداكن إلى الأعلى في كعكة عشوائية، تاركة خصلتين ناعمتين تنسدلان على وجنتيها لتضفي لمسة من الإغراء المصنوع. أخذت حقيبتها الصغيرة، وخرجت من غرفتها تركض بسرعة لتلحق بموعد المعهد.

وفي صالة الشقة، اصطدمت بقوة بوالدتها "هاجر غازي"، التي كانت تجلس واضعة قناعاً للوجه وتتصفح هاتفها. تراجعت "هاجر" للخلف بانزعاج شديد وصاحت بنبرة حادة:

— إييييه؟ قطر معدي؟! مش تاخدي بالك يا بنت وتفتحي عينيكي دي؟!

ابتسمت "ميرا" ببرود ولم تبالِ بغضب والدتها، بل اقتربت منها قائلة بدلال:

— سوري يا مامي.. اتأخرت جداً على المعهد ومش شايفة قدامي.

ثم مدت يدها المفتوحة نحوها وأردفت باقتضاب:

— إيدك بقى على الأخضر.. يلا.

نظرت إليها "هاجر" باشمئزاز ورفعت حاجبها مستنكرة:

— إيه "إيدك" دي؟ مش تتكلمي بأدب وأسلوب راقي يناسب الطبقة اللي عاوزين ندخلها؟ تملي لسانك دبش كده!

عدلت "ميرا" من جلست حقيبتها على كتفها وقالت بنبرة مرحة ساخرة:

— سوري يا "شاهيناز هانم" المستقبل.. ممكن هاجر هانم تديني قدر من المال عشان أمشي أموري النهارده؟

لوت "هاجر" فمها بسخرية ومرارة:

— ومنين يا حسرة؟! باباكي شاكر الجويلي شطب على كل المبالغ اللي معايا الأسبوع ده، ومبقاش سيبلي غير الفكة.

زفرت "ميرا" بضيق واضح وعقدت ذراعيها:

— أوففف.. وأنا أعمل إيه دلوقتي؟ أروح المعهد مش معايا تمن الكتب والمواصلات؟

هنا، لمعت في رأس "هاجر" فكرة شيطانية، واختفت نظرة الضيق من عينيها ليحل محلها بريق المكر. اعتدلت في جلستها وقالت بنبرة خفيضة مليئة بالإيحاء:

— بقولك إيه.. روحي لـ"شاكر" المكتب في الشركة وخذي منه الفلوس اللي انتي عاوزاها بنفسك.. ومنها بالمرة، يمكن "مالك الراوي" يشوفك هناك وتخطفي عينه ويعجب بيكي.. ونخلص منك ومن مصاريفك ونرتاح!

أطلقت "ميرا" ضحكة ساخرة وحانقة:

— مالك مين يا ماما اللي يعجب بيا؟! مالك الراوي خطب "تولين" بنت عمه خلاص، والبلد كلها عارفة إن فرحهم قرب، ده واحد عايش في برج عاجي ومش بيبص لأشكالي.

انتفضت "هاجر" بانتصار وهتفت وهي تلوح بهاتفها:

— لسه واصلالي الأخبار حالا من "شاهيناز هانم" شخصياً! كلمتني وقالتلي إنه شكله كدا هيفك الخطوبة دي ويفركش مع بنت عمه.. لأنه أساساً مش بيطيقها ومش بيحبها ويادوب بيعاملها كواجب عائلي، و"شاهيناز" مش موافقة على الجوازة دي من الأول ومستحملاها غصب عنها عشان خاطر جوزها عاصم.

اتسعت عينا "ميرا" باهتمام، وتابعت والدتها بخبث:

— وبعدين انتي مش عارفة شاهيناز هانم؟ دي لما بتصمم على حاجة بيبقاش قدامها مستحيل.. هتعمل ميت طريقة وطريقة عشان تبوظ الجوازة دي.. خصوصاً إنها من زمان، ومن أيام ما كانت بتلمحلي، نفسها تشيل "عاصم الراوي" من الشركة وتطرده بره الإمبراطورية خالص.. زي ما كان عاوز يرميها بره البيت زمان ويحرمها من ورثها.. دي تصفية حسابات قديمة يا حبيبتي، والفرصة جاتلنا على طبطاب.

عضت "ميرا" على شفتيها بقوة، وجالت في عقلها أفكار متضاربة. تذكرت فجأة كلمات "طارق" (ابن العم الحاقد) عندما التقت به سراً في المرة الأخيرة، وكيف كان ينظر إلى عينيها ببريق غامض وهو يقول لها بنبرة ذات مغزى: (ياريت كل مرة أشوف فيها عينيكي الجميلة دي، تقوليلي في أي خبر جديد عن فيلا "الراوي" يا قمري.. عيوني ليكي لو غديتيني بالأخبار).

نهضت "ميرا" سريعاً، وقد تبدلت خططها تماماً في ثانية واحدة، وقالت بنبرة متحمّسة:

— تمام يا مامي.. كلامك مظبوط، يدوبك ألحق أروح الشركة آخد الفلوس من بابي وأشوف الأجواء هناك عاملة إزاي.. سلام يا جوجو!